အိန္ဒိယမှ ထုတ်လုပ်သည့် အီသနောပမာဏ၏ ထက်ဝက်နီးပါးမှာ ပြောင်းသီးနှံမှ ထုတ်လုပ်ခြင်းဖြစ်

အိန္ဒိယနိုင်ငံ၏ အီသနောရောစပ်ခြင်းအစီအစဉ်တွင် ပြောင်းသီးနှံ၏ အခန်းကဏ္ဍသည် ၂၀၂၄-၂၅ ဘဏ္ဍာနှစ် (နိုဝင်ဘာလမှ အောက်တိုဘာလအထိ) အီသနောထောက်ပံ့မှုနှစ် (Ethanol Supply Year-ESY) အတွင်း သိသိသာသာ အားကောင်းလာခဲ့ပြီး ယင်းသည် ကုန်ကြမ်းအသုံးပြုမှု ပြောင်းလဲလာခြင်းကို ရှင်းလင်းစွာ ထင်ဟပ်စေကြောင်း သိရသည်။ 

အီသနော၊ ဇီဝစွမ်းအင်နှင့် အရက်ထုတ်လုပ်သူများ၏ ကုန်သွယ်ရေးအဖွဲ့ဖြစ်သော အိန္ဒိယ နိုင်ငံလုံးဆိုင်ရာ အရက်ချက်လုပ်သူများအသင်း (All India Distillers Association-AIDA) မှ မျှဝေ ထားသော နောက်ဆုံးအချက်အလက်များအရ နိုဝင်ဘာမှ အောက်တိုဘာအတွင်း အီသနော စုစုပေါင်းထုတ်လုပ်မှု၏ ထက်ဝက်နီးပါး (ခန့်မှန်း ခြေ ၄၈ ရာခိုင်နှုန်း) မှာ ပြောင်းသီးနှံကို အဓိက ကုန်ကြမ်းအဖြစ် အသုံးပြုခဲ့ခြင်းဖြစ်ကြောင်းနှင့် ယခင်ထောက်ပံ့မှုနှစ်တွင် ၄၂ ဒသမ ၆ ရာခိုင်နှုန်းရှိခဲ့ရာမှ သိသိသာသာတိုးတက်လာခြင်းဖြစ်ကြောင်း သိရသည်။

လွန်ခဲ့သော နှစ်အနည်းငယ်အတွင်း ပြောင်းသီးနှံသည် အစဉ်အလာအရ အသုံးပြုခဲ့သည့် ကြံအခြေခံကုန်ကြမ်းများကို ကျော်လွန်၍ နိုင်ငံအတွင်း အီသနောထုတ်လုပ်မှု လုပ်ငန်းစဉ်အတွက် အဓိက ကုန်ကြမ်းဖြစ်လာခဲ့ကြောင်းသိရသည်။ “ယခုနှစ် အီသနောခွဲတမ်း စုစုပေါင်းအနက် ပြောင်း အခြေခံထုတ်လုပ်မှုသည် အစိုးရ၏ အားပေးသော မူဝါဒများနှင့် ဝယ်ယူသည့်ဈေးနှုန်း မြင့်တက်လာမှု (ပြောင်းအခြေခံ အီသနောတစ်လီတာလျှင် ရူပီး ၇၁ ဒသမ ၈၆) တို့ကြောင့် မကြုံစဖူးတိုးတက် လာခဲ့ပါတယ်” ဟု AIDA က ထုတ်ပြန်ချက်တွင် ဖော်ပြခဲ့သည်။ ပျက်စီးသွားသော အစားအစာ ကောက်ပဲသီးနှံများနှင့် ပိုလျှံသော ကောက်ပဲသီးနှံများ အပါအဝင် အခြားသော အစေ့အဆန်များ၊ ကြံရည်၊ B-heavy တင်လဲရည်နှင့် C-heavy တင်လဲရည်တို့သည်လည်း ကုန်ကြမ်းအဖြစ် မျှတစွာ ပါဝင်လျက်ရှိကြောင်း သိရသည်။

အိန္ဒိယနိုင်ငံ၏ အီသနောထောက်ပံ့မှု အစီအစဉ်သည် အားကောင်းသော အရှိန်အဟုန်ဖြင့် ဆက်လက်ဖြစ်ပေါ်နေပြီး စာချုပ်ချုပ်ဆိုထားသည့် ပမာဏ လီတာ ၁,၁၆၃ ကုဋေတွင် စုစုပေါင်း ထောက်ပံ့မှုမှာ လီတာ ၁,၀၃၉ ကုဋေခန့်အထိ ရှိခဲ့ရာ ၈၉ ရာခိုင်နှုန်းအထိ ပြီးမြောက် အောင် ဆောင်ရွက်နိုင်ခဲ့ကြောင်း တွေ့ရှိရသည်။ ပြောင်းနှင့် ဆန်တို့အပါအဝင် အစေ့အဆန်အခြေခံ ကုန်ကြမ်း စုစုပေါင်းမှာ လီတာ ၇၁၈ ကုဋေရှိပြီး ထောက်ပံ့ပေးခဲ့သည့် အီသနောပမာဏ၏ ၆၉ ရာခိုင်နှုန်းနီးပါးအထိ ပါဝင်ခဲ့ရာ ယင်းသည် ယခင်နှစ်က ၅၉ ရာခိုင်နှုန်းရှိခဲ့ရာမှ တိုးတက်လာခြင်းဖြစ်ကြောင်း သိရသည်။ ၂၀၂၄-၂၅ ဘဏ္ဍာနှစ်အတွင်း ကြံအခြေခံကုန်ကြမ်းများမှာ လီတာ ၃၂၁ ကုဋေ (သို့မဟုတ် ၃၁ ရာခိုင်နှုန်း) ရှိခဲ့ပြီး ယခင်နှစ်က ၄၁ ရာခိုင်နှုန်းရှိခဲ့ရာမှ လျော့ကျသွားခဲ့ကြောင်း သိရသည်။

အိန္ဒိယနိုင်ငံ၏ အီသနောရောစပ်ခြင်းအစီအစဉ်တွင် ပြောင်းကို အဓိကကုန်ကြမ်းအဖြစ် သိသိသာသာ ပြောင်းလဲအသုံးပြုလာခြင်းသည် မြန်မာ့ပြောင်းသီးနှံ (Yellow Maize) တင်ပို့မှုကဏ္ဍအတွက် အရေးပါသော ဈေးကွက်အခွင့်အလမ်းသစ်တစ်ခု ဖြစ်လာနိုင်ကြောင်း သုံးသပ်ရပါသည်။ အိန္ဒိယနိုင်ငံ၏ ပြည်တွင်းပြောင်းဝယ်လိုအားမှာ အီသနောစက်ရုံများ၏ လိုအပ်ချက်ကြောင့် ဆက်လက်မြင့်တက်နေဦးမည်ဖြစ်ရာ၊ မြန်မာနိုင်ငံအနေဖြင့် ပထဝီဝင်အနေအထားအရ နီးစပ်မှုနှင့် ထုတ်လုပ်မှုစွမ်းအားကို အသုံးချ၍ အိန္ဒိယ၏ သွင်းကုန်မူဝါဒများနှင့် အရည်အသွေးစံနှုန်းများကို ကိုက်ညီအောင် ညှိနှိုင်းဆောင်ရွက်ခြင်းဖြင့် နှစ်နိုင်ငံကုန်သွယ်မှုတွင် ပြောင်းသီးနှံ တင်ပို့မှုကို ပိုမိုတိုးမြှင့်ဖော်ဆောင်နိုင်မည့် အလားအလာကောင်းများ ရှိနေကြောင်း တင်ပြလိုက်ရပါသည်။

ကောင်းထွဋ်အောင်  

The Hindu Businessline, Maize now accounts for close to half of ethanol produced in India, February 19, 2026.