ပင်မှည့်သီး မှာယူမှုများ မြင့်မားလျက်ရှိ

ရှမ်းပြည်နယ်၊ အောင်ပန်းမြို့ရှိ သစ်သီးဝလံဈေးကွက်၌ ရှားပါးပြတ်လပ်ခါနီးဖြစ်သည့် အီတလီ ပင်မှည့်သီးများအား နေပြည်တော်မှ အများအပြားမှာယူအားပေးလျက်ရှိကြောင်း သိရှိရသည်။ ပင်မှည့်သီးကို အဓိကအားဖြင့် သစ်သီးဖျော်ရည်ဆိုင်များမှ မှာယူလျက်ရှိပြီး ယခုအချိန်တွင် ဈေးနှုန်းမှာ အနည်းငယ် မြင့်တက်လာကြောင်း သိရှိရပါသည်။

အီတလီပင်မှည့်သီးမှာ အရောင်းအဝယ်ကောင်းမွန်လျက်ရှိကြောင်း၊ အဓိကအားဖြင့် ရပ်စောက်နှင့် ပင်လုံမြို့တို့တွင် စိုက်ပျိုးထုတ်လုပ်လျက်ရှိကြောင်း၊ နေပြည်တော်၊ ရန်ကုန်၊ မန္တလေး၊ ဘားအံ၊ မြဝတီနှင့် တာချီလိတ်တို့မှ အများအပြား မှာယူလျက်ရှိပြီး နေပြည်တော်မှ အများဆုံး မှာယူကြောင်း၊ အောင်ပန်းမြို့တွင်မူသစ်သီးဖျော်ရည်ဆိုင်များမှ အများဆုံးမှာယူကြကြောင်း၊ ယခုအခါ ရာသီကုန်ချိန် နီးပြီဖြစ်သဖြင့် ဈေးနှုန်း အနည်းငယ် မြင့်တက်လာကြောင်းကို အောင်ပန်းမြို့နယ်ရှိ အီတလီပင်မှည့်သီး လက်လီလက္ကား ကုန်သည် မညိုလဲ့ရီ၏ ပြောကြားချက်အရ သိရှိရသည်။

ယခုနှစ်၏ ပင်မှည့်သီးအထွက်နှုန်းမှာ ယခင်နှစ်နှင့်နှိုင်းယှဉ်ပါက မြင့်တက်လာပြီး အရောင်းအဝယ်လည်း ကောင်းမွန်လျက်ရှိကြောင်း၊ ဈေးကောင်းလည်း ရရှိကြောင်း၊ ပင်မှည့်သီးရာသီချိန် ကုန်လုပြီဖြစ်သဖြင့် တစ်နှစ်ပတ်လုံး ရောင်းချနိုင်ရန်အတွက် အသီးများကို အိတ်များဖြင့်ထည့်ကာ အေးခဲထားရသည်ဟု သူမက ဆက်လက် ပြောကြားခဲ့ကြောင်းသိရှိရပါသည်။

နှင်းရီဝင်း

https://www.gnlm.com.mm/241473-2/