ပဉ္စမအကြိမ် အမျိုးသားအားကစားပွဲတော်တွင် ပါဝင်ယှဉ်ပြိုင်ခဲ့ကြသည့် ဝန်ကြီးဌာနအားကစားသမားများအား ဂုဏ်ပြု

နေပြည်တော်၊ ဒီဇင်ဘာ၂၄

ပဉ္စမအကြိမ်အမျိုးသားအားကစားပွဲတော်တွင် ပါဝင်ယှဉ်ပြိုင်ခဲ့ကြသည့် ဝန်ကြီးဌာန အားကစားသမားများအား ဂုဏ်ပြုခြင်းအခမ်းအနားကို ဒီဇင်ဘာ ၂၄ ရက်နေ့ ညနေပိုင်းက စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးရုံး စုဝေးဆောင်ခန်းမ၌ ကျင်းပပြုလုပ်ရာ အခမ်းအနားသို့ ပြည်ထောင်စုဝန်ကြီး ဦးမင်းနောင် နှင့် ဒုတိယဝန်ကြီးများ ၊ ဌာနဆိုင်ရာတာဝန်ရှိသူများ ၊ အားကစားမောင်မယ်များ၊ နည်းပြများနှင့် အားကစားအသင်းတာဝန်ခံများ တက်ရောက် ကြသည်။

အခမ်းအနားတွင် ပြည်ထောင်စုဝန်ကြီးက ဂုဏ်ပြုအမှာစကားပြောကြားပြီး တစ်ဦးချင်း အားကစားထူးချွန်ဆုများကိုချီးမြှင့်ပေးအပ်သည်။

ဆက်လက်၍ ဒုတိယဝန်ကြီးများက အသင်းလိုက်အားကစားဆုများကို ချီးမြှင့်ပေးအပ်ကြရာ အားကစားအသင်းတာဝန်ခံများက လက်ခံရယူကြသည်။

၎င်းနောက် အားကစားအသင်းအလိုက် တာဝန်ခံများက ပဉ္စမအကြိမ် အမျိုးသား အားကစားပွဲတော်တွင် ပါဝင်ယှဉ်ပြိုင်ခဲ့ကြသည့် ပြိုင်ပွဲအတွေ့အကြုံများနှင့် အားသာချက် အားနည်းချက်များကို ရှင်းလင်းတင်ပြကြသည်။ 

ထို့နောက် ပြည်ထောင်စုဝန်ကြီး၊ ဒုတိယဝန်ကြီးများ နှင့် ဌာနဆိုင်ရာတာဝန်ရှိသူများသည် ဝန်ကြီးဌာနအားကစားသမားများနှင့်အတူ ဂုဏ်ပြုလက်ဘက်ရည်အတူတကွ သုံး ဆောင် ခဲ့ကြသည်။

ပဉ္စမအကြိမ်အမျိုးသားအားကစား ပွဲတော်တွင် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ကိုယ်စားပြု အားကစားသမားများက အားကစားနည်း ၆ မျိုးတွင် ပါဝင်ယှဉ်ပြိုင် ခဲ့ကြရာ ရွှေတံဆိပ် ၁ ခု ၊ ငွေတံဆိပ် ၂ ခု ၊ ကြေးတံဆိပ် ၃ ခု ရရှိခဲ့ကြောင်း သတင်းရရှိသည်။

MOALI