ရမည်းသင်းနှင့် ပျော်ဘွယ်မြို့များ၌ စပျစ်ဇုန် အကောင်အထည်ဖော်မည်၊ စိုက်ပျိုးရေးနှင့်မွေးမြူရေးလုပ်ငန်းများ တိုးမြှင့်လုပ်ဆောင်နိုင်ရေး ကွင်းဆင်းအားပေး

နေပြည်တော်၊ မေ ၈

ရမည်းသင်းနှင့်ပျော်ဘွယ်မြို့နယ်များတွင် စပျစ်စိုက်ပျိုးလုပ်ကိုင်မှု များပြားလာခြင်းကြောင့် ဆည်ရေသောက်လယ်မြေများပေါ်တွင် စိုက်ပျိုးခြင်းများရှိလာသဖြင့် လယ်ယာမြေအပေါ် ဥပဒေနှင့် ညီညွတ်မှုမရှိဘဲ စိုက်ပျိုးလုပ်ကိုင်မှုများအား လုပ်ငန်းအရှိန်မပျက်စေဘဲ စနစ်တကျဖယ်ရှားနိုင်ရန်နှင့် မြေလွတ်၊မြေလပ်နှင့် မြေရိုင်းများကို အသုံးပြုပြီး ဝိုင်စပျစ် စီးပွားဖြစ်စိုက်ပျိုးနိုင်ရန် ၊ စိုက်ပျိုးရေး ထွက်ကုန်အခြေခံ စားသောက်ကုန်ချောထုတ် စက်မှုလုပ်ငန်းများဖွံ့ဖြိုးလာစေရန်အတွက် နိုင်ငံတော် အစိုးရ၏ စီမံလမ်းညွှန်မှုဖြင့် စပျစ်ဇုန်စီမံကိန်းကို အကောင်အထည်ဖော် ဆောင်ရွက်သွားမည် ဖြစ်ကြောင်း မေ ၆ ရက်နေ့ က မန္တလေးတိုင်းဒေသကြီး ရမည်းသင်းမြို့နယ် သဲကျွန်းကျေးရွာတွင်  စပျစ်စိုက်တောင်သူများ၊ စပျစ်လုပ်ငန်းရှင်များနှင့် တွေ့ဆုံစဉ် ပြည်ထောင်စုဝန်ကြီး ဦးမင်းနောင်က ဆွေးနွေးပြောကြားသည်။

ယခုအကောင်အထည်ဖော်ဆောင်မည့် စပျစ်ဇုန်၌ ဝိုင်စပျစ်တစ်မျိုးတည်းကိုသာ စိုက်ပျိုး လုပ်ကိုင်ကြရန်ဖြစ်ပြီး ထွက်ရှိလာမည့် စပျစ်များရောင်းချနိုင်ရေးအတွက် လက်ရှိ လည်ပတ်နေသော ဝိုင်စက်ရုံမှဝယ်ယူသွားရန် ညှိနှိုင်းဆောင်ရွက်ထားပြီး ဖြစ်သကဲ့သို့ စိုက်ပျိုးမှုနှင့် ထွက်ရှိနိုင်မှုအပေါ် မူတည်၍ စပျစ်ဝိုင်စက်ရုံများ အချိန်မီအကောင် အထည်ဖော်ဆောင်နိုင်ရေးကိုပါ စီမံပြီးဖြစ်ကြောင်း သိရသည်။

မေ ၇ ရက်နေ့နှင့်၈ ရက်နေ့များတွင် ပြည်ထောင်စုဝန်ကြီး ဦးမင်းနောင်သည် မန္တလေး တိုင်းဒေသကြီးဝန်ကြီးချုပ် ဦးမျိုးအောင်နှင့်အတူ နွေစပါးမျိုးစေ့ထုတ်တောင်သူများ၊ နွေနှမ်းနှင့် ချည်မျှင်ရှည်ဝါစိုက်ပျိုးသူတောင်သူများအား စိုက်ကွင်းများအရောက် သွားရောက်တွေ့ဆုံအားပေးစကား ပြောကြားပြီး စိုက်ပျိုးထုတ်လုပ်မှုတိုးတက်ရေးနှင့် တောင်သူများ၏အကျိုးစီးပွားတိုးတက်မြင့်မားရေး ဆွေးနွေးခဲ့ကြသည်။

အလားတူ ကျောက်ဆည်မြို့နယ် စိုက်ပျိုးရေးသုတေသနစခန်း အစည်းအဝေးခန်းမ ၌ မွေးမြူရေးလုပ်ငန်းရှင်နှင့် မွေးမြူရေး တောင်သူ ၅၂ ဦး တို့အားလည်းကောင်း၊ ပြင်ဦးလွင်မြို့နယ် သုံးတောင်ရွာ ဓမ္မာရုံ၌ ဒေသခံ မွေးမြူရေးလုပ်ငန်းရှင် နှင့် မွေးမြူရေးတောင်သူ ၁၅၀ ဦး တို့အားလည်း ကောင်း တွေ့ဆုံ၍ ဒေသ၏မွေးမြူရေးလုပ်ငန်းများ ပိုမိုတိုးမြှင့်လုပ်ကိုင်နိုင်ကြစေရေးအတွက် နည်းပညာနှင့် လိုအပ်ချက်များကို ဝန်ကြီးဌာနက ဥပဒေနှင့်အညီကူညီဆောင်ရွက်ပေးနေမှု ၊ မွေးမြူရေးလုပ်ငန်းအတွက် မြေယာအသုံးချမှုနှင့်ပတ်သက်၍ ထုတ်ပြန်ထားသော လယ်ယာမြေ ဥပဒေနှင့်အညီ လိုက်နာဆောင်ရွက်ရန် လိုအပ်မှု၊ လယ်ယာမြေများတွင် ခွင့်ပြုချက်မရှိဘဲ ကျူးလွန် အသုံးပြုခြင်းများကို တည်ဆဲ ဥပဒေ၊ စံပြုလုပ်ထုံးလုပ်နည်းများနှင့်အတိုင်း ဆောင်ရွက်မည့် အခြေအနေ၊ စိုက်ပျိုးရေး မွေးမြူရေးလုပ်ငန်းများကို မိမိလုပ်ကိုင်ခွင့်ရမြေမရှိသူများ လုပ်ဆောင် လိုပါက မြေလွတ်၊မြေလပ်နှင့်မြေရိုင်းများကို ဥပဒေနှင့်အညီ တရားဝင်လျှောက်ထားအသုံးပြုနိုင်မှု အခွင့်အလမ်းများ နှင့် သတ်မှတ်ချက်စည်းကမ်းနှင့်အညီ စနစ်တကျအသုံးပြုပြီး လုပ်ငန်းတည်ငြိမ် ပါက ပုံစံ ၇ လျှောက်ထား ဆောင်ရွက်နိုင်မှုတို့ကို ဆွေးနွေးပြောကြားကြသည်။

ဆက်လက်၍ မွေးမြူရေးလုပ်ငန်းရှင်များ နှင့် မွေးမြူရေးတောင်သူများ၏ တင်ပြချက်များအပေါ် အသေးစိတ်ပြန်လည်ရှင်းလင်းဆွေးနွေးခဲ့ကြကြောင်း သတင်းရရှိသည်။

MOALI