စိုက်ပျိုးရေးတက္ကသိုလ် နှစ်တစ်ရာပြည့်အထိမ်းအမှတ် ဘက်စုံသုံးခန်းမ ပန္နက်တော်တင်
ရေဆင်းစိုက်ပျိုးရေးတက္ကသိုလ်၊ နှစ်တစ်ရာပြည့်အထိမ်းအမှတ် ဘက်စုံသုံးခန်းမ ပန္နက်တော်တင် အခမ်းအနားကို ဇန်နဝါရီလ(၂၇)ရက်နေ့ နံနက်ပိုင်းက အဆိုပါ တက္ကသိုလ်ရှိ သတ်မှတ်နေရာ၌ ကျင်းပပြုလုပ်ရာ အခမ်းအနားသို့ ပြည်ထောင်စုဝန်ကြီး ဦးမင်းနောင် ၊ ဒုတိယဝန်ကြီး ဒေါက်တာတင်ထွဋ် ၊ ဒုတိယဝန်ကြီး ဦးဗိုလ်ဗိုလ်ကျော် နှင့် ဌာနဆိုင်ရာ တာဝန်ရှိသူများ၊ စိုက်ပျိုးရေးတက္ကသိုလ် ပါမောက္ခချုပ် နှင့် ပါမောက္ခ ဌာနမှူးများ တက်ရောက်ကြသည်။
မင်္ဂလာအချိန်တွင် ပြည်ထောင်စုဝန်ကြီး ၊ ဒုတိယဝန်ကြီးများနှင့် တာဝန်ရှိသူများက သတ်မှတ်နေရာများ၌ မင်္ဂလာပန္နက်တင်ပေးကြပြီး အမွှေးနံ့သာရည်များ ပက်ဖျန်းပေးခဲ့ကြသည်။
၁၉၂၄ ခုနှစ်၊ ဒီဇင်ဘာလ(၂၂)ရက်နေ့တွင် မန္တလေးမြို့၌ စိုက်ပျိုးရေးပညာကို တက္ကသိုလ်အဆင့်ဖြင့်စတင်ဖွင့်လှစ်သင်ကြားခဲ့ရာ နှစ်တစ်ရာပြည့် ဖြစ်သည့် ၂၀၂၄-၂၀၂၅ ပညာသင်နှစ်တွင် သစ်လွင်မောင်မယ် (၂၁၁)ဦး တို့က ပထမနှစ်ပညာသင်ယူကြမည်ဖြစ်ပြီး စိုက်ပျိုးရေးတက္ကသိုလ်အနေဖြင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေး အတွက်နှစ်စဉ် စိုက်ပျိုးရေး ပညာရှင်များ မွေးထုတ်ပေးလျက်ရှိရာ ယနေ့အထိ နှစ်တစ်ရာ ကာလ အတွင်း စိုက်ပျိုးရေးသိပ္ပံဘွဲ့ (B.Agr.Sc.) (၁၂,၉၈၃)ဦး၊ ဘွဲ့လွန် ဒီပလိုမာ (Postgrad. Dip.Ag.Sc.) (၆၅)ဦး၊ မဟာဒဿနဘွဲ့ (M.Phil.) (၁၀)ဦး၊ မဟာသိပ္ပံဘွဲ့ (M.Agr.Sc.) (၆၆၈)ဦး၊ သုတေသနအခြေပြုပါရဂူဘွဲ့ (Ph.D. by Research) (၆)ဦး၊ ပါရဂူဘွဲ့ (Ph.D.) (၇၇)ဦး မွေးထုတ် ပေးခဲ့ပြီး ဖြစ်သည်။
မင်္ဂလာပန္နက်တင် တည်ဆောက်မည့် ဘက်စုံသုံးခန်းမ ကို စိုက်ပျိုးရေးတက္ကသိုလ် နှစ်တစ်ရာပြည့်အထိမ်းအမှတ် အခမ်းအနားကျင်းပမည့် ၂၀၂၄ ဒီဇင်ဘာလ မတိုင်မီ အပြီးတည်ဆောက်သွားမည်ဖြစ်သည်။