ရန်ကုန်ဈေးကွက်

ဆန်ဈေးကွက်

ယခုရက်သတ္တပတ်အတွင်း ဆန်ပါးကုန်စည်ဒိုင်၊ ဝါးတန်းလမ်းတွင် ထုတ်ပြန်ထားသော ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲတစ်အိတ်လျှင် ၂၀၀၀၀၀ ကျပ်နှုန်းနှင့် အောက်စ တစ်အိတ်လျှင် ၁၉၅၀၀၀ ကျပ်နှုန်းဖြင့်လည်းကောင်း၊ ဖျာပုံပေါ်ဆန်း ဆန်အလတ်စ တစ်တင်းခွဲတစ်အိတ်လျှင် ၁၄၀၀၀၀ ကျပ်နှုန်းနှင့် အောက်စ တစ်အိတ်လျှင် ၁၃၅၀၀၀ကျပ်နှုန်းဖြင့်လည်းကောင်း၊ ဇီယာဆန်အလတ်စ တစ်တင်းခွဲတစ်အိတ်လျှင် ၆၂၀၀၀ ကျပ်နှုန်းနှင့် အောက်စ တစ်အိတ်လျှင် ၆၀၀၀၀ကျပ်နှုန်းဖြင့်လည်းကောင်း၊ ဧည့်မထဆန်ကြမ်း ၁၅ ရာခိုင်နှုန်း အလတ်စတစ်တင်းခွဲတစ်အိတ်လျှင် ၆၂၀၀၀ ကျပ်နှုန်းနှင့် အောက်စ တစ်အိတ် လျှင် ၆၀၀၀၀ကျပ်နှုန်းဖြင့်လည်းကောင်း၊ ငစိန်ဆန် အလတ်စ တစ်တင်းခွဲတစ်အိတ်လျှင် ၆၀၀၀၀ ကျပ်နှုန်းနှင့် အောက်စတစ်အိတ်လျှင် ၅၈၀၀၀ ကျပ်နှုန်း ဖြင့်ရောင်းဝယ်လျက်ရှိကြောင်း သိရသည်။ ယခင်အပတ်ဈေးနှုန်းများနှင့် နှိုင်းယှဉ်ပါက ဈေးနှုန်း ပြောင်းလဲမှုမရှိသော်လည်း ယခုလ နောက်ဆုံးရက်သတ္တပတ်၏ ဈေးနှုန်းများနှင် နှိုင်းယှဉ်ပါက ဆန်တစ်အိတ်လျှင် ၃၀၀၀ ကျပ်မှ ၅၀၀၀ ကျပ်ဝန်းကျင်ထိဈေးမြင့်ခဲ့ကြောင်းသိရသည်။ ဆန်သစ်များ အဝင်ပါးလာချိန် ဖြစ်ခြင်း၊ အရည်အသွေး ခြောက်သွေ့ကောင်းမွန်လာချိန်ဖြစ်ခြင်း၊  ပြည်ပသို့ပုံမှန်တင်ပို့မှုရှိခြင်း၊ ကမ္ဘာ့ရွှေဈေး၊ ဒေါ်လာငွေလဲနှုန်းနှင့် စက်သုံးဆီ ဈေးနှုန်းများ မကြာ ခဏ အပြောင်းအလဲများ ဖြစ်ပေါ်လျက်ရှိခြင်း၊ ၂၀၂၆ ခုနှစ် မေ၊ ဇွန်၊ ဇူလိုင်လ များတွင်  အယ်လ်နီညိုရာသီဥတုဖြစ်ပေါ်နိုင်ခြေကြောင့် ဆန်၊ ပဲ အထွက်နှုန်းများကျဆင်းကာ စားသောက် ကုန်ဈေးနှုန်းများ ဈေးမြင့်လာနိုင်ခြင်း၊ သွင်းအားစုများနှင့်ကုန်ကျစရိတ်များဈေးမြင့်နေခြင်းကြောင့် စိုက်ပျိုးထုတ်လုပ်မှုနှင့် အထွက်နှုန်းများ လျော့ကျလာနိုင်ဖွယ်ရှိခြင်း စသည့် အခြေ အနေများကြောင့် ဆန်ချော ဆန်ကြမ်းများအားလုံး ဈေးအမြင့်တွင်သာ ဆက်လက်တည်ရှိနေ နိုင်ကြောင်း သိရသည်။ ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကျွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ်၊ လပွတ္တာ၊ ရွှေဘိုဒေသများမှ ဆန်ဝင်ရောက်မှုရှိခဲ့သည်။ မဒါဂတ်စကာ၊ ဖိလစ်ပိုင်၊ တရုတ်၊ ပိုလန်၊စပိတ်၊ ချက်ရီပတ်ဘလစ်၊ နယ်သာလန်၊ ဖီဂျီ၊ ဘယ်လဂျီယံ၊ ရိုမေးနီယား စသော နိုင်ငံများသို့ ပင်လယ်ရေကြောင်းမှ ပုံမှန်တင်ပို့မှုများ ရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

ထိုင်းနိုင်ငံသို့ သွင်းကုန်အခွန်လွတ်ခွင့်ဖြင့် တင်ပို့နိုင်သော ကာလဖြစ်ခြင်း၊ စိုက်ပျိုးထွက်ရှိမှု နည်းပါးခဲ့ခြင်းကြောင့် ပြောင်းလက်ကျန် နည်းပါးလာချိန် ဖြစ်ခြင်း၊ ပြည်ပဈေးမြင့်နေခြင်းနှင့် ဝယ်လိုအား မြင့်နေခြင်း၊ ပင်လယ်ရေကြောင်းနှင့် တာချီလိတ်နယ်စပ်မှ တင်ပို့မှုများပုံမှန်ရှိခြင်းတို့ကြောင့် အစေ့ထုတ်ပြောင်းဈေးနှုန်းများမှာ လည်း ကုန်းလမ်းဆက်သွယ်မှု တင်ပို့မှုများ ယခင်ရက်သတ္တပတ်၏ ဈေးနှုန်းများနည်းတူ ဈေးအမြင့်တွင် တည်ငြိမ်လျက်ရှိသည်။ အစေ့ထုတ်ပြောင်း ၅၄ ပိဿာလျှင် ယခင်အပတ်နှင့် ယခုအပတ် ဈေးနှုန်းမှာ ၉၉၃၆၀ ကျပ် ဖြစ်သည်။ ယခုလ နောက်ဆုံးရက်သတ္တပတ် ဈေးနှုန်းမှာ ၉၁၂၆၀ ကျပ် ဖြစ်ပါသည်။

စားဖိုဆောင်သီးနှံဈေးကွက်

ငရုတ်ခြောက် (ရှည်၊ လတ်) မှာ ဈေးကွက်သို့ ကုန်အဝင် ပုံမှန်ရှိသော်လည်း စားသုံးသူများမှ ဝယ်လိုအားနည်းခြင်းကြောင့် ယခင်အပတ်ထက် ဈေးနိမ့်ခဲ့သည်။ ငရုတ်ခြောက် (ပွ) မှာ ဈေးကွက်သို့ ကုန်အဝင် ပုံမှန်ရှိသော်လည်း အရည်အသွေး အမြင့်စများခြင်းကြောင့် ယခင်အပတ်ထက် ဈေးမြင့်ခဲ့သည်။ ငရုတ်ခြောက် (ရှည်၊ လတ်၊ ပွ) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၄၂၅၀ - ၁၃၂၅၀ - ၂၄၇၅၀ ကျပ်ဖြစ်ပြီး၊ ယခုအပတ်ဈေးနှုန်းမှာ ၁၃၅၀၀ - ၁၂၂၅၀ - ၂၅၀၀၀ ကျပ် ဖြစ်သည်။ ရန်ကုန်ဈေးကွက်သို့ ပန်းရဲ၊ မြားနီ အအေးခန်း သိုလှောင်ငရုတ်ခြောက်များ၊ ဟင်္သာတ မိုးထောင်၊ ဆင်ဖြူကျွန်း၊ မြစ်ဝပု၊ ဆက ငရုတ်ခြောက် များ ကုန်ဝင်ရောက်မှု ရှိခဲ့ကြောင်း သိရသည်။ ကြက်သွန်နီ (ထူး၊လတ်သေး) မှာ ဈေးကွက်သို့ ကုန်အဝင် လှိုင်ခြင်း၊ စားသုံးသူများမှ ဝယ်လိုအားနည်းခြင်းတို့ကြောင့် ယခင်အပတ်ထက် ဈေးနိမ့်ခဲ့သည်။ ကြက်သွန်နီ (ထူး၊လတ်သေး) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၂၅၀၀ - ၂၄၀၀ - ၁၈၀၀ ကျပ်ဖြစ်ပြီး၊ ယခုအပတ်ဈေးနှုန်းမှာ ၂၂၀၀ - ၂၁၇၅ - ၁၅၇၅ကျပ်သို့ ရောက်ရှိ ဈေးနိမ့်ခဲ့သည်။ ရန်ကုန်ဈေးကွက်သို့ မြင်းခြံ၊ ဆိပ်ဖြူ၊ မုံရွာ၊ တောင်သာ၊ မြစ်သား၊ ရွှေဘို၊ ပျော်ဘွယ်ဒေသများမှ ကြက်သွန်နီများ လှိုင်လှိုင် ဝင်ရောက်ခဲ့ကြောင်း သိရသည်။ ကြက်သွန်ဖြူ (ကြူကုတ်) မှာ ကုန်အဝင်နည်းခြင်း၊ တင်သွင်းဈေး မြင့်ခြင်း၊ သယ်ယူစရိတ် မြင့်ခြင်း၊ ဝယ်လိုအား များခြင်းတို့ကြောင့် ယခင်အပတ်ထက် ဈေးမြင့်ခဲ့သည်။ ကြက်သွန်ဖြူ (ကြူကုတ်) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၄၅၀၀ကျပ် ဖြစ်ပြီး ယခုပတ် ဈေးနှုန်းမှာ ၁၈၀၀၀ကျပ်သို့ ရောက်ရှိဈေးမြင့်ခဲ့သည်။ ကြက်သွန်ဖြူ (ရှမ်း) မှာလည်း ကုန်အဝင် နည်းခြင်း၊စားသုံးသူများမှ ဝယ်လိုအားများခြင်းတို့ကြောင့် ယခင်အပတ်ထက်ဈေးမြင့်ခဲ့သည်။ ကြက်သွန်ဖြူ (ရှမ်း)တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၆၀၀၀ ကျပ် ဖြစ်ပြီး ယခုအပတ်ဈေးနှုန်းမှာ ၆၄၀၀ ကျပ်သို့ ရောက်ရှိဈေးမြင့်ခဲ့သည်။ အာလူး(S1, OK, A1) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၂၃၀၀ - ၂၃၀၀ - ၁၇၀၀ ကျပ် ဖြစ်ပြီး ယခုအပတ်ပျမ်းမျှဈေးနှုန်းမှာ ၂၂၀၀ - ၂၂၀၀ - ၁၅၀၀ ကျပ်သို့ ရောက်ရှိဈေးနိမ့်ခဲ့သည်။ ဈေးကွက်သို့ အောင်ပန်းအာလူးများ ကုန်အဝင်ပုံမှန်ရှိသော်လည်း အရည်အသွေးနိမ့်ခြင်း၊ အထားမခံခြင်းနှင့် စားသုံးသူများမှ ဝယ်လိုအားနည်းခြင်းတို့ကြောင့် ယခင်အပတ်ထက် ဈေး နိမ့်လာခဲ့ခြင်းဖြစ်သည်။  

စားသုံးဆီဈေးကွက်

ကမ္ဘာ့စားအုန်းဆီ အများဆုံး ထုတ်လုပ်သော အင်ဒိုနီးရှားနိုင်ငံနှင့် မလေးရှားနိုင်ငံတွင် စားအုန်းဆီပို့ကုန် အခွန်တိုးမြှင့်ထားခြင်း၊ လောင်စာဆီ အဖြစ်ရောနှောသုံးစွဲမှုရှိခြင်း၊ ပြည်တွင်း လက်ကျန်နည်းလာချိန်ဖြစ်ခြင်း၊ အီရန်နှင့် အမေရိကန်ပဋိပက္ခကြောင့် လောင်စာဆီ အကျပ်အတည်းများဖြစ်ကာ သယ်ယူပို့ဆောင်စရိတ်များ ဈေးမြင့်လာခြင်း၊  ကမ္ဘာ့ရွှေဈေးနှင့် ဒေါ်လာငွေလဲလှယ်နှုန်းများ မတည်ငြိမ်ခြင်းစသည့် အခြေအနေများကြောင့် စားအုန်းဆီ တင်သွင်းရသော ဈေးနှုန်းများအား ထပ်မံ မြင့်တက်စေခဲ့သည်။ ထို့ကြောင့် ကမ္ဘာ့စားအုန်းဆီ ထုတ်လုပ်တင်ပို့သော နိုင်ငံများတွင် ဖြစ်ပေါ်လျက်ရှိသော ဈေးကွက်ဈေးနှုန်းများအပေါ် အခြေခံ၍ စားအုန်းဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်မှုကော်မတီ၏ ၂၀၂၆ ခုနှစ် မေ ၈ ရက်မှ ၁၄ ရက်အထိ ကုန်ဆုံးသောကာလအတွက် ထုတ်ပြန်ထားသော      ရန်ကုန် အထိုင် လက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၇၄၉၉ ကျပ် ဖြစ်သည်။ ယခင်အပတ် ဈေးနှုန်းဖြင့် နှိုင်းယှဉ်ပါက စားအုန်းဆီ တစ်ပိဿာလျှင် ၁၁၉ ကျပ်နှုန်း ဈေးမြင့်လာခဲ့ခြင်း ဖြစ်သည်။၂၀၂၅ ခုနှစ်  နှစ်ကုန်ပိုင်းမှစတင်ကာ စားအုန်းဆီ ရည်ညွှန်းဈေးနှုန်း များ ဆက်တိုက် မြင့်တက်လာနေခြင်း ဖြစ်သည်။ ပြင်ပ လက်လီဈေးကွက်တွင် သတ်မှတ်ထား သော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ် ထောင်လျှင် ၅၀ကျပ်သားနှုန်းရောင်းချပေးလျက်ရှိသည်။အချို့သောမြို့နယ်များတွင် စားအုန်းဆီ တစ်ပိဿာ၏ ပြင်ပဈေးနှုန်းမှာ ၁၂၀၀၀ကျပ် ဝန်းကျင် ဖြစ်သည်။

အေးသန္တာဝင်း