အင်ဒိုနီးရှားက စွမ်းအင်ဖူလုံရေးအတွက် B40 အစီအစဉ် စတင်ဆောင်ရွက်

အင်ဒိုနီးရှားနိုင်ငံ၊ စွမ်းအင်နှင့်သတ္တုအရင်းအမြစ်ဝန်ကြီးဌာနဝန်ကြီး Bahlil Lahadalia က “အင်ဒိုနီးရှားအစိုးရအနေဖြင့် ဇီဝဒီဇယ် ၄၀ ရာခိုင်နှုန်း (B40) အစီအစဉ်ကို ၂၀၂၅ ခုနှစ်၊ ဇန်နဝါရီ ၁ ရက်နေ့တွင် စတင်အကောင် အထည်ဖော်လျက်ရှိကြောင်း၊ စွမ်းအင်နှင့် သတ္တုအရင်းအမြစ်ဝန်ကြီးဌာနသည် B40 အစီအစဉ်အသေးစိတ်ကို ဆွေးနွေးရန် ဌာနတွင်းအစည်းအဝေးပြုလုပ်ခဲ့ကြောင်း လက်ရှိ အကောင်အထည်ဖော်နေသည့် B35 အစီအစဉ်အား ၂၀၂၅ ခုနှစ်၊ ဇန်နဝါရီ ၁ ရက်နေ့မှစ၍ B40 အစီအစဉ်အဖြစ် အဆင့်မြှင့်တင်ရန် ဆုံးဖြတ်ခဲ့ကြောင်း” ၂၀၂၅ ခုနှစ်၊ ဇန်နဝါရီ ၃ ရက်နေ့က ဂျာကာတာမြို့ရှိ စွမ်းအင်နှင့်သတ္တုအရင်းအမြစ်ဝန်ကြီးဌာနတွင် ပြုလုပ်သည့် သတင်းစာ ရှင်းလင်းပွဲတွင် ပြောကြားခဲ့သည်။

B40 အစီအစဉ်အကောင်အထည်ဖော်ခြင်းသည် အင်ဒိုနီးရှားနိုင်ငံ သမ္မတ Prabowo Subianto ၏ ၂၀၆၀ ပြည့်နှစ်တွင် ကာဗွန်ထုတ်လွှတ်မှုသုညဖြစ်စေရေး အစိမ်းရောင်စည်းမျဉ်းနှင့်အညီ အစားအစာနှင့်စွမ်းအင် ပြည့်စုံလုံလောက်ရေး မျှော်မှန်းချက်နှင့်ကိုက်ညီကြောင်း ဝန်ကြီး Bahlil Lahadalia ထံမှ သိရှိရသည်။ 

“အင်ဒိုနီးရှားအစိုးရသည် ၂၀၂၆ ခုနှစ်တွင် B40 အစီအစဉ်မှ B50 အစီအစဉ်သို့ ထပ်မံ၍ အဆင့်မြှင့်ရန် ပြင်ဆင်ဆောင်ရွက်သွားမည်ဖြစ်ကြောင်း၊ အဆိုပါအစီအစဉ်ကို အောင်မြင်စွာ အကောင်အထည်ဖော်နိုင်ပါက ဒီဇယ်တင်သွင်းမှုပမာဏ လျော့ကျလာမည်ဖြစ်ပြီး ၂၀၂၆ ခုနှစ်တွင် ဒီဇယ်တင်သွင်းမှုမရှိသလောက် အနေအထားဖြစ်လာနိုင်ကြောင်း” ဝန်ကြီး Bahlil Lahadalia က ပြောကြားခဲ့သည်။ 

စွမ်းအင်နှင့်သတ္တုအရင်းအမြစ်ဝန်ကြီးဌာန၊ ပြန်လည်ပြည့်ဖြိုးမြဲစွမ်းအင်နှင့် စွမ်းအင်ထိန်းသိမ်းရေးဌာန ညွှန်ကြားရေးမှူးချုပ် Eniya Listiani Dewi က B40 အစီအစဉ်သည် အင်ဒိုနီးရှားနိုင်ငံ၏ ဒီဇယ်လောင်စာဆီ တင်သွင်းမှုကို လျှော့ချနိုင်ပြီး နိုင်ငံခြားငွေသုံးစွဲမှုကို သက်သာစေမည်ဖြစ်ကြောင်း၊ B40 အစီအစဉ်မှ နိုင်ငံခြားငွေလဲလှယ်မှုအတွက် အင်ဒိုနီးရှားငွေ ၁၄၇ ဒသမ ၅ ထရီလီယံခန့် လျော့နည်းမည်ဖြစ်ကြောင်း၊ လက်ရှိ အကောင်အထည် ဖော်လျက်ရှိသည့် B35 အစီအစဉ်မှ အင်ဒိုနီး ရှားငွေ ၁၂၂ ဒသမ ၉၈ ထရီလီယံ လျော့နည်းသွားမည်ဖြစ်ကြောင်း၊ ဒီဇယ်လောင်စာဆီ တင်သွင်းမှုလျှော့ချခြင်းဖြင့် နိုင်ငံခြားငွေလဲလှယ်မှုအတွက် အင်ဒိုနီးရှားငွေ ၂၅ ထရီလီယံနီးပါး လျော့နည်းသွားမည် ဖြစ်ကြောင်း”  ပြောကြားသည်။ 

B40 အစီအစဉ်အကောင်အထည်ဖော်ခြင်းသည် စီးပွားရေးအရ အကျိုးဖြစ်ထွန်းစေသည့်အပြင် လူမှုဝန်းကျင်နှင့် ပတ်ဝန်းကျင်အတွက်လည်း အကျိုးရှိစေပါသည်။ ဇီဝဒီဇယ် အစီအစဉ်သည် စားအုန်းဆီကြမ်းကို တန်ဖိုးမြှင့်ထုတ်လုပ်ခြင်းဖြစ်ပြီး တန်ဖိုးအားဖြင့် အင်ဒိုနီးရှားငွေ ၂၀ ဒသမ ၉ ထရီ လီယံနီးပါးတိုးတက်စေပါသည်။ တစ်နှစ်လျှင် ဖန်လုံအိမ်ဓာတ်ငွေ့ ထုတ်လွှတ်မှုတန်ချိန် ၄၁ ဒသမ ၄၆ သန်း လျှော့ချနိုင်ပြီး စိုက်ခင်းရှိ အလုပ်သမား ၁ ဒသမ ၉၅ သန်းနှင့် စိုက်ခင်းပြင်ပ ဆက်စပ်လုပ်ငန်းများရှိ အလုပ်သမား ၁၄,၀၀၀ ကျော်ကို အကျိုးဖြစ်ထွန်းစေမည်ဖြစ်သည်။ ၂၀၂၅ ခုနှစ်တွင် B40 အစီအစဉ်မှ ၁၅ ဒသမ ၆ ကီလိုလီတာသန်းကို ပြည်သူ့ဝန်ဆောင်မှုအတွက် ၇ ဒသမ ၅၅ ကီလိုလီတာသန်းနှင့် ပြည်သူ့ဝန် ဆောင်မှုမဟုတ်သူများအတွက် ၈ ဒသမ ၀၇ ကီလိုလီတာသန်းအဖြစ် ခွဲဝေချထားမည်ဖြစ်ကြောင်း ဆုံးဖြတ် ထားပါသည်။ 

B40 အစီအစဉ်အကောင်အထည်ဖော်မှုသည် စွမ်းအင်နှင့်သတ္တုအရင်းအမြစ်ဝန်ကြီးဌာန၏ အမိန့်အမှတ် 341. K/EK. 01/MEM.E/2024 ကိုအခြေခံ၍ ရုပ်ကြွင်းဒီဇယ်ဆီနှင့် စားအုန်းဆီကြမ်းမှ ထုတ်လုပ်သည့် fatty acid methyl ester (FAME) တို့ ရောနှောထားသည့် ဇီဝဒီဇယ် အသုံးပြုမည့် အစီအစဉ်ဖြစ်ပါသည်။ အဆိုပါအစီအစဉ်အတွက် ဆီအုန်းစိုက်ပျိုးမှု ရန်ပုံငွေစီမံခန့်ခွဲမှုဘုတ်အဖွဲ့က ၄၀ ရာခိုင်နှုန်း ရန်ပုံငွေထည့်ဝင်ထားပါသည်။ ဇီဝဒီဇယ်ဖြန့်ဖြူးရေးအတွက် ဇီဝဒီဇယ်ကုမ္ပဏီ ၂၄ ခုမှ ဆောင်ရွက်မည်ဖြစ်ပြီး ပြည်သူ့ဝန်ဆောင်မှုကဏ္ဍနှင့် ပြည်သူ့ဝန်ဆောင်မှုကဏ္ဍမဟုတ်သည့် လုပ် ငန်းများအတွက် ဆီနှင့်ဓာတ်ငွေ့ကုမ္ပဏီ ၂ ခု၊ ပြည်သူ့ဝန်ဆောင်မှုကဏ္ဍ မဟုတ်သည့်လုပ်ငန်းများ အတွက် ဆီနှင့်ဓာတ်ငွေ့ကုမ္ပဏီ ၂၆ ခုတို့ကို B40 ဇီဝဒီဇယ်ဖြန့်ဖြူးပေးရန် တာဝန်သတ်မှတ်ပေး ထားပါသည်။ 

အင်ဒိုနီးရှားနိုင်ငံသည် ၎င်း၏ စိုက်ပျိုးရေးထုတ်ကုန်အားသာချက်ဖြစ်သည့် ဆီအုန်းမှ တန်ဖိုး မြှင့်ထုတ်ကုန်အဖြစ် ဇီဝဒီဇယ်ထုတ်လုပ်ခြင်းဖြစ်ပါသည်။ ထိုသို့အကောင်အထည်ဖော် ဆောင်ရွက် ခြင်းဖြင့် လောင်စာဆီတင်သွင်းမှုကို လျှော့ချနိုင်ပြီး နိုင်ငံခြားငွေလဲလှယ်မှု သက်သာစေခြင်း၊ ဆီအုန်းစိုက်ပျိုးထုတ်လုပ်သည့်ကဏ္ဍရှိ လုပ်သားပြည်သူများ၏ လူမှုစီးပွားဘဝတိုးတက်စေရန် ဆောာင်ရွက်နေခြင်းဖြစ်သည်။ ၂၀၂၅ ခုနှစ်တွင် B40 အစီအစဉ်၊ ၂၀၂၆ ခုနှစ်တွင် B50 အစီအစဉ်တို့ကို အကောင်အထည်ဖော်မည်ဖြစ်ရာ အင်ဒိုနီးရှားနိုင်ငံမှ ဆီအုန်းထုတ်ကုန်များကို ပြည်တွင်းသုံးစွဲမှုနှင့် ပြည်ပတင်ပို့မှုများ ချိန်ညှိဆောင်ရွက်လာနိုင်သဖြင့် ဆီအုန်းထုတ် ကုန်များ ကမ္ဘာ့ဈေးကွက်သို့ ဝင်ရောက်နိုင်မှုအနည်းအများနှင့် ဈေးနှုန်းအတက်အကျတို့ဖြစ်ပေါ်လာနိုင်ပါကြောင်း သုံးသပ်တင်ပြလိုက်ရပါသည်။ 

သွယ်သွယ်ဆုတင်

Indonesian Palm Oil Association