အခြေခံပညာနှင့် စက်မှု၊စိုက်ပျိုး၊မွေးမြူရေးအထက်တန်းကျောင်း ဆရာ/ဆရာမများအတွက် စိုက်ပျိုးရေးနှင့်မွေးမြူရေး အထူးပြုဘာသာရပ်ဆိုင်ရာ ကျွမ်းကျင်မှုစွမ်းရည်မြှင့်သင်တန်း ဖွင့်လှစ်

နေပြည်တော်၊ ဧပြီ၂၇

အခြေခံပညာနှင့်စက်မှု၊စိုက်ပျိုး၊မွေးမြူရေး အထက်တန်းကျောင်းများတွင် Grade-10, Grade-11 , Grade-12 သင်ကြားရေး တာဝန်ယူကြမည့် ဆရာဆရာမများအတွက် စိုက်ပျိုးရေးနှင့်မွေးမြူရေး အထူးပြု ဘာသာရပ်ဆိုင်ရာ ကျွမ်းကျင်မှု စွမ်းရည်မြှင့်တင်ရေး သင်တန်းဖွင့်ပွဲ ကို ဧပြီ ၂၇ ရက်၊ နံနက်ပိုင်းက နေပြည်တော် ရေဆင်းစိုက်ပျိုးရေးတက္ကသိုလ်၌ ကျင်းပသည်။

အခမ်းအနားတွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင် က အမှာစကားပြောကြားရာ၌ စိုက်ပျိုးမွေးမြူရေးနှင့်ပတ်သက်၍ လူသားအရင်း အမြစ်များ ရရှိစေရေးအတွက် အခြေခံပညာ အလယ်တန်းအဆင့် (Grade - 6, 7,  8, 9) အတန်းများ ကပင် စက်မှု၊ စိုက်ပျိုးရေးနှင့် မွေးမြူရေး ဘာသာရပ်ဆိုင်ရာ အခြေခံ ဗဟုသုတများ ရရှိလာစေရန် နိုင်ငံတော်အစိုးရ ၏ လမ်းညွှန်ချက်အရ သင်ကြားပို့ချပေးနိုင်ရေး ဆောင်ရွက်လျက်ရှိကြောင်း၊ ရရှိလာသည့် ပညာရပ်ဆိုင်ရာဗဟုသုတများအပေါ်မူတည်၍ ရွေးချယ်လာသော စိုက်ပျိုးရေး၊ မွေးမြူရေးဘာသာရပ်များကို Grade-10, Grade-11 , Grade-12 အဆင့်တွင် ဆက်လက်သင်ယူပြီး သက်ဆိုင်ရာ စိုက်ပျိုးရေးတက္ကသိုလ်၊ မွေးမြူရေးဆိုင်ရာဆေးတက္ကသိုလ်တို့တွင် တက်ရောက်သင်ယူ ကာ နိုင်ငံတော်၏ လူ့စွမ်းအားအရင်းအမြစ်များ မွေးထုတ်ပေးနိုင်မည်ဖြစ်ပါကြောင်း၊

စိုက်ပျိုးမွေးမြူရေး ထုတ်လုပ်မှုကဏ္ဍ ဖွံ့ဖြိုးတိုးတက်ရေး အတွက် အဓိကအရေးပါသော လူ့စွမ်းအား အရင်းအမြစ်များကို သင်ကြားလေ့ကျင့် မွေးထုတ်ပေးကြမည့် ဆရာ ဆရာမများအနေဖြင့် လုပ်ငန်းတာဝန် ထမ်းဆောင်ကြရာတွင် မိမိတို့တစ်ဦးချင်း၏ အခက်အခဲများရှိနိုင်သကဲ့သို့ အခြေခံ ပညာသင်ယူဆဲလူငယ်များအား စာတွေ့လက်တွေ့သင်ကြားပေးရာ၌ သင် ကြားရေး ဆိုင်ရာ အခက် အခဲများကိုလည်းကြုံတွေ့နိုင်ကြောင်း၊ မည်သည့်အခက်အခဲကို ရင်ဆိုင်ကျော်ဖြတ်ရသည်ဖြစ်စေ မိမိတို့၏ တပည့်များ ထူးချွန်ထက်မြက်ရေးအတွက် စေတနာ၊ ဝါသနာ၊ အနစ်နာ ဟူသည့် နာ(၃)နာကို အခြေခံထားပြီး ဆရာစိတ်ဓာတ်မွေးမြူကာ မိမိတို့ တတ်မြောက်ထားသည့် အတတ်ပညာ၊ လေ့လာခဲ့သော အတွေ့အကြုံ ဗဟုသုတများကို အခြေ ခံပြီး တပည့်ကျောင်းသား၊ ကျောင်းသူများအား အကောင်းဆုံး လေ့ကျင့် ပြုစုပျိုးထောင်းပေးနိုင်ရေး ကြိုးပမ်းကြစေလိုကြောင်း ပြောကြားသည်။

၂၀၂၆-၂၀၂၇ ပညာသင်နှစ်အတွက် ဖွင့်လှစ်သည့် ယခု သင်တန်းသည် စတုတ္ထ အကြိမ်မြောက် ဖွင့်လှစ်ခြင်းဖြစ်ပြီး ဖွင့်ပွဲအခမ်းအနားသို့ ဒုတိယဝန်ကြီးများ၊ အမြဲတမ်းအတွင်းဝန်နှင့် တာဝန်ရှိသူများ၊ စိုက်ပျိုးရေးနှင့်မွေးမြူရေးအထူးပြုဘာသာရပ်ဆိုင်ရာကျွမ်းကျင်မှုစွမ်းရည်မြှင့်တင်ရေး  သင်တန်းသား သင်တန်းသူ(၃၈၁)ဦးတို့ တက်ရောက်ကြသည်။

အခမ်းအနားအပြီးတွင် ပြည်ထောင်စုဝန်ကြီးသည် တပ်ကုန်းမြို့နယ် ၊ သရက်ကွင်း ကျေးရွာ အနီး၌ အသစ်တည်ဆောက်လျက်ရှိသည့် ဆင်သေရေလွှဲဆည်တည်ဆောက်ရေး စီမံကိန်းအား ကြည့်ရှုစစ်ဆေးရာ တာဝန်ရှိသူများက ဘဏ္ဍာရန်ပုံငွေရရှိမှုပေါ်မူတည်၍ ဦးစားပေး လုပ်ငန်းအလိုက် လုပ်ငန်းများဆောင်ရွက်နေမှု နှင့် ရေဝပ်ဧရိယာအတွင်းကျရောက်သည့် လယ်မြေများ၏ စိုက်ပျိုးရေးလုပ်ငန်းဆောင်ရွက်နိုင်ရန် ညှိနှိုင်းဆောင်ရွက်နေမှုများကို ရှင်းလင်းတင် ပြကြသည်။

တင်ပြချက်များအပေါ် ပြည်ထောင်စုဝန်ကြီး က ၂၀၂၇ ခုနှစ် မိုးရာသီအမီ လုပ်ငန်းများ ပြီးစီးရေး ၊ လုပ်ငန်းအဆင့်တိုင်းတွင် သတ်မှတ်စံချိန်စံညွှန်းများနှင့်အညီဖြစ်စေရေးစစ်ဆေးကြပ်မတ် ဆောင်ရွက်ရန် ၊ ပုံစံ(၇)ရှိပြီး လယ်မြေများအတွက် လယ်မြေများစနစ်တကျဖော်ထုတ်ပေးခြင်း ၊ စိုက်ပျိုးရေးလုပ်ငန်းအတွက် မြေယာအသုံးချမှုကို တည်ဆဲဥပဒေများနှင့်အညီလိုက်နာဆောင်ရွက်ရေး အသိပညာပေးခြင်းကို အုပ်ချုပ်ရေးအဖွဲ့များနှင့်သက်ဆိုင်ရာဌာနများ ပူးပေါင်း၍ ကွင်းဆင်း ဆောင်ရွက်ရန် ဆွေးနွေးမှာကြားသည်။

ထို့နောက် ပြည်ထောင်စုဝန်ကြီးသည် စိုက်ပျိုးရေးနှင့်မွေးမြူရေးသိပ္ပံ(ပျဉ်းမနား) ရှိ မျိုးစေ့စမ်းသပ်စိုက်ပျိုးကွင်း ၌ စိုက်ပျိုးရေးဦးစီးဌာန ဝါနှင့်လျှော်မျှင်ထွက်သီးနှံဌာနခွဲ က ဆောင်ရွက် လျက်ရှိသော တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်းချုပ်ခြင်း နည်းလမ်းများ အသုံးပြု၍ ရွှေတောင်-၁၀ နှင့် RAKA 666 ဝါမျိုး(၂)မျိုး စပ်းသပ်စိုက်ပျိုးထားမှုကို ကွင်းဆင်းစစ်ဆေး ရာ တာဝန်ရှိသူများက ဝါသီးနှံ ကို ခေါင်နှိမ်ခြင်းနည်းနှင့် အပင်အာဟာရများအသုံးပြု၍ အပင်ကြီးထွားမှုထိန်းချုပ်ခြင်း နည်းပညာ တို့ဖြင့် ဆောင်ရွက်နေမှု၊ ထုတ်လုပ်မှုစရိတ်၊ ဝါအထွက်နှုန်း နှင့် အကျိုးအမြတ်အခြေအနေများကို ရှင်းလင်းတင်ပြကြသည်။ 

တင်ပြချက်များအပေါ် ပြည်ထောင်စုဝန်ကြီး က အကြိမ်ကြိမ်ဝါဆွတ် ဝါကောက်ခြင်းနှင့် တစ်ကြိမ်တည်းအပြီး ဝါကောက်သိမ်းခြင်းတွင် ဝါအထွက်နှုန်းနှင့် အကျိုးအမြတ်တူနိုင်သော်လည်း ဝါစိုက်ပျိုး ဆွတ်ခူးချိန်ကာလတိုခြင်း၊ တစ်ဧကအထွက်နှုန်း ကို တစ်ကြိမ်တည်းဖြင့် အမှန်ရရှိ စေနိုင်ခြင်း၊ လုပ်သားရှားပါးမှု အခက်အခဲကို တောင်သူများကျော်လွှားနိုင်ခြင်း စသည့် အကျိုး ကျေးဇူးများရရှိမည်ဖြစ်၍ စနစ်တကျစမ်းသပ် ဆောင်ရွက်ပြီး လက်တွေ့အသုံးချနိုင်ရေးအတွက် တောင်သူနည်းပညာပေးလုပ်ငန်းများ ကျယ်ကျယ် ပြန့်ပြန့်ဆောင်ရွက်သွားရန် နှင့် အနာဂတ်ကာလ တွင်စက်ဖြင့် ဝါသိမ်းဆည်းခြင်းလုပ်ငန်း တွင်ကျယ်စွာဆောင်ရွက်နိုင်ရေး မျှော်မှန်းဆောင်ရွက်ရန် ဆွေးနွေးမှာကြားခဲ့ကြောင်း သတင်းရရှိသည်။  

MOALI