ဗီယက်နမ်၏ လယ်ယာထွက်ကုန်တင်ပို့မှုများ စံချိန်တင်သည့် ထူးခြားသော နှစ်တစ်နှစ်ဖြစ်ခဲ့

ဗီယက်နမ်နိုင်ငံ၏ လယ်ယာထွက် ကုန်တင်ပို့မှုသည် ယခုနှစ်တွင် ဝင်ငွေဒေါ်လာ ၆၀-၆၁ ဘီလီယံအထိ ရှိလာကာ ၂၀၂၃ ခုနှစ်နှင့်နှိုင်းယှဉ်ပါက မကြုံစဖူး မှတ်တိုင်တစ်ခုအဖြစ် အောင်မြင်မှု လမ်းကြောင်းပေါ်တွင် ရှိနေကြောင်း သိရသည်။

လက်ရှိအချိန်တွင် အဓိကကျသည့် ကဏ္ဍအတော်များများသည် သတ်မှတ်ချိန်ထက်ကျော်လွန်ရောက်ရှိနေပြီဖြစ်သည်။ “အသီးများ၏ဘုရင်” ဟု အမည်ပေးထားသော ဒူးရင်းသီးသည် စံသတ်မှတ်ချက်အသစ်တစ်ခုကို ဆောင်ကျဉ်းပေးခဲ့သည်။ စက်တင်ဘာတွင် ၎င်း၏ ပို့ကုန်တန်ဖိုးသည် စံချိန်တင်ဒေါ်လာ ၂ ဒသမ ၈၁ ဘီလီယံအထိရှိခဲ့ပြီး ယမန်နှစ်ကရရှိသည့် စုစုပေါင်းဒေါ်လာ၂ ဒသမ၂ ဘီလီယံ ကို ကျော်လွန်သွားခဲ့သည်။ အဆိုပါကိန်းဂဏန်းသည် ၁၀ လအတွင်း ဒေါ်လာ ၃ ဘီလီယံအထိ မြင့်တက်လာပြီး နှစ်ကုန်တွင် ဒေါ်လာ ၃ ဒသမ ၃ ဘီလီယံအထိရောက်ရှိရန် ခန့်မှန်းထားသည်။

လက်ရှိတိုးတက်မှု အရှိန်အဟုန်ဖြင့် အေးခဲထားသော ဒူးရင်းသီးများကို တရားဝင်လမ်းကြောင်းများမှတစ်ဆင့် တရုတ်နိုင်ငံသို့ တင်ပို့သည့် ကုန်ပစ္စည်းများစာရင်းတွင် ထည့်သွင်းခြင်း၊ သစ်သီးများကို  သင်္ဘောများဖြင့် တင်ပို့ရောင်းချခြင်းဖြင့် လာမည့်နှစ်တွင် အမေရိကန်ဒေါ်လာ ၄ ဘီလီယံအထိ ရှိလာနိုင်ဖွယ်ရှိကြောင်း ဗီယက်နမ်သစ်သီးဝ လံနှင့်ဟင်းသီးဟင်းရွက်အသင်း (Vinafruit)၏ အထွေထွေ အတွင်း ရေးမှူး Dang Phuc Nguyen က ပြောကြားခဲ့သည်။ ၎င်း၏ ခိုင်မာ သော တိုးတက်မှုကြောင့် ၉ လအတွင်း စုစုပေါင်းသစ်သီးဝလံနှင့်ဟင်းသီးဟင်းရွက် တင်ပို့မှုတန်ဖိုးကို ၂၀၂၃ ခုနှစ် ကိန်း ဂဏန်းနှင့်ညီမျှ  သည့် အမေရိကန်ဒေါ်လာ ၅ ဒသမ ၆ ဘီလီယံအထိ ရရှိစေခဲ့ပြီး ၁၀ လတွင် အမေရိကန် ဒေါ်လာ ၆ ဒသမ ၂ ဘီလီယံနှင့် ၁၁ လတွင် အမေရိကန်ဒေါ်လာ ၆ ဒသမ ၆ ဘီလီယံအထိ ရရှိစေခဲ့သည်။

တစ်ချိန်တည်းတွင်ပင် ဆန်စပါးကဏ္ဍသည် လွန်ခဲ့သည့်နှစ်၏  စုစု ပေါင်းပို့ကုန်တန်ဖိုးထက် ၁၀ လအတွင်း ထူးထူးခြားခြား စွမ်းဆောင် နိုင်ခဲ့သည်။ ၂၀၂၃ ခုနှစ်က တန်ချိန် ၈ ဒသမ ၁ သန်းနှင့် နှိုင်းယှဉ်ပါက ပမာဏမှာ တန်ချိန် ၇ ဒသမ ၈ သန်းဖြင့် အနည်းငယ်ကျဆင်းသွားသော် လည်း မြင့်မားသော ပို့ကုန်စျေးနှုန်းများသည် ဝင်ငွေဒေါ်လာ ၄ ဒသမ ၉ ဘီလီယံသို့ ရရှိစေခဲ့ပြီး ယမန်နှစ်က ဒေါ်လာ ၄ ဒသမ ၆ ဘီလီယံကို ကျော်လွန်သွားခဲ့သည်။ နိုဝင်ဘာ ပထမ ၁၅ ရက်အတွင်း ပြည်ပသို့ ဆန်တန်ချိန် ၃၀၀,၀၀၀ နီးပါး တင်ပို့နိုင်ခဲ့ပြီး စုစုပေါင်း ပို့ကုန်တန်ဖိုး အမေရိကန်ဒေါ်လာ ၅ ဘီလီယံအထိ တိုးမြင့်လာခဲ့သည်။

အောက်တိုဘာသည် ပြည်တွင်းကော်ဖီ ခူးဆွတ်မှု စတင်ချိန်ဖြစ်ပြီး ၁၀ လ အတွင်း စုစုပေါင်းတင်ပို့မှုတန်ချိန် ၁ ဒသမ ၂ သန်းရှိပြီး အမေရိကန်ဒေါ်လာ ၄ ဒသမ ၆ ဘီလီယံတန်ဖိုးရှိကာ ၂၀၂၃ ခုနှစ် တစ်နှစ်လုံးရရှိထားသော အမေရိကန်ဒေါ်လာ ၄ ဒသမ ၂ ဘီလီယံနီးပါးပမာဏကို ကျော်လွန်ခဲ့သည်။ အခြေခံအားဖြင့် ၀ယ်လိုအားထက် ရောင်းလိုအားနိမ့်ကျနေသဖြင့် ကော်ဖီဈေးနှုန်းများ မြင့်မားနေမည်ဟုမျှော်လင့်ထားကြောင်း ဗီယက်နမ် ကော်ဖီ-ကိုကိုးအသင်း (Vicofa) ၏ ဒုတိယ ဥက္ကဋ္ဌ Do Ha Nam က ပြောကြားခဲ့သည်။

သို့သော်လည်း အနာဂတ်တွင် ဈေးနှုန်းအတက်အကျများသည် သစ်တောပြုန်းတီးမှု တိုက်ဖျက်ရေးစည်းမျဉ်းများ (EUDR)ကို ၂၀၂၄ ခုနှစ်၊ ဒီဇင်ဘာ ၃၀ ရက်နေ့ သို့မဟုတ် ပြီးခဲ့သည့် ၁၂ လအတွင်း ကျင့်သုံးရန် ရှိမရှိနှင့် ပတ်သက်၍ ဥရောပ သမဂ္ဂ၏ နောက်ဆုံး ဆုံးဖြတ်ချက်အပေါ် မူတည်မည် ဖြစ်သည်။ အရှိန်မြင့်လာပြီးနောက် ငရုတ်ကောင်းစေ့လုပ်ငန်းသည် ၁၀ လအတွင်း ပို့ကုန်ဝင်ငွေ ဒေါ်လာ ၁ ဒသမ ၁ ဘီလီယံရရှိခဲ့သည့်အပြင် နှစ်စဉ် ၄၇ ရာနှုန်း တိုးလာခဲ့သဖြင့် အရှိန်အဟုန်ပြင်းစွာ ပြန်လည်ကောင်းမွန်လာခဲ့သည်။ ၂၀၁၇ ခုနှစ်နောက်ပိုင်း ပထမဆုံးအကြိမ်အဖြစ် ထုတ်ကုန်သည် ဒေါ်လာဘီလီယံချီသောပို့ကုန်အမျိုး အစားအဖြစ် ပြန်လည်ဝင်ရောက်ရန် စီစဉ်ထားပြီး ၎င်း၏ ၂၀၂၄ ခုနှစ် ကုန်သွယ်မှုပမာဏသည် အမေရိကန်ဒေါ်လာ ၁ ဒသမ ၃ ဘီလီယံကျော်ရှိမည်ဟု ခန့်မှန်းထားသည်။

တစ်ချိန်တည်းတွင် သီဟိုဠ်စေ့တင်ပို့မှုသည် ဇန်နဝါရီမှအောက်တို ဘာအတွင်း ၂၀၂၃ ခုနှစ် တစ်နှစ်တာရရှိခဲ့သည့် ကိန်းဂဏန်းနှင့်ကိုက်ညီသော အမေရိကန်ဒေါ်လာ ၃ ဒသမ ၆ ဘီလီယံအထိ ရောက်ရှိခဲ့သည်။ ဗီယက်နမ်နိုင်ငံသည် ကမ္ဘာပေါ်တွင် အစေ့အဆန်တင်ပို့မှု၌ ထိပ်တန်းနိုင်ငံအဖြစ် ရပ်တည်နေပြီး ယခုနှစ် တင်ပို့မှုတန်ဖိုးသည် စံချိန်တင်ဒေါ်လာ ၄ ဒသမ ၃-၄ ဒသမ ၅ ဘီလီယံအထိ ရှိလာမည်ဟု ခန့်မှန်းထားကြောင်းသိရှိရသည်။

ဖုန်းမြတ်ဝင်းမောင်မောင်

https://theinvestor.vn/vietnam-agricultural-product-exports-poised-for-record-breaking-year-d13607.html