ပေါင်းလောင်းရေလှောင်တမံ မှ ရေအားလျှပ်စစ်ယူနစ်(၈)သန်း ပိုမိုထုတ်လုပ်နိုင်ရန် ဟိုက်ဒရောလစ်စနစ် ယာယီ ရေထိန်းတံခါး(HED) တပ်ဆင်

နေပြည်တော်ကောင်စီနယ်မြေ ဇေယျာသီရိမြို့နယ် ပေါင်းလောင်းရေလှောင်တမံသည် လက်ရှိတွင် ကန်ရေပြည့် ရေလှောင်ပမာဏ (၅.၄)သိန်း ဧကပေရှိပြီး  နှစ်စဉ် ရေအား လျှပ်စစ်  ယူနစ် (၉၁၁) သန်းထုတ်လုပ်ပေးလျက်ရှိရာ ဝင်ရေကောင်းမွန်မှု ၊ တမံကြံ့ခိုင်မှုအရ ရေပိုမိုသိုလှောင်စုဆောင်းနိုင်မည်ဆိုပါက လျှပ်စစ်ပိုမို ထုတ်လုပ်ပေးနိုင်မည်ဖြစ်၍ ရေပိုလွှဲတွင် ယာယီရေထိန်းတံခါးတပ်ဆင် အသုံးပြုနိုင်ရေး ဆောင်ရွက်လျက်ရှိကြောင်း သိရသည်။

ရေပိုလွှဲကို (၁.၅) မီတာ မြှင့်တင်မည်ဆိုပါက ရေလှောင် ပမာဏ (၂၁၀၀၀) ဧကပေ ခန့် ပိုမိုသိုလှောင်နိုင်မည်ဖြစ်ပြီး တစ်နှစ်လျှင် ရေအားလျှပ်စစ်ယူနစ် (၈) သန်း ပိုမိုထုတ်လုပ် နိုင်မည်ဖြစ်၍ မြန်မာနိုင်ငံ တမံကြီးများဆိုင်ရာ အမျိုးသားကော်မတီ (MNCOLD) ၏ ဆွေးနွေးအကြံပြုချက်ကိုရယူခဲ့ကြောင်း၊ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန ပညာရှင်ဝန်ထမ်းများက စူးစမ်းလေ့လာတွက်ချက်၍ လုပ်ငန်းတင်ဒါခေါ်ယူ ဆောင်ရွက်ခြင်းဖြစ်ကြောင်း တာဝန်ရှိသူတစ်ဦးကပြောသည်။ 

ရေပိုလွှဲတွင် အလျား (၁၄၀.၅) မီတာ၊ (၁.၅) မီတာအမြင့် Hydraulic Elevator Dam (HED) ဟိုက်ဒရောလစ်စနစ် ယာယီ ရေထိန်းတံခါး တပ်ဆင်နိုင်ရေးအတွက် ယခုနှစ် ကန်ရေပြည့်ရာသီမရောက်မီ လုပ်ငန်း ပထမပိုင်း ဆောင်ရွက်ပြီးစီးရေးဆောင်ရွက်လျက်ရှိပြီး (၂၀၂၄-၂၀၂၅) ခုဘဏ္ဍာရေးနှစ်တွင် လုပ်ငန်းပြီးစီးရန် လျာထားဆောင်ရွက်လျက်ရှိကြောင်း နှင့် အဆိုပါလုပ်ငန်းပြီးစီးပါက ပေါင်းလောင်းရေလှောင်တမံ အနေဖြင့် နှစ်စဉ် ရေအားလျှပ်စစ်  ယူနစ်(၉၁၉)သန်း ထုတ်လုပ်ပေးသွားနိုင်မည်ဖြစ်ကြောင်း သတင်းရရှိသည်။