မိတ္ထီလာ၊ ပျော်ဘွယ်၊ ရမည်းသင်းဒေသ၌ မွေးမြူရေးကဏ္ဍ ဖွံ့ဖြိုးတိုးတက်ရေး မွေးမြူရေးလုပ်ငန်းရှင်များ မွေးမြူရေးတောင်သူများနှင့် တွေ့ဆုံဆွေးနွေး

  နေပြည်တော်၊ မေ ၁၁

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲထွန်းဝင်းသည် မေ ၁၀ ရက်နေ့တွင် မွေးမြူရေးကဏ္ဍဖွံ့ဖြိုးတိုးတက်ရေးနှင့် ထုတ်ကုန်မြှင့်တင်နိုင်ရေးအတွက် မန္တလေးတိုင်းဒေသကြီးအတွင်းရှိ မိထ္ထီလာ၊ ပျော်ဘွယ်နှင့် ရမည်းသင်းမြို့နယ်များရှိ မွေးမြူရေးလုပ်ငန်းရှင်များ၊ တစ်ပိုင်တစ်နိုင် မွေးမြူသူတောင်သူများနှင့် ကွင်းဆင်းတွေ့ဆုံ၍ လက်ရှိမွေးမြူထုတ်လုပ်ရေးအခြေအနေများ၊ လုပ်ငန်းအလိုက်အတွေ့အကြုံများ၊ မွေးမြူရေး လုပ်ငန်းများ တိုးချဲ့ဆောင်ရွက်ရေးအတွက် လိုအပ်ချက်များ၊ တိရစ္ဆာန်စာနှင့် ဖြည့်စွက်စာ အခြေအနေ၊ မွေးမြူရေးစနစ်နှင့် မျိုးလိုအပ်ချက်တို့ကိုဆွေးနွေးခဲ့ကြကြောင်း သိရသည်။

ရှေးဦးစွာ ဒုတိယဝန်ကြီးသည် မိထ္ထီလာမြို့နယ်ရှိ Garden Family ကုမ္ပဏီ ဆိတ်မွေးမြူရေးခြံတွင် မွေးမြူရေးနှင့်ကုသရေးဦးစီးဌာန ခရိုင်နှင့် မြို့နယ်တာဝန်ရှိသူများ၊ ဆိတ်မွေးမြူရေး လုပ်ငန်းလုပ်ကိုင်ကြသူများနှင့် တွေ့ဆုံ၍ ဆိတ်မွေးမြူရေးနှင့် တိုးတက် ထုတ်လုပ်ရေးအတွက် အလားအလာကောင်းသည့် မိထ္ထီလာဒေသတွင် ကောင်း မွန်သော မွေးမြူရေးကျင့်စဉ် (Good Animal Husbandry Practices - GAHP) နှင့်အညီ လိုက်နာ ဆောင် ရွက်သော  မွေးမြူရေးဇုန်များ ဆောင် ရွက်နိုင်ရေး ၊ မွေးမြူရေးကဏ္ဍဖွံ့ဖြိုးတိုးတက်ရေးနှင့် အသားကဏ္ဍထုတ် လုပ်မှု မြှင့်တင်ရေးအတွက် ပူးပေါင်းကြိုးပမ်းကြရန်နှင့် ပြည်တွင်း စားသုံးမှု ဖူလုံရုံသာမက ပြည်ပဈေးကွက်သို့ တင်ပို့နိုင်ရေးကိုပါ အလေးပေးဆောင်ရွက်ကြရန် တိုက်တွန်းပြောကြားသည်။

ထို့နောက် ဆိတ်မွေးမြူရေး လုပ်ငန်းရှင်များက ဆိတ်မွေးမြူရာတွင် ကြုံတွေ့ကြရသည့် မျိုးလိုအပ်ချက်၊ သယ်ယူပို့ဆောင်ရေးအခက်အခဲနှင့် မြေယာအသုံးပြုမှု လိုအပ်ချက်များကို တင်ပြကြရာ ဒုတိယဝန်ကြီးက သက်ဆိုင်ရာဌာနများနှင့် ညှိနှိုင်းပေါင်းစပ်ဆောင်ရွက်ပေးသည်။

ထိုမှတစ်ဆင့် ဒုတိယဝန်ကြီးသည် ပျော်ဘွယ်မြို့နယ်ရှိ ဇီဝကအစာစပ်စက်ရုံတွင် အစာစပ် လုပ်ငန်းရှင်များ၊ ဝက်၊ ဆိတ်၊ ကြက်မွေးမြူသူများနှင့် တွေ့ဆုံ၍ လက်ရှိ မွေးမြူ ရေးလုပ်ငန်း ဆောင်ရွက်မှုများ၊ ထုတ်လုပ်မှုအခြေအနေများကို ဆွေးနွေးပြီး ဒုတိယဝန်ကြီးက မိထ္ထီလာနှင့် ပျော်ဘွယ်ဒေသများအား မွေးမြူရေးဆိုင်ရာ အများစံထား အတုယူဖွယ်ဒေသများ ဖြစ်လာစေရေး၊ မွေးမြူရေးကဏ္ဍကို စနစ်တကျ အဆင့်မြှင့်တင်ရေး၊ လွှတ်ကျောင်းစနစ်မှ ခြံလှောင်စနစ်သို့ ပြောင်းလဲကျင့်သုံးစေရေးနှင့် ကောင်းမွန်သောတိုးတက်မှုဖြင့် မွေးမြူထုတ်လုပ်မှု မြှင့်တင်နိုင်ရေး ဆွေးနွေးမှာကြားသည်။

အလားတူ ရမည်းသင်းမြို့နယ်ရှိ ခရိုင်အထွေထွေအုပ်ချုပ်ရေးဦးစီးဌာနတွင် နွား၊ ဝက် မွေးမြူရေးလုပ်ငန်းရှင်များနှင့် တစ်ပိုင်တစ်နိုင် မွေးမြူရေးတောင်သူများနှင့် ရင်းနှီးစွာတွေ့ဆုံ၍ မွေးမြူရေးကဏ္ဍ ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်နိုင်ရေး၊ လက်ရှိမွေးမြူ ထုတ်လုပ်မှုအခြေအနေနှင့် ကြုံတွေ့ရသည့်အခက်အခဲများအား ဖြေရှင်းပေးနိုင်ရေး၊ မွေးမြူရေး တိရစ္ဆာန်မျိုးမြှင့်တင်ရေး၊ မွေးမြူရေးဆေးဝါးများ မပြတ်လတ်စေရန်၊ မျိုးလိုအပ်ချက် ဖြည့်ဆည်း ပေးရန်နှင့် နည်းပညာအကူအညီများရရှိ အသုံးပြုနိုင်ရေးအတွက် လက်တွေ့၊ နည်းပညာနှင့် မူဝါဒပိုင်း  ပေါင်းစပ်ဖြေရှင်း ညှိနှိုင်းဆွေးနွေးခဲ့ကြောင်း သတင်းရရှိသည်။

MOALI