အင်ဒိုနီးရှားစားအုန်းဆီစက်မှုလုပ်ငန်းများ၌ ဒေါ်လာ ၉ ဘီလီယံ ရင်းနှီးမြှုပ်နှံရန် တရုတ်ရင်းနှီးမြှုပ်နှံသူများ စိတ်ဝင်စား

တရုတ်ရင်းနှီးမြှုပ်နှံသူများသည် အင်ဒိုနီးရှားနိုင်ငံတွင် စားအုန်းဆီစက်မှုလုပ်ငန်းများ၌ အမေရိကန်ဒေါ်လာ ၉ ဘီလီယံ ရင်းနှီးမြှုပ်နှံရန် စိတ်ဝင်စားလျက်ရှိကြောင်း အင်ဒိုနီးရှား စားအုန်းဆီကောင်စီ (The Indonesian Palm Oil Council) က ထုတ်ဖော်ပြောကြားခဲ့ပါသည်။

အင်ဒိုနီးရှားစားအုန်းဆီကောင်စီ ဥက္ကဋ္ဌ Sahat Sinaga က “တရုတ်ရင်းနှီးမြှုပ်နှံသူများသည် ဆီအုန်းမှ စားအုန်းဆီအဖြစ် ထုတ်လုပ်သည့် လုပ်ငန်းစဉ်တစ်လျှောက်တွင် ရင်းနှီးမြှုပ်နှံမှု ပြုလုပ်လိုကြောင်း ၎င်းထံသို့ ဆက်သွယ်လာကြောင်း၊ စားအုန်းဆီထုတ်လုပ်ရန်အတွက် ပတ်ဝန်းကျင်နှင့်ကိုက်ညီသည့် နည်းပညာများကို အသုံးပြုမည်ဖြစ်ကြောင်း၊ လက်ရှိတွင် စားအုန်းဆီထုတ်လုပ်မှုလုပ်ငန်းတွင် အသုံးပြုနေသည့် နည်းပညာမှာ ခေတ်နောက်ကျနေပြီး ကာဗွန်ဓာတ်ငွေ့ထုတ်လွှတ်မှု မြင့်မားနေကြောင်း၊ နည်းပညာအသစ်ကို အသုံးပြုရန် မိမိအနေဖြင့် အဆိုပြုခဲ့ပြီး တရုတ်နိုင်ငံကလည်း စိတ်ဝင်စားမှုရှိကြောင်း၊ အင်ဒိုနီးရှားနိုင်ငံရှိ အသေးစား ဆီအုန်းစိုက်ပျိုးထုတ်လုပ်သူများကို အကူအညီပေးရန်အတွက် ဒေါ်လာဘီလီယံများစွာကို ယူဆောင်လာရန် အသင့်ဖြစ်နေကြောင်း” ဂျာကာတာမြို့တွင် ပြု လုပ်ခဲ့သည့် “Palm Oil Expo Indonesia (Palmex) 2025” ၏ ဖွင့်ပွဲအခမ်းအနားတွင် ပြောကြားခဲ့သည်။

အမေရိကန်ဒေါ်လာ ၉ ဘီလီယံရင်းနှီးမြှုပ်နှံမည့်ကိစ္စမှာ ၂၀၂၆ ခုနှစ်မှစ၍ လာမည့် ၇ နှစ် အတွင်း ဆောင်ရွက်ရန်စီစဉ်ထားကြောင်း၊ ရင်းနှီးမြှုပ်နှံမှုရန်ပုံငွေသည် ဆီအုန်းအခိုင်များမှ စားအုန်းဆီထုတ်လုပ်သည့် စက်ပစ္စည်းများ ပိုမိုကောင်းမွန်လာစေရေးကို အဓိကထားမည်ဖြစ်ကြောင်း ဥက္ကဋ္ဌ Sahat Sinaga ပြော ကြားချက်အရသိရှိရသည်။ 

“လုပ်ငန်းငယ်များအနေဖြင့် ဆီအုန်းအခိုင်များကို အခိုင်လိုက်ရောင်းချခြင်းအပြင် ပတ်ဝန်းကျင်နှင့်ကိုက်ညီသည့် နည်းပညာများ အသုံးပြုခြင်းဖြင့် ကာဗွန်ထုတ်လွှတ်မှုလျှော့ချနိုင်သည့် ရောင်းချမှုများမှတစ်ဆင့် အကျိုးအမြတ်များ ရရှိနိုင်မည်ဖြစ်ကြောင်း၊ ရင်းနှီးမြှုပ်နှံမှုများ ဝင်ရောက်လာနိုင် မှုမှာ အစိုးရ၏ နိုင်ငံခြားသားလုပ်ငန်းရှင်ကို ကာဗွန်ထုတ်လွှတ်မှုရောင်းချရန်လိုင်စင်ထုတ်ပေးခြင်း အပေါ်တွင်မူတည်ကြောင်း၊ကာဗွန်ရောင်းချရန်အတွက် ခွင့်ပြုချက်ရရှိထားသည့် အဖွဲ့အစည်း သို့မဟုတ် ကုမ္ပဏီမရှိသေးကြောင်း” ဥက္ကဋ္ဌ Sahat Sinaga က ပြောကြားခဲ့သည်။ 

အင်ဒိုနီးရှား စာရင်းအင်းဌာန၏ အချက်အလက်များအရ စားအုန်းဆီကြမ်းနှင့် ဆီအုန်းကဏ္ဍ ဆက်စပ်ကုန်စည်များ တင်ပို့မှုမှာ ၂၀၂၅ ခုနှစ် မတ်တွင် အမေရိကန်ဒေါ်လာ ၂ ဒသမ ၁၉ ဘီလီယံ ရှိပြီး ၂၀၂၅ ခုနှစ်၊ ဖေဖော်ဝါရီနှင့်နှိုင်းယှဉ်ပါက ၃ ဒသမ ၅၅ ရာခိုင်နှုန်းကျဆင်းခဲ့ပါသည်။ နှစ်အလိုက်အချက်အလက်များအရ ၂၀၂၄ ခုနှစ်၊ မတ်တွင် အမေရိကန်ဒေါ်လာ ၁ ဒသမ ၅၆ ဘီလီယံရရှိခဲ့သည့် အတွက် ယင်းနှင့်နှိုင်းယှဉ်ပါက ၂၀၂၅ ခုနှစ် မတ်တွင် ၄၀ ဒသမ ၈၅ ရာခိုင်နှုန်း တိုးတက်ခဲ့ပါသည်။ 

တရုတ်နိုင်ငံသည် ၎င်း၏ စားအုန်းဆီပြည်တွင်းလိုအပ်ချက်ကို ဖြည့်ဆည်းနိုင်ရေး ကမ္ဘာ့ဆီအုန်းစိုက်ပျိုးထုတ်လုပ်သည့် အဆင့် ၁ နိုင်ငံဖြစ်သည့် အင်ဒိုနီးရှားနိုင်ငံသို့ ချဉ်းကပ်ဆောင်ရွက်ခြင်းဖြစ်ပြီး စက်မှုလုပ်ငန်းများ ဖွံ့ဖြိုးတိုးတက်လာမှုအရ ကာဗွန်ထုတ်လွှတ်မှုများ မြင့်တက်လျက်ရှိရာ ကမ္ဘာ့ပတ်ဝန်း ကျင်ဆိုင်ရာအရေးကိစ္စရပ်များတွင် အရေးပါလာသည့်ကာဗွန်ထုတ်လွှတ် မှုလျှော့ချရေးအတွက် သစ်တောဖုံးလွှမ်းဧရိယာများသည့်နိုင်ငံကို ချဉ်းကပ်ခြင်းဖြစ်ကြောင်း သုံးသပ်မိပါသည်။ 

သွယ်သွယ်ဆုတင်

Indonesian Palm Oil Association