နာဂကိုယ်ပိုင်အုပ်ချုပ်ခွင့်ရဒေသတွင် ကုန်းမြင့်လယ်ယာမြေများနှစ်စဉ်ဖော်ထုတ်ပေးနေ
စစ်ကိုင်း၊ ဒီဇင်ဘာ ၁၁
နာဂကိုယ်ပိုင်အုပ်ချုပ်ခွင့်ရဒေသတွင် ရွှေ့ပြောင်းတောင်ယာစိုက်ခင်းများ လျော့နည်းပပျောက်စေရေးအတွက် ကုန်းမြင့်လယ်ယာမြေများ နှစ်စဉ်ဖော်ထုတ်ပေးလျှက်ရှိကြောင်း စစ်ကိုင်းတိုင်းဒေသကြီး၊ စက်မှုလယ်ယာဦးစီး ဌာနကသိရသည်။ ထိုသို့ နှစ်စဉ်ဖော်ထုတ်ပေးလျှက်ရှိသော ကုန်းမြင့်လယ်ယာမြေများတွင် အသုံးပြုရန်အတွက်လည်း လယ်ယာသုံးစက်ကိရိယာများကို ထောက်ပံ့ပေးလျက်ရှိသည်။
“အခုလိုနာဂကိုယ်ပိုင်အုပ်ချုပ်ခွင့်ရဒေသဖွံ့ဖြိုးတိုးတက်စေရေးအတွက် ကျွန်တော်တို့စက်မှုလယ်ယာဦးစီးဌာနအနေနဲ့ တိုင်းဒေသကြီးအစိုးရရန်ပုံငွေနဲ့ ကုန်းမြင့်လယ်ယာများဖော်ဆောင်ပေးခြင်း၊ လယ်ယာသုံးစက်ကိရိယာများထောက်ပံ့ပေးခြင်းနဲ့ လယ်ယာသုံးစက်ကိရိယာများမောင်းနှင်ထိန်းသိမ်းမှု(အခြေခံ) သင်တန်းတွေကို ဖွင့်လှစ်ဆောင်ရွက်ပေးလျှက်ရှိပါတယ်” ဟု စစ်ကိုင်းတိုင်းဒေသကြီး၊ စက်မှုလယ်ယာဦးစီးဌာန၊ တိုင်းဒေသကြီးဦးစီးမှူး ဦးသောင်းထိုက်က ပြောသည်။
ယင်းသို့ ကုန်းမြင့်လယ်ယာမြေများတွင် အသုံးပြုသော လယ်ယာသုံးစက်ကိရိယာများကို ကျွမ်းကျင်စွာအသုံးပြုနိုင်ရန်အတွက် လယ်ယာသုံးစက်ကိရိယာမောင်းနှင်ထိန်းသိမ်းမှု(အခြေခံ)တောင်သူသင်တန်းကို နိုဝင်ဘာ ၂၃ ရက်က နာဂကိုယ်ပိုင်အုပ်ချုပ်ခွင့်ရဒေသ၊ လဟယ်မြို့နယ်၊ တိုက်ရံကျေးရွာတွင် ဖွင့်လှစ်ပေးခဲ့သည်။
ထိုသင်တန်းကို စစ်ကိုင်းတိုင်းဒေသကြီးအစိုးရအဖွဲ့၊ အလုပ်အကိုင်အခွင့်အလမ်းများ ဖန်တီးပေးရေးကော်မတီနှင့်စက်မှုလယ်ယာဦးစီးဌာနတို့ ပူးပေါင်းကာဖွင့်လှစ်ပေးခြင်းဖြစ်ပြီး သင်တန်းကာလမှာ ရက်သတ္တပတ်နှစ်ပတ်ကြာမြင့်မည် ဖြစ်သည်။ အဆိုပါသင်တန်းတွင် စက်မှုလယ်ယာဦးစီးဌာန ကျွမ်းကျင်ဝန်ထမ်းများက စာတွေ့/လက်တွေ့သင်ကြားပေးလျှက်ရှိကာ သင်တန်းသားတောင်သူ ၂၀ ဦးတက်ရောက်လျက်ရှိကြောင်းသိရသည်။
ဇော်လင်းထွဋ်