ပြည်ပဝယ်လိုအားရှိမှုကြောင့် မြေထောက်ပဲဈေးမြင့်တက်

ပြည်တွင်းပြည်ပဝယ်လိုအား ကောင်းသည့်အတွက် မန္တလေးဈေးကွက်တွင် မြေထောက်ပဲ ဈေးနှုန်းများ ပုံမှန်မြင့်တက်လျက်ရှိပြီး တစ်တန်လျှင် ကျပ် ၄ ဒသမ ၅ သန်းအထိ ရောက်ရှိခဲ့သည်။ ပြည်တွင်းစားသုံးမှုအပြင် တရုတ်နှင့်အိန္ဒိယနိုင်ငံတို့မှ မြန်မာ့မြေထောက်ပဲ ဝယ်ယူမှုတိုးမြင့်လာသည့် အတွက် မြေထောက်ပဲဈေးနှုန်းများ အမြင့်ဆုံးအထိ မြင့်တက်လျက်ရှိသည်။

ဇန်နဝါရီ နောက်ဆုံးပတ်မှစ၍ ဈေးနှုန်းများ စတင်မြင့်တက်လာခဲ့သည်။ ဇန်နဝါရီ ၁၉ရက်နေ့တွင် တစ်တန်လျှင် ကျပ် ၃ ဒသမ ၈၅၅ သန်းသာ ရှိခဲ့ပြီး ဖေဖော်ဝါရီ ၆ ရက်နေ့တွင် တစ် တန်လျှင် ၄ ဒသမ ၅၅၈ သန်းအထိ တစ်ဟုန်ထိုး မြင့်တက်လာခဲ့သည်။ ကိန်းဂဏန်းများအရ ပြီးခဲ့သည့် ၃ ပတ်အတွင်း တစ်တန်လျှင် ကျပ် ၇ သိန်းအထက် သိသိသာသာ မြင့်တက်လာခဲ့ သည် ကို တွေ့ရှိ ရသည်။
မြန်မာနိုင်ငံသည် ပင်လယ်ရေကြောင်းနှင့် နယ်စပ်ကုန်သွယ်ရေးလမ်းကြောင်းများမှတဆင့် တရုတ်၊ အိန္ဒိယ၊ ဂျပန်၊ စင်္ကာပူနှင့် အခြားသော ပြည်ပနိုင်ငံများသို့ မြေထောက်ပဲများ တင်ပို့ပါသည်။ မြန်မာနိုင်ငံသည် ၂၀၂၂-၂၀၂၃  ဘဏ္ဍာရေးနှစ် (ဧပြီ-မတ်)အတွင်း ပြည်ပဈေးကွက်များသို့ အမေရိကန် ဒေါ်လာ ၅၀ ဒသမ ၃၁သန်းတန်ဖိုးရှိသော မြေထောက်ပဲတန်ချိန် ၅၉,၄၂၅ ခန့်တင်ပို့ခဲ့ကြောင်း စီးပွားရေး နှင့် ကူးသန်းရောင်းဝယ်ရေးဝန်ကြီးဌာန၏ စာရင်းအင်းများအရ သိရှိရသည်။

မြန်မာနိုင်ငံသည် လက်ရှိ ၂၀၂၃-၂၀၂၄ဘဏ္ဍာရေးနှစ်၏ ဧပြီ ၁ ရက်နေ့မှ ဇန်နဝါရီ ၂၆ ရက်နေ့အထိ ပြည်ပကုန်သွယ်ဖက်နိုင်ငံများသို့ အမေရိကန်ဒေါ်လာ ၂၉ ဒသမ ၇၇ သန်း တန်ဖိုးရှိသော မြေထောက်ပဲတန်ချိန် ၂၄,၁၆၃ အထက် တင်ပို့ခဲ့သည်။ ၎င်းအထဲမှ ပင်လယ်ရေ ကြောင်း ကုန်သွယ်မှုမှတဆင့် အမေရိကန်ဒေါ်လာ ၁၂ ဒသမ ၄သန်း တန်ဖိုးရှိသော မြေထောက်ပဲ တန်ချိန် ၁၂,၁၄၇ ခန့်နှင့် နယ်စပ်ကုန်သွယ်မှုမှတစ်ဆင့် အမေရိကန်ဒေါ်လာ ၁၇ ဒသမ ၃၆၄သန်း တန်ဖိုးရှိသော မြေထောက်ပဲတန်ချိန် ၁၂,၀၁၆ ခန့် တင်ပို့ခဲ့ကြောင်း စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၏ စာရင်းအင်းများအရ သိရှိရသည်။

အောက်တိုဘာ နှင့် နိုဝင်ဘာတွင် မြေထောက်ပဲများကို စတင်စိုက်ပျိုးကြပြီး ဖေဖော် ဝါရီ အစောပိုင်းတွင် ရိတ်သိမ်းကြသည်။ မြေထောက်ပဲများကို စစ်ကိုင်းတိုင်း အထက်ပိုင်းဒေသများ၊ ကချင်ပြည်နယ် ဗန်းမော်၊ ကရင်ပြည်နယ်နှင့် ဧရာဝတီမြစ်တစ်လျှောက်လုံးတွင် စိုက်ပျိုးကြသည်။ ကသာနှင့် ဗန်းမော်မြို့နယ်တို့မှထွက်ရှိသော မြေထောက်ပဲများသည် အရွယ်အစားကြီးသည့် အတွက် ပြည်တွင်းဈေးကွက်တွင် ဝယ်လိုအားမြင့်မားကြောင်း ၇. ၂. ၂၀၂၄ ရက်နေ့တွင် ထုတ်ပြန် ခဲ့သော https://www.gnlm.com.mm ၏ သတင်းအချက် အလက်များအရ သိရှိရသည်။

နွေးနွေးအောင်

https://www.gnlm.com.mm/red-kidney-bean-price-jumps-to-k4-5-mln-per-tonne-on-foreign-demand/