အမေရိကန် သစ်သီးဝလံ ဟင်းသီးဟင်းရွက်နှင့် အခွံမာသီး များအပေါ် အခွန်ကောက်ခံမှု အိန္ဒိယ လျှော့ချရန် စီစဉ်

Donald Trump နှင့် Narendra Modi တို့အကြား အခွန်လျှော့ချရေး ကုန်သွယ်မှု သဘောတူညီ ချက်၏ မူကြမ်းများ ထွက်ပေါ်လာသည်နှင့်အမျှ အိန္ဒိယသည် ၎င်း၏ အဓိက လယ်ယာကဏ္ဍထုတ်ကုန်များအတွက် ကာကွယ်မှုများကို ထိန်းသိမ်းထားရင်း အမေရိကန်ပြည်ထောင်စု အား ၎င်း၏လယ်ယာဈေးကွက်သို့ အကန့် အသတ်ဖြင့် ဝင်ရောက်ခွင့်ပေးမည်ဟု နှစ်နိုင်ငံစလုံးမှ အရာရှိများက ပြောကြားခဲ့သည်။

အမေရိကန်ကုန်သွယ်ရေးကိုယ်စားလှယ် Jamieson Greer က CNBC သို့ ပြောကြားရာတွင် သဘောတူညီချက်အရ အမေရိကန်စက်မှုကုန်စည်များအပေါ် အိန္ဒိယ၏ အခွန်များကို ၁၃ ဒသမ ၅ ရာခိုင်နှုန်းမှ သုညအထိ လျှော့ချပေးမည်ဖြစ် ကြောင်း၊ အိန္ဒိယသည် အမေရိကန်မှ အခွံမာသီးများ၊သစ်သီးများနှင့် ဟင်းသီးဟင်းရွက်များအပေါ် အခွန်များကိုလည်း ဖယ်ရှားပေးမည်ဖြစ်ကြောင်း၊ အပြန်အလှန်အားဖြင့် အမေရိကန်ပြည်ထောင်စုသည် အိန္ဒိယ ကုန်စည်များ အပေါ် အခွန်များကို ၅၀ ရာခိုင်နှုန်းမှ ၁၈ ရာခိုင် နှုန်းအထိ လျှော့ချပေးမည်ဖြစ် ကြောင်း ပြောကြားသည်။

အိန္ဒိယအစိုးရအရာရှိတစ်ဦးက ရိုက်တာသတင်းဌာနသို့ ပြောကြားရာတွင် သဘောတူ ညီ ချက်တွင်   အမေရိကန်ကုန်ပစ္စည်းများကိုအမေရိကန်ဒေါ်လာ ၅၀၀ ဘီလီယံဘိုး  နှစ်ပေါင်းများစွာ ဝယ်ယူရန် ကတိကဝတ် ပါဝင်ကြောင်း၊ နှစ်ပေါင်းများစွာအတွင်း အပြီးသတ် လုပ်ဆောင် သွားမည်ဖြစ်ကြောင်း၊ လာမည့်လများအတွင်း ပိုမိုကျယ် ပြန့်သော သဘောတူညီချက်ကို ညှိနှိုင်းသွားမည်ဖြစ်ကြောင်း ထပ် လောင်း ပြောကြားခဲ့သည်။ သဘော တူညီချက်တွင် အမေရိကန် ကားများအပေါ် အခွန်များကို ချက်ချင်းလျှော့ချခြင်းလည်းပါဝင်သည်။

စတင်မည့်ရက်စွဲကို ကြေညာထားခြင်းမရှိသေးကြောင်း၊ အမေရိကန်နှင့် အိန္ဒိယအရာရှိများသည် ၎င်းမူကြမ်းကို အပြီးသတ်နေဆဲဖြစ် ကြောင်း ယခုသီတင်းပတ် သို့မဟုတ် မကြာမီ အချိန်အတွင်း ပြီးစီးမည်ဖြစ်ကြောင်း Greer ကပြောကြားခဲ့သည်။

စိုက်ပျိုးရေးအတွက် သဘောတူညီချက်သည် ဈေးကွက်ဝင်ရောက်ခွင့်တစ်စိတ်တစ်ပိုင်းကို သဘောတူညီမှုရရှိပြီးဖြစ်သည်။အိန္ဒိယသည် လယ်ယာကဏ္ဍ၏ "အဓိကနေရာများ" ကို ဆက်လက် ကာကွယ်သွားမည်ဖြစ်သော်လည်း အမေရိကန်ပြည်ထောင်စုသည် နောက်ထပ် ဝင်ရောက်ခွင့်ကို ဆက်လက် ရှာဖွေသွားမည်ဖြစ်ကြောင်း Greer က ပြောကြားသည်။ အခွံမာသီး၊ သစ် သီးဝလံနှင့် ဟင်းသီးဟင်းရွက်များ အတွက် အိန္ဒိယ၏ အခွန်လျှော့ချမှု များသည် အမေရိကန်တင်ပို့ရောင်း ချသူများအတွက် အခွင့်အလမ်း များကို တိုးချဲ့ပေးလိမ့် မည်ဖြစ်ကြောင်း ၎င်းက ပြောသည်။

အမေရိကန်ပြည်ထောင်စုသည် အိန္ဒိယကုန်စည်များအပေါ် ၁၈ ရာ ခိုင်နှုန်း အခွန် ကောက်ခံမှုကို ဆက်လက်ထားရှိမည်ဖြစ်ကြောင်း Greer က ပြောကြားခဲ့ပြီး အမေရိကန် နှင့် အိန္ဒိယ၏ ကုန်သွယ်မှု ပိုငွေပမာဏ တိုးတက်မှုကို ကိုးကားဖော်ပြခဲ့သည်။ အမေရိကန် သန်းခေါင် စာရင်း ဗျူရို၏ အချက်အလက်များအရ ၂၀၂၅ ခုနှစ်၏ ပထမ ၁၁ လအတွင်း ထိုပိုငွေသည် အမေရိကန် ဒေါ်လာ ၅၃ ဒသမ ၅ ဘီလီယံအထိ ရောက်ရှိခဲ့ပြီး ၂၀၂၄ ခုနှစ် တစ်နှစ်လုံးအတွက် အမေရိကန်ဒေါ်လာ ၄၅ ဒသမ ၈ ဘီလီယံ ရှိခဲ့ကြောင်း သိရှိရပါသည်။

ဟေမာန်အောင်မင်း

https://www.freshplaza.com/asia/article/9808136/india-to-cut-tariffs-on-u-s-fruits-vegetables-and-tree-nuts/