နှစ်ပေါင်း ၇၀ ကျော်အတွင်း ဂျပန်နိုင်ငံ၏ လက်ဖက်ခြောက် တင်ပို့မှု အမြင့်ဆုံးနှုန်းသို့ ရောက်ရှိခဲ့

ဂျပန်ယန်းငွေတန်ဖိုး ကျဆင်းလျက်ရှိခြင်းနှင့် ပြည်ပနိုင်ငံများမှ ဂျပန်လက်ဖက်စိမ်းအမှုန့် (Matcha Powder) ဝယ်လိုအား မြင့်တက်ခဲ့ခြင်းကြောင့် ဂျပန်နိုင်ငံ၏ လက်ဖက် ခြောက်တင်ပို့မှုမှာ ၂၀၂၅ ဘဏ္ဍာနှစ်၊ ပထမ ၁၀ လတာကာလအတွင်း အမြင့်ဆုံးနှုန်းသို့ ရောက်ရှိခဲ့ပြီး၊ နှစ်ပေါင်း ၇၀ ကျော်အတွင်း အမြင့်ဆုံးဖြစ်ခဲ့ကြောင်း ၁၄-၁၂-၂၀၂၅ ရက်နေ့ထုတ် The Mainichi သတင်းစာတွင် “Japan's green tea exports reach highest level in over 70 years” ခေါင်းစဉ်ဖြင့် ဖော်ပြခဲ့သည်။

အဆိုပါ သတင်းတွင် ၂၀၂၅ ခုနှစ်၊ ဇန်နဝါရီမှ အောက်တိုဘာအတွင်း လက်ဖက်ခြောက် တင်ပို့မှုမှာ ယခင်နှစ်အလားတူကာလနှင့် နှိုင်းယှဉ်ပါက ၄၄ ရာခိုင်နှုန်း မြင့်တက်ခဲ့ပြီး၊ ၁၀,၀၈၄ တန် ရှိခဲ့ကြောင်း၊ ဂျပန်နိုင်ငံမှ အမေရိကန်နိုင်ငံ၊ တရုတ် (တိုင်ပေ)၊ ထိုင်းနိုင်ငံနှင့် ဂျာမနီနိုင်ငံတို့သို့ လက်ဖက်ခြောက် အများဆုံးတင်ပို့လျက်ရှိပြီး၊ ၂၀၂၅ ခုနှစ်၊ ဇန်နဝါရီမှ အောက်တိုဘာလအထိ အမေရိကန် နိုင်ငံသို့ ၃,၄၉၇ တန် တင်ပို့ခဲ့ကြောင်း ဖော်ပြထားသည်။

ကျန်းမာရေးကို အလေးထားသည့် ပြည်ပနိုင်ငံများရှိ စားသုံးသူများအနေဖြင့် ဂျပန်စားသောက်ကုန်များကို ကြိုက်နှစ်သက်မှု များပြားလာခြင်းကြောင့် ဂျပန်နိုင်ငံမှ လက်ဖက် ခြောက် တင်ပို့မှုမှာ ၉ နှစ်ဆက်တိုက် မြင့်တက်ခဲ့ကြောင်း၊ ပြည်ပနိုင်ငံများမှ ဝယ်လိုအားမြင့်တက်လျက် ရှိသော်လည်း တရုတ်လက်ဖက် ခြောက်ကို လူကြိုက်များမှု မြင့်တက်လျက်ရှိခြင်းကြောင့် ဂျပန်နိုင်ငံ မှ နှစ်စဉ်လက်ဖက်ခြောက်တင်ပို့မှုမှာ တန် ၁၀,၀၀၀ အောက်သာရှိကြောင်းနှင့် ၁၉၅၄ ခုနှစ်တွင် ၁၁,၅၅၃ တန်ရှိခဲ့ကြောင်း ဖော်ပြထားပါသည်။     

ဂျပန်ပြည်တွင်း၌ လက်ဖက်ခြောက် ဝယ်လိုအားမှာ ကျဆင်းလျက် ရှိသည့်အတွက် ပြည်တွင်း၌ လက်ဖက် ထုတ်လုပ်မှုကျဆင်းလျက် ရှိသော် လည်း လက်ဖက်ရွက်ဈေးနှုန်းမှာ မြင့်တက်လျက်ရှိကြောင်း၊ လက်ဖက်စိုက်တောင်သူများမှာ သက်ကြီးရွယ်အိုများ များပြားလာခြင်းနှင့် လက်ဖက်ဝယ် လိုအား ကျဆင်းခဲ့ခြင်းကြောင့် ၂၀၂၄ ခုနှစ်တွင် ဂျပန်နိုင်ငံ၌ လက်ဖက်ရွက်တန်ချိန် ၇၄,၀၀၀ ထုတ် လုပ်ခဲ့ကြောင်းနှင့် လွန်ခဲ့သည့် ၁၀ နှစ်ကျော်ကာလနီးပါးနှင့် နှိုင်းယှဉ်ပါက လက်ဖက်ထုတ်လုပ်မှုမှာ ၁၀ ရာခိုင်နှုန်းကျော် ကျဆင်းခဲ့ကြောင်း ဖော်ပြထား သည်။

ဂျပန်နိုင်ငံတွင် လက်ဖက်ခြောက်အဓိက ထုတ်လုပ်သူဖြစ်သည့် ကာဂိုရှီးမားပြည်နယ်၊ အနောက်တောင်ဘက်ရှိ စိုက်ပျိုးရေးသမဝါယမအသင်း၏ ထုတ်ပြန်ချက်အရ ၂၀၂၅ ခုနှစ်၊ အောက် တိုဘာမှ နိုဝင်ဘာအတွင်း ရေနွေးကြမ်းဗူးတွင် အသုံး ပြုသည့် လက်ဖက်ရွက်ဈေးနှုန်းမှာ ၁ ကီလိုဂရမ်လျှင် ၂,၅၀၀ ယန်းရှိကြောင်းနှင့် ယခင်နှစ်နှင့်နှိုင်းယှဉ်ပါက ၆ ဆ မြင့်တက်ခဲ့ကြောင်း ဖော် ပြထားပါသည်။  

ဂျပန်နိုင်ငံတွင် ရောင်းချလျက်ရှိသော လက်ဖက်ခြောက်များ၏ ၄ ပုံ ၁ ပုံမှာ ကျိုတိုဒေသမှ ထွက်ရှိသည့် လက်ဖက်ခြောက်များ ဖြစ်ပြီး၊ လက်ဖက်ရိတ်သိမ်းချိန်မှာ နှစ်စဉ်ဧပြီလမှ မေလအထိ ဖြစ်ပါသည်။ ပြည်ပနိုင်ငံများတွင် ဂျပန်လက်ဖက်စိမ်းအမှုန့် (Matcha Powder) ဝယ်လိုအား မြင့် တက်လျက်ရှိခြင်းကြောင့် ၂၀၂၇ ခုနှစ်တွင် ဂျပန်လက်ဖက်စိမ်းဝယ်လိုအားမှာ အမေရိကန်ဒေါ်လာ ၄ ဒသမ ၅ ဘီလီယံအထိ ရှိနိုင်ကြောင်း ခန့်မှန်းထားကြသည်။                                             

သူဇာဖြိုး