APTERR အစီအစဉ်ဖြင့် အရန်ဆန် ၁၀၀၂ ဒသမ ၇၁ တန်ကို ရေကြီးရေလျှံမှုဖြစ်ပွားခဲ့သော တိုင်းဒေသကြီး/ ပြည်နယ်များသို့ ထောက်ပံ့ဖြန့်ဖြူးပေးမည်

နေပြည်တော်၊ စက်တင်ဘာ၂၂

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်သည် စက်တင်ဘာ ၂၁ ရက် နံနက်ပိုင်းတွင် ရန်ကုန်တိုင်းဒေသကြီး သန်လျင်မြို့နယ်ရှိ  အာဆီယံ+၃  အရန်ဆန်သိုလှောင်ရုံအတွင်း အရန်ဆန်များ စနစ်တကျသိုလှောင်ထားရှိမှု၊ သိုလှောင်ရုံများ ကြံ့ခိုင်ရေးဆောင်ရွက်ထားရှိမှုအခြေအနေများကို ကြည့်ရှုစစ်ဆေးသည်။

လုပ်ငန်းများကြည့်ရှုစစ်ဆေးစဉ် ဒုတိယဝန်ကြီးက APTERR အစီအ စဉ်ဖြင့် အရန်ဆန် ၁၀၀၂ ဒသမ ၇၁ တန်ကို ယခုကြုံတွေ့ခဲ့ရသည့် ရေကြီးရေလျှံမှု ဖြစ်ပွားခဲ့သော တိုင်းဒေသကြီး ပြည်နယ်များသို့ ထောက် ပံ့ ဖြန့်ဖြူးပေးရေး ဆောင်ရွက်လျက်ရှိရာတွင် ဆက်စပ်ဌာနအဖွဲ့ အစည်းများနှင့်ချိတ်ဆက်ဆောင်ရွက်၍ သက်ဆိုင်ရာဒေသများသို့ အမြန်ဆုံး တင်ပို့ဖြန့်ဖြူးပေးနိုင်ရေး ပူးပေါင်းဆောင်ရွက်ကြရန် တာဝန်ရှိသူများအား ဆွေးနွေးမှာကြားသည်။

နေ့လယ်ပိုင်းတွင် ဒုတိယဝန်ကြီး ဒေါက်တာတင်ထွဋ်သည် အင်းစိန်မြို့နယ်ရှိ ရန်ကုန်တိုင်းဒေသကြီး စိုက်ပျိုးရေးဦးစီးဌာနမှူးရုံး အစည်း အဝေးခန်းမတွင် တိုင်းဒေသကြီး၊ ခရိုင်နှင့်မြို့နယ်အဆင့် လယ်ယာကဏ္ဍဆိုင်ရာတာဝန်ရှိသူများအားတွေ့ဆုံ၍ ရန်ကုန်တိုင်း ဒေသကြီး ၏ လယ်ယာကုန်ထုတ်လုပ်ငန်းဆောင်ရွက်ချက်များအား ဆွေးနွေးခဲ့ကြသည်။ ဆွေးနွေးပွဲတွင် ဒုတိယဝန်ကြီး က ရန်ကုန်တိုင်းဒေသကြီးအတွင်း လယ်ယာသားငါး ထွက်ကုန်အခြေခံ စက်မှုလုပ်ငန်းများ ဖွံ့ဖြိုးတိုးတက်အောင် ဆောင်ရွက်ရေး၊ တိုင်းဒေသကြီး အတွင်းရှိ ဆည်၊ တာတမံများ ကြံ့ခိုင်ရေးနှင့်  ဘေးကင်းလုံခြုံရေး အတွက် ကြိုတင် ဆောင်ရွက်ထားရှိရေး၊ ဦးစီးဌာန အတွင်းရှိဝန်ထမ်းများ စွမ်းဆောင်ရည် မြင့်မားရေး အတွက် စဉ်ဆက်မပြတ် သင်တန်းများ ဖွင့်လှစ်ပေးနိုင်ရေးဆိုင်ရာ ကိစ္စရပ်များကို ဆွေးနွေးမှာကြားခဲ့ကြောင်းသတင်းရရှိသည်။

MOALI