ရန်ကုန်ဈေးကွက်

ဆန်ဈေးကွက်

ဆန်စပါးကုန်စည်ဒိုင်(ဝါးတန်းလမ်း)တွင် ထုတ်ပြန်ထားသည့် ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စတစ်တင်းခွဲ တစ်အိတ်လျှင် ၁၇၀၀၀၀ ကျပ်နှုန်းနှင့်အောက်စတစ်အိတ်လျှင် ၁၆၅၀၀၀ကျပ်နှုန်း၊ ဖျာပုံပေါ်ဆန်း ဆန်ဟောင်းအလတ်စတစ်တင်းခွဲ တစ်အိတ်လျှင် ၁၂၅၀၀၀ ကျပ်နှုန်းနှင့် အောက်စတစ်အိတ် လျှင် ၁၂၀၀၀၀ကျပ်နှုန်း၊ ဖျာပုံပေါ်ဆန်းသစ်အလတ်စတစ်တင်းခွဲ တစ်အိတ် လျှင် ၁၁၀၀၀၀ ကျပ်နှုန်းနှင့် အောက်စတစ်အိတ်လျှင် ၁၀၅၀၀၀ကျပ်နှုန်း၊ ဇီယာဆန် အလတ်စ တစ်တင်းခွဲ တစ်အိတ် လျှင်၅၅၀၀၀ကျပ်နှုန်းနှင့် အောက်စတစ်အိတ်လျှင် ၅၄၀၀၀ ကျပ်နှုန်း၊ ဧည့်မထ ဆန်ကြမ်း ၁၅ ရာခိုင်နှုန်း လတ်စ တစ်တင်းခွဲ တစ်အိတ်လျှင် ၅၁၅၀၀ကျပ်နှုန်းနှင့်  အောက်စတစ်အိတ်လျှင် ၅၁၀၀၀ ကျပ်နှုန်း၊ ငစိန်ဆန်အလတ်စတစ်တင်းခွဲ တစ်အိတ်လျှင် ၅၁၅၀၀ကျပ်နှုန်းနှင့် အောက်စ တစ်အိတ်လျှင်၅၁၀၀၀ကျပ်နှုန်းဖြင့် ရောင်းဝယ်လျက်ရှိကြောင်းသိရသည်။ ယခင်အပတ်ဈေးနှုန်း များနှင့်နှိုင်းယှဉ်ပါက ဖျာပုံပေါ်ဆန်း ဆန်သစ်အလတ်စတစ်တင်းခွဲတစ်အိတ်လျှင် ၅၀၀၀ ကျပ် ဝန်းကျင်နှင့် ငစိန်ဆန် တစ်အိတ်လျှင် ၁၀၀၀ ကျပ်ဝန်းကျင်ခန့် ဈေးမြင့်ခဲ့ခြင်းဖြစ်သည်။ ဖျာပုံပေါ်ဆန်းဆန်ဟောင်းများ လက်ကျန် နည်းလာချိန်ဖြစ်ခြင်းနှင့်  ဖျာပုံပေါ်ဆန်းဆန်သစ်များ အရည်အသွေးပိုမိုခြောက်သွေ့ ကောင်းမွန်လာချိန်ဖြစ်ခြင်းကြောင့် ပေါ်ဆန်းဆန်သစ်များ ဝယ်လိုအားများကာ အနည်းငယ်ဈေးမြင့်လာခဲ့ခြင်းဖြစ်သည်။ ငစိန်ဆန်မှာလည်း ပြည်ပတင်ပို့ရန် ဝယ်ယူမှုများခြင်းကြောင့် ယခင် အပတ်ထက် အနည်းငယ် ဈေးမြင့်လာခဲ့ခြင်းဖြစ်သည်။ ကျန်ဆန်အမျိုး အစားများမှာ ကုန်အဝင်ပုံမှန်ရှိခြင်း၊ ဆန်ချော၊ ဆန်ကြမ်းရောနှောစားသုံမှုများခြင်း၊ သင့်တင့်မျှတသော ဈေးနှုန်းများဖြင့် ဆန်ကားများလှည့်လည်ရောင်းချပေးလျက်ရှိခြင်း၊ လိုအပ်သလောက်သာ ပုံမှန်ဝယ်ယူမှုရှိခြင်းတို့ကြောင့် ပြည်တွင်း စားသုံးမှုများသော ဆန်ချော၊ ဆန်လတ်အများစုမှာ ဈေးငြိမ် အရောင်းအဝယ်အေးခဲ့ကြောင်းသိရသည်။ ပြည်ပ ပို့ဆန်ဈေးကွက်တွင်လည်း တရုတ်၊ဖိလစ်ပိုင်နိုင်ငံများသို့ ပိုမိုတင်ပို့ခဲ့ပြီး အခြားသော နိုင်ငံ အချို့သို့လည်း တင်ပို့မှုရှိ ကြောင်းသိရသည်။  ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ်၊လပွတ္တာ၊ ရွှေဘို ဒေသများမှ ဆန်ဝင်ရောက်မှုပုံမှန်ရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

အရှေ့အလယ်ပိုင်း ပဋိပက္ခများဖြစ်ပွားနေသည့် ကာလအတွင်း လောင်စာဆီဈေးနှုန်းများမြင့်တက်နေခြင်း၊ ကမ္ဘာ့ရွှေဈေးနှင့် ဒေါ်လာငွေ လဲနှုန်းများမတည်ငြိမ်ခြင်း၊နိုင်ငံတကာကုန်သွယ်ရေးလုပ်ငန်းများတွင် လောင်စာ ဆီ အကျပ် အတည်း အပေါ်စိုးရိမ်မှုများ မြင့်တက်နေချိန်ဖြစ်ခြင်း၊ ကမ္ဘာ့ရွှေဈေးနှင့် ဒေါ်လာငွေလဲနှုန်းများ မတည်ငြိမ်ခြင်း တို့ဖြစ်ပေါ် ခဲ့သည်။အရှေ့အလယ်ပိုင်းပဋိပက္ခကြောင့် ကုန်သည် ဝယ်လက် များက အခြေအနေစောင့်ကြည့်မှုများဖြစ်ပေါ်ခဲ့သည်။ ထို့ကြောင့် အရောင်းအဝယ်အေးပြီး အစေ့ထုတ်ပြောင်းဈေးနှုန်းများမှာ ယခင်အပတ် ဈေးနှုန်းအတိုင်း ၅၄ ပိဿာလျှင် ၈၂၀၈၀ ကျပ်ဖြစ်သည်။ ယခင်လ နောက်ဆုံးရက်သတ္တ ပတ်၏ ဈေးနှုန်းမှာ ၈၂၆၂၀ ကျပ်ဖြစ်ခဲ့သည်။

ပဲမျိုးစုံဈေးကွက်

အိန္ဒိယနိုင်ငံတွင် ပဲလိုအပ်ချက်များရှိခြင်းကြောင့် မတ်ပဲ(သင်္ဘောတင်)နှင့် ပဲစင်းငုံ(သင်္ဘောတင်)များ ဝယ်လိုအားများခဲ့သည်။ ထို့ကြောင့် မတ်ပဲ(သင်္ဘောတင်)နှင့်ပဲစင်းငုံ(သင်္ဘောတင်)များ ယခင်အပတ်ထက် ဈေးမြင့်လာခဲ့သည်။ မြန်မာပြည်တွင်း၌ မတ်ပဲအဟောင်းရော ပဲသစ်ပါရှိနေခြင်းကြောင့် မတ်ပဲအဟောင်းရော အသစ်ပါ အရောင်းအဝယ်ဖြစ်ကာ ဈေးမြင့်ခဲ့ခြင်းဖြစ်သည်။ မတ်ပဲ(သင်္ဘောတင်) အဟောင်း တစ်တန်လျှင် ယခင်အပတ်ပျမ်းမျှ ဈေးနှုန်းမှာ ၂၉၇၉၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၀၀၅၀၀၀ ကျပ်သို့လည်းကောင်း၊ မတ်ပဲ(သင်္ဘောတင်)အသစ် တစ်တန်လျှင် ယခင်အပတ် ပျမ်းမျှ ဈေးနှုန်းမှာ ၂၉၈၉၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၀၁၅၀၀၀ကျပ်သို့ လည်းကောင်း  ပဲစင်းငုံ(သင်္ဘောတင်) တစ်တန်လျှင် ယခင်အပတ်ပျမ်းမျှ ဈေးနှုန်းမှာ ၃၁၀၃၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၁၃၀၀၀၀ ကျပ်သို့ရောက်ရှိဈေးမြင့်ခဲ့သည်။ ယခုရက် သတ္တပတ်အတွင်း ကုန်စည်ဒိုင်ဖွင့်ရက် ၆ ရက်ရှိခဲ့ပြီး မတ်ပဲ(သင်္ဘောတင်) ကုန်သေတ္တာ ၁၆၅ လုံးခန့် နှင့် ပဲစင်းငုံ(သင်္ဘောတင်) ကုန်သေတ္တာ ၈၅လုံးခန့် အရောင်းအဝယ်ဖြစ်ခဲ့ ကြောင်း သိရသည်။ ပဲတီရွှေဝါဈေးနှုန်းများမှာ ခရမ်းပဲတီစိမ်းများအား ပွဲစားအချို့မှ ကြိုတင်(ကြိုပွိုင့်စနစ်) ရောင်းချမှုများရှိခဲ့ပြီး ပဲအပ်ရမည့် ကာလနီးလာချိန်တွင် ဝယ်လိုအားကောင်းလာခြင်းကြောင့် ပဲတီရွှေဝါဈေးနှုန်းများ ယခင်အပတ်ထက် သိသာစွာဈေးမြင့်လာခဲ့ခြင်းဖြစ်သည်။ ပဲတီရွှေဝါများ ပဲသစ် ပေါ်စအချိန်တွင် ဈေးနှုန်းများကျဆင်းခဲ့သော်လည်း ပဲအထွက်နှုန်းမှာ လျော့ကျနေခြင်း ကြောင့် တောင်သူများမှ ထုတ်ရောင်းမှုနည်းကာ ဈေးကွက်အတွင်း ပဲဝင်ရောက်မှုနည်းလာ ခဲ့သည်။ ထို့ကြောင့် ကြိုရောင်းသမား ကုန်သည်များက ပဲအပ်ချိန် နီးလာချိန်တွင် အပြိုင်အဆိုင် ဝယ်ယူမှုများရှိကာ ပဲတီရွှေဝါဈေးနှုန်းများ ဈေးမြင့်လာခြင်းဖြစ်ကြောင်းသိရသည်။    ပဲတီရွှေဝါ ၃ တင်း/ ၆၀ ပိဿာလျှင် ယခင်အပတ်ပျမ်းမျှ ဈေးနှုန်းမှာ ၃၃၀၄၅၀ ကျပ်ဖြစ်ပြီး ယခုအပတ် ဈေးနှုန်းမှာ ၃၃၅၅၅၀ ကျပ်သို့ ရောက်ရှိ ဈေးမြင့်ခဲ့သည်။ ဘိုကိတ်ပဲမှာ စိုက်ပျိုးထုတ်လုပ်မှု နည်းသော ပဲအမျိုးအစားဖြစ်ခြင်း၊ ဈေးကွက်သို့ ပဲသစ်အဝင်နည်းခြင်း၊ ဝယ်လိုအားများခြင်း တို့ကြောင့် ဘိုကိတ်ပဲ ၃ တင်း/ ၆၀ ပိဿာလျှင် ယခင် အပတ်ပျမ်းမျှ ဈေးနှုန်းမှာ ၂၀၆၅၅၀ ကျပ်ဖြစ်ပြီး ယခုအပတ်ဈေးနှုန်းမှာ ၂၁၀၀၀၀ ကျပ်သို့ ရောက်ရှိ ဈေးမြင့်ခဲ့သည်။ ထောပတ်ပဲနှင့် ကုလားပဲမှာ ပဲသစ်ပေါ်ချိန်ဖြစ်သော်လည်း ဈေးကွက် သို့ ကုန်အဝင်နည်းခြင်းနှင့် စားသုံးသူများက ဝယ်လိုအားနည်းခြင်းတို့ကြောင့် ရောင်းလိုအား ဝယ်လိုအားမျှကာ ဈေးငြိမ်အရောင်းအဝယ်အေးခဲ့သည်။ ထောပတ်ပဲ ၃ တင်း/၆၀ ပိဿာလျှင် ပျမ်းမျှဈေးနှုန်းမှာ ၂၂၀၈၀၀ ကျပ်ဖြစ်ပြီး ကုလားပဲတစ်ပိဿာလျှင် ပျမ်းမျှဈေးနှုန်းမှာ၄၀၈၀ ကျပ်ဖြစ်သည်။ ပဲပုပ်ပဲမှာ ဈေးကွက်သို့ ပဲသစ်အဝင်နည်းသော်လည်း ဝယ်လိုအားနည်းလာခြင်း ကြောင့် ၃တင်း/၆၀ ပိဿာလျှင် ယခင် အပတ်ပျမ်းမျှဈေးနှုန်းမှာ ၄၂၁၀၅၀ ကျပ်ဖြစ်ပြီး ယခုအပတ်ဈေးနှုန်းမှာ ၄၂၀၀၀၀ ကျပ်သို့ ရောက်ရှိဈေးနိမ့်ခဲ့သည်။   

စားသုံးဆီဈေးကွက်

အင်ဒိုနီးရှားနိုင်ငံနှင့် မလေးရှားနိုင်ငံတွင် ဇန်နဝါရီမှ မတ်အထိ ကာလသည် စားအုန်းဆီထုတ်လုပ်မှု လျော့ကျသော ကာလဖြစ်ခြင်း၊ တရုတ်နှစ်သစ်ကူးပွဲတော်နှင့် အစ္စလာမ်ဘာသာဝင်များ၏ ဥပုသ် ဆောက်တည်သော ကာလများအတွက် စားအုန်းဆီ ကြိုတင်ဝယ်ယူမှုစုဆောင်းမှုများရှိခဲ့သော ကာလဖြစ်ခြင်း၊ မလေးရှားရင်းဂစ်ငွေ တန်ဖိုးမြင့်တက်လာခြင်း၊ အင်ဒိုနီးရှားနိုင်ငံတွင်လည်း စားအုန်းဆီ ပို့ကုန်အပေါ် အခွန်ကောက်ခံရာတွင်  မတ် ၁ ရက်နေ့မှစတင်ကာ လက်ရှိ အခွန်ရာခိုင်နှုန်းထက် ၂ ဒသမ ၅ ရာခိုင်နှုန်း တိုးမြှင့်ပြီး ၁၂ ဒသမ ၅ ရာခိုင်နှုန်းအထိကောက်ခံရန် အတည်ပြုထားပြီးဖြစ်ခြင်း၊ မတ်လကုန်ပိုင်းတွင် ကျင်းပမည့် အီးဒ်(Eid al-Fitr)ပွဲတော်ကာလအတွက် ဝယ်လိုအားများသော ကာလဖြစ်ခြင်းစသည့် အခြေအနေများကြောင့် စားအုန်းဆီတင်သွင်းသော ဈေးနှုန်းများမှာလည်း တဖြည်းဖြည်း မြင့်တက်လာခဲ့သည်။ ထို့ပြင် အရှေ့အလယ်ပိုင်း ပဋိပက္ခကြောင့် လောင်စာဆီ အကျပ်အတည်းများအပေါ် စိုးရိမ်မှုကလည်း ဈေးနှုန်းများ ထပ်မံမြင့်တက် စေခဲ့သည်။ စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှု ကော်မတီ၏ ၂၀၂၆ ခုနှစ်၊ မတ် ၆  ရက်မှ ၁၂ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန်အထိုင်လက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၆၄၃၀ ကျပ်ဖြစ်သည်။ ယခင်အပတ်ဈေးနှုန်း များနှင့်နှိုင်းယှဉ်ပါက တစ်ပိဿာလျှင် ၃၀ ကျပ် ဈေးမြင့်လာခဲ့ခြင်းဖြစ်သည်။  ပြင်ပရှိ လက်လီ ဈေးကွက်တွင် သတ်မှတ်ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာ မကွာသော ဈေးနှုန်းများဖြင့် တစ်အိမ်ထောင်လျှင်  ၅၀ ကျပ်သားနှုန်း ရောင်းချပေးလျက်ရှိသည်။ အချို့သော မြို့နယ်များတွင် စားအုန်းဆီ တစ်ပိဿာ၏ ပြင်ပပေါက်ဈေးမှာ ၁၀၀၀၀ ကျပ်ဝန်းကျင်ဖြစ်သည်။

အေးသန္တာဝင်း