ရန်ကုန်ဈေးကွက်

(၂၅-၁၂-၂၀၂၅ ရက်နေ့ ကောက်ယူဈေးနှုန်းများဖြစ်ပါသည်။)

ဆန်ဈေးကွက်

ရွှေဘိုပေါ်ဆန်းဆန် အလတ်စ တစ်တင်းခွဲ တစ်အိတ်လျှင် ၁၉၀၀၀၀ ကျပ်နှုန်းနှင့် အောက်စတစ်အိတ်လျှင် ၁၈၅၀၀၀ ကျပ်နှုန်း၊  ဖျာပုံပေါ်ဆန်း အလတ်စတစ်တင်းခွဲ တစ်အိတ်လျှင် ၁၂၅၀၀၀ ကျပ်နှုန်းနှင့် အောက်စတစ်အိတ်လျှင် ၁၂၀၀၀၀ကျပ်နှုန်း၊ ဇီယာဆန် အသစ် အလတ်စ တစ်တင်းခွဲ တစ်အိတ် လျှင်၅၅၀၀၀ကျပ်နှုန်းနှင့် အောက်စတစ်အိတ်လျှင် ၅၂၀၀၀ ကျပ်နှုန်း၊ ဧည့်မထ ၂၅ ရာခိုင်နှုန်း အကြမ်းအလတ်စ တစ်တင်းခွဲတစ်အိတ်လျှင် ၄၉၀၀၀ ကျပ်နှုန်း၊ ငစိန်ဆန်အလတ်စတစ်တင်းခွဲ တစ်အိတ်လျှင် ၅၂၀၀၀ကျပ်နှုန်းနှင့် အောက်စတစ်အိတ်လျှင် ၅၀၀၀၀ကျပ်နှုန်းတို့ဖြင့် ရောင်းဝယ်လျက်ရှိကြောင်းသိရသည်။ ယခင်ရက်သတ္တပတ်၏ ဈေးနှုန်းများဖြင့် နှိုင်းယှဉ်ပါက ဧည့်မထ ၂၅ ရာခိုင်နှုန်း အကြမ်းတစ်မျိုးသာ ယခင်အပတ် ထက် အနည်းငယ်ဈေးမြင့်ခဲ့သည်။ ဧည့်မထဆန်တစ်အိတ်လျှင် ၂၀၀၀ ကျပ်ဝန်းကျင် ဈေးမြင့် ခဲ့ခြင်းဖြစ်သည်။ ရွှေဘိုပေါ်ဆန်းဆန်မှာ ဆန်သစ်ပေါ်ချိန်ဖြစ်သော်လည်း သယ်ယူရန် အခက်အခဲ များရှိခြင်း၊ သယ်ယူစရိတ်မြင့်ခြင်း၊ လှောင်လက်များမှ ဝယ်ယူမှုရှိခြင်း၊ ကုန်အဝင်နည်းခြင်းနှင့် ဝယ်ယူစားသုံးမှုမှာလည်း ပုံမှန်ရှိနေခြင်းတို့ကြောင့် ယခင်ရက်သတ္တပတ်များနည်းတူ ဈေးနှုန်း အမြင့်ဖြင့် ဈေးငြိမ်လျက်ရှိသည်။ ကျန်ဆန်အမျိုးအစားများမှာလည်း ပြည် တွင်းသုံးစွဲမှုပုံမှန် ရှိခြင်း၊ ပြည်ပသို့ ပုံမှန်တင်ပို့မှုရှိခြင်း၊ ကုန်အဝင်ပုံမှန်ရှိခြင်းနှင့် ရောင်းလိုအား၊ ဝယ်လိုအားမျှနေခြင်း၊ ဆန်ဈေးနှုန်းများတည်ငြိမ် မှန်ကန်မှုရှိစေရန် စားသုံးသူများထံသို့ သင့်တင်မျှတသော ဈေးနှုန်းများဖြင့် လှည့် လည်ရောင်းချပေးလျက်ရှိခြင်း၊ ပြည်ပသို့ ပုံမှန်တင်ပို့မှုရှိခြင်းတို့ကြောင့် ယခင် အပတ်ဈေးနှုန်းများဖြင့်သာ ဈေးငြိမ် အရောင်းအဝယ်ဖြစ်သည်။ ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ် ၊ လပွတ္တာ၊ ရွှေဘို ဒေသများမှ ဆန်ဝင်ရောက်မှုပုံမှန်ရှိပြီး စားသုံးသူများမှလည်း လိုအပ်သလောက်သာ ပုံမှန်ဝယ်ယူ မှု ရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

ထိုင်းနိုင်ငံသို့ အကောက်ခွန်လွတ်တင်ပို့ချိန်နီးလာခြင်းကြောင့် လှောင်လက်များမှာ ဝယ်ယူမှုရှိကာ ယခင်ရက်သတ္တပတ်အတွင်း ဈေးမြင့်ခဲ့သော်လည်း ယခုရက်သတ္တပတ်တွင်မူ ခရစ်စမတ်နှင့် နှစ်ကုန်ပိတ်ရက်များရှိခဲ့ခြင်း၊ ပထဝီနိုင်ငံရေးအခြေအနေများနှင့် အမေရိကန်ဒေါ်လာတန်ဖိုး ဈေးနိမ့်လာခြင်းကြောင့် လှောင်လက်များမှ အဝယ်နည်းကာ စောင့်ကြည့်မှုများရှိခြင်း၊ သယ်ယူရန် အခက်အခဲများရှိခြင်းတို့ကြောင့် အစေ့ထုတ်ပြောင်းဈေးနှုန်းများ ယခင်အပတ်ထက် ဈေးနိမ့်ခဲ့သည်။ အစေ့ထုတ်ပြောင်း ၅၄ ပိဿာလျှင် ယခင်အပတ်ပျမ်းမျှ ဈေးနှုန်းမှာ ၇၈၈၄၀ ကျပ်ဖြစ်ပြီး ယခုအပတ်ဈေးနှုန်းမှာ ၇၇၇၆၀ ကျပ်သို့ ရောက်ရှိဈေးနိမ့်ခဲ့သည်။

ပဲမျိုးစုံဈေးကွက်

အိန္ဒိယနိုင်ငံတွင် မတ်ပဲများအား လိုသလောက်သာ ဝယ်ယူမှုရှိခြင်း၊ ရောင်းအားပမာဏလုံလောက်မှုရှိနေခြင်းတို့ကြောင့် မတ်ပဲဈေးနှုန်းများ ယခင် အပတ်ထက်ဈေးနိမ့်ခဲ့သည်။ ထို့အတူ ပဲစင်းငုံများအား ပဲခွဲစက်များနှင့် ကုန်သည်များက ပုံမှန် ဝယ်ယူမှုရှိခြင်း၊ ပြည်ပပဲများလည်း မပြတ်ဝင်ရောက်မှုရှိနေခြင်း၊ အိန္ဒိယအစိုးရ၏ တောင်သူထံမှ ပဲများအား ဝယ်ယူပေးသော အစီအစဉ်များလည်းရှိနေခြင်းတို့ကြောင့် ပဲစင်းငုံဈေးနှုန်းများ ယခင် အပတ်ထက်ဈေးမြင့်ခဲ့သည်။  မတ်ပဲ(သင်္ဘောတင်) တစ်တန်လျှင် ယခင်အပတ်ပျမ်းမျှ ဈေးနှုန်း မှာ ၂၇၂၇၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၂၆၈၇၀၀၀ ကျပ်သို့ ရောက်ရှိဈေးနိမ့်ခဲ့သည်။ ယခုရက်သတ္တပတ်အတွင်း ကုန်စည်ဒိုင်ဖွင့်ရက် ၅ ရက်ရှိခဲ့ပြီး မတ်ပဲ(သင်္ဘောတင်) ကုန်သေတ္တာ ၆၀ လုံးခန့် အရောင်းအဝယ်ဖြစ်ခဲ့ကြောင်းသိရသည်။ ပဲစင်းငုံ (သင်္ဘောတင်)တစ်တန်လျှင် ယခင်အပတ်ဈေးနှုန်းမှာ ၂၅၆၀၀၀၀ ကျပ်ဖြစ်ပြီး ယခုအပတ် ဈေးနှုန်း ၂၅၇၅၀၀၀ ကျပ်သို့ ရောက်ရှိဈေးမြင့်ခဲ့ခြင်းဖြစ်သည်။ ယခု ရက်သတ္တပတ်အတွင်း ကုန်စည်ဒိုင်သို့ ပဲစင်းငုံအသစ် အချို့ စတင်ဝင်ရောက်မှုရှိလာပြီး အရည်အသွေး ပိုမိုကောင်းမွန်ခြင်းကြောင့် ဝယ်လိုအားများကာ ပဲစင်းငုံအသစ်(သင်္ဘောတင်)တစ်တန်လျှင် ၂၆၃၀၀၀၀ ကျပ်ဖြင့် ရောင်းဝယ်လျက်ရှိခဲ့ကြောင်း သိရသည်။ ယခု ရက်သတ္တပတ်အတွင်း ကုန်စည်ဒိုင်ဖွင့်ရက် ၅ ရက်ရှိခဲ့ပြီး ပဲစင်းငုံ(သင်္ဘောတင်)  ကုန်သေတ္တာ ၁၀ လုံးခန့် အရောင်းအဝယ်ဖြစ်ခဲ့ကြောင်းသိရသည်။ ပဲတီ ရွှေဝါ၊ ထောပတ်ပဲနှင့် ပဲလွမ်းဖြူဈေးနှုန်းများမှာ ပြည်တွင်း ပြည်ပမှ ပုံမှန်ဝယ်ယူမှုရှိခြင်းကြောင့် ယခင်အပတ်ဈေးနှုန်းများဖြင့်သာ ပဲတီရွှေဝါ  ၃ တင်း/ ၆၀ ပိဿာလျှင် ၄၁၀၅၅၀ ကျပ်နှုန်းဖြင့် လည်းကောင်း၊ ထောပတ်ပဲ ၃ တင်း/ ၆၀ ပိဿာလျှင် ၁၈၉၃၀၀ ကျပ်နှုန်းဖြင့်လည်းကောင်း၊ ပဲလွမ်းဖြူ ၃ တင်း/ ၆၀ ပိဿာလျှင် ၂၅၇၅၅၀ ကျပ်နှုန်းဖြင့်လည်းကောင်း အသီးသီး ရောင်းဝယ်လျက်ရှိကြောင်း သိရသည်။ ကုလားပဲနှင့် ဘိုကိတ်ပဲမှာ ပြည်တွင်းသုံးစွဲမှုသာရှိခြင်း၊ အရောင်းအဝယ်အေးခြင်းတို့ ကြောင့် ယခင်အပတ်ထက်ဈေးနိမ့်ခဲ့သည်။ ကုလားပဲ တစ်ပိဿာ လျှင် ယခင်အပတ်ပျမ်းမျှ ဈေးနှုန်းမှာ ၄၁၆၅ ကျပ်ဖြစ်ပြီး ယခုအပတ် ဈေးနှုန်းမှာ ၄၁၂၅ ကျပ်ဖြစ်သည်။ ဘိုကိတ်ပဲမှာ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၂၀၂၅၀၀ ကျပ်ဖြစ်ပြီး ယခုအပတ် ဈေးနှုန်းမှာ ၁၉၇၅၅၀ ကျပ်ဖြစ် သည်။ ပဲသစ်အချို့ ဈေးကွက်သို့ ဝင်ရောက်မှုရှိခြင်း အရည်အသွေးကောင်းခြင်းတို့ကြောင့် ယခင်အပတ်ထက် ဈေးမြင့်ခဲ့သည်။ ပဲပုပ်ပဲ ၃ တင်း/ ၆၀ ပိဿာလျှင် ပျမ်းမျှဈေးနှုန်းမှာ ၃၀၃၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၁၈၆၀၀ ကျပ်ဖြစ်သည်။

စားဖိုဆောင်သီးနှံဈေးကွက်

ငရုတ်ခြောက်(ရှည်၊လတ်၊ပွ)များ ဈေးကွက်သို့ ပုံမှန်ဝင်ရောက်မှုရှိခြင်းနှင့် ဝယ်လိုအားပုံမှန်မျှသာရှိခြင်းတို့ကြောင့် ယခင်အပတ် ဈေးနှုန်းများဖြင့်သာ ဈေးငြိမ်အရောင်းအဝယ်ဖြစ်ခဲ့သည်။ ငရုတ်ခြောက် (ရှည်၊ လတ်၊ ပွ) တစ်ပိဿာလျှင် ပျမ်းမျှဈေးနှုန်းမှာ ၁၃၇၅၀-၁၄၂၅၀-၂၃၀၀၀ ကျပ်ဖြစ်သည်။ ကြက်သွန်ဖြူ(ရှမ်း) မှာ အရည်အသွေးနိမ့်လာခြင်းကြောင့် ရောင်းလိုအားများခြင်း၊ စားသုံးသူများမှ ဝယ်လိုအား ရှိနေခြင်းတို့ကြောင့် ယခင်အပတ်ဈေးနှုန်းများဖြင့် ဈေးငြိမ် အရောင်းအဝယ်ဖြစ်ခဲ့သည်။ ကြက်သွန်ဖြူ(ရှမ်း)တစ်ပိဿာလျှင် ပျမ်းမျှဈေးနှုန်းမှာ ၅၀၀၀ ကျပ် ဖြစ်သည်။ ကြက်သွန်ဖြူ(ကြူကုတ်)မှာ တင်သွင်းဈေးမြင့်ခြင်းကြောင့် ဈေးမြင့်ခဲ့ရာမှ စားသုံးသူ များမှ ဝယ်လိုအားနည်းခြင်းကြောင့် ယခင်အပတ်ထက်ဈေးနိမ့်လာခဲ့သည်။ ကြက် သွန်ဖြူ (ကြူကုတ်) တစ်ပိဿာလျှင် ယခင်အပတ်ပျမ်းမျှ ဈေးနှုန်းမှာ ၁၅၇၅၀ ကျပ်ဖြစ်ပြီး ယခုအပတ် ဈေးနှုန်းမှာ၁၄၂၅၀ ကျပ်သို့ ရောက်ရှိဈေးနိမ့်ခဲ့သည်။ ရှမ်းအာလူးများမှာ ဈေးကွက်သို့ ကုန်ဝင်ရောက်မှု ပုံမှန်ရှိခြင်း၊ အသေးစအလတ်စများခြင်းနှင့် စားသုံးသူများမှ ပုံမှန်ဝယ်ယူစားသုံး မှုရှိခြင်းကြောင့်လည်းကောင်း တရုတ်အာလူးများမှာ အရည်အသွေး အရွယ်အစားလှပကောင်း မွန်ခြင်း၊ ကုန်အဝင်နည်းခြင်းနှင့် စားသုံးသူများမှ ဝယ်လိုအားနည်းနေခြင်းတို့ကြောင့်လည်း ကောင်း ရောင်းလိုအား ဝယ်လိုအားမျှကာ ဈေးငြိမ်အရောင်းအဝယ်ဖြစ်ခဲ့သည်။ ရှမ်းအာလူး(A1-OK-S1-S2)တစ်ပိဿာလျှင် ပျမ်းမျှဈေးနှုန်းမှာ ၃၀၀၀-၃၃၀၀-၃၈၀၀-၄၃၀၀ ကျပ်ဖြစ်ပြီး တရုတ် အာလူး တစ်ပိဿာလျှင် ပျမ်းမျှဈေးနှုန်းမှာ ၅၂၅၀ ကျပ်ဖြစ်သည်။ ကြက် သွန်နီ (ထူး၊ လတ်၊ သေး)မှာ နွေကြက်သွန်နီ အဟောင်းစများ အရည်အသွေးနိမ့်လာချိန်ဖြစ်ခြင်း ကုန်အဝင်များကာ ရောင်းလိုအားများခြင်းကြောင့် ယခင်ရက်သတ္တပတ်အတွင်း ဈေးအလွန်နိမ့်ခဲ့သည်။ ယခု ရက်သတ္တပတ်တွင်မူ အဟောင်းစများ ကုန်အဝင်နည်းလာခြင်း၊ မိုးကြက်သွန်နီအသစ်များ ဈေး ကွက်သို့ ဝင်ရောက်မှုရှိလာခြင်း၊ အရည်အသွေး ပိုမိုကောင်းမွန်ခြင်းတို့ကြောင့် ယခင်အပတ် ထက် ဈေးမြင့်ခဲ့သည်။ ကြက်သွန်နီ (ထူး၊ လတ်၊ သေး) တစ်ပိဿာ ယခင်အပတ်ပျမ်းမျှဈေးနှုန်းမှာ ၁၃၀၀-၉၀၀-၃၇၅ ကျပ်ဖြစ်ပြီး ယခုအပတ် ပျမ်းမျှဈေးနှုန်းမှာ ၁၇၀၀-၁၃၀၀-၄၅၀ ကျပ်သို့ ရောက်ရှိဈေးမြင့်ခဲ့သည်။ ရန်ကုန်ဈေးကွက်သို့ ဆိပ်ဖြူ၊ မြင်းခြံ၊ ပခုက္ကူ၊ မုံရွာ၊ မြစ်သား ကြက်သွန်နီများ ကုန်ဝင်ရောက်မှုရှိခဲ့ကြောင်းသိရသည်။

စားသုံးဆီဈေးကွက်

စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှု ကော်မတီ၏ ၂၀၂၅ ခုနှစ်၊ ဒီဇင်ဘာ ၂၆  ရက်မှ ၂၀၂၆ခုနှစ်၊ ဇန်နဝါရီ ၁ ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန်အထိုင်လက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၆၀၆၀ ကျပ်ဖြစ်သည်။ ယခင်အပတ်ဈေးနှုန်းနှင့် နှိုင်းယှဉ်ပါက ၁၀ ကျပ် ဈေးမြင့်လာခဲ့ခြင်းဖြစ်သည်။                                        

အေးသန္တာဝင်း