ကြက်သွန်နီစျေးနှုန်းများ ကျဆင်းမှုကြောင့် တန်ချိန် ၁၅၀၀၀ ပြည်ပတင်ပို့ရန် တောင်ကိုရီးယား စီမံ

တောင်ကိုရီးယားအစိုးရသည် ကြက်သွန်နီလက်ကား စျေးနှုန်းများ ဆက်လက်ကျဆင်းနေချိန်တွင် ကြက်သွန်နီ စျေးကွက် တည်ငြိမ်စေရန် ရည်ရွယ်သည့် ရောင်းဝယ် ဖောက်ကားမှု လုပ်ငန်းအစီအစဉ်တစ်ခုကိုကြေငြာခဲ့သည်။ စိုက်ပျိုး ရေး၊အစားအသောက်နှင့် ကျေးလက် ဒေသဆိုင်ရာ ဝန်ကြီးဌာနက အဆိုပါအစီအမံများတွင် အစိုးရစုဆောင်းထားရှိသော ကြက်သွန်နီ များ ပြည်ပတင်ပို့ခြင်းနှင့် စားသုံးမှု တိုးမြှင့်စေရန် ကာလတို လက်လီ လျှော့စျေးဖြင့် ရောင်းချပေးခြင်းတို့ ပါဝင်ကြောင်း ကြေငြာခဲ့ သည်။

ဝန်ကြီးဌာန၏ ထုတ်ပြန်ချက်အရ သိုလှောင်ထားသော အဆင့်မီ ကြက်သွန်နီ၏ ဇန်နဝါရီ လကုန်ပိုင်း လက်ကားဈေးနှုန်းသည် တစ်ကီလို ဂရမ်လျှင် ၁၀၂၂ ဝမ် ဖြစ်ပြီး ယင်းမှာ အမေရိကန်ဒေါ်လာ သုညဒသမ ၇၆ ခန့်နှင့် ညီမျှသည်။ ၎င်းသည် တစ်နှစ်ထက်တစ်နှစ် ၂၇ ဒသမ ၆ ရာခိုင်နှုန်း လျော့နည်းခြင်းဖြစ်ပြီး လွန်ခဲ့သည့်နှစ်များ၏ ပျမ်းမျှစျေးနှုန်းထက် ၂၃ ဒသမ ၃ ရာခိုင်နှုန်း ကျဆင်း နေပါသည်။ သိုလှောင်ထားသော ကြက်သွန်နီ၏  လက်ကား‌ဈေး နှုန်းသည် ယေဘုယျအားဖြင့် အသစ်နှုတ်သိမ်းရာသီမတိုင်မီ ဇန်နဝါရီမှ မတ်လအတွင်း မြင့်တက်လေ့ရှိသော်လည်း အစိုးရ အရန် သိုလှောင်ပမာဏအပါအဝင် ၂၀၂၅ ခုနှစ်အတွက် စုစုပေါင်း သိုလှောင်ထားသော ကြက်သွန်နီ ပမာဏမှာ ယခင်နှစ်ထက် ၈ ဒသမ ၇ ရာခိုင်နှုန်း ပိုမိုမည်ဟု ခန့်မှန်းထားသည်။

ဝန်ကြီးဌာနအနေဖြင့် စျေးနှုန်းဖိအားဖြစ်ပေါ်ရခြင်းသည် ဝယ်လို အားယုတ်လျော့ခြင်းနှင့် ဈေးကွက် အရည်အသွေးနိမ့်သော ကြက်သွန်နီများ တင်ပို့မှုတိုးလာခြင်းတို့ ပေါင်းစပ် မှုကြောင့် ဟု သတ်မှတ်ခဲ့သည်။ အရာရှိများက ဇန်နဝါရီနှင့် မတ်လအတွင်း စျေးနှုန်းများ လက်ရှိ အခြေ အနေအတိုင်း ဆက်ရှိနေပါက စိုက်ကွင်းတွင်း ရောင်းဝယ်မှုများနှင့် ရာသီသစ် ကြက်သွန်နီ ဝင်ရောက် လာရေးနှင့် စျေးနှုန်းသတ်မှတ်ရေးတို့အပေါ် သက်ရောက်မှုရှိနိုင်ပြီး စောစီးစွာ စီမံဆောင်ရွက်ရန် လိုအပ်ကြောင်း ပြောကြားသည်။

တုံ့ပြန်ဆောင်ရွက်မှုအဖြစ် အစိုးရသည် ဝယ်ယူစုဆောင်းထားသော ကြက်သွန်နီတန်ချိန်၂၅၀၀၀ အနက် မှ တန်ချိန် ၁၅၀၀၀ ကို ပြည်ပသို့ တင်ပို့ရန် စီမံထားသည်။ ပို့ကုန်များကို ဗီယက်နမ်၊ တရုတ်(တိုင်ပေ)၊ ဂျပန်၊ မလေးရှားနှင့် အခြားဈေးကွက်များကိုတင်ပို့ရန်ရည်ရွယ်ပါသည်။ ကျန်တန်ချိန် ၉၆၀၀ ကိုမူ ကန့်သတ်ထားသော အခြေအနေများတွင်သာ သုံးစွဲမည်ဖြစ်ပြီး  မတ်လ ကုန်ပိုင်းတွင် ကြက်သွန်နီသစ်များ တင်ပို့မှုစတင်ပြီးနောက် စျေးနှုန်းရုတ်တရက် မြင့်တက်ခြင်းကဲ့သို့သော မမျှော်လင့်ထားသည့် ရောင်း ဝယ်ဖောက်ကားမှု နှောင့်ယှက်ခြင်းများ ဖြစ်ပေါ်ပါက ထိုအခြေအနေ တွင်သာ အသုံးပြုရန် ရည်ရွယ်ထား သည်။

ဝန်ကြီးဌာနသည် ပြည်တွင်းစားသုံးမှုကို မြှင့်တင်ရန် ယခုလ ၁၆ ရက်နေ့အထိ စူပါမားကတ်များနှင့် ရိုးရာဈေးတန်းများတွင် ၄၀ ရာခိုင် နှုန်းအထိ လျှော့စျေးနှုန်းဖြင့် ရောင်း ချပံ့ပိုး ပေးသွားမည်။ လာမည့်လတွင် NongHyup စိုက်ပျိုးရေးလုပ်ငန်းအဖွဲ့နှင့် ကြက်သွန်နီ ဘဏ္ဍာ ရန်ပုံငွေ (onion checkoff fund) တို့ ပူးပေါင်း၍ ပြည်တွင်းထုတ် ကြက်သွန်နီများ အတွက် ထပ်မံ၍ အထူးဈေးရောင်းပွဲတော် များနှင့် လျှော့စျေးအစီအစဉ်များ ဆောင်ရွက်ရန် စီစဉ်ထား ရှိပါသည်။

ဝန်ကြီးဌာန၏ ဖြန့်ဖြူးရေးနှင့် စားသုံးသူမူဝါဒ ညွှန်ကြားရေးမှူးချုပ် Hong Inkiက "၎င်းကြက်သွန်နီ ရောင်းဝယ်ဖောက်ကားမှု စီမံခန့်ခွဲရေး အစီအမံသည် စျေးနှုန်းများအတွက် ကာလတိုတုံ့ပြန်မှု တစ်ခုထက်ကျော်လွန်၍ ယခုနှစ်အတွင်း ကြက်သွန်နီ၏ စုပေါင်းရောင်းဝယ် ဖောက်ကားမှု တည်ငြိမ်ရေး သေချာစေရန် ကြိုတင်ကာကွယ်သည့် အဆင့် တစ်ခုအနေဖြင့် အကောင်အထည် ဖော်ခဲ့ခြင်းဖြစ်သည်" ဟုပြောကြားခဲ့သည်။ ထို့အပြင် အစိုးရသည် စျေးနှုန်း တက်ချိန်၊ လျော့ကျချိန်‌ နှစ်ခုစလုံးတွင် ဈေးကွက်အခြေအနေများကို ဆက်လက်စောင့် ကြည့်ပြီး လိုအပ်ပါက တုံ့ပြန်ဆောင်ရွက်သွားမည်ဟု ၎င်းက ဖြည့်စွက်ပြောကြားခဲ့ကြောင်း သိရှိရသည်။ 

ဖုန်းမြတ်ဝင်းမောင်မောင်

https://www.freshplaza.com/asia/article/9808284/south-korea-plans-15-000-ton-onion-exports-as-prices-fall/