ပြည်တွင်းဈေးကွက်တွင် မတ်ပဲဈေးနှုန်း ပြန်တက်လာ
မတ်ပဲ FOB ဈေးနှုန်းတက်ပြီးနောက် ပြည်တွင်းဈေးကွက်တွင် မတ်ပဲဈေး တဖြည်းဖြည်း မြင့်တက်လာသည်။ နိုဝင်ဘာလ (၂၉) ရက်နေ့တွင် တစ်တန်လျှင် ကျပ် (၂.၇၈)သန်းသာ ရှိခဲ့သော်လည်း ဒီဇင်ဘာလ (၆) ရက်နေ့တွင် တစ်တန်လျှင် ကျပ် (၂.၉၈)သန်းသို့ ပြန်လည် ရောက်ရှိခဲ့ပြီး တစ်ပတ်အတွင်း မတ်ပဲတစ်တန်လျှင် ကျပ် (၂၀၀,၀၀၀)ကျော်အထိ သိသိ သာသာ ဈေးမြင့်တက်လာခဲ့သည်။
မြန်မာနိုင်ငံသည် မတ်ပဲ နှင့် ပဲစဉ်းငုံကို အိန္ဒိယသို့ အဓိကတင်ပို့နေပြီး ပဲတီစိမ်းကို တရုတ် နှင့် ဥရောပသို့တင်ပို့သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ စာရင်းဇယားများအရ (၂၀၂၃-၂၀၂၄)ဘဏ္ဍာရေးနှစ်၊ ဧပြီလ (၁)ရက်နေ့မှစတင်၍ လက်ရှိဘဏ္ဍာရေးနှစ်၏ (၈)လနီးပါးအတွင်း မြန်မာနိုင်ငံ ပဲမျိုးစုံ (၁၀၄၆၀၀၀)တန် တင်ပို့မှုမှ ရရှိသည့်ဝင်ငွေမှာ အမေရိကန်ဒေါ်လာ (၈၈၄)သန်း ကျော် ရှိမည်ဟု ခန့်မှန်းထားကြောင်း သိရသည်။ ယခင် (၂၀၂၂-၂၀၂၃)ဘဏ္ဍာနှစ်တွင် တန်ချိန် (၁.၉)သန်းကျော် တင်ပို့ခဲ့ပြီး အမေရိကန်ဒေါ်လာ (၁.၄၇)ဘီလီယံကျော်ရရှိခဲ့ကြောင်း သိရှိ ရသည်။
ဟေမာန်အောင်မင်း