ဇီဝဒီဇယ် ၄၀ ရာခိုင်နှုန်း (B40) အစီအစဉ်အတွက် ဆီအုန်းပို့ကုန်အခွန် ၁၀ ရာခိုင်နှုန်းသို့ အင်ဒိုနီးရှား တိုးမြှင့်သတ်မှတ်မည်

အင်ဒိုနီးရှားအစိုးရသည် ဇီဝဒီဇယ် ၄၀ ရာခိုင်နှုန်း (B40) ထုတ်လုပ်မည့် အစီအစဉ်အတွက်ငွေကြေးထောက်ပံ့မှုတစ်ခုအနေဖြင့် စားအုန်းဆီကြမ်းတင်ပို့ရာတွင် ပို့ကုန်အခွန် တိုးမြှင့်ကောက်ခံ ရန် စီစဉ်လျက်ရှိကြောင်း အင်ဒိုနီးရှားစားအုန်းဆီအသင်းက ၂၀၂၄ ခုနှစ်၊ ဒီဇင်ဘာ ၂၄ ရက်နေ့က သတင်းထုတ်ပြန်ခဲ့သည်။ B40 မှာ လောင်စာဆီ ၆၀ ရာခိုင်နှုန်းနှင့် စားအုန်းဆီကြမ်းမှ ထုတ်လုပ်ရ ရှိသည့် ဇီဝဒီဇယ် ၄၀ ရာခိုင်နှုန်းရောနှောထားသည့် ဇီဝဒီဇယ် ဖြစ်သည်။ 

စီးပွားရေးရာညှိနှိုင်းရေးဝန်ကြီး Airlangga Hartarto က “အစိုးရသည် ၂၀၂၅ ခုနှစ်၊ ဇန်နဝါရီမှစ၍ အကောင်အထည်ဖော်မည့် B40 အစီအစဉ်အတွက် ရန်ပုံငွေ လုံ လောက်ရန် စားအုန်းဆီ ကြမ်းတင်ပို့မှုအပေါ် ကောက်ခံသည့် ပို့ကုန်အခွန်ကို ၁၀ ရာခိုင်နှုန်းသို့ တိုးမြှင့်၍ စိုက်ပျိုးမှုရန်ပုံငွေ စီမံခန့်ခွဲရေးဘုတ် အဖွဲ့က တာဝန်ယူကောက်ခံသွားမည်ဖြစ်ကြောင်း၊ B40 အစီအစဉ်အတွက် ရန်ပုံငွေကို စိုက်ပျိုးမှုရန်ပုံငွေစီမံခန့်ခွဲရေးဘုတ်အဖွဲ့ထံမှ ရယူမည်ဖြစ်ကြောင်း၊ ပြန်လည်သန့် စင်ထားသည့် စားအုန်းဆီကဲ့သို့သော ကုန်စည်များအတွက် ပို့ကုန် အခွန် ၄ ဒသမ ၅ ရာခိုင်နှုန်းနှင့် စားအုန်းဆီ ကြမ်းအတွက် ပို့ကုန်အခွန် ၁၀ ရာခိုင်နှုန်းသို့ တိုးမြှင့်ကောက်ခံသွားမည်ဖြစ်ကြောင်း” ၂၀၂၄ ခုနှစ်၊ ဒီဇင်ဘာ ၂၀ ရက်နေ့က ဂျာကာတာမြို့တွင် ပြောကြားသည်။ ပို့ကုန်အခွန်အသစ်သတ်မှတ်မှုမှာ ဘဏ္ဍာ ရေးဝန်ကြီးဌာန၏ လုပ်ထုံးလုပ်နည်းထွက်ရှိပြီးနောက်တွင်စတင်အသက် ဝင်မည်ဖြစ်သည်။ စီးပွားရေးရာညှိ နှိုင်းရေး ဝန်ကြီးဌာန၏ အစားအ သောက်နှင့် လယ်ယာစီးပွားရေးညှိ နှိုင်းရေးဌာန ဒုတိယခေါင်းဆောင် Dida Gardera က “၂၀၂၅ ခုနှစ်၊ နှစ်ကုန်အထိ B40 အစီအစဉ်အကောင် အထည်ဖော်မှုအတွက် ရန်ပုံငွေလုံ လောက်ကြောင်း” ပြောကြားသည်။ 

ဆီအုန်းလုပ်ငန်းကဏ္ဍရှိ လုပ်ငန်းရှင်များအနေဖြင့် ပို့ကုန်အခွန်တိုးမြှင့်မှုသည် စားအုန်းဆီကြမ်းနှင့် ဆက်စပ်ကုန်စည်များတင်ပို့မှုအပေါ် ဆိုးကျိုးသက်ရောက်မည်ကို စိုးရိမ်နေကြပါသည်။ အင်ဒိုနီးရှားစားအုန်း ဆီအသင်းဥက္ကဋ္ဌ Eddy Martono က “စားအုန်းဆီကြမ်း တင်ပို့မှုအတွက် ပို့ကုန် အခွန် ၁၀ ရာခိုင်နှုန်းသို့ တိုးမြှင့်ခြင်းသည် ကမ္ဘာ့ဈေးကွက်တွင် ယှဉ်ပြိုင်နိုင်စွမ်းကျဆင်းစေကြောင်း၊ ၂၀၂၄ ခုနှစ်တွင် ပို့ကုန်ကျဆင်းပြီး ပြန်လည်စိုက်ပျိုးသည့်အစီအစဉ်အတွက် ကုန်ကျစရိတ်မြင့်တက် ခြင်းသည် ပို့ကုန်အခွန်တိုးမြှင့်ရန် လိုအပ်ရသည့် နောက်ခံအကြောင်းအရင်းများဖြစ်ကြောင်း၊ စိုက်ပျိုးမှုရန်ပုံငွေစီမံခန့်ခွဲရေး ဘုတ်အဖွဲ့က ကောက်ခံသည့် ရန်ပုံငွေကျဆင်းခြင်းကြောင့် ဇီဝဒီဇယ်အတွက် ထောက်ပံ့ရန်ပုံငွေမှာ အကန့်အသတ် ဖြစ်နေကြောင်း၊ အစိုးရအနေဖြင့် လိုအပ်သည့်ရန်ပုံငွေအတွက် စားအုန်းဆီကြမ်းပို့ကုန်အခွန်ကို တိုးမြှင့်ကောက်ခံရန် လိုအပ်လာခြင်းဖြစ် ကြောင်း” ပြောကြားသည်။ 

အင်ဒိုနီးရှားနိုင်ငံသည် B40 အစီအစဉ်ကို ၂၀၂၅ ခုနှစ်မှစ၍ အကောင်အထည်ဖော်ရန် ရန်ပုံငွေလုံလောက်မှုရှိစေရေး၊ တစ်ဖက်တွင် အဆိုပါအစီအစဉ်အတွက် ကုန်ကြမ်းလုံလောက်မှု ရှိစေရေး ပို့ကုန်အခွန်တိုးမြှင့်ကောက်ခံသည့် နည်းလမ်းအသုံးပြုခြင်းဖြစ်ကြောင်းသိရှိရသည်။ 

သွယ်သွယ်ဆုတင်

Indonesian Palm Oil Association