မျိုးစေ့ပြပွဲ (၂၀၂၆) ကျင်းပ

နေပြည်တော်၊ မတ် ၁ 

Seed Fair 2026 (မျိုးစေ့ပြပွဲ ၂၀၂၆) ကို မတ် ၁ ရက် မှ ၃ ရက်နေ့အထိ နေပြည်တော်ကောင်စီနယ်မြေ၊ ပျဉ်းမနားမြို့နယ်၊ စိုက်ပျိုးရေးသိပ္ပံကျောင်းဝင်းအတွင်း ကျင်းပခဲ့ကြောင်း သိရှိရသည်။

တောင်သူလယ်သမား အခွင့်အရေး အကျိုးစီးပွားမြှင့်တင်ရေး ဥပဒေပါ “တောင်သူလယ်သမားများ သွင်းအားစု (မျိုးစေ့) များကို လွယ်ကူအဆင်ပြေစွာ ရရှိသုံးစွဲနိုင်ရေးအတွက် ပံ့ပိုးကူညီ စီမံဆောင်ရွက်ရန်” ပြဌာန်းချက်နှင့်အညီ ၂၀၁၈ ခုနှစ်မှ စတင်၍ နှစ်စဉ် မျိုးစေ့ပြပွဲများ ကျင်းပခဲ့ရာ ၂၀၂၆ ခုနှစ် မျိုးစေ့ပြပွဲကို (၈) ကြိမ်မြောက် ကျင်းပခဲ့ခြင်းဖြစ်သည်။ ယခုနှစ် မျိုးစေ့ပြပွဲ ဖွင့်ပွဲအခမ်းအနားတွင် မျိုးစေ့အမျိုးပေါင်း ၂၀ မျိုး၊ မျိုးစေ့ပေါင်း ၅၀,၀၀၀ အား ပူးတွဲချည်နှောင်ထားသည့် မိုးပျံပူပေါင်းများ လွှင့်တင်ခဲ့ကြပြီး ပြပွဲကို မြေဧရိယာ ၂၈ ဧကပေါ်၌ လယ်ယာသီးနှံ ၁၀ မျိုး၏ မျိုးပြား ၉၁ မျိုး၊ ဟင်းသီးဟင်းရွက် သီးနှံ၂၄ မျိုး၏ မျိုးပြား ၅၃ မျိုးအပြင် ဌာန ၂ ခုနှင့် ကုမ္ပဏီ ၃၄ ခုတို့မှ ခင်းကျင်းပြသထားသော ပြခန်းများဖြင့် စုံလင်စွာခင်းကျင်းပြသခဲ့ပြီး လာရောက်လေ့လာသူ တောင်သူများ၊ စိုက်ပျိုးထုတ်လုပ်သူများ ပြည်သူများ၏ သိရှိလိုသည်များကို သက်ဆိုင်ရာစိုက်ကွင်းတာဝန်ခံများ၊ စိုက်ပျိုးရေးပညာရှင်ဝန်ထမ်းများက အသေးစိတ် လိုက်ပါရှင်းလင်းပြသပေးကြသည်။

နိုင်ငံတော်အနေဖြင့် လယ်ယာကဏ္ဍနှင့်စပ်လျဉ်း၍ စားနပ်ရိက္ခာဖူလုံရေး၊ အာဟာရပြည့်ဝရေး၊ အစားအစာဘေးကင်းလုံခြုံမှုရှိစေရေးနှင့် တောင်သူလယ်သမားများ ဝင်ငွေတိုးတက်စေရေးတို့အတွက် အကောင်အထည်ဖော် ဆောင်ရွက်လျက်ရှိရာ စိုက်ပျိုးထုတ်လုပ်သော သီးနှံများ၏ မျိုးကောင်းမျိုးသန့် ရရှိစိုက်ပျိုးထုတ်လုပ်နိုင်ရေးသည် လယ်ယာကဏ္ဍအတွက် အရေးကြီးဆုံး လုပ်ငန်းစဉ်ဖြစ်ကြောင်း၊ မျိုးကောင်းမျိုးသန့်သုံးစွဲခြင်းဖြင့် ရောဂါပိုးမွှားဒဏ်ခံနိုင်မှု၊ ရေငတ်ဒဏ်ခံနိုင်မှု၊ ဆားငံဒဏ်ခံနိုင်မှု၊ အပူချိန်နိမ့်မြင့်ဒဏ်ခံနိုင်မှု၊ ဓာတ်မြေဩဇာအပေါ်တုံ့ပြန်နိုင်မှု၊ အထွက်ပိုမိုရရှိမှုစသော အကျိုးကျေးဇူးများကို ရရှိနိုင်မည်ဖြစ်ကြောင်း၊ တောင်သူများအနေဖြင့် မျိုးကောင်းမျိုးသန့် ရရှိသုံးစွဲနိုင်မှသာ သီးနှံများ အရည်အသွေးရော၊ အထွက်နှုန်းပါ တိုးတက်လာပြီး ပြည်တွင်းစားသုံးမှု ဖူလုံရုံသာမက ပိုလျှံသော လယ်ယာထွက်ကုန်များကို နိုင်ငံတကာဈေးကွက်သို့ ချိတ်ဆက်တင်ပို့ ရောင်းချနိုင်မည်ဖြစ်ပါကြောင်း စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်က ပြောသည်။

ကွဲပြားခြားနားသော ရာသီဥတု ရေမြေအခြေအနေစုံလင်သည့် မိမိတို့မြန်မာနိုင်ငံတွင် ဒေသအလိုက် ကောင်းစွာဖြစ်ထွန်းပြီး အရည်အသွေးစံချိန်စံညွှန်းနှင့်ကိုက်ညီသော မျိုးစေ့များ ထုတ်လုပ်နိုင်ရေးသည် အရေးကြီးသောအခန်းကဏ္ဍမှ ပါဝင်လျက်ရှိကြောင်း၊ မျိုးစေ့ကဏ္ဍဖွံ့ဖြိုး တိုးတက်ရေးကို အားပေးသည့်အနေဖြင့် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၏ ထောက်ခံချက်ဖြင့် နိုင်ငံသားကုမ္ပဏီများသာမက နိုင်ငံခြားသားကုမ္ပဏီများပါ ၁၀၀ ရာခိုင်နှုန်း ရင်းနှီးမြှပ်နှံမှုကို ဆောင်ရွက်ခွင့်ပြုထားပြီဖြစ်ကြောင်း၊ မျိုးစေ့ထုတ်လုပ်ရေးလုပ်ငန်းသည် ပြည်တွင်းလိုအပ်ချက်အတွက်သာမက ပြည်ပသို့ တင်ပို့နိုင်ရေးအတွက်ကိုပါ ဆောင်ရွက်နိုင်ပြီး အကျိုးအမြတ် ကောင်းစွာရရှိနိုင်သည့် ရင်းနှီးမြှုပ်နှံမှုလုပ်ငန်းတစ်ခုဖြစ်၍ နိုင်ငံ့အကျိုး၊ တောင်သူလယ်သမားများ အကျိုးကိုရှေးရှု့ပြီး၊ မျိုးစေ့ကဏ္ဍဖွံ့ဖြိုးတိုးတက်ရေးကို သက်ဆိုင်ရာဌာနများ၊ ပညာရှင်များနှင့် ပုဂ္ဂလိကကဏ္ဍများပါ ပူးပေါင်း ပါဝင်ဆောင်ရွက်သွားကြရန် လိုအပ်ကြောင်း ဒုတိယဝန်ကြီးက ဖြည့်စွက်ပြောကြားသည်။

“မျိုးစေ့ပြပွဲ ၂၀၂၆” ကို အရည်အသွေးကောင်း မျိုးကောင်းမျိုးသန့်များ သုံးစွဲမှု မြင့်မားလာစေရေး၊ မျိုးစေ့သုံးစွဲသူများနှင့် မျိုးစေ့ထုတ်လုပ်သူများအကြား ဆက်နွယ်မှုကွန်ယက် ပိုမို ကောင်းမွန်စေရေးနှင့်မျိုးစေ့ကဏ္ဍတွင် Public-Private Partnership (PPP) ပိုမိုကောင်းမွန် လာစေရေးစသည့် ရည်ရွယ်ချက်ကောင်းများဖြင့် ကျင်းပပြုလုပ်ခြင်းဖြစ်ကြောင်း၊ မျိုးစေ့သည် စိုက်ပျိုးရေးဆိုင်ရာ အခြေခံသွင်းအားစုများအနက် အဓိကအကျဆုံး သွင်းအားစု ဖြစ်ခြင်းကြောင့် နိုင်ငံဖွံဖြိုးတိုးတက်မှု၏ အခြေခံအကြောင်းအရင်းတစ်ခုဖြစ်သော မျိုးစေ့အခန်း ကဏ္ဍသည် အလွန်အရေးပါပြီး အထောက်အပံ့ပေးနိုင်မှု အမြင့်ဆုံးဖြစ်ပါကြောင်း၊ ခိုင်မာသော မျိုးစေ့လုပ်ငန်းတစ်ခု ဟူသည် အရည်အသွေးပြည့်မီသော မျိုးစေ့များကို လိုအပ်သောအချိန်၊ လိုအပ်သောနေရာတွင် လိုအပ်သောပမာဏကို သင့်တော်သော နှုန်းထားဖြင့် တောင်သူလယ်သမားများရရှိရန် ဆောင်ရွက်ပေးနိုင်ခြင်းဖြစ်ပါကြောင်း စိုက်ပျိုးရေးဦးစီးဌာနညွှန်ကြားရေးမှူးချုပ် ဒေါက်တာရဲတင့်ထွန်းက ပြောကြားသည်။

ပြပွဲကျင်းပစဉ်ကာလအတွင်း တောင်သူလယ်သမားများနှင့် စိုက်ပျိုးရေးလုပ်ငန်းကိုစိတ်ပါ ဝင်စားသူများအတွက်  စိုက်ပျိုးရေးဆိုင်ရာ ဉာဏ်စမ်းပဟေဠိ အဖြေညှိအစီအစဉ်နှင့် “တောင်သူကို ဗဟိုပြုသော ဂေဟစနစ်အခြေပြုစိုက်ပျိုးရေးစနစ်နှင့် ဇီဝစီးပွားရေး” ခေါင်းစဉ်ဖြင့် တောင်သူနည်းပညာဆွေးနွေးပွဲကို ထည့်သွင်းကျင်းပခဲ့ကြောင်း သတင်းရရှိသည်။

MOALI