ပေါင်းလောင်းရေလှောင်တမံ ရေပိုလွှဲပထမအဆင့် အထက်ဘက်ပိုင်း၏ အပိုင်း(၂) ဆောင်ရွက်နေမှု၊ တမံကြံ့ခိုင်မှု၊ ရေဝင်ရောက်မှုနှင့် ရေသိုလှောင်မှုအခြေအနေများ ကြည့်ရှုစစ်ဆေး

နေပြည်တော် ၊ ဇန်နဝါရီ ၂၆

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်နှင့် တာဝန်ရှိသူများသည် ဇန်နဝါရီ ၂၅ ရက်နေ့ မွန်းလွဲပိုင်းက ပြည်ထောင်စုနယ်မြေ၊ နေပြည်တော် ဇေယျာသီရိမြို့နယ်ရှိ ပေါင်းလောင်းရေလှောင်တမံ၏ ရေပိုလွှဲပထမအဆင့် အောက်ဘက်ပိုင်း၏ အပိုင်း(၁)ပြန်လည်ပြုပြင်ခြင်းလုပ်ငန်း ဆောင်ရွက်ပြီးစီးခဲ့မှု အခြေအနေနှင့် ယခုပွင့်လင်းရာသီတွင် ရေပိုလွှဲပထမအဆင့် အထက်ဘက်ပိုင်း၏ အပိုင်း(၂)ပြုပြင်ဆောင်ရွက်နေမှု၊ ပေါင်းလောင်းတမံ ကြံ့ခိုင်မှုအခြေအနေများ၊ ရေဝင်ရောက်မှု အခြေအနေနှင့် ရေသိုလှောင်ထားရှိမှု အခြေအနေများကို  ကြည့်ရှုစစ်‌ဆေးသည်။

တာဝန်ရှိသူများက ရေပိုလွှဲ ပြုပြင်ဆောင်ရွက်နေမှု အခြေအနေများ၊ ပေါင်းလောင်း ရေလှောင်တမံကြံ့ခိုင်မှု အခြေအနေများ၊ ရေဝင်ရောက်မှုနှင့် ရေသိုလှောင်ထားရှိမှု အခြေအနေများ၊ ၂၀၂၅-၂၀၂၆ ခုနှစ် နွေစပါးနှင့် နွေသီးနှံစိုက်ပျိုးရေပေးဝေရန် ဆောင်ရွက်ထားရှိမှု အခြေအနေများအား ရှင်းလင်းတင်ပြရာ ဒုတိယဝန်ကြီးက သတ်မှတ်စံချိန်စံညွှန်းများနှင့်အညီ အရည်အသွေးပြည့်မီစွာဖြင့် အချိန်မီပြီးစီးရေး အလေးထားဆောင်ရွက်ကြရန်၊ ရေလှောင်တမံနှင့် ရေပိုလွှဲတို့၏ ကြံ့ခိုင်ရေးကို Dam Monitoring စောင့်ကြည့်တိုင်းတာ စစ်ဆေးမှုများ အမြဲမပြတ်ဆောင်ရွက်ပြီး ပုံမှန်တင်ပြကြရန်၊ နွေစပါးနှင့်နွေအခြားသီးနှံ လျာထားစိုက်ဧကများအတိုင်း လုံလောက်စွာ စိုက်ပျိုးရေပေးဝေနိုင်ရေး အလေးထားဆောင်ရွက်ကြရန်နှင့် အခြားနည်းပညာပိုင်းဆိုင်ရာ လိုအပ်သည်များ ဆွေးနွေးမှာကြားခဲ့သည်။ 

ပေါင်းလောင်းရေလှောင်တမံ ရေပိုလွှဲပထမအဆင့် အောက်ဘက်ပိုင်း၏ အပိုင်း(၁) ပြန်လည်ပြုပြင်ခြင်းလုပ်ငန်း တစ်ခုလုံးအနေဖြင့် ၆၀ ရာခိုင်နှုန်း ဆောင်ရွက်ပြီးစီးပြီဖြစ်ပြီး  ပြန်လည်ပြုပြင်ခြင်းလုပ်ငန်းအား ဖေဖော်ဝါရီလကုန်တွင် ပြီးစီးအောင်ဆောင်ရွက်သွားမည်ဖြစ် ကြောင်း သိရသည်။ ပေါင်းလောင်းတမံ ရေသောက်စနစ်အနေဖြင့် နွေစပါး ၉၁၄၁ ဧက၊ နွေအခြားသီးနှံ ၂၅ ဧက စုစုပေါင်း ၉၁၆၆ ဧကအား စိုက်ပျိုးရေပေးဝေရန် လျာထားဆောင် ရွက်လျက်ရှိကြောင်း သိရသည်။

ထိုမှတဆင့် ဒုတိယဝန်ကြီးနှင့်အဖွဲ့သည် ဇေယျာသီရိမြို့နယ်၊ စိမ်းစားပင်ကျေးရွာ နေပန်-လပန် စက်မှုလယ်ယာ စနစ်ကျလယ်မြေအနီးရှိ နရဘန်ချောင်းပေါင်အား ၂၀၂၅ ခုနှစ် မိုးရာသီ ရေကြီးရေလျှံမှုကြောင့် ရေတိုက်စားပျက်စီးမှုများ ဖြစ်ပေါ်ခဲ့သည့်အပေါ် ချောင်းပေါင်၏ အားနည်းသည့် အပိုင်းများကို ကျောက်ဖြည့် မြေထိန်းနံရံဖြင့် ကာကွယ်ခြင်းလုပ်ငန်း ဆောင်ရွက်ပြီးစီးမှု အခြေအနေ၊ နရဘန်ချောင်းမှ ယာယီချောင်းပိတ် ၂ ခု ဖြင့် နွေစပါးနှင့် နွေအခြားသီးနှံ စတင်စိုက်ပျိုးရေပေးဝေမှု အခြေအနေများနှင့် ရေဆင်းရေလှောင်တမံ၏  ၂၀၂၅-၂၀၂၆ ခုနှစ်အတွင်း နွေစပါးနှင့် နွေအခြားသီးနှံ လျာထား ၇၄၂၆ ဧက အနက် လက်ယာ (၂) မိုင်နာ (၃) မြောင်း ၁၄၈ ဧက စိုက်ပျိုးရေစတင်ပေးဝေမှု အခြေအနေနှင့်   ကျန်နွေစပါးနှင့် နွေအခြားသီးနှံ လျာထားဧကများအား စိုက်ပျိုးရေပေးဝေရန် ဆောင်ရွက် ထားရှိမှု အခြေအနေများအား ကြည့်ရှု စစ်ဆေးသည်။

ကြည့်ရှုစစ်ဆေးစဉ် ဒုတိယဝန်ကြီးမှ ကျောက်ဖြည့်မြေထိန်း နံရံများအား ရေတိုက်စားမှုခံနိုင်ပြီး   ရေရှည်ခိုင်ခံ့ကောင်းမွန်အောင် စနစ်တကျထိန်းသိမ်းဆောင်ရွက်ကြရန်၊ စိုက်ပျိုးရေကို အလေအလွင့်နည်းပါးစွာဖြင့် အကျိုးရှိစွာသုံးစွဲကြရန်၊ ရာသီအလိုက် သီးထပ် ၃ သီး စိုက်ပျိုးနိုင်ရေး အလေးထားဆောင် ရွက်ကြရန် ဆွေးနွေးမှာကြားသည်။ နရဘန်ယာယီချောင်းပိတ်အမှတ် (၁) မှ ၁၄၆ ဧကနှင့် ယာယီချောင်းပိတ် အမှတ် (၂) မှ ၁၀၈ ဧက စုစု ပေါင်း ၂၅၄ ဧကအား နွေစပါးနှင့် နွေအခြားသီးနှံအတွက် ဇန်နဝါရီ ၁၅ ရက်နေ့မှစ၍ စိုက်ပျိုးရေ စတင်ပေးဝေနေပြီ ဖြစ်ကြောင်း သိရသည်။  

ထို့နောက် ရေဆင်းတက္ကသိုလ်များနယ်မြေရှိ ကျောင်းသား၊ ကျောင်းသူများ၏ အပန်းဖြေရိပ်သာ (Recreation Center) စီမံကိန်းဆောင်ရွက်နေမှု အခြေအနေ၊ စိုက်ပျိုးရေးတက္ကသိုလ် ဘောလုံးကွင်း၏ ပွဲကြည့်စင်နှင့် မီတာ ၄၀၀ ပြေးလမ်း အဆင့်မြှင့်တင် တည်ဆောက်ခြင်းလုပ်ငန်း ဆောင်ရွက်နေမှုအခြေအနေတို့ကို ကြည့်ရှုစစ်ဆေးပြီး သတ်မှတ်ချက်စံနှုန်းများနှင့်အညီ အရည်အသွေးပြည့်မီစွာ အချိန်မီပြီးစီးရေး၊ ရေရှည်တည်တံ့ ကောင်းမွန်စေရေး အထူးအလေးထား ဆောင်ရွက်ကြရန်နှင့် အခြားလိုအပ်သည်များ ပေါင်းစပ်ညှိနှိုင်း ဆောင်ရွက်ပေးခဲ့ကြောင်း သတင်းရရှိသည်။

MOALI