စိုက်ပျိုးမွေးမြူရေးပညာနှင့် နိုင်ငံတကာစိုက်ပျိုးမွေးမြူရေးတက္ကသိုလ်များ(အပိုင်း-၄၇)
(ယခင်အပတ်မှအဆက်)
Using Credit-Unit (hour) System in World Universities
ယနေ့ခေတ် နိုင်ငံတကာတက္ကသိုလ်တွေမှာ ခရက်ဒစ်ယူနစ် စနစ်ကျင့်သုံးနေမှုကို ဆက်လက် ဆွေးနွေးပါမည်။
Credit-Hour/Credit-Unit System ၏အဓိပ္ပါယ်
ခရက်ဒစ်နာရီစနစ်/ယူနစ်စနစ် ဆိုသည်မှာ တက္ကသိုလ်များတွင် ဘာသာရပ်တစ်ခုစီအတွက် သင်ကြားချိန်၊ လေ့လာမှုဝန်ထုပ်ဝန်ပိုးနှင့် သင်ယူရရှိရမည့် ရလဒ်များအပေါ် မူတည်၍ Credit Unit (အမှတ်ယူနစ်) သတ်မှတ်ပေးသည့် စနစ်တစ်ခုဖြစ်ပါသည်။ ကျောင်းသား၊ ကျောင်းသူများသည် ဘွဲ့ရရန်အတွက် သတ်မှတ်ထားသော အမှတ် (Credit/Score) အရေအတွက်ကို ပြည့်မီရပါသည်။
ခရက်ဒစ်ယူနစ်စနစ်၏ အားသာချက်များ
၁။ ပညာသင်ကာလတစ်လျှောက်လုံး လွတ်လပ်စွာစိတ်ကြိုက်ရွေးချယ်နိုင်မှု (Flexibility)
ကျောင်းသား/သူများသည် မိမိ၏ စိတ်ဝင်စားမှု၊ အလုပ်အကိုင်ရည်မှန်းချက်နှင့် သင်ယူနိုင်သော အချိန်အလိုက် ဘာသာရပ်များကို ရွေးချယ်တက်ရောက်နိုင်သည်။ အချိန်ပြည့်/ အချိန်ပိုင်း (Full-time, Part-time) သို့မဟုတ် သင်ယူချိန်နှစ်တိုတိုနှင့် အမြန်သင်ယူခြင်း တို့ကို စိတ်ကြိုက်ရွေးချယ်နိုင်သည်။ ခက်ခဲသောဘာသာရပ်များကို စာသင်နှစ်ဝက် (Semester) များခွဲပြီး သင်ယူနိုင်သည်။
အကျိုးကျေးဇူး - အလုပ်လုပ်ရင်းသင်ယူသူများ၊ နိုင်ငံတကာကျောင်းသား/သူများ (International Students) အတွက် အထူးအရေးကြီးသည်။
၂။ ကျောင်းသားဗဟိုပြု ပညာရေး (Student-Centered Learning)
ကျောင်းသား/သူများသည် မိမိ၏ပညာရေးကို ကိုယ်တိုင်စီမံခန့်ခွဲရသည်။ ကျောင်းသား/ သူကိုယ်တိုင် ကိုယ်ပိုင်ဆုံးဖြတ်ချက်ချနိုင်မှုနှင့် တာဝန်ယူနိုင်မှုတိုးတက်စေသည်။
အကျိုးကျေးဇူး - မိမိကိုယ်တိုင်တက်ကြွစွာလေ့လာမှု (Active learning) ကို အားပေးပြီး ဆရာမှဦးဆောင်သင်ကြားမှု (Passive learning) ကို လျော့နည်းစေသည်။
၃။ ရရှိသော ခရက်ဒစ်ကို လွှဲပြောင်းနိုင်မှု (Mobility)
နိုင်ငံတကာတက္ကသိုလ်များအကြား ကူးပြောင်းသင်ယူရပါက ခရက်ဒစ်များကို လွှဲပြောင်းနိုင်သည်။
အကျိုးကျေးဇူး - ကျောင်းသား/သူအချင်းချင်း၊ တက္ကသိုလ်အချင်းချင်း လဲလှယ် သင်ယူသောစနစ် (Exchange programs) နှင့် နိုင်ငံတကာ လေ့လာမှု (International study) များအတွက် အဆင်ပြေသည်။ နိုင်ငံတကာပညာရေးစနစ်များနှင့် ချိတ်ဆက်မှု ပိုမိုကောင်း မွန်စေသည်။
၄။ စနစ်ကျမှုနှင့် ပွင့်လင်းမြင်သာမှု (Standardization & Transparency)
ဘာသာရပ်တစ်ခုချင်းစီတွင် သတ်မှတ်သင်ယူနိုင်စွမ်း (Workload) နှင့် သင်ယူမှုရလဒ် (Learning outcomes) သတ်မှတ်ထားသည်။
အကျိုးကျေးဇူး - ကျောင်းသားများသည် ဘွဲ့ရရန် လိုအပ်ချက်များကို ရှင်းလင်းစွာ သိရှိ နိုင်သည်။ တက္ကသိုလ်များအကြား တက္ကသိုလ်တစ်ကျောင်းနှင့်တစ်ကျောင်း နှိုင်းယှဉ်ရ လွယ်ကူစေသည်။
၅။ သင်ရိုးညွှန်းတမ်းကို ကောင်းမွန်စွာ ဒီဇိုင်းဆွဲနိုင်ခြင်း
အဓိကမသင်မနေရဘာသာရပ်များ (Core courses)၊ စိတ်ကြိုက်ရွေးချယ်ဘာသာရပ်များ (Electives )၊ အထွေထွေပညာရေး (General
education) စသည့် အမျိုးအစားများ ခွဲခြားနိုင်သည်။ အကျိုးကျေးဇူး - ကျောင်းသားများအတွက် ညီမျှပြီး ပြည့်စုံသောပညာရေးရရှိစေသည်။
၆။ စဉ်ဆက်မပြတ်အကဲဖြတ်မှုရရှိခြင်း (Continuous Assessment)
ကျောင်းသား၊ ကျောင်းသူများ၏ တတ်မြောက်မှုစွမ်းရည် အကဲဖြတ် မှုတွင် နောက်ဆုံး စာမေးပွဲ (Final exam) တစ်ခုတည်းမဟုတ်ဘဲ တစ်ဦးချင်း၊ အဖွဲ့လိုက်အလုပ် (Assignment)၊ မေးခွန်းတိုများ (Quiz)၊ ပရိုဂျက် လက်တွေ့လုပ်ဆောင်မှုများ (Project)၊ နှစ်လတ်စစ်ဆေးမှု (Midterm Test) စသည်တို့ဖြင့် အမြဲတမ်းအကဲဖြတ်သည်။
အကျိုးကျေးဇူး - တစ်ခါတည်းလေ့လာမှုထက် စဉ်ဆက်မပြတ်၊ ဆက်လက်လေ့လာ မှုများကို အားပေးသည်။
၇။ ဘာသာရပ်ပေါင်းစုံ လေ့လာသင်ယူနိုင်ခြင်း (Interdisciplinary Learning)
ဘာသာရပ်စုံသင်တက္ကသိုလ်များ (Comprehensive Universities) တွင်ကျောင်းသား/ သူများသည် မတူညီသောဌာနများမှ ဘာသာရပ်များကို စိတ်ကြိုက်တွဲဖက် သင်ယူ နိုင်သည်။
ဥပမာ - စိုက်ပျိုးရေးကျောင်းသား/သူများသည် စီးပွားရေးပညာ (Economics)၊ ပတ်ဝန်း ကျင်သိပ္ပံပညာ (Environmental Science)၊ သစ်တောပညာ (Forestry)၊ အင်ဂျင်နီယာ ပညာ (Engineering)၊ သတင်းအချက်အလက်ပညာ (ICT)၊ အချက်အလက် ခွဲခြမ်း စိတ် ဖြာပညာ (Data Analysis) စသည့်ဘာသာရပ်များကို တက္ကသိုလ် တစ်ခုတည်းတွင် တစ်ပြိုင်နက် သင်ယူနိုင်ပါသည်။
၈။ အချိန်စီမံခန့်ခွဲမှု ကောင်းမွန်ခြင်း
ခရက်ဒစ်စနစ် (Credit) သည် ဘွဲ့ရရှိရန်လိုအပ်ချက်များ (workload) နှင့်ချိတ်ဆက်ထားသောကြောင့် စာတွေ့သင်ကြားမှု (Lecture)၊ ဓာတ်ခွဲခန်း (Laboratory)၊ တစ်ဦးချင်း လေ့လာမှု (Self-study) ကို စနစ်တကျ စီမံခန့်ခွဲနိုင်ပါသည်။
၉။ ဘဝတစ်သက်တာတစ်လျှောက်လုံး သင်ယူနိုင်မှု (Lifelong Learning)
အသက်ကြီးသွားပြီး နောက်ပိုင်းတွင်လည်း အချိန်မရွေး ပြန်လည်သင်ယူနိုင်ပြီး ယခင် သင်ယူခဲ့သော ခရက်ဒစ် (Credits) များကို ပြန်လည်အသုံးချနိုင်သည်။ ဥပမာ - စိုက်ပျိုး ရေးဘွဲ့ရရှိသူကလည်း မဟာသိပ္ပံသင်တန်းများတွင် အင်ဂျင်နီယာ၊ စီးပွားရေးဘွဲ့၊ ပါရဂူ ဘွဲ့သင်တန်းများတွင် ပတ်ဝန်းကျင်သိပ္ပံ စသည်ဖြင့် ဆက်လက်သင်ယူနိုင်ပါသည်။
အကျိုးကျေးဇူး - ဘာသာရပ်ကျွမ်းကျင်မှုပြုစုပျိုးထောင်ခြင်း (Professional development) အတွက် အထောက်အကူပြုပါသည်။
၁၀။ နိုင်ငံတကာအဆင့်မြင့်ပညာရပ်များနှင့် ကိုက်ညီမှု (Global Alignment)
နိုင်ငံတကာ နာမည်ကြီးတက္ကသိုလ်အများစုတွင် အသုံးပြုသော စနစ်ဖြစ်သည်။ ဘွဲ့လက်မှတ်များကို နိုင်ငံတကာတွင် အသိအမှတ်ပြုမှုရရှိစေသည်။
အကျိုးကျေးဇူး - အလုပ်အကိုင်အခွင့်အလမ်းများ ပိုမိုရရှိတိုးတက်စေသည်။
၁၁။ သင်ကြားမှု အရည်အသွေး တိုးတက်စေခြင်း
ဆရာများသည် သတ်မှတ်ထားသော သင်ယူမှုရလဒ် (Learning outcomes) အတိုင်း သင်ကြား၊ သုတေသနပြုရပါသည်။
အကျိုးကျေးဇူး - သင်ရိုးညွန်းတမ်းနှင့် သင်ကြားမှု အရည်အသွေး ပိုမိုကောင်းမွန် လာစေပါသည်။
၁၂။ မိမိကိုယ်တိုင် ဘွဲ့ရရှိရန် တိုးတက်မှုကို လွယ်ကူစွာ သိနိုင်ခြင်း
ဥပမာ - ဘွဲ့ရရှိရန် လိုအပ်သော စုစုပေါင်း ခရက်ဒစ် ၁၂၀ (Total Credit = 120) တွင် ခရက်ဒစ် ၉၀ ရရှိပြီးပါက ခရက်ဒစ် ၃၀ သာကျန်ရှိပါတော့ သည်။
အကျိုးကျေးဇူး - ကျောင်းသားများအတွက် အနာဂတ်အစီအစဉ်ရေးဆွဲရန် လွယ်ကူ စေပါသည်။
စာရေးသူ၏အတွေး -
စာရေးသူ ယခု ၂၀၂၆-ခုနှစ် ဩစတေးလျနိုင်ငံသို့ပြန်လည် ရောက်ရှိရာတွင် ဩစတေးလျ နိုင်ငံရှိ တက္ကသိုလ် အားလုံး ခရက်ဒစ်ယူနစ်စနစ် (Credit Unit System) ကို အသုံးပြုနေ ပါသည်။ တကယ်တော့ လွန်ခဲ့သော ၁၉၈၇-ခုနှစ် (လွန်ခဲ့သောအနှစ် ၄၀-လောက်) စာရေးသူ ကွင်းစလန်တက္ကသိုလ် (UQ – The University of Queensland) တွင် မဟာ စိုက်ပျိုးရေးပညာ တက်ရောက်စဉ်ကတည်းက ထိုတက္ကသိုလ်က ခရက်ဒစ်ယူနစ်စနစ် ကို စတင်အသုံးပြုနေပါပြီ။
ဤစနစ်ကြောင့် (၂၀၂၅-ခုနှစ် ဒီဇင်ဘာလမှ ၂၀၂၆-ခုနှစ် မေလကုန်အထိ) ယခု စာရေးသူ ကိုယ်တိုင် မြန်မာနိုင်ငံ မိမိအိမ်မှနေ၍ အပတ်စဉ် တနင်္လာနှင့် ကြာသပတေး နေ့တိုင်း ဆစ်ဒနီတက္ကသိုလ်မှ ၂၀၂၆ခုနှစ် ပထမနှစ်ဝက် သင်တန်းများ ဥယျာဉ်ခြံသီးနှံ စိုက်ပျိုးရေး ထုတ်လုပ်ရေးဘာသာ (HORT 3005 Production Horticulture) နှင့် အဆင့်မြင့် သီးနှံ စိုက်ပျိုးရေးစနစ်ဘာသာ (AGRI 4001 Advanced Plant Production System) ကို အွန်လိုင်း မှ သင်ယူနိုင်ခြင်းအကျိုးကျေးဇူးများကို ရရှိနေပါသည်။
နောက်ဆုံးပေါ် သင်ယူမှုစီမံခန့်ခွဲမှုစနစ် (LMS – Learning Management System) ကြောင့် သင်ခန်းစာများကို တိုက်ရိုက် သင်ယူနိုင်ခြင်း၊ အချိန်မအားပါက ဗီဒီယို မှတ်တမ်း များ (Recorded Videos) ကို အင်တာနက်စနစ် ဖြင့် ပြန်လည်ကြည့်ရှု နားထောင်နိုင် ခြင်း၊ ဆစ်ဒနီတက္ကသိုလ် အီလက်ထရောနစ် စာကြည့်တိုက်များ (Electronic Library) ကိုမိမိအိမ်မှ စာအုပ်၊ စာတမ်း၊ ဂျာနယ်များငှားရမ်းဖတ်ရှုလေ့လာနိုင်ခြင်းစသည့် အကျိုး ကျေးဇူး များစွာရရှိနေပါသည်။
(စာရေးသူကိုယ်တိုင် စိုက်ပျိုးရေးဘွဲ့ရသူဖြစ်သော်လည်း ယနေ့ခေတ်သင်ကြားပေးနေသော တိကျစိုက်ပျိုးရေး (Precision Farming)၊ မော်လီကျူးစနစ်အပင်မျိုးမွေးမြူရေး (Molecular Plant breeding)၊ မှိုုမွေးမြူရေး (Mushroom Cultivation)၊ စပျစ်ဝိုင် ထုတ်လုပ်ရေး (Grape Wine production)၊ လုံခြုံစိတ်ချရသော စိုက်နည်းစနစ် (Protective Cultivation) စသည့် ခေတ်မီ နောက်ဆုံးပေါ်နည်းပညာ၊ သင်ခန်းစာများမှာ အသစ် အဆန်း ဖြစ်လျက် ရှိနေ ပါသည်။ ဆောင်းပါးအသေးစိတ်ရေးပါဦးမည်)
စာရေးသူသိရသလောက် ရေဆင်းစိုက်ပျိုးရေးတက္ကသိုလ်၊ မအူပင်စိုက်ပျိုးမွေးမြူရေး တက္ကသိုလ်များတွင် နောက်ဆုံးပေါ် သင်ယူမှုစီမံခန့်ခွဲမှုစနစ် (LMS – Learning Management System) မတပ်ဆင်ရသေး၊ သင်ကြားပေးမှုရှိမနေသေးပါ၊ သန်လျင် သမဝါယမတက္ကသိုလ်တွင် စာရေးသူတို့အဖွဲ့ပူးတွဲ သင်ကြားပေးနေသည့် စိုက်ပျိုး ကူးသန်းရောင်းဝယ်ရေး ဘာသာရပ် လက်မှတ်ရသင်တန်း (Agribusiness Online Certificate Training Course) တွင်မူ ထိုတက္ကသိုလ်တွင်တပ်ဆင်ပြီးဖြစ်သည့် (LMS) ကို အသုံးပြု ပြီး သင်ကြားပေးလျက်ရှိနေပါသည်။ အင်္ဂါ၊ ဗုဒ္ဓဟူး၊ ကြာသပတေး နေ့ ည ၇ နာရီခွဲတိုင်း Zoom Application ဖြင့်သင်ကြားပေးနေပြီး အလုပ်လုပ်ကိုင်နေသော သင်တန်းသား၊ သင်တန်းသူများ အတွက် အလွန်အသုံးဝင်နေပါသည်။ တက္ကသိုလ်နှင့် ညှိနှိုင်းပြီးပါက ဒီပလိုမာ (Diploma)၊ ဘွဲ့ဒီဂရီ (Degree Programs) အဝေးသင်ဘွဲ့သင်တန်းများ (Distance Education) ကို စနေ၊ တနင်္ဂနွေ ကျောင်းသား၊ ကျောင်းသူများ တက္ကသိုလ်သို့ လူကိုယ်တိုင်လာရောက်သင်ယူ (In-person Training)၊ ကျန်ရုံးဖွင့်ရက်များတွင် အဝေးမှ သင်ယူ (Online Training)သော ၂ ခုပေါင်းစနစ် (Blended Learning/Hybrid Learning Programs) ကို ကျင့်သုံးရင်း ဆက်လက်ဆောင်ရွက်သွားမည်ဟု စီစဉ်နေပါသည်။
(ဆက်ပါဦးမည်)
ဒေါက်တာမျိုးကြွယ်