ပဲသီးနှံသစ်များ ဈေးကွက်သို့ ဝင်ရောက်လာသည့်အတွက် အိန္ဒိယတွင် ပဲစင်းငုံဈေးနှုန်းများ စတင်ကျဆင်းလာလျက်ရှိ

အိန္ဒိယနိုင်ငံ Karnataka နှင့် Maharashtra ကဲ့သို့ ပြည်နယ်များတွင် ပဲသီးနှံသစ်များ ဈေးကွက်သို့ ဝင်ရောက်လာသည့်အတွက်  ပဲစင်း ငုံ (tur/arhar) ဈေးနှုန်းများ စတင်ကျဆင်းလာလျက်ရှိကြောင်း၊ သို့သော် အစိုးရအနေဖြင့် ၂၀၂၄ ခုနှစ်၊ ခါရစ် (မိုးရာသီ) အတွက် ပဲစင်း ငုံ ၉၆၆,၅၇၅ တန်အား အနိမ့်ဆုံးပံ့ပိုး ဈေးနှုန်း (Minimum support price -MSP) သတ်မှတ်၍ ဝယ်ယူပေးမည်ဟု ကတိပြုထားကြောင်း The Hindu Businessline သတင်းဌာနက ဒီဇင်ဘာ ၂၅ ရက်က ဖော်ပြ သည်။

အိန္ဒိယအမျိုးသား စိုက်ပျိုးရေးသမဝါယမ ရောင်းဝယ်ရေးအဖွဲ့ချုပ်လီမိတက် (National Agricultural Cooperative Marketing Federation of India Ltd- Nafed) ၏ တရားဝင်အင်တာ နက်စာမျက်နှာ၌ အထက်ပါအတိုင်းဖော်ပြထားကြောင်း သိရသည်။ အသေးစိတ်အားဖြင့် FAQ အရည်အသွေးရှိ ပဲစင်းငုံကို Uttar Pradesh ပြည်နယ်မှ ၃၉၅,၁၇၀ တန်ဖြင့် အများဆုံးဝယ်ယူမည်ဖြစ်ကာ၊၎င်းနောက် တွင် Karnataka ပြည်နယ်မှ ၃၀၆,၁၅၀ တန်အားလည်းကောင်း၊ Andhra Pradesh ပြည်နယ်မှ ၉၅,၆၂၀ တန်အားလည်းကောင်း၊ Telangana ပြည်နယ်မှ ၁၆၉,၁၄၀ တန်အား လည်းကောင်း၊ Haryana ပြည်နယ်မှ ၄၉၅ တန်အားလည်းကောင်း အစိုးရမှ အသီးသီးဝယ်ယူပေးသွားမည်ဟု သိရသည်။

၂၀၂၄ ခုနှစ်၊ ခါရစ်ရာသီအတွက် ပဲစင်းငုံ၏ အနိမ့်ဆုံးပံ့ပိုးဈေးနှုန်းကို ၁ ကွင်တယ် (၁၀၀ ကီလိုဂရမ်) လျှင် ရူပီး ၇၅၅၀ သတ်မှတ်ထားကြောင်းနှင့် ယခုအခါ အိန္ဒိယနိုင်ငံ၏ ပဲစင်းငုံအဓိက စိုက်ပျိုးရာ ပြည်နယ်များဖြစ်သော Karnataka၊ Maharashtra၊ Gujarat၊ Telangana နှင့် Andhra Pradesh ပြည်နယ်များရှိ လက်ကားဈေးကွက် (mandi) များသို့ ပဲစင်းငုံသစ်များ စတင်ဝင်ရောက်လာပြီဖြစ် ကြောင်း သိရသည်။

Karnataka ပြည်နယ်ရှိ Koppal နှင့် Bijapur ခရိုင် ဈေးကွက်များတွင် ဒီဇင်ဘာ ၂၄ ရက် နေ့၌ ဖြစ်ပေါ်လျက်ရှိသော ပဲစင်းငုံ၏ ရည်ညွှန်းလက်ကားဈေးနှုန်းမှာ ၁ ကွင်တယ်လျှင် ရူပီး ၇,၃၀၀ နှင့် Bagalkot ခရိုင်တွင် ရူပီး ၇,၁၇၂ ဖြင့်လည်းကောင်း၊ ပြီးခဲ့သည့် ဒီဇင်ဘာ ၂၄ ရက်က Latur ခရိုင်တွင် ရူပီး ၇,၈၀၀ နှင့် Dudhani ခရိုင်ဈေးကွက်တွင် ရူပီး ၇,၆၄၈ အသီးသီးဖြစ်ပေါ်ခဲ့ ကြောင်း သိရသည်။

ယခုနှစ် မိုးရာသီတွင် ပဲစင်းငုံကို ဧရိယာတိုးချဲ့စိုက်ပျိုးခဲ့သော တောင်သူများအနေဖြင့် ရာသီဥတုဖေါက်ပြန်မှုနှင့် မှိုရောဂါကျရောက်မှုစသည့် စိန်ခေါ်မှုများနှင့်ရင်ဆိုင်ခဲ့ရကာ ရိတ်သိမ်းချိန်တွင် ဈေးနှုန်းကျဆင်းမှုနှင့် ရင်ဆိုင်နေရသည့်အပေါ် စိုးရိမ်မကင်းဖြစ်နေကြကြောင်း Kalaburgi ရှိ ပဲစင်းငုံနီ စိုက်ပျိုးသူများအသင်း (Red Gram Growers Association) ဥက္ကဋ္ဌ Basavaraj Ingin က ပြောကြားခဲ့သည်။ 

အိန္ဒိယနိုင်ငံသည် ပဲစင်းငုံကို မိုဇန်ဘစ်နှင့် ကင်ညာအပါအဝင် နိုင်ငံအများအပြားမှ တင်သွင်း လျက်ရှိပြီး မွန်ဘိုင်းဈေးကွက်တွင် အဆိုပါပဲ ၁ ကွင်တယ်လျှင် ရူပီး ၆၂၀၀ မှ ၆၈၀၀ အတွင်း ရောင်း ဝယ်လျက်ရှိကြောင်း သိရသည်။အိန္ဒိယစိုက်ပျိုးရေးဝန်ကြီး ဌာနမှ ပထမအကြိမ်ကြိုတင်ခန့်မှန်းချက်အရ တစ်နိုင်ငံလုံး၏ ပဲစင်းငုံ ထုတ်လုပ်မှုသည် ယခင်နှစ်က တန်ချိန် ၃၄ ဒသမ ၁၇ သိန်းရှိခဲ့ရာမှ ယခုနှစ်တွင် ၃၅ ဒသမ ၀၂ သိန်းသို့ အနည်းငယ်တိုးမြင့်လာမည်ဟု သိရသည်။

သို့ပါ၍ မြန်မာနိုင်ငံအနေဖြင့် အိန္ဒိယနိုင်ငံသို့ မတ်ပဲနှင့် ပဲစင်းငုံတို့ကို အဓိက တင်ပို့ရောင်းချ လျက်ရှိရာ အိန္ဒိယတွင် ပဲစင်းငုံသစ်များ ဈေးကွက်သို့ ဝင်ရောက်လာကာ ပဲဈေးနှုန်းများကျဆင်းလာခြင်းကြောင့် အဆိုပါပဲ၏ သွင်းကုန်ဈေးနှုန်းနှင့် ပမာဏအပေါ် အကျိုးသက်ရောက်မှုရှိလာဖွယ် အခြေ အနေ ဖြစ်ပါကြောင်း သုံးသပ်တင်ပြလိုက်ရပါသည်။

ကောင်းထွဋ်အောင်

The Hindu Businessline, Tur prices start easing with new crop arrivals, December 25, 2024