ရုရှား-ထိုင်း ကုန်သွယ်မှုပမာဏ ၉ လတာအတွင်း ကန်ဒေါ်လာ ၁ ဒသမ၂ ဘီလီယံသို့ ရောက်ရှိ

၂၀၂၄ ခုနှစ် ပထမ ၉ လတာကာလအတွင်း ရုရှားနှင့် ထိုင်းနိုင်ငံတို့အကြား ကုန်သွယ်မှု ပမာဏသည် အမေရိကန်ဒေါ်လာ ၁ ဒသမ၂ ဘီလီယံအထိ ရောက်ရှိခဲ့ကြောင်း ထိုင်း-ရုရှား စီးပွားရေး ကောင်စီနှင့် ထိုင်းစက်မှုလုပ်ငန်းအဖွဲ့ချုပ် ဥက္ကဋ္ဌ Mr. Kriengkrai Thiennukul က ပြောကြားခဲ့သည်။

ဒဏ်ခတ်ပိတ်ဆို့မှုများကြောင့် ငွေပေးချေမှုအပါအဝင် နှစ်နိုင်ငံအကြား ကုန်သွယ်မှုတွင်အခက်အခဲအတားအဆီးတချို့ ရှိသော်လည်း နှစ်နိုင်ငံကုန်သွယ်မှုပမာဏသည် ပထမ ၉ လ အတွင်း အမေရိကန်ဒေါ်လာ ၁ ဒသမ၂ ဘီလီယံခန့်အထိ ရောက်ရှိခဲ့ကြောင်း၊ ထိုင်းနိုင်ငံသည် ရုရှားနိုင်ငံသို့ ကန်ဒေါ်လာ ၆၁၀ သန်း တန်ဖိုးရှိ ကုန်ပစ္စည်းများ တင်ပို့ခဲ့ပြီး ရုရှားနိုင်ငံမှ ကန်ဒေါ်လာ ၅၇၉ သန်း တန်ဖိုးရှိ ကုန်ပစ္စည်းများ တင်သွင်းခဲ့ကြောင်း၊ ထိုင်းနိုင်ငံသည် ရုရှားရေနံစိမ်းနှင့် ဓာတ်မြေသြဇာများတင်သွင်းရန် စိတ်ဝင်စားကြောင်း Mr. Kriengkrai Thiennukul က ပြောကြားခဲ့သည်။

ထိုင်းနိုင်ငံသို့ လာရောက်လည်ပတ်ခဲ့သည့် ရုရှားခရီးသွားအရေ အတွက်သည် နှစ်စမှ စတင်၍ စက်တင်ဘာလအထိ ၁ ဒသမ ၄ သန်းကျော်ရှိကြောင်း နှစ်နိုင်ငံကြား ခရီးသွား ဖလှယ်ရေးဖွံ့ဖြိုးတိုးတက်ရေးနှင့်ပတ်သက်၍ ၎င်းက ထည့်သွင်းပြောကြားခဲ့သည်။

ရုရှားနိုင်ငံသည် ထိုင်းနိုင်ငံသို့ ရေနံနှင့် ရေနံထွက်ပစ္စည်း၊ ဓာတ်မြေသြဇာ၊ သံနှင့် သံမဏိ၊ အလူမီနီယံ၊ ဂျုံ၊ ကျောက်မျက်ရတနာ၊ နို့နှင့် နို့ ထွက်ပစ္စည်း၊ သတ္တုနှင့် ဆောက်လုပ်ရေးပစ္စည်းများကို အဓိကတင်ပို့ပြီး ထိုင်းနိုင်ငံမှ စက်ပစ္စည်းနှင့် အစိတ်အပိုင်းများ၊ အီလက်ထရောနစ်ပစ္စည်းများ၊ တာယာ၊ စည်သွတ်သစ်သီးများ၊ စည်သွတ်ပင်လယ်စာ၊ ရော်ဘာ၊ ဆန်၊ ဟင်းခတ်အမွှေးအကြိုင်များ စသည်တို့ကို အဓိကတင်သွင်းကြောင်း သိရသည်။

ခွန်မျိုးသူ

https://tass.ru/ekonomika/185410987