စပ်မျိုးပြောင်းမျိုးသစ်များ မျိုးရွေးချယ်ခြင်း ကွင်းသရုပ်ပြပွဲကျင်းပ ကျေးရွာသစ်လှုပ်ရှားမှုစံပြကျေးရွာများအား ရန်ပုံငွေထောက်ပံ့ပေးအပ်

နေပြည်တော်၊ ဖေဖော်ဝါရီ ၂၃

အစိုးရနှင့် ပုဂ္ဂလိက ပူးပေါင်းဆောင်ရွက်မှုဖြင့် စပ်မျိုးပြောင်းမျိုးစေ့ စီးပွားဖြစ်ထုတ်လုပ်ရန် အတွက် “စပ်မျိုးပြောင်းမျိုးသစ်များ မျိုးရွေးချယ်ခြင်း ကွင်းသရုပ်ပြပွဲ’’ ကို ဖေဖော်ဝါရီ ၂၃ ရက်နေ့ နံနက်ပိုင်းက နေပြည်တော်၊ တပ်ကုန်းမြို့နယ်ရှိ စိုက်ပျိုးရေးသုတေသနခြံ ၌ ကျင်းပရာအခမ်းအနားသို့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်နှင့် ဌာနဆိုင်ရာတာဝန်ရှိသူများ၊ မျိုးစေ့ထုတ်ကုမ္ပဏီများ မှ ကိုယ်စားလှယ်များ နှင့် ဒေသတောင်သူများ တက်ရောက်ကြသည်။

စပ်မျိုးပြောင်းမျိုးသစ်များ မျိုးရွေးချယ်ခြင်း ကွင်းသရုပ်ပြပွဲ တွင် မျိုးစေ့ထုတ်ကုမ္ပဏီများမှ ကိုယ်စားလှယ်များ၊ တောင်သူများက စပ်မျိုးပြောင်းမျိုးသစ်၂၈ မျိုး၏ အရည်အသွေးနှင့်အထွက်နှုန်း အပေါ် သဘောထားမှတ်ချက်များ ၊ အကြံပြုချက်များ တင်ပြကြရာ သက်ဆိုင်ရာပညာရှင်များက ဖြေကြားဆွေးနွေးကြသည်။

မြန်မာနိုင်ငံတွင် အစေ့ထုတ်ပြောင်းသီးနှံကို နှစ်စဉ် ဧက ၁ ဒသမ ၅၈ သန်းခန့် စိုက်ပျိုး ထုတ်လုပ် လျက်ရှိကာ စိုက်ဧရိယာ၏ ၈၅ ရာခိုင်နှုန်းကျော်သည် စပ်မျိုး မျိုးစေ့များကို အသုံးပြု၍ စိုက်ပျိုးလျက်ရှိကြောင်း၊  လိုအပ်သည့် စပ်မျိုးမျိုးစေ့များကို ပြည်ပနိုင်ငံအသီးသီးမှ တင်သွင်းရောင်းချ ဖြန့်ဖြူးရခြင်းကြောင့် သုံးစွဲရလျက်ရှိသည့် နိုင်ငံခြားငွေသုံးစွဲမှုအားလျှော့ချနိုင်စေရန် ပြည်တွင်း၌ လိုအပ်လျက်ရှိသော အစေ့ထုတ် ပြောင်းစပ်မျိုး မျိုးစေ့များကို ပြည်တွင်း၌ ထုတ်လုပ်ရောင်းချပေးနိုင်ရေးနှင့် စိုက်ပျိုးသူများ မျိုးစေ့လိုအပ်ချိန် လိုအပ်သည့်ပမာဏကို ဖြန့်ဖြူးပေးနိုင်ရေးအတွက် အခြေခံမိဘမျိုးစေ့ ထုတ်လုပ်ခြင်း နှင့် လိုအပ်သော သုတေသနလုပ်ငန်းများအား အစိုးရဌာနအပိုင်းက ကြိုးပမ်းဆောင်ရွက်လျက်ရှိသကဲ့သို့ စီးပွားဖြစ် မျိုးစေ့ထုတ်  ဖြန့်ဖြူးခြင်းကို ပုဂ္ဂလိကပိုင်းက ဆက်လက် ကြိုးပမ်းနိုင်ကြစေရန် စိုက်ပျိုးရေး၊မွေးမြူရေးနှင့်ဆည် မြောင်းဝန်ကြီးဌာနက အားပေးကူညီ ဆောင်ရွက်ပေးလျက်ရှိသည်။

စိုက်ပျိုးရေးသုတေသနဦးစီးဌာနက သုတေသနပြု ဖော်ထုတ် ရရှိထားသော အလားအလာကောင်း စပ်မျိုးပြောင်းမျိုးသစ်များကို မျိုးစေ့ကုမ္ပဏီများ၊ ဒေသခံပြောင်းစိုက်တောင်သူများကိုယ်တိုင် မျက်မြင် စိတ်ကြိုက် မျိုးရွေးချယ်နိုင်ကြစေရန် ၂၀၂၅ ခုနှစ်တွင်ကျင်းပခဲ့သည့် ပထမအကြိမ် စပ်မျိုးပြောင်း မျိုးသစ်များ မျိုးရွေးချယ်ခြင်းကွင်းသရုပ်ပြပွဲ၌ မျိုးစေ့ထုတ်ကုမ္ပဏီ ၆ ခု ပါဝင် ဆောင်ရွက်ခဲ့ပြီး ယနေ့ကျင်းပသည့် ဒုတိယအကြိမ် ကွင်းသရုပ်ပြပွဲတွင် မျိုးစေ့ကုမ္ပဏီ ၁၁ ခု ပါဝင် ဆောင်ရွက်ခဲ့သဖြင့် သုတေသနရလဒ် များ လက်တွေ့အသုံးချနိုင်ရေးအတွက် အရေးပါသည့် တိုးတက်မှုတစ်ရပ်ဖြစ်ကြောင်း၊ ၂၀၂၆-၂၀၂၇ မိုးသီးနှံ ပြောင်းစိုက်ဧရိယာများတွင် ပြည် တွင်းထုတ် စပ်မျိုးပြောင်းမျိုးစေ့များ အသုံးပြုစိုက်ပျိုးနိုင်မည်ဖြစ်ကြောင်း သိရသည်။ 

ထိုမှတစ်ဆင့် ပြည်ထောင်စုဝန်ကြီးသည် နေပြည်တော်၊ ဇေယျာသီရိမြို့နယ်၊ ရေဆင်း ရှိ စိုက်ပျိုးပညာပေးရေးနှင့် ကျေးလက်ဒေသ ဖွံ့ဖြိုးရေး သင်တန်းကျောင်း(AERDTC)ခန်းမ၌ ကျင်းပသည့် မြန်မာနိုင်ငံတွင် စွမ်းအားမြှင့်မီးဖိုများဖြန့်ဖြူးခြင်းစီမံကိန်း၏ ထောက်ပံ့ငွေဖြင့် ဆောင်ရွက်သည့် ကျေးရွာသစ်လှုပ်ရှားမှုစံပြကျေးရွာများအား ရန်ပုံငွေ ထောက်ပံ့ပေးအပ်ပွဲ အခမ်းအနား သို့ တက်ရောက် အားပေးသည်။

စိုက်ပျိုးရေးဦးစီးဌာနက ကျေးရွာသစ်လှုပ်ရှားမှုစံပြကျေးရွာ ၂၅၀ ရွာအား အကောင်အထည်ဖော် ဆောင်ရွက်လျက်ရှိပြီး အဆိုပါကျေးရွာများအနက် မြန်မာနိုင်ငံတွင် စွမ်းအားမြှင့်မီးဖိုများ ဖြန့်ဖြူးခြင်း စီမံကိန်း၏ အထောက်အပံ့ဖြင့် ၂၀၁၉-၂၀၂၀ ဘဏ္ဍာနှစ်မှ ၂၀၂၅-၂၀၂၆ ဘဏ္ဍာနှစ်အထိ စုစုပေါင်းကျေးရွာ ၁၀၆ ရွာ အကောင်အထည်ဖော် ဆောင်ရွက်နိုင်ခဲ့ရာ ကျေးရွာများ၏ ဝင်ငွေ တိုးပွားရေးကဏ္ဍ၊ စွမ်းဆောင်ရည်မြှင့်တင်ရေးကဏ္ဍနှင့် လူနေမှုပတ်ဝန်းကျင်ဖွံ့ဖြိုးတိုးတက်ရေးကဏ္ဍများအပေါ် လုပ်ငန်းဆောင်ရွက်မှု အခြေအနေများအား အကဲဖြတ်သုံးသပ်မှု ရလဒ်များအရ “A” အဆင့် ရရှိသော ကျေးရွာ ၃၀ ရွာ အား တစ်ရွာလျင် ရန်ပုံငွေ ကျပ်(၃၁၅)သိန်း ၊ “B” အဆင့်ရရှိသော ကျေးရွာ ၂၃ ရွာ အား တစ်ရွာလျင် ရန်ပုံငွေ ကျပ်သိန်း ၂၁၀ စီကို ဂုဏ်ပြုပေးအပ်ခဲ့ရာ ရန်ပုံငွေစုစုပေါင်း ကျပ်သိန်း ၁၄၂၈၀ ထောက်ပံ့ခဲ့ခြင်းဖြစ်ကြောင်း သိရသည်။

၎င်းနောက် ပြည်ထောင်စုဝန်ကြီးသည် နေပြည်တော်ကောင်စီရုံး ဇမ္ဗူသီရိခန်းမ၌ ကျင်းပသည့် အာဆီယံအပေါင်းသုံး အရေးပေါ်ဆန်အရန်ရိက္ခာအစီအစဉ်-၃ အရ ကိုရီးယားဆန် ၁,ဝ၂ဝ တန် လွှဲပြောင်းပေးအပ်ပွဲအခမ်းအနားသို့တက်ရောက်သည်။

အစီအစဉ်အရ ပြည်ထောင်စုဝန်ကြီး ဦးမင်းနောင် က ၂၀၂၅ ခုနှစ် မတ် ၂၈ ရက်နေ့က မြန်မာနိုင်ငံတွင် လှုပ်ခတ်ခဲ့သော ငလျင်ကြောင့် ထိခိုက် ခံစားခဲ့ရသည့် ပြည်သူများအတွက် APTERR အစီအစဉ်-၃ (၂ဝ၂၅)ဖြင့် ကိုရီးယားသမ္မတနိုင်ငံမှ လှူဒါန်းသည့် ဆန်တန်ချိန် ၃၀၀၀ အနက် နေပြည်တော်ကောင်စီနယ် မြေရှိ ငလျင်ဘေးသင့်ပြည်သူများအား ဖြန့်ဝေလှူဒါန်းရန် ဆန် ၁,ဝ၂ဝ တန် (၂၅,၅၀၀-အိတ်)ကို နေပြည်တော်ကောင်စီဥက္ကဋ္ဌ ဦးသန်းထွန်းဦး ထံ လွှဲပြောင်း ပေးအပ်သည်။

ယခုလွှဲပြောင်းပေးအပ်သော ကိုရီးယားဆန် ၁,၀၂၀ တန်သည် ငလျင်ဘေးသင့်ပြည်သူများအတွက် ဒုတိယအကြိမ်လှူဒါန်းခြင်းဖြစ်ပြီး ပထမအကြိမ် အဖြစ် ကိုရီးယားဆန် ၁,၃၆၀ တန်ကို ၂၀၂၅ ခုနှစ်၊ ဇွန်တွင် လွှဲပြောင်းပေးအပ်ခဲ့ကြောင်းနှင့် ငလျင်ဘေးသင့်ပြည်သူများသို ဖြန့်ဖြူးလှူဒါန်းနိုင်ခဲ့ပြီး ဖြစ်ကြောင်း သတင်းရရှိသည်။                              

MOALI