ရေဆင်းစိုက်ပျိုးရေးတက္ကသိုလ် (၁ဝ၁) နှစ်ပြည့် နှစ်ပတ်လည်အထိမ်းအမှတ် သုတေသနစာတမ်းဖတ်ပွဲနှင့် ပိုစတာပြပွဲ ကျင်းပ

နေပြည်တော်၊ ဒီဇင်ဘာ ၂၃

ရေဆင်းစိုက်ပျိုးရေးတက္ကသိုလ်၏(၁ဝ၁)နှစ်ပြည့် နှစ်ပတ်လည်အထိမ်းအမှတ် သုတေသန စာတမ်းဖတ်ပွဲနှင့် ပိုစတာပြပွဲကို ဒီဇင်ဘာ ၂၂ ရက်နေ့က အဆိုပါတက္ကသိုလ်ရှိ ဘွဲ့နှင်း သဘင်ခန်းမ၌ ကျင်းပရာအခမ်းအနားသို့ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ဒုတိယဝန်ကြီး ဒေါက်တာတင်ထွဋ် ၊ ဦးစီးဌာနများမှ ညွှန်ကြားရေးမှူးချုပ်များ၊ ပါမောက္ခချုပ်များ၊ ဧည့်သည်တော်များနှင့် ဘွဲ့ကြို၊ ဘွဲ့လွန်ကျောင်းသား၊ ကျောင်းသူများ တက်ရောက်ကြသည်။

အခမ်းအနားတွင် ဒုတိယဝန်ကြီးက အမှာစကားနှင့် key Note ပြောကြားရာ၌ ၁၉၂၄ ခုနှစ်တွင် စိုက်ပျိုး ရေးကောလိပ် နှင့် သုတေသနဗိမာန်အဖြစ်ဖွင့်လှစ်ခဲ့ပြီး စိုက်ပျိုးရေး ပညာရပ် သင်ကြားသင်ယူမှုနှင့် သုတေ သနဖွံ့ဖြိုးမှုတို့ တစ်ပြိုင်တည်း စတင် ခဲ့သည့်နည်းတူ တက္ကသိုလ်နှင့် သုတေသနတို့သည် ခွဲခြားမရသည် မှာ အထင်အရှားဖြစ်ပါကြောင်း၊ ရေမြေ ရာသီဥတု၊ ခေတ်စနစ်နှင့် လိုက်လျောညီထွေသော စိုက်ပျိုးဖြစ်ထွန်းမှုအတွက် စမ်းသပ် လေ့ လာမှုများ၊သုတေသနများကို စနစ် တကျလုပ်ဆောင်နိုင်မှသာ စိုက်ပျိုး ထုတ်လုပ်သူများ အတွက် ထိရောက်အကျိုးရှိသည့် နည်းပညာများ၊ သီးနှံစိုက်ပျိုး ထုတ်လုပ်မှုဆိုင်ရာ မှန်ကန်သည့် အကြံပြုချက်များ ရရှိစေမှာဖြစ်ပြီး သွင်းအားစုနှင့် အရင်းအမြစ်များကိုလည်း အလေ အလွင့်မရှိ အသုံးပြုနိုင်စေမည်ဖြစ်ကြောင်း၊ သဘာဝ အရင်းအမြစ်များအနေဖြင့် အကန့်အသတ်ရှိသော်လည်း သုတေ သနသည် အကန့်အသတ် မရှိပါကြောင်း၊  အထူးသဖြင့် စွမ်းအင်နှင့် သဘာဝအရင်းအမြစ် ကန့်သတ် ချက်  လွှမ်းမိုးမှုအောက်တွင် နေထိုင်ကြရသည့် ယနေ့ခေတ်ကဲ့သို့ အခက် အခဲ ကြပ်တည်းမှုများ အားလုံးအတွက် ထွက်ပေါက်မှာ သုတေသနသာဖြစ်ကြောင်း ပိုမိုသိသာထင်ရှားလျက် ရှိကြောင်း၊ ရေဆင်းစိုက်ပျိုး ရေး တက္ကသိုလ်၏ ဘွဲ့ကြို၊ ဘွဲ့လွန် သင်ကြားပို့ချမှုများနှင့် ဘွဲ့ဒီဂရီပေးအပ်မှုတွင် သုတေသနကို အဓိက ထားဆောင်ရွက်လျက်ရှိပြီး နိုင်ငံတကာ အဆင့်မီ သုတေသနများ ဆောင်ရွက် နိုင်မှု အတွက်လည်း များစွာဂုဏ်ယူရပါကြောင်း၊ ဤသုတေသန တွေ့ရှိချက်များကို လက်တွေ့ ဘဝတွင် မှန်မှန်ကန်ကန် အသုံးချနိုင်ရေးကို အထူးဂရုပြု ဆောင်ရွက်ရန်လိုကြောင်း၊စားရေရိက္ခာ တိုးတက်ထုတ်လုပ်နိုင်စေရန် နည်းပညာများ တိုးတက်ရှာဖွေခြင်းနှင့် နည်းပညာဖြန့်ဝေပေးခြင်းစသော ဝန်ဆောင်မှုလုပ်ငန်းများကို စေတနာအပြည့်ဖြင့် ဆက် လက်လုပ်ဆောင်ပေးကြရန်နှင့် မိမိတို့လုပ်ဆောင်လျက်ရှိသည့် ကောင်းမွန်သောအလုပ်ကို သံသယ ကင်းရှင်းစွာ ဂုဏ်ယူစိတ်အပြည့်ဖြင့်လုပ်ဆောင်နိုင်ရန်၊ နိုင်ငံ့စိုက်ပျိုးရေးကဏ္ဍ ဖွံ့ဖြိုးတိုး တက်မှုအတွက် သုတေသနစွမ်းရည်ဖြင့် လက်တွေ့အကျိုးပြု ထိရောက်သော နည်းလမ်းများကို ဆက်လက် ဆန်းစစ်ရှာဖွေနိုင်ကြစေရန် ဆန္ဒပြုပါကြောင်း ပြောကြားသည်။

ထို့နောက် ဒုတိယဝန်ကြီးသည် သုတေသနပြပွဲအတွင်း ခင်းကျင်းပြသထားသည့် ပိုစတာ (၅၅)စောင်နှင့် သုတေသနဆောင်ရွက်ထားရှိသည့် ရလဒ်များအား ကြည့်ရှု အားပေးသည်။

ယနေ့ ကျင်းပသည့် ရေဆင်း စိုက်ပျိုးရေးတက္ကသိုလ်၏ ၁ဝ၁ နှစ်ပြည့် နှစ်ပတ်လည် အထိမ်းအမှတ် သုတေသနစာတမ်းဖတ်ပွဲ တွင် စိုက်ပျိုးရေးပညာရှင်များနှင့် သုတေ သီများက စာတမ်း ၆ စောင် တင်သွင်းဖတ်ကြားခဲ့ကြကြောင်း သတင်းရရှိသည်။

MOALI