မန္တလေးဈေးကွက်

(မန္တလေးပွဲစားကုန်သည် စက်ပိုင်ကထိန်တော်အသင်း၊ ကိုင်းတန်းဈေး၊ သီရိမာလာဈေးတို့မှ ၂၆-၃-၂၀၂၆ ရက်နေ့ ကောက်ယူဈေးနှုန်းများဖြစ်ပါသည်။)

ဆန်နှင့်ဆီဈေးကွက်

မန္တလေးဈေးကွက်တွင် ဆန်ဈေးနှုန်းအနေဖြင့် ရန်ကုန်ပေါ်ဆန်းအဝင်ပုံမှန် မြို့တွင်းစားသုံးမှု ပုံမှန်ရှိခြင်းကြောင့် တစ်အိတ် ၁၄၀၀၀၀ကျပ်ဖြင့် ဈေးတည်ငြိမ်နေသည်။ ရွှေဘိုပေါ်ဆန်းမှာ ရွှေဘိုဒေသတစ်ခု ထဲသာ ဝင်ရောက်ပြီး မြို့တွင်းစားသုံးမှုပုံမှန် အဝင်ပုံမှန်ရှိခြင်းကြောင့် တစ်အိတ် ၁၈၅၀၀၀ ကျပ်ဖြင့် ဈေးတည် ငြိမ်နေသည်။မနောသုခဆန်မှာ အသစ်အဝင်နည်းခြင်း၊ မြို့တွင်းစားသုံးမှုများခြင်း၊ အလှူပွဲများ ပေါများခြင်းကြောင့် ဝယ်ယူမှုများခြင်းကြောင့် ၁ တင်းခွဲ တစ်အိတ် ၆၅၀၀၀ကျပ်မှ ၈၅၀၀၀ကျပ်သို့ ဈေးမြင့်သွားသည်။ဇီယာနှင့်ငစိန်ဆန်တို့အနက် ဇီယာဆန်မှာ မြို့တွင်းစားသုံးမှုပုံမှန် အဝင်ပုံမှန်ရှိခြင်းကြောင့် တစ်အိတ် ၈၀၀၀၀ ကျပ်ဖြင့် ဈေးတည်ငြိမ်နေပြီး ငစိန်ဆန်မှာ အသစ်အဝင်နည်းသွားခြင်း၊ မုန့်လုပ်ငန်းသမားများ အဝယ် များခြင်းကြောင့် တစ်အိတ် ၅၅၀၀၀ ကျပ်မှ ၆၀၀၀၀ ကျပ်သို့ ဈေးမြင့်သွားသည်။    ဧရာမင်းဆန်မှာ အဝင်ပုံမှန်၊ မြို့တွင်းစားသုံးမှုပုံမှန်၊ အလှူပွဲများရှိသဖြင့် အနီးဝန်းကျင်မြို့များမှ ဝယ် ယူမှုရှိခြင်းကြောင့် တစ်အိတ် ၁၄၀၀၀၀ ကျပ်ဖြင့် ဈေးတည်ငြိမ်နေသည်။ ဆီဈေးနှုန်းအနေဖြင့် မြေပဲ(လုံးဆန်/ဆီဆန်) ဈေးမြင့်သဖြင့် အမြင့်ဈေးဖြင့် ကြိတ်ခွဲရခြင်းကြောင့် ပဲဆီတစ်ပိဿာ ၁၆၀၀၀ ကျပ်မှ ၁၉၀၀၀ ကျပ်သို့ ဈေးမြင့်သွားပြီး၊ နှမ်းဆီတစ်ပိဿာ ၁၂၅၀၀ မှ ၁၆၀၀၀ကျပ် သို့ ဈေးမြင့်သွားသည်။

ဆီထွက်သီးနှံဈေးကွက်

မြေပဲ(လုံးဆံ)မှာ နယ်ဝင်နည်းသဖြင့် မြေပဲအသစ်အဝင်နည်းခြင်း၊ လုပ်ငန်းသမားအဝယ်ပုံမှန်ရှိခြင်းကြောင့် မြေပဲ(လုံးဆံ) ၁၀၀ ပိဿာ ယခင်အပတ် အရည်အသွေးအကောင်းဆုံး ၁၁၀၀၀၀၀ ကျပ်မှ ယခုအပတ် ၁၂၅၀၀၀၀ကျပ်ထိ ဈေးမြင့် သွားသည်။ မြေပဲ(ဆီဆံ)မှာလည်း အသစ်အဝင်နည်းခြင်း၊ ဆီစက်သမား၊ လှောင်သမားအဝယ်ရှိခြင်းကြောင့် ယခင်အပတ် အရည်အသွေးအကောင်းဆုံး ၁၀၃၀၀၀၀ ကျပ်မှ ယခုအပတ် ၁၁၅၀၀၀၀ ကျပ်သို့ ဈေးမြင့်သွားသည်။

နှမ်းဖြူမှာ ဆောင်းနှမ်းဖြူ တောင်သူထံလက်ကျန်နည်း၊ အဝင်နည်းသွား ပြီး လှောင်သမားထံမှ ဝယ်ရခြင်း၊ လုပ်ငန်းသမား အဝယ်ပုံမှန်ရှိခြင်းကြောင့် ၄၅ ပိဿာ ယခင်အပတ် အရည်အသွေးအကောင်းဆုံး ၃၅၀၀၀၀ကျပ်မှ ယခုအပတ် ၄၀၀၀၀၀ ကျပ်သို့ ဈေးမြင့်သွားသည်။ နှမ်းညိုမှာ ဆီစက်သမားအဝယ်နည်းသော်လည်း အဝင်နည်းသွားခြင်း အရောင်း     အဝယ်အေးခြင်းကြောင့် ယခင်အပတ် ၄၅ ပိဿာ အရည်အသွေးအကောင်းဆုံး ၃၃၀၀၀၀ကျပ်မှ ယခုအပတ် ၃၆၀၀၀၀ ကျပ်သို့ ဈေးမြင့်သွားသည်။ နှမ်းနက်ဈေးနှုန်းအနေဖြင့် စမုံနှမ်းနက်မှာ အရည်အသွေးအက်စစ်ပါဝင်မှုအနည်းအများအလိုက် အရောင်းအ ဝယ်အေးသော်လည်း အနိမ့်ဆုံး ၆၈၀၀၀၀ကျပ်မှ ၇၇၀၀၀၀ ကျပ် ဈေးအမျိုးမျိုးဖြင့် ရောင်းဝယ်နေသည်။ ဆောင်းနှမ်းနက်မှာ ၄၅ ပိဿာ ၅၀၀၀၀၀ ကျပ်ဖြင့် လုပ်ငန်းသမားနှင့် ရန်ကုန်ဝယ်လက်အနည်းငယ် ရှိသည်။

ပန်းနှမ်းဈေးနှုန်းမှာ အသစ်မဝင်သေးခြင်း၊ လက်ကျန်နည်းခြင်း၊ ဘယဆေးသမားနှင့် ရောဆီသမားအ ဝယ်ရှိခြင်းကြောင့် ယခင်အပတ် ၄၅ ပိဿာ ၂၈၀၀၀၀ ကျပ်မှ ၃၀၀၀၀၀ကျပ်သို့ ဈေးမြင့်သွားသည်။ နေကြာဈေးနှုန်းမှာ ဆောင်းနေကြာအသစ်ဝင်ရောက်သော်လည်း အဝင်နည်းခြင်း၊ ဆီစက်သမား အဝယ်ရှိခြင်းကြောင့် ၂၇ ပိဿာ ၂၁၅၀၀၀ ကျပ်မှ ၂၂၅၀၀၀ သို့ ဈေးမြင့်သွားသည်။

ပဲမျိုးစုံဈေးကွက်

မတ်ပဲဈေးနှုန်းမှာ ပဲခွဲစက်များ အဝယ်ပုံမှန်ရှိခြင်း၊ အဝင်နည်းခြင်းကြောင့် ၃ တင်းတစ်အိတ် ကျောက်ရစ်ပဲ ၂၇၈၀၀၀ ကျပ်မှ ၂၈၀၀၀၀ ကျပ်သို့ ဈေးမသိမသာမြင့်သွားပြီး အညာပဲများမှာ ၂၇၅၀၀၀ ကျပ်ဖြင့် ဈေးတည်ငြိမ်နေသည်။    ပဲတီစိမ်းဈေးနှုန်းအနေဖြင့် အသစ်အဝင်နည်းသွားသော်လည်း ပဲခွဲစက်များ ပုံမှန်ဝယ်ယူမှုသာ ရှိပြီး တရုတ်ဝယ်လက်နည်းခြင်းကြောင့် အရည်အသွေးပေါ်မူတည်၍ အနိမ့်ဆုံး ၃တင်းတစ်အိတ် ၂၆၀၀၀၀ ကျပ် မှ ၂၉၀၀၀၀ ကျပ် ဈေးအမျိုးမျိုးဖြင့် အရောင်းအဝယ်အေး ဈေးတည်ငြိမ်နေသည်။    ပဲစဉ်းငုံ (ဖြူ/နီ) တို့မှာ အသစ်များ အဝင်ရှိခြင်း၊ ပဲခွဲစက်နှင့် ရန်ကုန်ဝယ်လက်နည်းခြင်း အရောင်း အဝယ်အေးခြင်းကြောင့် ၃တင်းတစ်အိတ် ၂၈၇၀၀၀ ကျပ်မှ ၂၇၅၀၀၀ ကျပ်သို့ လည်းကောင်း၊ ပဲစဉ်းငုံဖြူ မှာလည်း လုပ်ငန်းသုံးနှင့် ပဲခွဲစက်များ အဝယ်နည်းခြင်းကြောင့် ၃တင်း တစ်အိတ် ၂၅၇၀၀၀ ကျပ်မှ ၂၅၀၀၀၀ ကျပ်သို့ ဈေးမသိမသာ နိမ့်သွားသည်။ ပဲပုတ် (ရှမ်း/မြန်မာ) တို့အနက် ပဲပုတ်(မြန်မာ)မှာ အသစ်မဝင်သေးခြင်း၊ လက်ကျန်နည်းခြင်း၊  လှောင်သမားထံမှ ဝယ်ရခြင်း၊ လုပ်ငန်းသမား အဝယ်ပုံမှန်ရှိခြင်းကြောင့် ယခင်အပတ် ၃၅၀၀၀၀ ကျပ်မှ ၄၂၀၀၀၀ ကျပ်သို့ ဈေးများစွာ မြင့် သွားသည်။ ပဲပုတ် (ရှမ်း)မှာ မိုးမိတ်၊ မိုးညှင်းတို့မှ အသစ်များ အဝင်နည်းခြင်း၊ ဆီစက်သမားအဝယ် ပုံမှန်ရှိခြင်းကြောင့် မိုးမိတ်ပဲ အရည်အသွေးအကောင်းဆုံး ၃၇၀၀၀၀ ကျပ် မိုးညှင်းပဲ အရည်အသွေး အကောင်းဆုံး ၃၈၀၀၀၀ ကျပ်မှ ၄၅၀၀၀၀ ကျပ်သို့ ဈေးမြင့်သွားသည်။ ကုလားပဲဈေးနှုန်းများအနေဖြင့် ကုလားပဲ (လုံးဖြူကြီး)မှာ အသစ်အဝင်နည်းသေးခြင်း၊ လုပ်ငန်းသမား အဝယ်ပုံမှန်ရှိခြင်းကြောင့် ယခင်အပတ် ၃တင်း တစ်အိတ် ၂၂၀၀၀၀ ကျပ်မှ ယခု ၂၂၇၀၀၀ ကျပ်သို့ ဈေးမြင့်သွားသည်။ ကုလားပဲ၊ လုံးဝါကြီးမှာ အသစ်ဝင်ရောက်သော်လည်း အဝင်နည်းခြင်း၊ ပဲခွဲစက်များ ပုံမှန်ဝယ်ယူမှုရှိခြင်း၊ လက်ကျန်နည်းခြင်းကြောင့် ၃တင်း တစ်အိတ် ၂၁၇၀၀၀ ကျပ်မှ ၂၁၅၀၀၀ ကျပ်သို့  ဈေးမသိမသာနိမ့်သွားသည်။ ခွဲခြမ်းမှာ အလှူပွဲများ ပေါလာခြင်း၊ အမြင့်ဈေးဖြင့် ခွဲခြမ်းဝယ်ယူကြိတ်ခွဲရခြင်း၊ ယခင်လက်ကျန်နည်း၍ အသစ်ဈေးဖြင့် ကြိတ်ခွဲရခြင်းကြောင့် ယခင်အပတ် တစ်ပိဿာ ၅၄၀၀ ကျပ်မှ ယခုအပတ် ၅၇၀၀ ကျပ်သို့ ဈေးမြင့်သွားသည်။

ပဲယင်းမှာ အသစ်ဝင်ရောက်မှုရှိပြီး အရည်အသွေး ကောင်းခြင်း၊ နယ်ဝင်နည်းခြင်း၊ ပဲခွဲစက်များ ပုံမှန်ဝယ်ယူမှုရှိခြင်းကြောင့် ယခင်အပတ် ၃တင်း တစ်အိတ် ၂၃၅၀၀၀ ကျပ်မှ ၂၅၀၀၀၀ ကျပ်သို့ ဈေးမြင့်သွားသည်။ မြေတောက်ပဲမှာ မုံရွာလက်ကျန် အဟောင်း ၃တင်း တစ်အိတ် ၂၄၀၀၀၀ ကျပ်၊ ကလေး၊ တမူးမှ ဝင်သော မြေတောက်ပဲ အသစ် အရည်အသွေးပေါ်မူတည်၍ ၃ တင်းတစ်အိတ် ၂၈၀၀၀၀ မှ ၂၉၀၀၀၀ ကျပ်ဖြင့် လုပ်ငန်းသမား၊ အကြော်အလှော်သမားများ ဝယ်ယူမှုပုံမှန်ရှိ သည်။ စားတော်ပဲ (ကျွန်း)မှာ အသစ်ဝင်ရောက်ခြင်း၊ လက်လီသမား အဝယ်ပုံမှန်ရှိခြင်းကြောင့် ၃တင်းတစ် အိတ် ၆၄၀၀၀၀ ကျပ်မှ ၆၅၀၀၀၀ ကျပ်သို့ ဈေးမသိမသာ မြင့်သွားသည်။

ကျောက်တွင်းပဲကြီး (ကြီး) အသစ်များ ဝင်ရောက်ခြင်း၊ အရည် အသွေးကောင်းခြင်း၊ လုပ်ငန်းသမားလှောင်သမား အဝယ်ရှိခြင်းကြောင့် ယခင်အပတ် ၃ တင်းတစ် အိတ် ၄၂၀၀၀၀ ကျပ်မှ ယခုအပတ် ၄၉၅၀၀၀ ကျပ်ထိ ဈေးမြင့်သွားပြီး မိုးမိတ်ပဲ ၄၁၀၀၀၀ ကျပ်ဖြင့် တည်ငြိမ်နေသည်။ ပဲကြီး(သေး) မှာ အဝင်ပုံမှန်လက်လီသမား အဝယ်ပုံမှန်ရှိခြင်းကြောင့် တစ်အိတ် ၄၁၀၀၀၀ ကျပ်ဖြင့် ဈေးတည်ငြိမ်နေသည်။ ထောပတ်ပဲ (ကြီး/သေး) တို့မှ အသစ်အဝင်များလာခြင်း၊ လုပ်ငန်းသမား အကြော်/လှော်သမား အဝယ်ပုံမှန် ရှိခြင်းကြောင့် ယခင်အပတ်၃တင်း တစ်အိတ် ၃၉၀၀၀၀ ကျပ်မှ ၃၈၀၀၀၀ ကျပ်သို့ ဈေးမသိမသာနိမ့်သွားပြီး ထောပတ်ပဲ (သေး)မှာ လက်လီသမား အဝယ်များခြင်းကြောင့် ယခင်ပတ် ၂၂၀၀၀၀ ကျပ်မှ ၂၈၀၀၀၀ ကျပ်သို့ ဈေးမြင့်နေသည်။ ပဲလွန်းဖြူဈေးနှုန်းမှာ ပဲလွန်းဖြူအသစ်များ စတင်ဝင်ရောက်လာသဖြင့် ယခင်အပတ် ၃တင်း တစ်အိတ် ၂၅၅၀၀၀ ကျပ်မှ ယခုအပတ် ၂၄၀၀၀၀ ကျပ် သို့ ဈေးနိမ့်သွားသည်။

စားဖိုဆောင်သီးနှံ‌ဈေးကွက်

ယခုအပတ် ငရုတ်ခြောက် (ရှည်)မှာ ဧရာဝတီတိုင်းဘက်မှ ဝင်ရောက်ပြီး တစ်ပိဿာ ၁၈၅၀၀ ကျပ်၊ ငရုတ်စို (လတ်)တစ်ပိဿာ ၁၈၀၀၀ ကျပ်၊ ဧရာဝတီ ငရုတ်(ပွ) တစ်ပိဿာ ၂၅၀၀၀ ကျပ်ဖြင့် မန္တလေးလက်လီဆိုင်များနှင့် အမှာရှိသောမြို့များသို့ တင်ပို့သည်။ ကြက်သွန်နီဈေးနှုန်းမှာ မြစ်သားကြက်သွန်များအဝင်နည်းသွားခြင်း၊ အရည်အသွေးကောင်းခြင်း‌ ကြောင့် မြို့တွင်းသုံးဝယ်ယူမှုများသော်လည်း ကြီးတစ်ပိဿာ ၂၀၀၀ ကျပ်မှ ယခုအပတ်၂၈၀၀ ကျပ် သို့ ဈေးမြင့်သွားပြီး လတ်တစ်ပိဿာ ၂၃၀၀ ကျပ်ဖြင့် ဈေးတည်ငြိမ်နေပြီး ကြက်သွန်နီ(သေး)မှာ ၁၈၀၀ ကျပ်မှ ၂၂၀၀ကျပ် သို့ ဈေးမြင့်သွားသည်။ ကြက်သွန်ဖြူ(တရုတ်)မှာ လမ်းပန်းဆက်သွယ်ရေးကြောင့် တစ်ပိဿာ ၁၂၀၀၀ ကျပ်မှ ၁၄၀၀၀ ကျပ်သို့ ဈေးမြင့်သွားသည်။ ကြက်သွန်ဖြူ (မြန်မာ)မှာ အရည်အသွေးပေါ်မူတည်၍ တစ်ပိသာ ၅၀၀၀ ကျပ်မှ ၁၀၀၀၀ ကျပ်ထိ ဈေးအမျိုးမျိုးဖြင့် ရောင်းဝယ် နေသည်။

အာလူးဈေးနှုန်းအနေဖြင့် အောင်ပန်းအာလူးများ အဝင်များလာခြင်းကြောင့် အိုကေတစ်ပိဿာ ၃၂၀၀မှ ၃၀၀၀ ကျပ်သို့ ဈေးနိမ့်သွားပြီး အေဝမ်းတစ်ပိဿာ ၂၈၀၀ ကျပ်၊ ဆွဲတစ်ပိဿာ ၂၅၀၀ ကျပ်ဖြင့် ရောင်းဝယ်နေသည်။

သစ်သီးဝလံနှင့် ဟင်းသီး/ရွက်ဈေးကွက်

မန္တလေးဈေးကွက်တွင် သစ်သီးဝလံဈေးနှုန်းမှာ ဖရဲသီးဈေးနှုန်းမှာ ချောင်းဦး၊ သဲတော၊ ဝမ်းတွင်း၊ ပုသိမ်ကြီး၊ တံတားဦးတို့မှ လှိုင်လှိုင်ဝင်ရောက်ပြီး အရည်အသွေး‌ပေါ်မူတည်၍ တစ်လုံး ၁၅၀၀ကျပ်မှ ၆၀၀၀ ကျပ်ထိ ဈေးအမျိုးမျိုးဖြင့် ရောင်းဝယ်နေသည်။ ဝမ်းတွင်း၊ ကျောက်ဆည်၊ နွားထိုးကြီးတို့မှ သခွားမွှေး၊ ‌ရွှေသခွားမွှေးများလည်း အဝင်များပြီး အရည်အသွေးအမျိုးမျိုးဖြင့် တစ်လုံး ၁၀၀၀ကျပ်မှ ၁၅၀၀ကျပ်ဖြင့် ရောင်းဝယ်မှုရှိသည်။ သီပေါ၊ တန့်ယန်းတို့မှ နာနတ်သီးများ လှိုင်လှိုင်ဝင်ရောက်မှုရှိပြီး အရည် အသွေးပေါ် မူတည်၍ တစ်လုံး ၈၀၀ကျပ်မှ ၃၀၀၀ကျပ်၊ ရွာငံမှ ထောပတ်သီး အရည်သွေးကောင်း ၁၂၀လုံးပါ တစ်အိတ် ၁၅၀၀၀၀ကျပ်၊ ပြင်ဦးလွင်၊ တောင်ကြီးတို့မှ စတော်ဘယ်ရီ ၅ပိဿာဝင် တစ်ဖာလျှင် ၄၀၀၀၀ကျပ်၊ ရမည်းသင်း စပျစ်သီး တစ်ပိဿာ ၁၅၀၀၀ကျပ်၊ သင်္ဘောသီးတစ်လုံး ၃၀၀၀ကျပ်ဖြင့် မိုးကုတ်၊ ကြပ်ပြင်၊ ကသာ၊ ထီးချိုင့်၊ မြစ်ကြီးနား စသော အမှာရှိသော မြို့များသို့ တင်ပို့သည်။

ဟင်းသီး/ရွက်ဈေးနှုန်းအနေဖြင့် ခရမ်းချဉ်(ရှမ်းတောင်) မဝင်သေးဘဲ မုံရွာ တရုတ်(တိုင်ပေ)များသာ ဝင်ရောက်ပြီး ၂၀ ပိဿာ တစ်သေတ္တာ ၅၀၀၀၀ကျပ်ဖြင့် မြို့တွင်းသုံးဝယ်ယူမှုသာရှိသည်။ ငရုတ်စို (ရှည်နှင့်လတ်) မှာ မုံရွာ၊ ချောင်းဦးမှ ဝင်ရောက်ပြီး ငရုတ်စို (ရှည်) တစ်ပိဿာ ၄၀၀၀ကျပ်၊ ငရုတ်စို (လတ်) တစ်ပိဿာ ၅၀၀၀ ကျပ်ဖြင့် ငပိထောင်း၊ လက်ဖက်သမား အဝယ်သာရှိသည်။ အောင်ပန်း၊ ပြင်ဦးလွင်ဘက်မှ ပန်းမုံလာပွင့် တစ်ပွင့် ၁၀၀၀ကျပ်၊ ဂေါ်ဖီတစ်ထုပ် ၁၅၀၀ကျပ်၊ ‌ဂေါ်ရခါးသီး ၁လုံး ၃၀၀ကျပ်၊ မုံလာဥနီ တစ်ပိဿာ ၅၀၀၀ ကျပ်ဖြင့် လက်လီဆိုင်များနှင့် စားသောက်ဆိုင်များ ပုံမှန်ဝယ်ယူမှုရှိသည်။

ခင်မေကြည်