ပြည်ထောင်စုဝန်ကြီး ဦးမင်းနောင် ကချင်ပြည်နယ်လယ်ယာကဏ္ဍဆိုင်ရာ နိုင်ငံ့ဝန်ထမ်းများအား တွေ့ဆုံ

နေပြည်တော်၊ ဇန်နဝါရီ ၉

လယ်ယာကဏ္ဍဖွံ့ဖြိုးတိုးတက်ရေးလုပ်ငန်းများ ကွင်းဆင်းဆောင်ရွက်ရန် ကချင်ပြည်နယ်တွင်ရောက်ရှိနေသော စိုက်ပျိုးရေး၊မွေးမြူရေးနှင့် ဆည်မြောင်း ဝန်ကြီးဌာန ပြည်ထောင်စုဝန်ကြီး ဦးမင်းနောင်သည်  ဇန်နဝါရီ ၈ ရက်နေ့ တွင် မြစ်ကြီးနားမြို့ ရှိ ပြည်နယ်စိုက်ပျိုးရေးဦးစီးဌာနမှူးရုံး အစည်းအဝေးခန်းမ၌ ပြည်နယ် ခရိုင်အဆင့် လယ်ယာကဏ္ဍဆိုင်ရာ တာဝန်ရှိသူများအားတွေ့ဆုံ၍ လုပ်ငန်းဆိုင်ရာလိုအပ်ချက်များ ဆွေးနွေးခဲ့ကြကြောင်း သိရသည်။

တွေ့ဆုံစဉ် ပြည်ထောင်စုဝန်ကြီးက စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနအောက်ရှိ ဦးစီးဌာနအသီးသီးမှ ဝန်ထမ်းများ၏ လုပ်ငန်းတာဝန်ဆောင်ရွက်မှုနှင့် ကျန်းမာရေး ဆိုင်ရာများကို ရင်းနှီးပွင့်လင်းစွာမေးမြန်းပြီး နိုင်ငံ့ဝန်ထမ်းဥပဒေစည်းမျဉ်းစည်းကမ်းများ တိကျစွာလိုက်နာ ဆောင်ရွက်ရန်၊ မိမိတို့ တာဝန်ယူထားကြသည့် လုပ်ငန်းများ အောင်မြင်ရေးအတွက် ကြိုးပမ်းဆောင်ရွက်ကြရန်၊ လုပ်ငန်းများတွင် ကြုံတွေ့ရတတ်သည့် အခက်အခဲ နှင့်စိန်ခေါ်မှုများကို ဆက်စပ်ဌာန အဖွဲ့အစည်းများနှင့် ညှိနှိုင်းပေါင်းစပ်ဆောင်ရွက်ရန်၊ လိုအပ်ပါက ပြည်နယ်အစိုးရ နှင့် မိမိဝန်ကြီးဌာနသို့ အချိန်နှင့်တစ်ပြေးညီ တင်ပြဆောင်ရွက်ရန် ဆွေးနွေးမှာကြားသည်။ 

ထို့နောက်  ပြည်နယ်ခရိုင်အဆင့် လယ်ယာကဏ္ဍဆိုင်ရာ တာဝန်ရှိသူများက သက်ဆိုင်ရာလုပ်ငန်းကဏ္ဍများအလိုက်တင်ပြကြရာ ပြည်ထောင်စုဝန်ကြီးက ဖြည့်စွက်ဆွေးနွေးပြီး လိုအပ်ချက်များ ညှိနှိုင်းပေါင်းစပ်ဆောင်ရွက်ပေးကာ ဝန်ထမ်းများအတွက် စားသောက်ဖွယ်ရာများ ထောက်ပံ့ပေးအပ်ခဲ့ကြောင်း သတင်းရရှိသည်။

MOALI