မန္တလေးဈေးကွက်

ဆန်

ရွှေဘိုပေါ်ဆန်း၊ ရန်ကုန်ပေါ်ဆန်းတို့မှာ အသစ်အဝင်ရှိခြင်း၊ မြို့တွင်းစားသုံးမှုနှင့်မန္တလေးဝန်းကျင်မှလာရောက်ဝယ်ယူမှုရှိခြင်းတို့ကြောင့် ရန်ကုန်ပေါ်ဆန်းအသစ်တစ်အိတ် ၁၂၀၀၀၀ကျပ်မှ ၁၂၅၀၀၀ကျပ်သို့ ဈေးမသိမသာမြင့်သွားပြီး၊ ရွှေဘိုပေါ်ဆန်းမှာ အဟောင်းတစ်အိတ် ၁၄၀၀၀၀၊ အသစ်တစ်အိတ် ၁၃၅၀၀၀ကျပ်ဖြင့် ဈေးတည်ငြိမ်နေသည်။ မနောသုခဆန်မှာ မန္တလေးဝန်းကျင်မှ အသစ်များဝင်ရောက်ခြင်း၊ မြို့တွင်းလူလတ်တန်းစား သုံးဆန်ဖြစ်ခြင်းကြောင့် အသစ်အဝင်များသော်လည်း တစ်အိတ် ၈၀၀၀၀ ကျပ်ဖြင့် ဈေးတည်ငြိမ်နေ သည်။ငစိန်နှင့်ဇီယာဆန်မှာ ရန်ကုန်ဈေးကွက်မှ တစ်ဆင့်ဝင်ရောက်သောဆန်ဖြစ်၍ အသစ်များ ဝင်ရောက်သော်လည်း မုန့်လုပ်ငန်းသမားများ ပုံမှန်ဝယ်ယူသော ဆန်ဖြစ်ခြင်း၊ လုပ်ငန်းသမားအဝယ် များခြင်းကြောင့် တစ်အိတ် ၇၃၀၀၀ကျပ်မှ ၇၄၀၀၀သို့ ဈေးမြင့်သွားပြီး ဇီယာဆန်မှာ ရန်ကုန်ဈေးကွက်မှ အဝင်များလာခြင်း၊ မန္တလေးဝန်းကျင်မှ ဝယ်ယူမှုနည်းခြင်းတို့ကြောင့် တစ်အိတ် ၉၃၀၀၀ကျပ်မှ ၈၈၀၀၀ကျပ် သို့ ဈေးမသိမသာနိမ့်သွားသည်။ ဧရာမင်းဆန်မှာမူ အသစ်အဝင်များလာခြင်း၊ မြို့တွင်းသုံးဝယ်ယူမှုနည်းခြင်း၊ အသစ်ဈေးဖြစ်ခြင်းကြောင့် တစ်အိတ် ၁၂၅၀၀၀ ကျပ်မှ ၁၂၀၀၀၀ ကျပ်သို့ ဈေးမသိမသာနိမ့်သွားသည်။

ဆီထွက်သီးနှံ

မြေပဲ(လုံးဆန်) ဈေးနှုန်းမှာ ထွက်ရှိရာဒေသအလိုက် အရည် အသွေးကွာခြားမှုကြောင့် အညာမြေပဲမှာ ၁၀၀ ပိဿာ ၈၅၀၀၀၀ ကျပ်၊ မြင်းမူဆန် ၉၅၀၀၀၀ ကျပ်ဖြင့် လုပ်ငန်းသမား၊ လှောင်သမားဝယ်ယူမှုရှိပြီး မြေပဲ(ဆီဆန်)မှာ ဆောင်းမြေပဲအသစ်များ အဝင်နည်းသွားခြင်း၊ ဆီစက်သမားအဝယ်ပုံမှန်ရှိခြင်း ကြောင့် ၁၀၀ပိဿာ ၈၂၀၀၀၀ ကျပ်မှ ၈၄၀၀၀၀ 
ကျပ်သို့ ဈေးမြင့်သွားသည်။

နှမ်းမျိုးစုံတို့အနက် နှမ်းဖြူမှာ လုပ်ငန်းသမား၊ အဝေးတင်ပို့သမားအဝယ်နည်းခြင်းကြောင့် အရောင်းအဝယ်အေးပြီး ၄၅ပိဿာ အရည်အသွေးအကောင်းဆုံး ၃၃၅၀၀၀ကျပ်ဖြင့် ဈေးတည်ငြိမ် နေသည်။ နှမ်းညိုမှာ အဝင်ပုံမှန်၊ ဆီစက်သမားအဝယ်ပုံမှန်ရှိခြင်းကြောင့် ၄၅ပိဿာ ၃၀၀၀၀၀ကျပ် ဖြင့် ဈေးတည်ငြိမ် နေသည်။ အရည်အသွေးကောင်းသန့်စင်ပြီး ဆောင်းနှမ်းနက်များအား ရန်ကုန်ဝယ်လက်ရှိခြင်းကြောင့် ၄၅ပိဿာ ၅၄၀၀၀၀ ကျပ်မှ ၅၅၀၀၀၀ ကျပ်သို့ ဈေးမသိမသာ မြင့်သွားသည်။

ပန်းနှမ်းဈေးနှုန်းမှာအသစ်ဝင်ရောက်မှုရှိခြင်း၊ ရောဆီအတွက် ဆီစက်သမား ဘယဆေးသမား ဝယ်ယူမှုရှိခြင်းကြောင့် ၄၅ပိဿာ ၂၂၀၀၀၀ကျပ်မှ ၂၂၅၀၀၀ကျပ်သို့ ဈေးမြင့်သွားသည်။ နေကြာမှာ ဆောင်းနေကြာအဝင်နည်းသေးခြင်း၊ ဆီစက်သမားအဝယ်နည်း၍ အရောင်းအဝယ်အေးခြင်းကြောင့် ၂၇ပိဿာ ၁၆၀၀၀၀ကျပ်ဖြင့် ဈေးတည်ငြိမ်နေသည်။

စားဖိုဆောင်သီးနှံ

ငရုတ်ခြောက်(ရှည်)မှာ နယ်စုံအဝင်များလာခြင်း၊မြို့တွင်းသုံးပုံမှန်ရှိခြင်းကြောင့် ငရုတ်ခြောက်(ရှည်) တစ်ပိဿာ ၁၂၀၀၀ကျပ်၊ ငရုတ်ခြောက်(လတ်) တစ်ပိဿာ ၈၀၀၀ကျပ်၊ ငရုတ်ခြောက်(ပွ) တစ်ပိဿာ ၁၆၀၀၀ကျပ်ဖြင့် ဈေးတည်ငြိမ်နေသည်။

ကြက်သွန်နီ မြစ်သားနှင့် ရွှေဘိုတို့မှ ဝင်ရောက်မှုရှိပြီး အသစ်များလာခြင်းကြောင့် မြစ်သား(ကြီး) တစ်ပိဿာ ၃၈၀၀ကျပ်မှ ၃၅၀၀ကျပ်၊ လတ်တစ်ပိဿာ ၃၅၀၀ကျပ်မှ ၃၃၀၀ကျပ်၊ သေးတစ်ပိဿာ ၃၃၀၀ကျပ်မှ ၃၀၀၀ကျပ်သို့ ဈေးနိမ့်သွားသည်။ ရွှေဘိုမှ ဝင်သော ကြက်သွန်နီမှာ ကြီးတစ်ပိဿာ ၃၀၀၀ကျပ်မှ ၂၈၀၀ကျပ်၊ လတ်တစ်ပိဿာ ၂၈၀၀ကျပ်မှ ၂၇၀၀ကျပ်၊ သေးတစ်ပိဿာ ၂၅၀၀ကျပ်မှ ၂၂၀၀ကျပ်သို့ ဈေးနိမ့်သွားသည်။

ရွှေဘို၊ ရွှေပန်းကုံးဘက်မှ ကြက်သွန်ဖြူ(မြန်မာ)များ အဝင်များနေပြီး အရည်အသွေးပေါ်မူတည်၍ အညံ့ဆုံး တစ်ပိဿာ ၅၀၀၀ကျပ်မှ အကောင်းဆုံး ၈၀၀၀ကျပ်ဈေးအမျိုးမျိုးဖြင့် ရောင်းဝယ်နေသည်။ ရှမ်းဖြူထွက်ရှိပြီဖြစ်သော်လည်း ဈေးကွက်အတွင်း ဝင်ရောက်မှုမရှိသေးပါ။ ကြက်သွန်ဖြူ(တရုတ်)မှာ ဝင်ရောက်မှုပုံမှန်မရှိခြင်းကြောင့် အရောင်းအဝယ် အေးနေသည်။

အာလူးဈေးနှုန်းအနေဖြင့် ပခုက္ကူနှင့် အောင်ပန်းတို့မှ ဝင်ရောက်မှုရှိပြီး ပခုက္ကူ အာလူး တစ်ပိဿာ ၄၀၀၀ကျပ်၊ အောင်ပန်းအာလူး တစ်ပိဿာ ၃၀၀၀ကျပ်ဖြင့် မြို့တွင်းသုံးနှင့် အမှာရှိသော မြို့များတို့ တင်ပို့သည်။

ပဲမျိုးစုံ

မတ်ပဲဈေးနှုန်းမှာ မတ္တရာ၊ ရွှေဘို၊ မုံရွာမှ အသစ်၃တင်းတစ်အိတ် ၂၆၀၀၀၀ကျပ်၊ ကျောက်ရစ်ပဲ တစ်အိတ် ၂၇၇၀၀၀ ကျပ်ဖြင့် လှောင်သမား၊ ရန်ကုန် သမားအရောင်းအဝယ် အေး၍ ဈေးတည်ငြိမ်နေသည်။ 

ပဲတီစိမ်း(အညာ)မှာ အဝင်နည်းသွားခြင်း၊ ပဲခွဲစက်နှင့် ရန်ကုန်ဝယ်လက်နည်းသွားခြင်း၊ ပဲအရည်အသွေးပေါ်မူတည်၍ ဈေးကွာခြားခြင်းကြောင့် ယခင်အပတ် ၃တင်းတစ်အိတ် အရည်အသွေး အကောင်းဆုံး ၂၇၀၀၀၀ကျပ်မှ ၂၆၅၀၀၀ကျပ်သို့ ဈေးမသိမသာနိမ့်သွားသည်။

ပဲစဉ်းငုံ(ဖြူ/နီ)နှစ်မျိုးလုံးအသစ်များ ဝင်ရောက်မှုရှိခြင်း၊ အရည် အသွေးကောင်းခြင်း၊ ရန်ကုန်သမား၊ လှောင်သမား၊ ပဲခွဲစက်များ အဝယ်ရှိခြင်းကြောင့် ပဲစဉ်းငုံ(ဖြူ) ၃တင်းတစ်အိတ်၂၆၈၀၀၀ ကျပ်မှ ၂၈၂၀၀၀ ကျပ်၊ ပဲစဉ်းငုံ(နီ) ၂၈၆၀၀၀ကျပ်မှ ၂၈၈၀၀၀ကျပ်သို့ ဈေးမြင့်သွားသည်။

ပဲပုတ်(မြန်မာ)မှာ အသစ်ဝင်သော်လည်း အဝင်နည်းသေးခြင်း၊ လုပ်ငန်းသမားအဝယ်ပုံမှန်ရှိခြင်း၊ ပဲအရည်အသွေးပေါ်မူတည်၍ ဈေးကွာခြား ခြင်းကြောင့် အရည်အသွေး အနိမ့်ဆုံး ၂၈၅၀၀၀ ကျပ်မှ အကောင်းဆုံး ၃တင်းတစ်အိတ် ၂၉၀၀၀၀ ကျပ်ဖြင့် ရောင်းဝယ်နေပြီး၊ ပဲပုတ်(ရှမ်း)မှာ အသစ်မဝင်သေးသော်လည်း ဆီစက်သမားအဝယ်နည်းခြင်းကြောင့် ၃ တင်းတစ်အိတ် ၃၃၅၀၀၀ ကျပ်ဖြင့် ဈေးတည်ငြိမ်နေသည်။

ကုလားပဲဈေးနှုန်းများအနေဖြင့် ကုလားပဲ(လုံးဖြူကြီး/လုံးဝါကြီး)နှစ်မျိုးလုံ အသစ်ဝင်ရောက် မှုရှိခြင်း၊ ပဲခွဲစက်နှင့်ပဲကြော်/လှော်လုပ်ငန်းသမား အဝယ်ပုံမှန်ရှိခြင်းကြောင့် တစ်အိတ် ၂၃၀၀၀၀ကျပ်ဖြင့် ဈေးတည် ငြိမ်နေပြီး ကုလားပဲ(လုံးဝါကြီး)မှာ ခွဲစက်သမားအဝယ်နည်းခြင်းကြောင့် တစ်အိတ် ၂၃၀၀၀၀ ကျပ်မှ ၂၂၀၀၀၀ ကျပ်သို့ ဈေးမသိမသာနိမ့်သွားသည်။ ခွဲခြမ်းမှာလည်း ပဲစိုများ၊ ဟင်းသီး/ ရွက်များ ဝင်ရောက်မှု များချိန်ဖြစ်ခြင်း၊ အလှူပွဲနည်းပါးခြင်းကြောင့် အရောင်းအဝယ်အေးပြီး ယခင်အပတ်ဈေးနှုန်းများအတိုင်း ၁ပိဿာ ၆၀၀၀ကျပ်ဖြင့် ဈေးငြိမ် နေသည်။

ပဲယင်း၊ မြေထောက်ပဲ၊ စားတော်ပဲ(ကျွန်း)တို့မှာ အသစ်အဝင်နည်းသေးခြင်း၊ အရည်အသွေးပေါ်မူတည်၍ ဈေးကွာခြားခြင်းကြောင့် ပဲယင်း ၃တင်းတစ်အိတ် အရည်အသွေးကောင်းဆုံး ၂၈၇၀၀၀ ကျပ်ဖြင့် ရောင်းချမှုရှိသည်။ မြေထောက်ပဲမှာ အရည်အသွေးကွာခြားမှု ပေါ်မူတည်၍ ၃တင်းတစ်အိတ် အညံ့ဆုံး ၂၆၅၀၀၀ ကျပ်၊ အကောင်းဆုံး ၂၈၇၀၀၀ ကျပ်ဖြင့် ပဲကြော်/လှော်လုပ်ငန်းရှင်များ ပုံမှန်ဝယ်ယူမှုရှိသည်။ စားတော်ပဲ(ကျွန်း)မှာလည်း ဒေသ/အရည်အသွေးပေါ်မူတည်၍ တစ်အိတ်ယခင်အပတ် ၃၆၀၀၀၀ ကျပ်မှ ယခုအပတ် ၃၃၀၀၀၀ကျပ်ဖြင့် လက်လီပုံမှန်ဝယ်ယူမှုရှိသည်။

ပဲကြီး(ကြီး/သေး) ထောပတ်ပဲ(ကြီး/သေး) တို့မှာ ပဲကြီး(ကြီး)များ အသစ်ဝင်ရောက်မှုရှိခြင်း၊ လုပ်ငန်းသမားပုံမှန်ရှိခြင်းကြောင့် ၃တင်းတစ်အိတ် ၂၈၀၀၀၀ ကျပ်မှ ၂၆၅၀၀၀ ကျပ်သို့ ဈေးနိမ့် သွားပြီး ပဲကြီး(သေး)မှာ လက်ကျန်အဟောင်းများသာဖြစ်ပြီး အသစ်မဝင်သေးခြင်း၊ လက်လီသမား အဝယ်ပုံမှန်ရှိခြင်းကြောင့် ၃တင်းတစ်အိတ် ၂၀၀၀၀၀ ကျပ်မှ ၂၄၀၀၀၀ ကျပ်သို့ ဈေးမြင့်သွားသည်။ ထောပတ်ပဲ(ကြီး)မှာ အသစ်မဝင်သေးခြင်း၊ လက်ကျန် နည်းပြီး အရောင်းအဝယ်အေးခြင်းကြောင့် ဈေးနှုန်းဖော်ပြခြင်းမရှိဘဲ ထောပတ် ပဲ(သေး) အသစ်ဝင်ရောက်မှုရှိပြီး လက်လီသမားအဝယ်ပုံမှန် ရှိခြင်းကြောင့် ၃တင်းတစ်အိတ် ၂၆၀၀၀၀ကျပ်ဖြင့် ဈေးတည်ငြိမ်နေသည်။

ဂျုံနှင့်အစေ့ထုတ်ပြောင်း

မုံရွာ၊ စစ်ကိုင်း၊ ရွှေဘိုတို့မှ ဂျုံအသစ်များ ဝင်ရောက်မှုရှိခြင်း၊ ဂျုံစက်များအဝယ်ပုံမှန်ရှိခြင်းကြောင့် ငါန်းဇွန် တောင်ဘက်၊ မြင်းမူ၊ မြောင်၊ ဆားတောင်၊ ဘုတလင်၊ မုံရွာ ဂျုံများမှာ အရည်အသွေးအကောင်းဆုံး ၂၂၀၀၀၀ကျပ်မှ ၂၁၀၀၀၀ကျပ်သို့ ဈေးနိမ့်သွားသည်။ ရှမ်းဂျုံမှာ ထွက်ရှိပြီဖြစ်သော်လည်း ရန်ကုန်သို့သာ ဝင်ရောက်မှုရှိသည်။ မန္တလေးကုန်စည်ဒိုင်ရှိ လက်ကျန်အဟောင်းမှာ တစ်အိတ် ၂၀၀၀၀၀ကျပ်ရှိပြီး၊ ကြူကုတ်ဂျုံမှာ ၃တင်းတစ်အိတ် ၁၈၀၀၀၀ ကျပ်၊ အထွက်တိုးဂျုံ ၁၉၃၀၀၀ကျပ်၊ ဩစတေးလျဂျုံမှုန့် ၁ပိဿာ ၃၇၀၀ကျပ်ဖြင့် လက်လီလုပ်ငန်းသမားများအဝယ် ပုံမှန် ရှိနေသည်။ အစေ့ထုတ်ပြောင်းဈေးနှုန်းမှာ အသစ်ပေါ်ချိန်ဖြစ်သော်လည်း၊ အဝင်နည်းခြင်းလက်ကျန်နည်းခြင်း၊ အစာစပ်သမားပုံမှန်ဝယ်ယူမှုရှိခြင်း၊ ရံဖန်ရံခါ အိန္ဒိယပို့ရန် ရန်ကုန်ဝယ်လက်ရှိခြင်းတို့ကြောင့် ၃တင်း တစ်အိတ် ၈၄၀၀၀ကျပ်ဖြင့် ဈေးငြိမ်နေသည်။

သစ်သီးဝလံနှင့် ဟင်းသီး/ရွက် 

မြင်းမူဘက်မှ ပန်းမုံလာ၊ ဂေါ်ဖီထုပ်၊ မုံလာဥများ လှိုင်လှိုင်ဝင်ရောက်ပြီး ပန်းမုံလာ တစ်ပွင့် ၁၀၀၀ကျပ်၊ ဂေါ်ဖီ၁ထုပ် ၆၀၀ကျပ်၊ မုန်လာဥ ၅ဥတွဲ အစည်း ၄၀ပါ တစ်အိတ် ၁၃၀၀၀မှ ၁၅၀၀၀ ကျပ် မုန့်ညင်းဖြူ ၁၀ပိဿာဝင်တစ်အိတ် ၈၀၀၀ကျပ်ဖြင့် ရောင်းဝယ်နေပြီး မြို့တွင်းလက်လီဆိုင်များ စားသောက်ဆိုင်များ ဝယ်ယူမှုပုံမှန်ရှိနေသည်။ ဧရာဝတီမြစ်ရိုးတစ်လျှောက်မှ တရုတ်(တိုင်ပေ)ပြောင်းများ အဖူး ၁၀၀ပါတစ်အိတ် ၄၀၀၀၀ ကျပ်၊ ရှမ်းပြောင်း ၁၀၀ ဖူး ၅၀၀၀၀ ကျပ်ဖြင့် လက်လီဆိုင်များ ဝယ်ယူမှုရှိ
သည်။

မြင်းမူဘက်မှ သခွားသီး ၁၀၀လုံးပါ တစ်အိတ် ၂၀၀၀၀ကျပ်၊ ခရမ်းချဉ်(တရုတ်(တိုင်ပေ))သီးများလည်း အဝင်များနေပြီး တစ်ပိဿာ ၇၀၀ ကျပ်ဈေးဖြင့် နယ်ဝေးတင်ပို့ရမှုနည်းပြီး မြို့တွင်းသုံးသာရှိခြင်းကြောင့် ဈေးနိမ့်နေသည်။    ရမည်းသင်းစပျစ်တစ်ပိဿာ ၁၀၅၀၀ ကျပ်၊ ဇီးပုလဲ ၇ပိဿာ တစ်ခြင်း ၂၅၀၀၀ ကျပ်၊ ပန်းသီးအကြွပ်  ယိုးဒသားသီး ၁၀၀ လုံးပါတစ်ဖာ ၁၁၀၀၀၀ ကျပ်၊ သခွားမွှေး အရည်အသွေး ပေါ်မူတည်၍ ၁၅၀၀ကျပ်မှ ၃၀၀၀ ကျပ်၊ သင်္ဘောသီး တစ်လုံး ၂၀၀၀ မှ ၃၀၀၀ ကျပ်ဖြင့် လက်ပံလှ၊ မုံရွာနှင့် အမှာရှိသော မြို့များသို့တင်ပို့သည်။                                     

ခင်မေကြည်