ကြမ်းခင်းဈေး ၁ တန်လျှင် ကန်ဒေါ်လာ ၄၉၀ သတ်မှတ်၍ ဆန်ဖြူတင်ပို့မှု ပြန်လည်ခွင့်ပြုခဲ့သည့် အိန္ဒိယနိုင်ငံ

အိန္ဒိယအစိုးရသည် ဘာစမာတီဆန် မဟုတ်သော ဆန်ဖြူတင်ပို့မှုကို ပြီးခဲ့သည့် စက်တင်ဘာ ၂၈ ရက်က ပြန်လည်ခွင့်ပြုပေးခဲ့ကြောင်း သိရသည်။ သို့သော် အနိမ့်ဆုံးပို့ကုန် ဈေးနှုန်း (ကြမ်းခင်းဈေး) ကို ၁ တန်လျှင် ကန်ဒေါ်လာ ၄၉၀ သတ်မှတ်မည်ဟု အိန္ဒိယနိုင်ငံခြားကုန် သွယ်မှုညွှန်ကြားမှုဦးစီးဌာန (Directorate-General of Foreign Trade -DGFT) က ထုတ်ပြန်ခဲ့သော အမိန့်ကြော်ငြာစာ၌ ပါရှိကြောင်း The Hindu Businessline သတင်းဌာနက ဖော်ပြသည်။

“တစ်ဝက်တစ်ပျက်ကြိတ်ခွဲထားသော သို့မဟုတ် အလုံးစုံကြိတ်ခွဲထားသော၊ အရောင်တင်ထားသော သို့မဟုတ် မတင်ထားသော၊ ဘာစမာတီဆန်မဟုတ်သော ဆန်ဖြူ (HS code 1006 30 90) ကို ကြမ်းခင်းဈေး ၁ တန်လျင် ကန်ဒေါ်လာ ၄၉၀ ဖြင့် ကန့်သတ်ကုန်မှ လွတ်လပ်စွာတင်ပို့နိုင်သော ကုန်အဖြစ် ပြင်ဆင်သတ် မှတ်လိုက်ပြီး၊ နောက်ထပ် အမိန့်တစ်စုံတစ်ရာမထုတ်ပြန်မီအချိန်အထိချက်ချင်းအာဏာသက် ရောက် စေရမည်။” ဟု DGFT ၏ အမိန့်ကြော်ငြာစာ၌ ဖော်ပြထားကြောင်း သိရသည်။

၂၀၂၂ ခုနှစ် စက်တင်ဘာလကတည်းက အာဏာသက်ဝင်ခဲ့သည့် အိန္ဒိယဘဏ္ဍာရေးဝန်ကြီး ဌာန၊ ရငွေဦးစီးဌာနမှ ထုတ်ပြန်သောအမိန့်အရ ဆန်ဖြူကို ပို့ကုန်ခွန်သုညဖြင့်တင်ပို့ခွင့်ပြုထား ကြောင်း သိရသည်။ ပေါင်းဆန်အပေါ် ပို့ကုန်ခွန်အား ၂၀ ရာခိုင်နှုန်းမှ ၁၀ ရာခိုင်နှုန်းသို့လျှော့ချ သတ်မှတ်ကြောင်းနှင့် အခွံချွတ်ထားသောဆန်နှင့် ဆန်လုံးညိုတို့အပေါ် ပို့ကုန်ခွန်အား အလားတူ လျှော့ချသတ် မှတ်လိုက်ကြောင်း အဆိုပါ ရငွေဦးစီးဌာနမှ ပြီးခဲ့သည့် သောကြာနေ့ (စက်တင်ဘာ ၂၇ ရက်) က ထုတ်ပြန် ကြေညာခဲ့ကြောင်း သိရသည်။

အစိုးရမှ ယခုကဲ့သို့ ဆန်ဖြူပြန်လည်တင်ပို့ခွင့်ပြုခဲ့ပြီး၊ ပေါင်းဆန်အပေါ်အကောက်ခွန်နှုန်း လျှော့ချသတ်မှတ်ပေးခဲ့မှုအပေါ် ကြိုဆိုကြောင်း၊ သို့သော် ၎င်းအနေဖြင့် အဘယ်ကြောင့်ဆန်ဖြူကို ကြမ်းခင်း ဈေး ၁ တန်လျင် ကန်ဒေါ်လာ ၄၉၀ သတ်မှတ်ပြီး၊ ပေါင်းဆန်အပေါ် အ ကောက်ခွန်နှုန်း ၁၀ ရာခိုင်နှုန်း သတ်မှတ်သည့်အပေါ် ကောင်းစွာနားမလည်ဟု အိန္ဒိယဆန် တင်ပို့ရောင်းချသူများ အသင်း ဥက္ကဋ္ဌ BV Krishna Rao က ပြောကြားခဲ့သည်။

စိုက်ပျိုးရေးပို့ကုန်များတင်ပို့ရောင်းချသူများအသင်း ဥက္ကဋ္ဌ M Madan Prakash က အစိုးရ အနေဖြင့် ကြမ်းခင်းဈေးသတ်မှတ်ထားသော်လည်း အိန္ဒိယနိုင်ငံအနေဖြင့် ဆန်ဖြူကို ပမာဏများများ တင်ပို့နိုင်ဖွယ်ရှိကြောင်းပြောကြားခဲ့သည်။ “ယခင်က ကျနော်တို့ ဝယ်သူတွေကို ပေါင်းဆန်သို့ ပြောင်း လဲဝယ်ယူကြဖို့ တိုက်တွန်းနေခဲ့ရပါတယ်။ အခုတော့ ဆန်ဖြူတင်ပို့ခွင့် ပြန်လည်ခွင့်ပြုလိုက်ပြီဖြစ်ကာ ကြမ်းခင်းဈေးသတ်မှတ်ချက်ကတော့ ပြဿနာကြီးကြီးမားမားမဟုတ်ပါ” ဟု ၎င်းက ပြောကြားခဲ့သည်။

“အစိုးရက ယခုလိုဆောင်ရွက်လိုက်တာဟာ မျှတပါတယ်။ ပေါင်းဆန်က ၁၀ ရာခိုင်နှုန်း အခွန်ပေးရရင်တောင် ဆန်ဖြူရဲ့ ကြမ်းခင်းဈေးနှင့် နှိုင်းယှဉ်လျင် သက်သာနေတဲ့အတွက် ပေါင်းဆန် ကိုပဲ ဆက်လက်တင်ပို့သွားမှာဖြစ်ပြီး၊ဆန်ဖြူကိုတော့ ဖြည်းဖြည်းချင်း တင်ပို့သွားမှာဖြစ်ပါတယ်” ဟု နယူးဒေလီမြို့အခြေစိုက် ဆန်ကုန်သည်တစ်ဦးဖြစ်သူ Rajesh Paharia Jain က ပြောကြားခဲ့ သည်။ ကမ္ဘာ့ဆန်ဈေးကွက်တွင် အိန္ဒိယဆန်ဈေးနှုန်းကိုယှဉ်၍ ရောင်းနိုင်ခြင်းမရှိသည့်အတွက် ဈေးနှုန်းပြောင်းလဲဖွယ်ရှိကြောင်း၊ ယင်းသို့ဆိုပါက ကမ္ဘာ့ဆန်ဈေးကွက်တွင် နေရာပြန်လည်ရရှိနိုင်ရန် အကူ အညီပေးနိုင်ကြောင်း၊ ဆန်ကွဲတင်ပို့မှုမှာမူ သမိုင်းကြောင်းတစ်ခုသာဖြစ် ကြောင်း ၎င်းက ပြောကြားခဲ့သည်။

အိန္ဒိယအနေဖြင့် ပြည်တွင်း၌ ဆန်စိုက်ပျိုးထွက်ရှိမှု နည်းပါးမည်ကို စိုးရိမ်သည့်အတွက် ၂၀၂၃ ခုနှစ်၊ ဇူလိုင်လမှစတင်၍ ပြည်ပသို့ဆန်တင်ပို့မှုပိတ်ပင်တားမြစ်ခဲ့သည်။ ဩဂုတ်လတွင် အယ်နီညိုကြောင့် အဓိကစပါးစိုက်ရာ ဒေသများ၌ မိုး ရေကောင်းစွာမရရှိသည့်အတွက် ပေါင်းဆန်၊ ဆန် လုံးညိုနှင့် အခွံချွတ်ထားသောဆန်တို့အပေါ် ပို့ကုန်ခွန် ၂၀ ရာခိုင်နှုန်း သတ်မှတ်စည်းကြပ်ခဲ့ကြောင်း သိရသည်။

အိန္ဒိယစိုက်ပျိုးရေးရေးဝန်ကြီးဌာနမှ ယခုသီတင်းပတ်အတွင်း ထုတ်ပြန်ထားသော အချက် အလက်များအရ ဆန်ထုတ်လုပ်မှု တန်ချိန် ၁၃၇ ဒသမ ၈၃ သန်းရှိကြောင်းနှင့် ၂၀၂၂-၂၃ ဘဏ္ဍာနှစ်က တန်ချိန် ၁၃၅ ဒသမ ၇၆ သန်းသာ ထုတ်လုပ်ခဲ့သည့်အတွက် ဆန်ထုတ်လုပ်မှု တိုးတက်လာ ကြောင်း သိရသည်။

အိန္ဒိယနိုင်ငံမှ ဘာစမာတီမဟုတ်သော ဆန်များတင်ပို့ခွင့်ပိတ်ပင်ခဲ့သည့်အတွက် ၂၀၂၂-၂၃ ဘဏ္ဍာနှစ်က အဆိုပါဆန်များ တင်ပို့မှုတန်ချိန် ၁၇ ဒသမ ၇၉ သန်းရှိခဲ့ရာမှ ၂၀၂၃-၂၄ ဘဏ္ဍာနှစ်တွင် ၁၁ ဒသမ ၁၂ သန်းသို့ ကျဆင်းခဲ့ကြောင်း သိရသည်။

ယခုနှစ် ခါရစ် (မိုးရာသီ) စပါး စိုက်ဧရိယာသည် ယခင်နှစ်က ဟက်တာ ၄၀၁ ဒသမ ၅၅ သိန်းရှိခဲ့ရာမှ ၄၀၉ ဒသမ ၅ သိန်းသို့ တိုးမြင့်လာကြောင်း၊ သို့သော် Telangana၊ Andhra Pradesh၊ Jharkhand စသည့် ပြည်နယ်များနှင့် အနောက် ဘင်္ဂလားပြည်နယ် တောင်ပိုင်းဒေသများ၌ မိုးသည်း ထန်စွာ ရွာသွန်းမှုကြောင့် အဆိုပါဒေသများမှ စပါးစိုက်ပျိုးထွက်ရှိမှုအပေါ် စိုးရိမ်မကင်းဖြစ်နေကြကြောင်း သိရသည်။

အိန္ဒိယနိုင်ငံမှ ဆန်ဖြူတင်ပို့ခွင့်ပိတ်ပင်ခဲ့သည့်အတွက် ကမ္ဘာ့ဆန်ဈေးကွက်တွင် ဆန်ဈေးနှုန်း ၁ တန်လျင် ကန်ဒေါ်လာ ၆၀၀ နီးပါးအထိ မြင့်တက်ခဲ့ပြီး၊ ထိုင်း၊ ဗီယက်နမ်နှင့် ပါကစ္စတန်နိုင်ငံတို့ အနေဖြင့် ၎င်းမှတစ်ဆင့် အကျိုးအမြတ် များပြားခဲ့ကြောင်း သိရသည်။

ယင်းသို့ ဆန်ဖြူတင်ပို့မှုကို ပြန်လည်ခွင့်ပြုလိုက်သည့်အတွက် ကမ္ဘာ့ဆန်ဈေးကွက်အပေါ် သိသာသောရိုက်ခတ်မှုများရှိလာနိုင်ရာ မြန်မာနိုင်ငံအနေဖြင့်လည်းဆန်တင်ပို့မှုနှင့်ပတ်သက်၍ လိုအပ်မည့် ပြင် ဆင်ဆောင်ရွက်မှုများ ပြုနိုင်ရန် အသိပေးတင်ပြလိုက်ရပါသည်။

ကောင်းထွဋ်အောင်

The Hindu Businessline, India lifts ban on exports of white rice with $490/tonne floor price, September 28, 2024