ပေါင်းလောင်းဆည်ရေသောက်စနစ်၌ နွေစပါးနှင့် နွေသီးနှံ ၉၁၆၆ ဧက စိုက်ပျိုးရေ ပေးဝေရန် လျာထားဆောင်ရွက်

နေပြည်တော်၊ မေ ၈

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်သည် မေ ၇ ရက်နေ့ မွန်းလွဲပိုင်းတွင် နေပြည်တော်၊ ဇေယျာသီရိမြို့နယ်ရှိ ပေါင်းလောင်း ရေလှောင်တမံ၏ ကြံ့ခိုင်မှု၊ စီးဝင်ရေပမာဏနှင့် ဝင်ရေသိုလှောင်ထားရှိမှုတို့ကို ကြည့်ရှု စစ်ဆေးသည်။ ဆက်လက်၍ ရာဂီမုန်တိုင်းအရှိန်ကြောင့် မိုးသည်းထန်စွာ ရွာသွန်းမှု ဖြစ်ပေါ်ခဲ့ပြီး ထိခိုက်ပျက်စီးမှုဖြစ်ပေါ်ခဲ့သည့် ရေပိုလွှဲ ပထမအဆင့်၏ အောက်ဘက်ပိုင်း အပိုင်း(၁) နှင့် အထက်ဘက်ပိုင်း အပိုင်း(၂) ပြန်လည် ပြုပြင် ဆောင်ရွက်ပြီးစီးမှု ကိုကြည့်ရှု စစ်ဆေးပြီး တာဝန်ရှိသူများအား ရေလှောင်တမံနှင့် ရေပိုလွှဲတို့၏ ကြံ့ခိုင်မှုကို Dam Monitoring စောင့်ကြည့် တိုင်းတာ စစ်ဆေးမှုများ အမြဲမပြတ်ဆောင်ရွက်ရန်၊ ရေပိုလွှဲတွင် တပ်ဆင်ထားသော HED (Hydraulic Elevator Dam) ရေတံခါးများအား လုပ်ထုံးလုပ်နည်း နှင့်အညီ စမ်းသပ်လည်ပတ်စစ်ဆေးရန်၊ ပေါင်းလောင်းမြစ် ဘေးဝဲယာတလျောက်၌ မိုးရာသီများတွင်ကြုံတွေ့ရတတ်သည့် ရေကြီးရေလျှံမှု လျော့ပါး သက်သာစေရေးအတွက် အထက်ပေါင်းလောင်းတမံ၊ အောက်ပေါင်းလောင်းတမံနှင့် ရေလွှဲဆည် တို့ ရေထုတ်လွှတ်မှု ပမာဏကို ချိန်ညှိလုပ်ဆောင်နိုင်ရေးကို သက်ဆိုင်ရာဌာနများ နှင့် ညှိနှိုင်းစီမံ ဆောင်ရွက်ရန် ဆွေးနွေးမှာကြားသည်။

၎င်းနောက် ဒုတိယဝန်ကြီးသည် ပေါင်းလောင်းရေလွှဲဆည်၏ လက်ဝဲ ဖက် သဲထုတ် ရေတံခါး၏ မြေထိန်းနံရံ၊ မြောင်းထိပ် ရေတံခါးနှင့် ရေခွဲနံရံများ ပြန်လည်ပြုပြင် ဆောင်ရွက် ပြီးစီးမှု ကို ကြည့်ရှုစစ်ဆေးပြီး ရေလွှဲဆည် ရေရှည်တည်တံ့ ခိုင်ခံ့ရေးအတွက် ဆက်လက်စီမံ ဆောင်ရွက်သင့်သည်များကို တာဝန်ရှိသူများအား ဆွေးနွေးမှာကြားသည်။

ဆက်လက်၍ ပေါင်းလောင်းဆည်ရေသောက်စနစ် လက်ယာတူးမြောင်းမကြီးနှင့် လက်ဝဲတူးမြောင်းမကြီးတို့မှ ရေသောက်ဧရိယာအတွင်းရှိ နွေစပါးနှင့် နွေသီးနှံစိုက်ကွင်းများ သို့ စိုက်ပျိုးရေလုံလောက်စွာပေးဝေနေမှု ကိုကြည့်ရှုစစ်ဆေးပြီး ဆည်မြောင်း နှင့် ရေအသုံးချမှု စီမံခန့်ခွဲရေးဦးစီးဌာန တာဝန်ရှိသူ များအား  ရေသောက်ဧရိယာများနှင့် ဆက်စပ်နေသော ရေရရှိရန်ခက်ခဲသည့် ကုန်းမြင့်မြေဧရိယာနေရာများတွင် အနိမ့်တင် ဆိုလာပန့်များဖြင့် ရေတင်ပေးဝေနိုင်ရေး ဆက်လက်ဆောင်ရွက်ရန်၊ စိုက်ပျိုးရေကို အလေ အလွင့်မရှိ စနစ်တကျပေးဝေသွားရန်နှင့် လျာထားစိုက်ဧကပြည့် စိုက်ပျိုးပြီး ပန်းတိုင်အထွက်နှုန်း ရရှိရေး အတွက် သက်ဆိုင်ရာဌာနများနှင့်ပူးပေါင်းဆောင်ရွက်ကြရန် ဆွေးနွေး မှာကြားသည်။ ပေါင်းလောင်းဆည်ရေသောက်စနစ်၌ ယခုနှစ် နွေစပါး နှင့် နွေသီးနှံ စုစုပေါင်း (၉၁၆၆)ဧက အား စိုက်ပျိုးရေပေးဝေရန် လျာထားဆောင်ရွက်လျက်ရှိကြောင်း သတင်းရရှိသည်။

MOALI