ပဲခူးတိုင်းဒေသကြီး အနောက်ခြမ်း နွေစပါးနှင့် နွေအခြားသီးနှံ စိုက်ပျိုးရေပေးဝေမှု ကွင်းဆင်းကြည့်ရှု

နေပြည်တော် ၊ ဇန်နဝါရီ ၁၂  

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော် သည် တာဝန်ရှိသူများလိုက်ပါလျက် ဇန်နဝါရီ ၉ ရက်နေ့ ညနေပိုင်းက ပဲခူးတိုင်းဒေသကြီး သာယာဝတီခရိုင် သုံးဆယ်မြို့ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနရိပ်သာ၌ ဝန်ကြီးဌာနအောက်ရှိ တိုင်းအဆင့်၊ ခရိုင်အဆင့် ဌာနဆိုင်ရာ တာဝန်ရှိသူများနှင့်တွေ့ဆုံ၍ ပဲခူးတိုင်းဒေသကြီး အနောက်ဘက်ခြမ်းရှိ လယ်ယာကဏ္ဍဆိုင်ရာ ဖွံ့ဖြိုးတိုးတက်ရေးနှင့် ဆည်တာတမံနှင့် ရေတင်လုပ်ငန်းများကြံ့ခိုင်ရေး၊ ဆည်ရေသောက်စနစ်များမှ နွေစပါးနှင့် နွေအခြား သီးနှံများ စိုက်ပျိုးရေ တိုးတက်ပေးဝေနိုင်ရေး ဆွေးနွေး မှာကြားခဲ့သည်။

ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာန သက်ဆိုင်ရာတာဝန်ရှိသူများမှ ပဲခူးတိုင်းဒေသကြီး အနောက်ခြမ်းတွင် ပြည်ခရိုင်၊ နတ်တလင်းခရိုင်နှင့် သာယာဝတီခရိုင် တို့အောက်တွင် ရေလှောင်တမံ ၁၈ ခုနှင့် ရေတင်လုပ်ငန်း ၁၀ ခု ရှိပြီး ရေလှောင်တမံများ၏ ရေသိုလှောင်ထားရှိမှုအခြေအနေ၊ ရေသောက်စနစ်နှင့် ရေတင်လုပ်ငန်းများမှ နွေစပါးနှင့် နွေအခြားသီးနှံ စိုက်ပျိုးရေ ပေးဝေနေမှု အခြေအနေ၊ ပြည်ထောင်စု/တိုင်းဒေသကြီး ရန်ပုံ ငွေရရှိမှု အပေါ်မူတည်၍ လုပ်ငန်းများ ဆောင်ရွက်နေမှု အခြေအနေများအား ရှင်းလင်းတင်ပြရာ ဒုတိယဝန်ကြီးက နွေစပါးနှင့် နွေအခြားသီးနှံ လျာထားစိုက်ဧကများ အပြည့် အဝစိုက်ပျိုးရေ ပေးဝေနိုင်ရေး အလေးထားဆောင်ရွက်ကြရန်၊ တာတမံနှင့် ရေတင်လုပ်ငန်းများ ပြုပြင်ထိန်းသိမ်းခြင်းအတွက် စနစ် တကျ စီမံဆောင်ရွက်ကြရန်၊ သီးထပ်သီးညှပ်များ စိုက်ပျိုးနိုင်ရေးနှင့် စိုက်ဧကများ ပိုမိုတိုးတက် ရေပေးဝေနိုင်ရေးအတွက် ရေရရှိရေး နည်းလမ်းပေါင်းစုံဖြင့် ကြံဆဆောင်ရွက်ကြရန်၊ လယ်ယာသုံးစက်ကိရိယာများ ပိုမိုတွင်ကျယ်စွာ သုံးစွဲနိုင်ရေးနှင့် စာရင်းဇယား ကိန်းဂဏန်းများ တိကျမှန်ကန်စေရေး သက်ဆိုင်ရာဌာနတာဝန်ရှိသူများနှင့်ပူးပေါင်း ဆောင်ရွက်ရန် ဆွေးနွေးမှာကြားသည်။

ပဲခူးတိုင်းဒေသကြီး အနောက်ခြမ်းအနေဖြင့် နွေစပါး ၂၀၃၅၁၉ ဧကနှင့် နွေအခြားသီးနှံ ၂၇၈၇၈ ဧက၊ စုစု ပေါင်း ၂၃၁၃၉၇ ဧကအား စိုက်ပျိုးရေပေးဝေရန် လျာထားဆောင်ရွက်လျက် ရှိကြောင်း သိရသည်။ 

ဆက်လက်၍ သုံးဆယ်ရေလှောင်တမံ ဆည်ရေသောက်စနစ်အတွင်း နွေစပါးနှင့် နွေအခြားသီးနှံ စိုက်ပျိုးရေပေးဝေမှုအခြေအနေ ကြည့်ရှုစစ်ဆေးစဉ် စိုက်ဧကများ တိုးတက် စိုက်ပျိုးနိုင်ရေး၊ မျိုးကောင်းမျိုးသန့်သုံးစွဲနိုင်ရေး၊ ခေတ်မီနည်းပညာများ ပြောင်းလဲအသုံးပြုနိုင်ရေး နှင့် သုံးဆယ်ဆည်ရေ သောက်စနစ်မှ နွေစပါးနှင့် နွေအခြားသီးနှံ စိုက်ပျိုးရေ ပေးဝေမှု အခြေအနေများနှင့် သာ ယာဝတီမြို့နယ်၊ ကျွဲသက်ကျေးရွာ အုပ်စု သုံးဆယ်ဆည်ရေသောက်စနစ်အတွင်း နွေစပါးမျိုးထုတ်စိုက် ခင်း ရေဆင်း ပေါ်ဆန်း (၁) နှင့် (၂) ပျိုးထောင်ထားရှိမှု အခြေအနေများအား ကွင်းဆင်းကြည့်ရှု စစ်ဆေး သည်။ ရေဆင်းပေါ်ဆန်း (၁) နှင့် (၂) စပါးမျိုးများသည် ရာသီမရွေး စိုက် ပျိုးနိုင်ရန် စိုက်ပျိုးရေးသုတေသနဦးစီးဌာနမှ ထုတ်လုပ်ထားသော မျိုးများဖြစ်ပြီး သာယာဝတီ မြို့နယ်အတွင်း ယခုနွေစပါးရာသီတွင် မျိုးသန့်ပွား မျိုးစေ့ထုတ်စိုက်ခင်း ၁၀၀ ဧက စိုက်ပျိုး ထုတ်လုပ်ပြီး ဒေသတွင်းတောင်သူများသို့ ဖြန့်ဖြူးကာ ၂၀၂၆ - ၂၀၂၇ ခုနှစ် မိုးစပါးရာသီတွင် စိုက်ဧရိယာ တိုးချဲ့စိုက်ပျိုးသွားမည်ဖြစ်ကြောင်း သိရသည်။

သုံးဆယ် ဆည်ရေသောက် စနစ်အနေဖြင့် နွေစပါးဧက ၄၂၀၀၀ ကျော်အား စိုက်ပျိုးရေ ပေးဝေရန် လျာထားဆောင်ရွက်လျက်ရှိပြီး နွေစပါး ဆည်ရေသွင်းပြီး ဧက ၂၄၀၀၀ ကျော်ရှိပြီ ဖြစ်ကြောင်း သတင်း ရရှိသည်။

MOALI