မြန်မာနိုင်ငံတမံကြီးများဆိုင်ရာ အမျိုးသားကော်မတီမှ ကြီးမှူ:၍ “Knowledge Sharing For Better Dams and Water Resources Management” ခေါင်းစဥ်ဖြင့် စာတမ်းဖတ်ပွဲကျင်းပ

နေပြည်တော်၊ အောက်တိုဘာ၂၆

မြန်မာနိုင်ငံတမံကြီးများဆိုင်ရာ အမျိုးသားကော်မတီမှ ကြီးမှူးကျင်းပသော “Knowledge Sharing For Better Dams and Water Resources Management” ခေါင်းစဥ်ဖြင့် ကျင်းပသောစာတမ်းဖတ်ပွဲကို အောက်တိုဘာ ၂၅ ရက်နေ့၊ နံနက်ပိုင်းက ရန်ကုန်မြို့ ရန်ကင်းမြို့နယ်ရှိဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနရုံး အစည်းအဝေးခန်းမ၌ ကျင်းပရာ အခမ်းအနားသို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်၊ မြန်မာနိုင်ငံ တမံကြီးများဆိုင်ရာ အမျိုးသားကော်မတီဥက္ကဋ္ဌ၊ နာယကအဖွဲ့ဝင်များ အလုပ်အမှုဆောင် ကော်မတီဝင်များ၊ အသင်းသားများနှင့် ဖိတ်ကြားထားသော ဧည့်သည်တော်များ  တက်ရောက်ကြသည်။

စာတမ်းဖတ်ပွဲအခမ်းအနားတွင် ဒုတိယဝန်ကြီးက အဖွင့်အမှာစကားပြောကြားရာ ယခုလိုစာတမ်းဖတ်ပွဲများ ကျင်းပခြင်းဖြင့် ဆည်၊ တာတမံထိန်းသိမ်းပြီး စိုက်ပျိုးရေ‌ ပေးဝေခြင်းလုပ်ငန်းစဥ်များ၊ စိုက်ပျိုးရေထုတ်လွှတ်ခြင်းနှင့်အတူ ရေအားလျှပ်စစ် ထုတ်လုပ်ခြင်းလုပ်ငန်းစဥ်များအပေါ် များစွာအကျိုးဖြစ်ထွန်းစေကြောင်း၊ မြန်မာနိုင်ငံ သည် ရေချိုအရင်းအမြစ်များ ပေါကြွယ်ဝသော်လည်း စိုက်ပျိုးရေပေးဝေရေးနှင့် ရေအားလျှပ်စစ်ထုတ်လုပ်ရေး ကဏ္ဍတွေမှာ လက်ရှိအခြေအနေအရ လိုအပ်ချက်များ ရှိနေသေးသည့်အပြင် ကမ္ဘာ့ရာသီဥတု ပြောင်းလဲမှုအခြေအနေများ၊ သဘာဝပတ်ဝန်းကျင် ထိန်းသိမ်းဖို့လိုအပ်သည့် အခြေအနေတွေရှိနေတာနှင့်အတူ တစ်ဖက်မှာလည်း စိုက်ပျိုးရေလိုအပ်ချက် မြင့်မားမှု၊ လျှပ်စစ်ဓာတ်အား လိုအပ်ချက် မြင့်မားလာမှုစသည့် စိန်ခေါ်မှုတွေရှိလာကြောင်း၊ ရေကြီးရေလျှံမှုဖြစ်စဥ်ကြောင့် ယခုနှစ် မိုးသီးနှံရာသီအတွင်း စိုက်ပျိုးထားသော မိုးစပါး စိုက်ခင်းအများအပြား ထိခိုက် ပျက်စီးခဲ့ပြီး စားနပ်ရိက္ခာ ဖူလုံမှုအပေါ် သက်ရောက်မှုများ ဖြစ်ပေါ်လာနိုင်သဖြင့် ပြန်လည် အစားထိုးကုစား နိုင်ရန် အတွက် လာမည့် နွေသီးနှံရာသီတွင် တစ်နိုင်ငံလုံး၌ နွေစပါး ဧက(၃)သန်းကျော် အထိ တိုးချဲ့စိုက်ပျိုးနိုင်ရန် လျာထားစီမံ ဆောင်ရွက်လျက်ရှိကြောင်း၊ 

ရေကြီးရေလျှံမှု ဖြစ်စဥ်အပေါ် ခြုံငုံသုံးသပ်ရလျှင် မြစ်ချောင်းများ၏ ရေဆင်းဧရိယာများအတွင်း သစ်တောပြုန်းတီးမှု များပြားခြင်းနှင့်အတူ နောက်ဆက် တွဲ ဆိုးကျိုးများအနေဖြင့် မြေဆီလွှာ တိုက်စားစီးဆင်းမှု၊ မြေပြိုမှုများ ဆိုးရွားစွာ ဖြစ်ပေါ်ပြီး မြစ်ချောင်းများ တလျောက် သဲနုန်းပို့ချမှု ကြီးမားစွာ ဖြစ်ပေါ်ကာ မြစ်ချောင်း ကြမ်းပြင်များ မြင့်တက်လာလျက်ရှိကြောင်း၊ သစ်တောပြုန်းတီးမှုများကို ကာကွယ်နိုင် ရန်အတွက် ပတ်သက်ဆက်ဆိုင်သည့် ဌာနများ အနေဖြင့် ပြည်သူများသို့ ဆွေးနွေး အသိပညာပေးခြင်း၊ ဥပဒေလုပ်ထုံးလုပ်နည်းများနှင့်အညီ ထိန်းကျောင်းခြင်းများကို စီမံဆောင်ရွက်ရန် လိုအပ်လျက်ရှိသဖြင့် မိမိတို့ဌာနအနေဖြင့် ကြို့ပမ်းဆောင်ရွက်မှုနှင့် အတူ မြန်မာနိုင်ငံတမံကြီးများဆိုင်ရာ အမျိုးသားကော်မတီ အနေဖြင့်လည်း တက်နိုင် သည့် ကဏ္ဍမှ ဝိုင်းဝန်းပူးပေါင်းအကြံပေး ကူညီဆောင်ရွက်ပေးနိုင်ရန် တိုက်တွန်း ပြောကြားလိုကြောင်း၊ ကော်မတီ၏ ရည်ရွယ်ချက်အတိုင်း အဆိုပါ ရေကြီးရေလျှံမှု ဖြစ်စဥ်နှင့် ပတ်သက်၍ ဌာနဆိုင်ရာများမှ အချက်အလက်များ စုဆောင်းပြီး အစီရင်ခံစာများ ပြုစုရေးသားမှုအပေါ် အခြေခံပြီး စာတမ်းများပြုစု၍ စာတမ်းဖတ်ပွဲများ ဆက်လက်ကျင်းပ ပြုလုပ်မှုများ ဆောင်ရွက်ပေးစေလိုကြောင်း၊ မိမိတို့နိုင်ငံ ဖွံ့ဖြိုတိုးတက်ရေးအတွက် အရေးကြီးကဏ္ဍတွေဖြစ်သည့် စိုက်ပျိုးရေးနှင့် လျှပ်စစ်စွမ်းအင်ကဏ္ဍတွေမှာ ရေလှောင်တမံကြီးများသည် အဓိကနေရာက စွမ်းဆောင်ပေးနေပြီး ရေလှောင်တမံကြီးများရဲ့ လုံခြုံစိတ်ချရမှု၊ ခိုင်ခံတည်ငြိမ်မှု၊ သဘာဝ ပတ်ဝန်းကျင်၊ စီးပွားရေးနှင့်လူမှုပတ်ဝန်းကျင်းတို့အပေါ် အကျိုးသက်‌ရောက်မှု၊ စွမ်းရည်မြင့်မား တိုးတက်မှုအစရှိသည့် လုပ်ငန်းရပ်များကို မြန်မာနိုင်ငံတမံကြီးများဆိုင်ရာ အမျိုးသားကော်မတီ၏ ရည်ရွယ်ချက်များနှင့်အညီ ဆက်လက်ဆောင်ရွက်ပေး စေလိုပါကြောင်း၊ ရေရှည်တည်တံ့ခိုင်မြဲပြီး ရာသီဥတုပြောင်းလဲမှု ဒဏ်ခံနိုင်သည့် စိုက်ပျိုးရေးကဏ္ဍ ဖြစ်ပေါ်စေဖို့ နိုင်ငံတကာ နည်းပညာရပ်များ၊ သုတေသနရလဒ်များကို မျိုးဆက်သစ်များသို့ ဆက်လက်ဖြန့်ဝေပေးစေလိုပါကြောင်း ပြောကြားသည်။

ဆက်လက်၍ မြန်မာနိုင်ငံတမံကြီးများဆိုင်ရာ အမျိုးသားကော်မတီ၊ ဥက္ကဌမှ အဖွင့်အမှာစကားပြောကြားသည်။ ယခုစာတမ်းဖတ်ပွဲတွင် ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာနမှ စာတမ်းရှင် (၃)ဦးနှင့် ရေအားလျှပ်စစ် အကောင်အထည်ဖော်ရေး ဦးစီးဌာနမှစာတမ်းရှင်(၁)ဦးတို့က “Measures to Minimize the Environmental and Social Impacts in the Implementation of the Upper Yeywa Hydropower Project” ခေါင်းစဉ်ဖြင့်လည်းကောင်း၊ “Engineering Management On Rock-Fill Dam Project” ခေါင်းစဥ်ဖြင့်လည်‌ကောင်း၊ “Dispersive soils and Their Management" ခေါင်းစဥ်ဖြင့်လည်‌ကောင်း၊ “Rules and Regulations for Flood Control Management of Thaphanzeik Dam” ခေါင်းစဉ်ဖြင့် အသီးသီး ဖတ်ကြားကြပြီး တက်ရောက်လာသူများက စာတမ်းနှင့် ပတ်သက်၍ အပြန်အလှန် ဆွေးနွေးဖလှယ်ခဲ့ကြသည်။

ညနေပိုင်းတွင် ဒုတိယဝန်ကြီးနှင့် ဌာနဆိုင်ရာ တာဝန်ရှိသူများသည် ဆည်မြောင်း နှင့် ရေအသုံးချမှုစီမံခန့်ခွဲရေးဦးစီးဌာန တည်ဆောက်ရေး(၉) အစည်းအဝေး ခန်းမ၌ တိုင်းဒေသကြီးဦးစီးမှူးများနှင့် တွေ့ဆုံ၍ (၃)သီးစိုက်ပျိုးနိုင်ရေး၊ သီးနှံများပန်းတိုင် အထွက်နှုန်း ရရှိရေးအတွက် မျိုးစေ့သုံးစွဲမှုမှန်ကန်ရေး၊ လက်တွေ့ဆန်သော သုတေသန များ ဖော်ထုတ်နိုင်ရေး၊ ရေလှောင်တမံများရေသိုလှောင်ထားရှိမှုနှင့် (၃)သီး စိုက်ပျိုးနိုင်ရေး နွေစပါးတိုးချဲ့‌ရေး ဆက်စပ်အ‌ခြေအနေများ၊ စာရင်းကိန်းဂဏန်း မှန်ကန် စေရေးစသည့် စိုက်ပျိုးမွေးမြူရေး ကဏ္ဍတိုးတက်စေရေးဆိုင်ရာ ကိစ္စရပ်များဆွေးနွေးခဲ့ကြကြောင်း သတင်းရရှိသည်။