မန္တလေးဈေးကွက်
ဆန်
မြို့တွင်းစားသုံးမှုသာရှိခြင်း၊ နယ်ဝေး တင်ပို့ရမှု မရှိခြင်းကြောင့် လက်ကျန်နည်းသော်လည်း ရွှေဘိုပေါ်ဆန်းတစ်အိတ် ၁၃၀၀၀၀ကျပ်၊ ရန်ကုန်ပေါ်ဆန်းတစ်အိတ် ၁၄၅၀၀၀ကျပ်ဖြင့် ဈေးတည်ငြိမ်နေသည်။မနောသုခဆန်မှာ လက်ကျန်နည်းသွားခြင်း၊ လူလတ်တန်းစား အများသုံးဆန်ဖြစ်ခြင်းကြောင့် အရည်အသွေးပေါ်မူတည်၍ တစ်အိတ် ၉၀၀၀၀ကျပ်မှ ၉၆၀၀၀ ကျပ် ဖြင့် ရောင်းဝယ်မှုရှိသည်။ငစိန်ဆန်မှာ မိုးစပါးစိုက်ထားဆဲဖြစ်ခြင်း၊ အဝင်နည်းခြင်း၊ မုန့်လုပ်ငန်းရှင်များ အဝယ်များခြင်းကြောင့် ယခင်အပတ် တစ်အိတ် ၇၈၀၀၀ကျပ်မှ ယခုအပတ် ၈၂၀၀၀ကျပ်သို့ ဈေးမြင့်သွားသည်။ ဇီယာ မျိုးနွယ်ဝင်ဆန်များ ပြည်ပတင်ပို့မှုရှိခြင်း၊ တောင်သူထံ လက်ကျန်နည်း ၍ ပင်ရင်းဈေးမြင့်ခြင်းကြောင့် အရောင်းအဝယ် အေးသော်လည်း အဟောင်းနှစ်သက်သူ များသဖြင့် အဟောင်းတစ်အိတ် ၉၅၀၀၀ကျပ်ဖြင့် ဈေးတည်ငြိမ်နေသည်။ဧရာမင်းဆန်မှာ အဝင်ပုံမှန်၊ မြို့တွင်းသုံးပုံမှန်ရှိခြင်း၊ မန္တလေးဝန်းကျင်မှလာရောက်ဝယ်ယူမှု နည်းခြင်း၊ မိုးများသဖြင့် အရောင်း အဝယ်အေးခြင်းတို့ကြောင့် တစ်အိတ် ၁၃၅၀၀၀ကျပ်ဖြင့် ဈေးငြိမ်နေသည်။
ဆီထွက်သီးနှံ
မြေပဲ (လုံးဆန်) ဈေးနှုန်းမှာ မိုးမြေပဲဝင်ချိန်နီး၍ လှောင်သမားထုတ်ရောင်းမှုရှိခြင်းကြောင့် လုပ်ငန်းသုံး အဝယ်ပုံမှန်ရှိသော်လည်း အရည်အ သွေးအကောင်းဆုံး ၁၀၀ပိဿာ ၉၄၀၀၀၀ကျပ်မှ ၉၃၀၀၀၀ကျပ် သို့ ဈေးမသိမသာနိမ့်သွားသည်။ မြေပဲ(ဆီဆန်)မှာ အသစ်ဝင်ရောက်မှုရှိသော်လည်း ဆီစက်သမား အဝယ်များခြင်းကြောင့် ၁၀၀ပိဿာ ၈၃၀၀၀၀ကျပ်ဖြင့် ဈေးတည်ငြိမ်နေသည်။ နှမ်းမျိုးစုံတို့အနက် နှမ်းဖြူမှာ အသစ်ဝင်ရောက်မှုရှိခြင်း၊ တရုတ်ဝယ်လက်နှင့် လှောင်သမား အဝယ်နည်းခြင်းကြောင့် အရည်အသွေးအကောင်းဆုံး ၄၅၀၀၀၀ကျပ်မှ ၃၈၀၀၀၀ကျပ်သို့ လည်းကောင်း၊ အရည် အသွေးအညံ့ဆုံး ၄၃၀၀၀၀ကျပ်မှ ၃၇၀၀၀၀ကျပ်သို့ အသီးသီး ဈေးနိမ့် သွားသည်။ နှမ်းညိုဈေးနှုန်းမှာ အသစ်အဝင်များခြင်း၊ ဆီစက်သမား အဝယ်ပုံမှန်ရှိခြင်းကြောင့် အရည်အသွေးအကောင်းဆုံး ၃၃၀၀၀၀ကျပ်မှ ၃၁၀၀၀၀ကျပ်သို့ ဈေးနိမ့်သွားသည်။ နှမ်းနက်(စမုံ)မှာ တရုတ်ဝယ်လက်နည်းခြင်း၊ အသစ်ဝင်ချိန်နီးခြင်း၊ လှောင်သမား ထုတ်ရောင်းမှုရှိခြင်းကြောင့် အရည်အသွေးအကောင်းဆုံး ၄၅ပိဿာ ယခင်အပတ် ၆၇၀၀၀၀ကျပ်မှ ၆၁၀၀၀၀ကျပ်သို့ ဈေးမသိမသာနိမ့်သွားသည်။ ပန်းနှမ်းဈေးနှုန်းအနေဖြင့် ပစ္စည်းရှား အရောင်း အဝယ်အေးခြင်း စတင်စိုက်ပျိုးရန် ပြင်ဆင်ချိန် ဖြစ်ခြင်းတို့ကြောင့် ၃တင်း တစ်အိတ် ၂၇၀၀၀၀ကျပ်ဖြင့် ဈေးတည်ငြိမ်နေသည်။
နေကြာဈေးနှုန်းမှာ ရာသီဥတုနှင့် လမ်းပမ်းဆက်သွယ်ရေးကြောင့် မိုးနေကြာမဝင်သေးခြင်း၊ ဆီစက်သမား အဝယ်ပုံမှန်ရှိခြင်း၊ လက်ကျန်နည်းခြင်းကြောင့် ၂၇ပိဿာ ၂၁၅၀၀၀ကျပ်မှ ၂၃၀၀၀၀ကျပ်သို့ ဈေးမြင့်သွားသည်။ ဆီဈေးနှုန်းများအနေဖြင့် မြေပဲ(ဆီဆန်) ဈေးမသိမသာနိမ့်ခြင်းကြောင့် ပဲဆီတစ်ပိဿာ ၁၉၀၀၀ကျပ်မှ ၁၇၀၀၀ကျပ်သို့ ဈေးနိမ့်သွားပြီး နှမ်းဆီတစ်ပိဿာ ၁၆၀၀၀ကျပ်၊ ပဲပုတ်ဆီ ၁၂၀၀၀ကျပ်၊ ပန်းနှမ်းဆီ ၁၅၀၀၀ ကျပ်သို့ ဈေးအသီးသီးဖြင့် ရောင်းဝယ်မှုရှိသည်။
စားဖိုဆောင်သီးနှံ
ငရုတ်ခြောက် (ရှည်)မှာ မန္တလေးတိုင်းမြို့နယ်များ ရွှေဘို၊ မြင်းမူ တို့မှ ဝင်ရောက်ပြီး တစ်ပိဿာ ၁၀၀၀၀ကျပ်၊ ငရုတ်ခြောက် (လတ်) တစ်ပိဿာ ၈၀၀၀ကျပ်နှင့် ဧရာဝတီတိုင်း (ပန်းတနော်)မှ ငရုတ်ခြောက် (ပွ) ) Air con သီး တစ်ပိဿာ ၂၃၀၀၀ကျပ်၊ ပုလိပ်ပွ တစ်ပိဿာ ၁၉၀၀၀ကျပ်ဖြင့် မြို့တွင်းသုံးနှင့် မန္တလေးဝန်းကျင်မြို့များမှ ဝယ်ယူမှုရှိသည်။ ကြက်သွန်နီဈေးနှုန်းမှာ နယ်စုံလက်ကျန်အဟောင်းများသာ ထုတ်ရောင်းမှုရှိပြီး မြို့တွင်းစားသုံးမှုသာ ရှိခြင်းကြောင့် ကြီးတစ်ပိဿာ ၂၂၀၀ကျပ်၊ လတ်တစ်ပိဿာ ၁၉၀၀ကျပ်၊ သေးတစ်ပိဿာ ၁၆၀၀ကျပ်ဖြင့် ဈေးတည်ငြိမ်နေသည်။
ကြက်သွန်ဖြူ(တရုတ်)မှာ လမ်းပမ်းဆက်သွယ်ရေးကြောင့် အဝင်နည်းသော်လည်း နယ်ဝေး တင်ပို့ရမှုမရှိဘဲ မြို့တွင်းသုံးသာရှိခြင်းကြောင့် တစ်ပိဿာ ၁၈၀၀၀ကျပ်မှ ၁၇၀၀၀ကျပ်သို့ ဈေးနိမ့်သွားသည်။ ကြက်သွန်ဖြူ (ရှမ်း)မှာ အဝင်ပုံမှန်၊ စားသုံးမှု ပုံမှန်ရှိခြင်းကြောင့် အရည်အသွေး အကောင်းဆုံး တစ်ပိဿာ ၁၂၀၀၀ကျပ်၊ အညံ့ဆုံး ၉၀၀၀ကျပ်ဖြင့် ဈေးတည်ငြိမ်နေသည်။
အာလူးဈေးနှုန်းမှာ တရုတ်အာလူးများ ဝင်ရောက်မှုရှိပြီး တစ်ပိဿာ ၅၅၀၀ကျပ်၊ အောင်ပန်း အာလူး အိုကေတစ်ပိဿာ ၄၅၀၀ကျပ်၊ အေဝမ်း ၃၃၀၀ကျပ်ဖြင့် ရောင်းဝယ်နေသည်။ ချင်းဈေးနှုန်းမှာ ဥမများသာ ဝင်ရောက်ခြင်း၊ ချင်းသစ်ဖော်ချိန်ဖြစ်၍ အဝင်များခြင်းကြောင့် တစ်ပိဿာ ၃၅၀၀ကျပ်ဖြင့် ဈေးတည်ငြိမ်နေသည်။
ပဲမျိုးစုံ
မတ်ပဲဈေးနှုန်းအနေဖြင့် လက်ကျန်နည်း၊ ပစ္စည်းရှားခြင်းရှိသော်လည်း ပဲခွဲစက်နှင့် ရန်ကုန်ဝယ်လက်အဝယ်နည်းခြင်း၊ လှောင်သမား ထုတ်ရောင်းမှုရှိခြင်းကြောင့် ၃တင်းတစ်အိတ် ၃၈၅၀၀၀ကျပ်မှ ၃၇၀၀၀၀ ကျပ်သို့ ဈေးနိမ့်သွားသည်။
ပဲတီစိမ်း(အညာ)မှာ မိုးပဲဝင်ချိန်နီးခြင်း၊ တရုတ်ဝယ်လက်နည်းခြင်း၊ ပဲခွဲစက်များ ဝယ်ယူမှု နည်းခြင်းကြောင့် ၃တင်းတစ်အိတ် အရည်အသွေးအကောင်းဆုံး ၂၅၀၀၀၀ကျပ်မှ ၂၄၅၀၀၀ကျပ်သို့ ဈေးမသိမသာနိမ့်သွားသည်။
ပဲစဉ်းငုံ(ဖြူ/နီ)တို့မှာ လက်ကျန်နည်းခြင်း၊ ပစ္စည်းရှားခြင်း၊ အရောင်းအဝယ်အေးခြင်းကြောင့် ဩဂုတ်လဈေးနှုန်းအတိုင်း ပဲစဉ်းငုံ(ဖြူ) ၃တင်းတစ်အိတ် ၄၃၅၀၀၀ကျပ်၊ ပဲစဉ်းငုံ(နီ) တစ်အိတ် ၄၆၅၀၀၀ကျပ်ဖြင့် ဈေးတည်ငြိမ်နေသည်။
ကုလားပဲ(လုံးဖြူကြီးV2)မှာ လက်ကျန်နည်း၊ ပစ္စည်းရှားခြင်းကြောင့် လုပ်ငန်းသမားအဝယ် နည်းသော်လည်း ၃တင်းတစ်အိတ် ၃၀၀၀၀၀ကျပ်ဖြင့် ဈေးတည်ငြိမ်နေပြီး လုံးဝါကြီး(ထိုင်ဝမ်) မှာလည်း ပဲစိုများပေါချိန်ဖြစ်၍ ခွဲခြမ်းအတွက် စက်သမား အဝယ်နည်းခြင်းကြောင့် ၃တင်းတစ်အိတ် ၂၇၅၀၀၀ကျပ်ဖြင့် ဈေးတည်ငြိမ်နေသည်။ ခွဲခြမ်းမှာ မြို့တွင်းသုံးဝယ်ယူမှု နည်းခြင်းကြောင့် တစ်ပိဿာ ၇၀၀၀ကျပ်ဖြင့် ဈေးတည်ငြိမ်နေသည်။
ပဲပုတ်(ဗမာ)မှာ မိုးပဲဝင်ချိန်ဖြစ်သော်လည်း မဝင်သေးခြင်း၊ လုပ်ငန်းသမား အဝယ်ပုံမှန်ရှိခြင်း ကြောင့် ၃တင်းတစ်အိတ် ၃၇၀၀၀၀ကျပ်မှ ၃၈၀၀၀၀ကျပ်သို့ ဈေးမြင့်သွားပြီး ပဲပုတ်(ရှမ်း)မှာ ဆီစက်သမား အဝယ်ပုံမှန်ရှိခြင်း၊ လမ်းပမ်းဆက်သွယ်ရေးကြောင့် အသစ်မဝင်သေးခြင်းတို့ကြောင့် ၃တင်းတစ်အိတ် ၃၈၀၀၀၀ကျပ်မှ ၄၀၀၀၀၀ကျပ်သို့ ဈေးမြင့်သွားသည်။
ပဲယင်း၊ မြေထောက်ပဲ၊ စားတော်ပဲ(ကျွန်း) တို့မှာလည်း ပစ္စည်းရှားသော်လည်း အရောင်းအဝယ်အေးခြင်းကြောင့် ပဲယင်းတစ်အိတ် ၁၈၈၀၀၀ ကျပ်မှ ၁၈၇၀၀၀ကျပ်၊ မြေထောက်ပဲ ၃၈၀၀၀၀ကျပ်မှ ၃၇၀၀၀၀ကျပ်၊ စားတော်ပဲ(ကျွန်း) ၄၂၀၀၀၀ကျပ်မှ ၄၀၀၀၀၀ကျပ်သို့ ဈေးအသီးသီး နိမ့်သွားသည်။
ပဲကြီး(ကြီး)မှာ မိုးပဲမဝင်သေးသော်လည်း လုပ်ငန်းသမားအဝယ်နည်းပြီး အရောင်းအဝယ် အေးခြင်းကြောင့် ၃တင်းတစ်အိတ် ၃၁၀၀၀၀ကျပ်မှ ၃၀၀၀၀၀ကျပ်သို့ ဈေးနိမ့်သွားသည်။ ပဲကြီး(သေး) မှာ လက်လီသမားနှင့် ပဲလှော်လုပ်ငန်းသမားအဝယ်ရှိခြင်းကြောင့် ၃တင်းတစ်အိတ် ၂၂၀၀၀၀ကျပ်မှ ၂၄၀၀၀၀ကျပ်သို့ ဈေးမြင့်သွားသည်။ ထောပတ်ပဲ(ကြီး)မှာ ပစ္စည်းရှားခြင်း၊ အသစ် မဝင်သေးခြင်းကြောင့် ၃တင်းတစ်အိတ် ၄၀၀၀၀၀ကျပ်မှ ၄၂၀၀၀၀
ကျပ်သို့ ဈေးမြင့်သွားသည်။
ဂျုံနှင့်အစေ့ထုတ်ပြောင်း
ဂျုံလက်ကျန်နည်း ပစ္စည်းရှားသော်လည်း နယ်ဝေးတင်ပို့ရမှုမရှိခြင်း၊ မြို့တွင်းဂျုံစက်များ အဝယ်နည်း ခြင်းကြောင့် ငါန်ဇွန်၊ မြင်းမူ၊ မြောင်၊ ဆားတောင်၊ ဘုတလင်၊ မုံရွာ ဂျုံများ ၃တင်းတစ်အိတ် ၂၃၀၀၀၀ကျပ်မှ ၂၂၀၀၀၀ကျပ်သို့ ဈေးနိမ့်သွားပြီး ရှမ်းဂျုံမှာ အသစ်ဝင်ရောက်သော်လည်း လမ်းပန်းဆက်သွယ်ရေးကြောင့် အဝင်နည်းပြီး ၁၉၀၀၀၀ကျပ်မှ ၁၉၈၀၀၀ ကျပ်သို့ ဈေးမြင့်သွားသည်။ အစေ့ထုတ်ပြောင်း အသစ်ဝင်ရောက်သော်လည်း အဝင်နည်းခြင်း၊ အစာစပ်သမားပုံမှန်ဝယ်ယူမှုရှိခြင်း ကြောင့် ၃တင်းတစ်အိတ် ၈၇၀၀၀ကျပ်မှ ၈၈၀၀၀ကျပ်သို့ ဈေးမြင့်သွားသည်။
သစ်သီးဝလံ
အုန်းတော၊ ဝမ်းတွင်း၊ သဲတောတို့မှ ဖရဲသီးများ လှိုင်လှိုင်ဝင်ရောက်ပြီး တစ်လုံး ၂၅၀၀ကျပ်မှ ၃၅၀၀ကျပ်၊ တန့်ယန်းနာနတ်များ အဝင်များသော်လည်း တစ်လုံး ၁၅၀၀ကျပ်ထိ ဈေးမြင့်သွားသည်။ရွာငံဘက်မှ ထောပတ်သီးနှင့်ပင်မှည့်သီးများ အဝင်များပြီး အလုံး ၁၂၀ ပါ ထော ပတ်သီးတစ်အိတ် ၄၅၀၀၀ကျပ်၊ ၂၅၀ လုံးပါ ပင်မှည့်သီးတစ်အိတ် ၃၅၀၀၀ ကျပ်ဖြင့် မြို့တွင်းသုံးနှင့် အမှာရှိသောမန္တလေးဝန်းကျင် ဒေသ များသို့ တင်ပို့သည်။ တရုတ်စပျစ်များသာ ဝင်ရောက်ပြီး ၃ ပိဿာ ၅၀ ကျပ်သားဝင် တစ်ခြင်း ၈၀၀၀၀ကျပ်၊ ဖရဲသခွား၊ သခွားမွှေးများ အဝင်နည်းခြင်းကြောင့် ဝူခုန်းသခွား (ဖရဲသခွား) တစ်လုံး ၅၀၀၀ မှ ၆၀၀၀ ကျပ်၊ သခွားမွှေးတစ်လုံး ၃၀၀၀ကျပ်ဖြင့် မြို့တွင်း သစ်သီးဆိုင်များ ဝယ် ယူမှုများသာရှိပြီး နယ်ဝေးတင်ပို့ရမှု နည်းနေသည်။
ခင်မေကြည်