ရန်ကုန်ဈေးကွက်

(၂၇-၁-၂၀၂၆ ရက်နေ့ ကောက်ယူဈေးနှုန်းများဖြစ်ပါသည်။)

ဆန်ဈေးကွက်

ယခုရက်သတ္တပတ်အတွက် ဆန်စပါးကုန်စည်ဒိုင်(ဝါးတန်းလမ်း)တွင် ထုတ်ပြန်ထားသည့် ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲ တစ်အိတ်လျှင် ၁၉၅၀၀၀ ကျပ်နှုန်းနှင့် အောက်စတစ်အိတ်လျှင် ၁၉၀၀၀၀ ကျပ်နှုန်း၊ ရွှေဘိုပေါ်ဆန်း ဆန်အသစ် အလတ်စ တစ်တင်းခွဲ တစ်အိတ်လျှင် ၁၇၅၀၀၀ ကျပ်နှုန်းနှင့် အောက်စတစ်အိတ်လျှင် ၁၆၈၀၀၀ ကျပ်နှုန်း၊ ဖျာပုံပေါ်ဆန်းဟောင်းအလတ်စတစ်တင်းခွဲ တစ်အိတ်လျှင် ၁၂၅၀၀၀ ကျပ်နှုန်းနှင့် အောက်စတစ်အိတ်လျှင် ၁၂၀၀၀၀ကျပ်နှုန်း၊ ဖျာပုံပေါ်ဆန်းသစ်အလတ်စတစ်တင်းခွဲ တစ်အိတ် လျှင် ၁၀၅၀၀၀ ကျပ်နှုန်းနှင့် အောက်စ တစ်အိတ်လျှင် ၁၀၀၀၀၀ကျပ်နှုန်း၊ ဇီယာဆန် အလတ်စ တစ်တင်းခွဲ တစ်အိတ် လျှင်၅၅၀၀၀ကျပ်နှုန်းနှင့် အောက်စတစ်အိတ်လျှင် ၅၂၀၀၀ ကျပ်နှုန်း၊ ဧည့်မထ ဆန်ကြမ်း ၁၅ ရာခိုင်နှုန်း လတ်စ တစ်တင်းခွဲတစ်အိတ်လျှင် ၅၀၅၀၀ ကျပ်နှုန်းနှင့်  အောက်စတစ်အိတ်လျှင် ၅၀၀၀၀ ကျပ်နှုန်း၊ ငစိန်ဆန်အလတ်စတစ်တင်းခွဲ တစ်အိတ်လျှင် ၅၀၀၀၀ကျပ်နှုန်းနှင့် အောက်စတစ်အိတ်လျှင် ၄၉၀၀၀ကျပ်နှုန်းဖြင့်လည်းကောင်း ရောင်းဝယ်လျက်ရှိကြောင်းသိရသည်။ ယခင်အပတ်ဈေးနှုန်းများနှင့်နှိုင်းယှဉ်ပါက ရွှေဘိုပေါ်ဆန်း ဆန်သစ် အလတ်စတစ်တင်းခွဲတစ်အိတ်လျှင် ၁၇၂၀၀၀ ကျပ်နှုန်းမှ ၁၇၅၀၀၀ ကျပ်နှုန်းသို့ လည်းကောင်း၊ ဖျာပုံပေါ်ဆန်းဆန်သစ် အလတ်စတစ်တင်းခွဲ တစ်အိတ်လျှင် ၁၀၃၀၀၀ ကျပ်နှုန်း မှ ၁၀၅၀၀၀ ကျပ်နှုန်းသို့လည်းကောင်း အသီးသီးရောက်ရှိ ဈေးမြင့်ခဲ့သည်။ ကျန်ဆန်အမျိုး အစားများမှာ ဆန်ဟောင်းရှားပါးလာချိန်ဖြစ်သော်လည်း စပါးဟောင်းများအား လတ်တလော အသစ်ကြိတ်ခွဲထားသော ဆန်ဟောင်းကြိတ်သစ်များအဖြစ် ဈေးကွက်အတွင်း ဝင်ရောက်မှုရှိကာ ရောင်းလိုအား၊ ဝယ်လိုအား မျှတလျက်ရှိခြင်းကြောင့် ဆန်ဟောင်းဈေးများ ဈေးအမြင့်တွင် ဈေးငြိမ်လျက်ရှိခြင်းဖြစ်သည်။ ဆန်သစ်ဈေးနှုန်းများမှာမူ ဆန်ဟောင်းများ ဈေးမြင့်နေချိန်တွင် ဆန်သစ်များအား စားသုံးသူများမှ ဝယ်ယူစားသုံးမှုများလာခြင်းကြောင့် ဆန်သစ် အလတ်စတစ် အိတ်လျှင် ၃၀၀၀ ကျပ်ခန့် ဈေးမြင့်လာခဲ့ခြင်းဖြစ်သည်။ ပြည်ပပို့ ဆန်ဈေးကွက်တွင်လည်း အိန္ဒိယ၊ ထိုင်း၊ ဗီယက်နမ်အပါအဝင် အဓိက ဆန်တင်ပို့သည့် နိုင်ငံများသည် ပြည်တွင်းပိုလျှံသော ဆန်များကို တင်ပို့နိုင်ရန် ယှဉ်ပြိုင်လျက်ရှိပြီး ဝယ်လက်များမှာလည်း ဈေးထပ်ကျမည်ကို စောင့်ကြည့်လျက်ရှိနေခြင်းကြောင့် ကမ္ဘာ့ဆန်ဈေးနှုန်းများ အကျဘက်တွင် ရှိနေဦးမည်ဟု သုံးသပ်ခန့်မှန်းလျက်ရှိကြသည်။ မြန်မာပြည်တွင်း၌လည်း ပို့ကုန်ရငွေပမာဏ၏ ၂၅ ရာခိုင်နှုန်း အစား ၁၅ ရာခိုင်နှုန်းကိုသာ မြန်မာနိုင်ငံတော်ဗဟိုဘဏ်၏ သတ်မှတ်ချက်အတိုင်း မြန်မာကျပ်ငွေဖြင့် လဲလှယ်ဆောင်ရွက်ရန် ပြင်ဆင်ဖြေလျှော့ထားခြင်းကြောင့် ပြည်ပပို့ ဆန်ဈေးနှုန်းများအား အကျသက်သာစေခဲ့သည်။ ပြည်တွင်း ဆန်ဈေးနှုန်းများ တည်ငြိမ်မှန်ကန်မှုရှိစေရန် စားသုံးသူများထံသို့ သင့်တင့်မျှတသော ဈေးနှုန်းများဖြင့် ဆန်ကား များ လှည့်လည် ရောင်းချပေးလျက်ရှိသည်။  ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ် ၊ လပွတ္တာ၊ ရွှေဘို ဒေသများမှ ဆန်ဝင်ရောက်မှုရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

အစေ့ထုတ်ပြောင်းများအား ထိုင်းနိုင်ငံသို့ အကောက်ခွန်လွတ်တင်ပို့ချိန်နီးလာခြင်းကြောင့် ဝယ်လက်များမှ ဝယ်ယူမှုများခြင်း၊ ပို့ကုန်ရငွေအပေါ် ဖြေလျှော့မှုများရှိလာခြင်းကြောင့် ကုန်သည်၊ ဝယ်လက်များမှ ဈေးမြှင့်ပေးဝယ်ခြင်းစသည့်အခြေအနေများကြောင့် ၅၄ ပိဿာလျှင် ယခင်အပတ်ပျမ်းမျှ ဈေးနှုန်းမှာ ၇၇၇၆၀ကျပ်ဖြစ်ပြီး ယခုအပတ်ဈေးနှုန်းမှာ ၇၉၃၈၀ ကျပ်သို့ ရောက်ရှိဈေးမြင့်ခဲ့သည်။ ထိုင်းအစိုးရသည် ယခုနှစ်အတွင်း အစေ့ထုတ်ပြောင်း အကောက်ခွန်လွတ် တင်သွင်းခွင့်ကာလကို ဖေဖော်ဝါရီမှ ဇွန်အထိ ၅ လသာ အခွန်ကင်းလွတ်ခွင့်ပြုမည်ဖြစ်ကြောင်းသိရသည်။ ယခင်နှစ်များကမူ အာဆီယံလွတ်လပ်စွာ ကုန်သွယ်မှုသဘောတူညီချက်အရ နှစ်စဉ် ဖေဖော်ဝါရီလမှ ဩဂုတ်လကုန်အထိ ၇ လကို အခွန်ကင်းလွတ်ခွင့်ပြုခဲ့ခြင်းဖြစ်သည်။ အခြား အာဆီယံနိုင်ငံများသို့ ပြောင်းတန်ချိန် ပမာဏတိုးမြှင့် တင်ပို့ရောင်းချနိုင်ရန် မြန်မာနိုင်ငံ ပြောင်းလုပ်ငန်းအသင်းက စီစဉ်လျက်ရှိပြီး ဖေဖော်ဝါရီလကုန်ပိုင်းတွင် ဖိလစ်ပိုင်နိုင်ငံသို့ သွားရောက်ညှိနှိုင်းမှုများပြုရန် စီစဉ်ထားကြောင်း သိရသည်။

ပဲမျိုးစုံဈေးကွက်

အဓိကဝယ်လက်ဖြစ်သော အိန္ဒိယနိုင်ငံတွင် မိုးစိုက်ပဲများ ရေကြီးနစ်မြုပ်မှုများရှိခဲ့ခြင်းကြောင့် အိန္ဒိယပြည်တွင် ပဲအထွက်နှုန်းကျဆင်းကာ မတ်ပဲ၊ ပဲစင်းငုံများအား ဝယ်လို အားများခြင်း၊ ပြည်တွင်းပဲဈေးမြင့်ခြင်း၊ မိုဇမ်ဘစ်၊ မာလာဝီ စသော အာဖရိကနိုင်ငံ အချို့တွင်လည်း ရေကြီးနစ်မြုပ်မှုများဖြစ်ပေါ်ခဲ့ခြင်းကြောင့် ပဲစင်းငုံများ ပျက်စီးမှုရှိခဲ့ခြင်း၊ မြန်မာနိုင်ငံတွင်လည်း ပဲသစ် အဝင်နည်းနေသေးခြင်း၊ မတ်ပဲ၊ ပဲစင်းငုံများအား အိန္ဒိယဝယ်လက်များမှ ဝယ်ယူမှုများခြင်း၊ လှောင်လက်များကလည်း ဝယ်ယူမှုရှိခြင်း ရိတ်သိမ်းချွေလှေ့ကုန်ကျစရိတ်များ ဈေးမြင့်နေခြင်း၊ ပို့ကုန်ရငွေအပေါ် ဖြေလျှော့မှုများရှိလာခြင်းကြောင့် ကုန်သည်များက ဈေးမြှင့် ဝယ်ယူမှုရှိလာခြင်း၊ ပဲသစ်ပေါ်စအချိန်ဖြစ်ခြင်းကြောင့် ဈေးကွက်သို့ ပဲသစ်အဝင်နည်းနေသေးခြင်း၊ ပဲဟောင်းများလည်း လက်ကျန်အလွန်နည်းချိန်ဖြစ်ခြင်းတို့ကြောင့် ဈေးကွက်အတွင်း ပဲအဝင်နည်းကာ ဝယ်လိုအားများခဲ့သည်။ ထို့ကြောင့်    မတ်ပဲ(သင်္ဘောတင်)  တစ်တန်လျှင် ယခင်အပတ်ပျမ်းမျှ ဈေးနှုန်း မှာ ၂၈၇၃၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၂၉၈၆၀၀၀ ကျပ်သို့ ရောက်ရှိဈေးမြင့်ခဲ့သည်။အလားတူပင် ပဲစင်းငုံ(သင်္ဘောတင်) တစ်တန်လျှင် ယခင်အပတ်ပျမ်းမျှ ဈေးနှုန်းမှာ ၂၉၈၇၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၂၉၁၀၀၀ ကျပ်သို့ရောက်ရှိဈေးမြင့်ခဲ့သည်။ ယခုရက်သတ္တပတ်အတွင်း ကုန်စည်ဒိုင်ဖွင့်ရက် ၆ ရက်ရှိခဲ့ပြီး မတ်ပဲ(သင်္ဘောတင်) ကုန်သေတ္တာ ၁၉၀ လုံးခန့် အရောင်းအဝယ်ဖြစ်ခဲ့ပြီး ပဲစင်းငုံ(သင်္ဘောတင်) ကုန်သေတ္တာ ၁၁၀ လုံးခန့် အရောင်းအဝယ်ဖြစ်ခဲ့ကြောင်းသိရသည်။ ပဲတီရွှေဝါဈေးနှုန်းများမှာ ပဲဟောင်းလက်ကျန်များ နေသေးခြင်းနှင့် ဝယ်လက်များက ဈေးချဝယ်ယူမှုရှိခြင်း၊ တောင်သူများကလည်း ဈေးထပ်ကျ မည်ကို စိုးရိမ်ခြင်းကြောင့် ရောင်းချမှုများရှိသဖြင့် ၃ တင်း/ ၆၀ ပိဿာလျှင် ယခင်အပတ်ပျမ်းမျှဈေးနှုန်းမှာ ၄၁၀၅၅၀ ကျပ် ဖြစ်ပြီး ယခု အပတ်ဈေးနှုန်းမှာ ၄၀၅၆၀၀ ကျပ်သို့ ရောက်ရှိဈေးနိမ့်ခဲ့သည်။ ပဲလွမ်းဖြူမှာ ပဲသစ်မဝင် သေးခြင်းနှင့်အရောင်းအဝယ်အေးခြင်းကြောင့် ၃ တင်း/ ၆၀ ပိဿာလျှင် ယခင်အပတ်ပျမ်းမျှ ဈေးနှုန်းမှာ ၂၅၅၀၀၀ ကျပ်ဖြစ်ပြီး ယခုအပတ် ဈေးနှုန်းမှာ ၂၅၂၄၅၀ ကျပ်သို့ ရောက်ရှိ ဈေးနိမ့်ခဲ့သည်။ ကုလားပဲမှာ ပဲသစ်မဝင်သေးခြင်း၊ ရောင်းလိုအား၊ ဝယ်လိုအားမျှနေခြင်းကြောင့် ဈေးငြိမ် အရောင်းအဝယ်ဖြစ်ခဲ့သည်။ ကုလားပဲ တစ်ပိဿာလျှင် ပျမ်းမျှဈေးနှုန်းမှာ ၄၁၆၈ ကျပ်ဖြစ်သည်။  ထောပတ်ပဲ ၃ တင်း/ ၆၀ ပိဿာလျှင် ပျမ်းမျှဈေးနှုန်းမှာ ၁၉၉၈၀၀ ကျပ်ဖြစ်ပြီး ယခုအပတ်ဈေးနှုန်းမှာ ၂၁၀၃၀၀ ကျပ်သို့လည်းကောင်း၊ ပဲပုပ်ပဲ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၃၇၂၄၅၀ကျပ်ဖြစ်ပြီး ယခုအပတ်ဈေးနှုန်းမှာ ၃၉၂၅၅၀ ကျပ်သို့လည်းကောင်း၊  ဘိုကိတ်ပဲမှာ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၂၀၀၁၀၀ ကျပ်ဖြစ်ပြီး ယခုအပတ် ဈေးနှုန်းမှာ ၂၀၂၅၀၀ကျပ်သို့လည်းကောင်း အသီးသီးရောက်ရှိဈေးမြင့်ခဲ့ကြသည်။  

စားသုံးဆီဈေးကွက်

စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှုကော်မတီ၏ ၂၀၂၅ ခုနှစ်၊ ဇန်နဝါရီ ၂၃  ရက်မှ ၂၉  ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန်အထိုင်လက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၆၁၅၀ ကျပ်ဖြစ်သည်။ ယခင်အပတ်ဈေးနှုန်းမှာလည်း ၆၁၅၀ ကျပ်ဖြစ်သည်။ ပြင်ပရှိ လက်လီ ဈေးကွက်တွင် သတ်မှတ်ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာ မကွာသော ဈေးနှုန်းများဖြင့် တစ်အိမ်ထောင်လျှင်  ၅၀ ကျပ်သားနှုန်း ရောင်းချပေးလျက်ရှိသည်။ အချို့သော မြို့နယ်များတွင် စားအုန်းဆီ တစ်ပိဿာ၏ ပြင်ပပေါက်ဈေးမှာ ၁၀၀၀၀ ကျပ်ဝန်းကျင်ဖြစ်သည်။                   

 အေးသန္တာဝင်း