ဉာဏ်ရည်တုနည်းပညာအား စိုက်ပျိုးရေးကဏ္ဍတွင် လက်တွေ့ အသုံးချနိုင်ရေး ကြိုးပမ်း
နေပြည်တော်၊ ဇန်နဝါရီ ၂၆
AI နည်းပညာ မိတ်ဆက်ခြင်းနှင့် စိုက်ပျိုးရေးကဏ္ဍတွင် လက်တွေ့အသုံးချနိုင်ရေးအတွက် စိုက်ပျိုးရေးဦးစီးဌာန၏ ဌာနတွင်း စွမ်းဆောင်ရည်မြှင့်သင်တန်းအဖြစ် AI Introduction and Basic Usage သင်တန်းကို ဇန်နဝါရီလ၊ တတိယပတ်က နေပြည်တော် ရုံးအမှတ် ၄၃ သင်တန်းခန်းမ၌ စတင် ဖွင့်လှစ်ခဲ့ကြောင်း သိရသည်။
သီးနှံစိုက်ပျိုးထုတ်လုပ်မှု တိုးတက်ရေးကြိုးပမ်း ဆောင်ရွက်ရာတွင် အဆင့်မြင့် နည်းပညာများအား အကျိုးရှိစွာ အသုံးပြုနိုင်ရေးကို စဉ်ဆက်မပြတ် ဆောင်ရွက်ခဲ့ကြောင်း၊ ယခုအခါ ဥာဏ်ရည်တုနည်းပညာ AI ကို စိုက်ပျိုးရေးလုပ်ငန်းများ၊ သီးနှံထွက်ကုန်များ ရောင်းချဖြန့်ဖြူးရေးလုပ်ငန်းများ၌ တွင်ကျယ်စွာအသုံးပြုလျက်ရှိသကဲ့သို့ သီးနှံရောဂါနှင့် ဖျက်ပိုးများကို စူးစမ်း ရှာဖွေဖော်ထုတ်ခြင်း၊ စိုက်ပျိုးရေ စီမံခန့်ခွဲမှုစနစ် တည်ထောင်ခြင်း ၊ သီးနှံရင့်မှည့်မှု ရှာဖွေဖော်ထုတ်ခြင်း၊ သီးနှံအရည်အသွေး ခွဲခြားခြင်းများနှင့် ဖြစ်ပေါ်လာနိုင်သည့် ဆုံးရှုံးမှုများကို ကြိုတင်ကာကွယ်နိုင်ခြင်း လုပ်ငန်းများ၌ ထိရောက်စွာ အသုံးပြုနိုင်စေရေး ကြိုးပမ်းသွားရန်ဖြစ်ကြောင်း၊ စိုက်ပျိုးရေးဆိုင်ရာနည်းပညာဝန်ဆောင်မှုများ ဆောင်ရွက်ပေးလျက်ရှိသည့် စိုက်ပျိုးရေးဦးစီးဌာနမှ အမှုထမ်း အရာထမ်းများအနေဖြင့် ဉာဏ်ရည်တု နည်းပညာ(AI)ကို ရှေ့တန်းမှ ဦးဆောင်ကာ လယ်ယာကဏ္ဍ၌ စနစ်တကျ အသုံးချနိုင်ကြရန်နှင့် စိုက်ပျိုးရေးဆိုင်ရာ သတင်းအချက်အလက်များ၊ နည်းပညာများကို လွယ်လင့်တကူရှာဖွေလေ့လာပြီး တောင်သူများထံ လက်ဆင့်ကမ်းပညာပေးနိုင်ကြစေရန် ယခုသင်တန်းကို ဆောင်ရွက်ခြင်း ဖြစ်ကြောင်း စိုက်ပျိုးရေးဦးစီးဌာန ညွှန်ကြားရေးမှူးချုပ်က ပြောသည်။
AI နည်းပညာနှင့် စိုက်ပျိုးရေးကဏ္ဍကို ဆက်စပ်ချဲ့ထွင် လေ့လာအသုံးချခြင်းဖြင့် လက်တွေ့ဆောင်ရွက်မှုလုပ်ငန်းစဥ်တွင် ကုန်ကျစရိတ်ကို လျှော့ချနိုင်ပြီး စိုက်ပျိုးထုတ်လုပ်မှု တိုးတက်လာစေရန်၊ သီးနှံအထွက်နှုန်းတိုးပြီး ထုတ်ကုန်အရည်အသွေးမြင့်မားလာစေရန် ရည်ရွယ်ဖွင့်လှစ်သော ယခုသင်တန်းတွင် စိုက်ပျိုးရေးဦးစီးဌာနအောက်ရှိ ဌာနခွဲများနှင့် နေပြည်တော်ကောင်စီနယ်မြေ အမှုထမ်း အရာထမ်း ၃၂ ဦး တို့က တက်ရောက်လေ့လာခဲ့ကြပြီး အွန်လိုင်းစနစ်ဖြင့် တိုင်းဒေသကြီး/ပြည်နယ်မှ အမှုထမ်း အရာထမ်းများအား သင်တန်း အပတ်စဉ်အလိုက် ဖွင့်လှစ်ပေးသွားမည်ဖြစ်ကြောင်း သတင်းရရှိသည်။
DOA