မန္တလေးဈေးကွက်
ဆန်နှင့်ဆီ
ဆန်ဈေးနှုန်းများအနေဖြင့် နယ်ဝေးတင်ပို့ရမှု မရှိခြင်း၊ မြို့တွင်းစားသုံးရန်အဝယ်နည်းခြင်း၊ အသစ်မဝင်သေးခြင်းကြောင့် ရန်ကုန်ပေါ်ဆန်းတစ်အိတ် ၁၃၅၀၀၀ကျပ်၊ ရွှေဘိုပေါ်ဆန်းတစ်အိတ် ၁၅၅၀၀၀ကျပ်ဖြင့် ဈေးတည်ငြိမ်နေသည်။ မန္တလေးဝန်းကျင်မှ အများဆုံးဝင်ရောက်သော မနောသုခဆန်မှာ အဟောင်းအဝင်နည်းသွားခြင်း၊ အသစ်ဝင်ရောက်မှုရှိခြင်း၊ မြို့တွင်းအများသုံးဆန်ဖြစ်၍ ဝယ်ယူမှုများခြင်း၊ လှောင်သမားထံမှ ဝယ်ရခြင်းကြောင့် အဟောင်းတစ်အိတ် ၉၅၀၀၀ကျပ်၊ အသစ်တစ်အိတ် ၉၀၀၀၀ကျပ်ဖြင့် ရောင်းဝယ်မှုရှိသည်။ ဇီယာနှင့် ငစိန်မှာ ရန်ကုန်ဈေးကွက်မှ တစ်ဆင့်ဝင်ရောက်သောဆန်ဖြစ်ခြင်း၊ ကားခဈေး မသိမသာမြင့်ခြင်း၊ အဝင်နည်းခြင်းကြောင့် အရောင်းအဝယ်အေးသော်လည်း ဇီယာဆန်တစ်အိတ် ၉၃၀၀၀ကျပ်ဖြင့် ဈေးတည်ငြိမ်နေပြီး ငစိန်ဆန်မှာ အဝင်ပုံမှန်၊ လုပ်ငန်းသမားအဝယ်နည်းခြင်းကြောင့် ကားခဈေးမြင့်သော်လည်း တစ်အိတ် ၇၈၀၀၀ကျပ်ဖြင့် ဈေးတည်ငြိမ်နေသည်။ ဧရာမင်းဆန်မှာအဝင်ပုံမှန်၊ မြို့တွင်းစားသုံးမှုပုံမှန်ရှိခြင်းကြောင့် တစ်အိတ် ၁၄၀၀၀၀ကျပ်ဖြင့် ဈေးတည်ငြိမ်နေသည်။ ရန်ကုန်မှ သယ်ယူစရိတ်မှာ ဆန်တစ်အိတ် ၃၅၀၀ကျပ်၊ ရွှေဘိုမှ ဆန်အိတ် အနည်းအများပေါ်မူတည်၍ တစ်အိတ် ၂၀၀၀မှ ၂၅၀၀ကျပ် တင်ခပေးရကြောင်း သိရသည်။ ဆီဈေးနှုန်းများအနေဖြင့် မိုးမြေပဲပေါ်ချိန်ဖြစ်၍ မြေပဲ(ဆီဆံ) ဈေးနိမ့်သဖြင့် ပဲဆီတစ်ပိဿာ ၁၄၅၀၀ကျပ်၊ နှမ်းဆီ ၁၃၅၀၀ကျပ်ဈေးဖြင့် ရောင်းဝယ်နေသည်။
ဆီထွက်သီးနှံ
မြေပဲ(လုံးဆန်/ဆီဆန်) ဈေးနှုန်းမှာ အဝင်ပုံမှန်၊ လုပ်ငန်းသမားအဝယ် ပုံမှန်ရှိခြင်းကြောင့် လုံးဆံသစ် ၁၀၀ပိဿာ အရည်အသွေးပေါ်မူတည်၍ ၈၁၀၀၀၀ကျပ်မှ ၈၃၀၀၀၀ကျပ်၊ မြင်းမူဆံ ၁၀၀ပိဿာ ၈၅၀၀၀၀ကျပ်ဈေးရှိပြီး မြေပဲ (ဆီဆန်)မှာ ပြည်၊ အောင်လံမှဝင်သော ဆီဆန် ၁၀၀ပိဿာ ၇၂၀၀၀၀ကျပ်၊ နွားထိုးဆီဆန် ၁၀၀ပိဿာ ၇၆၀၀၀၀ကျပ်ဖြင့် ဆီစက်သမားများ ပုံမှန်ဝယ်ယူနေသည်။ နှမ်းဖြူမှာ လုပ်ငန်းသမားအဝယ်နည်းခြင်း ပြည်ပပို့ရန် အဝယ်နည်းခြင်း ကြောင့် ၄၅ပိဿာ ၃၅၀၀၀၀ကျပ်၊ နှမ်းညိုမှာ အသစ်ဝင်ရောက်မှုများခြင်း၊ ဆီစက်သမားအဝယ်နည်း ခြင်းကြောင့် ၄၅ပိဿာ ၃၂၀၀၀၀ကျပ်မှ ၂၉၀၀၀၀ကျပ်သို့ ဈေးနိမ့်သွားသည်။ နှမ်းနက်(စမုံ)မှာ အဝင်နည်းသွားခြင်းကြောင့် အရောင်းအဝယ် အေးသော်လည်း အရည်အသွေးပေါ်မူတည်၍ အရည်အသွေးအနိမ့်ဆုံး ၅၇၅၀၀၀ကျပ်မှ ၅၉၀၀၀၀ကျပ်၊ အကောင်းဆုံး ၆၄၀၀၀၀ကျပ်မှ ၆၅၅၀၀၀ကျပ်သို့ ဈေးမြင့်သွားသည်။ ပန်းနှမ်းနှင့်နေကြာမှာ ပစ္စည်းရှား၊ အရောင်းအဝယ်ဖြစ်မှုမရှိခြင်း၊ ဆီစက်သမားအဝယ်နည်း ခြင်းကြောင့် လဆန်းပိုင်းဈေးနှုန်းအတိုင်း ပန်းနှမ်း ၄၅ပိဿာ ၂၅၀၀၀၀ကျပ်၊ နေကြာ ၂၇ပိဿာ ၂၀၀၀၀၀ကျပ် ဈေးသာရှိသည်။
ပဲမျိုးစုံ
မတ်ပဲ ဈေးနှုန်းမှာ အဝင်ပုံမှန်ရှိခြင်း၊ ပြည်ပပို့ရန် အဝယ်နည်းခြင်း၊ အရောင်းအဝယ်အေးသော်လည်း လက်ကျန်အဟောင်းနည်းခြင်းကြောင့် ၃တင်းတစ်အိတ် ၃၅၀၀၀၀ကျပ်၊ ရေသွင်းပဲ တစ်အိတ် ၃၁၀၀၀၀ကျပ်ဖြင့် ဈေးတည်ငြိမ်နေသည်။ ပဲတီစိမ်း (အညာ)မှာ မိုးပဲတီစိမ်းများ အဝင်ရှိခဲ့ခြင်း၊ အရောင်းအဝယ်အေးခြင်း၊ အရည်အသွေးပေါ်မူတည်၍ ဈေးကွာခြားခြင်းကြောင့် အရည်အသွေး အနိမ့်ဆုံး ၂၂၅၀၀၀ ကျပ်မှ အကောင်းဆုံး ၂၄၃၀၀၀ ကျပ်ဖြင့် ဈေးငြိမ်နေသည်။ပဲပုတ်(ရှမ်း/မြန်မာ) တို့မှာ မိုးပဲဝင်ချိန်ဖြစ်သော်လည်း စိုက်ဧကနည်း အထွက်နည်းခြင်း၊ လမ်းပမ်း ဆက်သွယ်ရေးကြောင့် အဝင်နည်းခြင်း၊ လုပ်ငန်းသမား အဝယ်ပုံမှန်ရှိခြင်းကြောင့် ၃တင်း တစ်အိတ် ပဲပုတ်(မြန်မာ) ၄၁၀၀၀၀ကျပ်မှ ၄၂၀၀၀၀ကျပ်၊ ပဲပုတ်(ရှမ်း)မှာလည်း လက်ကျန်နည်း၊ အသစ်အဝင်နည်းခြင်းကြောင့် အရည်အသွေးအကောင်းဆုံး ၄၁၀၀၀၀ကျပ်မှ ၄၂၀၀၀၀ ကျပ်သို့ ဈေးမြင့်သွားသည်။ကုလားပဲ(ကုဖြူကြီး)မှာ ပဲကြော်/လှော် သမားအဝယ်နည်းခြင်းကြောင့် လက်ကျန်နည်းသော်လည်း ၃တင်းတစ်အိတ် ၃၁၀၀၀၀ကျပ်ဖြင့် ဈေးတည်ငြိမ်နေပြီး ကုလားပဲ(လုံးဝါကြီး) မှာ ပဲစိုများပေါချိန်ဖြစ်၍ ခွဲစက်သမားအဝယ်နည်းခြင်း၊ အလှူပွဲနည်းခြင်းကြောင့် ၃တင်းတစ်အိတ် ၂၈၅၀၀၀ကျပ်ဖြင့် ဈေးငြိမ်နေသည်။ လုံးဝါကြီး ဈေးတည်ငြိမ်သဖြင့် ခွဲခြမ်းမှာလည်း တစ်ပိဿာ ၇၀၀၀ကျပ်ဖြင့် ဈေးတည်ငြိမ်နေသည်။ ပဲယင်း၊ မြေတောက်ပဲ၊ စားတော်ပဲ(ကျွန်း)တို့မှာ ပဲယင်းမှာလက်ကျန်နည်း၊ ပစ္စည်းရှားခြင်း၊ ပဲခွဲစက်များ ပုံမှန်ဝယ်ယူခြင်းကြောင့် ယခင်အပတ် ၃တင်းတစ်အိတ် ၁၉၈၀၀၀ကျပ်မှ ၂၁၀၀၀၀ ကျပ် သို့လည်းကောင်း ဈေးမြင့်သွားပြီး မြေတောက်ပဲမှာ အရောင်းအဝယ်အေးခြင်း၊ အရည်အသွေးညံ့ခြင်း လုပ်ငန်းသမားအဝယ်နည်းခြင်းကြောင့် ၃တင်းတစ်အိတ် ၃၄၀၀၀၀ကျပ်ဖြင့် ဈေးတည်ငြိမ်နေသည်။ စားတော်ပဲ(ကျွန်း)မှာ လက်လီသမားအဝယ်ပုံမှန်ရှိခြင်း၊ လက်ကျန်နည်းခြင်းကြောင့် ၃တင်း တစ်အိတ် ၃၉၀၀၀၀ကျပ်ဖြင့် ဈေးတည်ငြိမ်နေသည်။ပဲကြီး(ကြီး/သေး)၊ ထောပတ်ပဲ(ကြီး)တို့မှာ မိုးပဲဝင်ချိန်ဖြစ်သော်လည်း အဝင်နည်းခြင်း၊ လုပ်ငန်းသမား အဝယ်ပုံမှန်ရှိခြင်းကြောင့် ပဲကြီး(ကြီး) ၃တင်းတစ်အိတ် ၂၉၀၀၀၀ကျပ်မှ ၃၀၀၀၀၀ကျပ်သို့ ဈေးမြင့်သွားပြီး ပဲကြီး(သေး)မှာ အဝင်ပုံမှန်၊ လက်လီသမား အဝယ်ပုံမှန် ရှိခြင်းကြောင့် ၃တင်းတစ်အိတ် ၂၄၀၀၀၀ကျပ်ဖြင့် ဈေးတည်ငြိမ်နေသည်။ ထောပတ်ပဲ(ကြီး)မှာ အသစ်ဝင်ရောက်မှုရှိခြင်းကြောင့် တစ်အိတ် ၄၁၀၀၀၀ကျပ်မှ ၃၂၅၀၀၀ကျပ်သို့ ဈေးသိသိသာသာ နိမ့်သွားသည်။
စားဖိုဆောင်သီးနှံ
ငရုတ်ခြောက်(ရှည်)မှာ သာစည်၊ ပျော်ဘွယ်မှဝင်ရောက်ပြီး တစ်ပိဿာ အရည်အသွေးအကောင်းဆုံး ၁၄၀၀၀ကျပ်၊ ငရုတ်ခြောက် (လတ်) တစ်ပိဿာ ၇၀၀၀ကျပ်၊ ငရုတ်ခြောက်ပွ သဘာဝသီး တစ်ပိဿာ ၁၅၀၀၀ ကျပ်၊ Air.con ဖြင့် ထားသော ငရုတ်ခြောက်(ပွ) တစ်ပိဿာ ၂၃၀၀၀ကျပ်ဈေးရှိပြီး မန္တလေးမြို့တွင်းသုံး ဝယ်ယူမှုသာများသည်။နယ်စုံကြက်သွန် လက်ကျန်အဟောင်းများသာရှိခြင်း၊ အသစ်မဝင်သေးခြင်းကြောင့် နယ်စုံကြက်သွန်နီ(ကြီး) တစ်ပိဿာ ၃၃၀၀ကျပ်မှ ၄၃၀၀ကျပ်၊ လတ် တစ်ပိဿာ ၃၀၀၀ကျပ်မှ ၃၈၀၀ကျပ်၊ သေး တစ်ပိဿာ ၂၂၀၀ကျပ်မှ ၂၈၀၀ကျပ်သို့ ဈေးအသီးသီး မြင့်သွားသည်။ ကြက်သွန်ဖြူ (တရုတ်)မှာ အဝင်နည်းခြင်း လက် ကျန်နည်းခြင်းကြောင့် တစ်ပိဿာ ၁၆၀၀၀ကျပ်မှ ၂၀၀၀၀ကျပ်သို့ ဈေးမြင့်သွားသည်။ ကြက်သွန်ဖြူ (ရှမ်း)မှာ အဝင်နည်းသွားခြင်းကြောင့် အရည်အ သွေးအနိမ့်ဆုံး တစ်ပိဿာ ၁၀၀၀၀ကျပ်မှ ၁၅၀၀၀ကျပ်ထိ ဈေးအမျိုးမျိုးဖြင့် ရောင်းဝယ်နေသည်။ ယခုအပတ်အောင်ပန်းအာလူးဝင်ရောက်မှု မရှိဘဲ တရုတ်အာလူး တစ်မျိုးထဲသာ ဈေးကွက်အတွင်းတွေ့ရပြီး စားသုံးမှုပုံမှန်ရှိခြင်းကြောင့် တစ်ပိဿာ ၆၀၀၀ကျပ်မှ ၆၂၀၀ကျပ်သို့ ဈေးမြင့်သွားသည်။
ဟင်းသီး/ရွက်နှင့် သစ်သီးဝလံ
သာစည်ဘက်မှ ငရုတ်စို(ရှည်)များ ဝင်ရောက်ပြီး တစ်ပိဿာ ၅၅၀၀ကျပ်၊ မုံရွာ၊ ချောင်းဦးမှ ငရုတ်စို (လတ်)များ ပစ္စည်းရှား အဝင်နည်းခြင်းကြောင့် တစ်ပိဿာ ၁၀၀၀၀ကျပ်ထိ ဈေးမြင့်နေပြီး မြို့တွင်းလုပ်ငန်းသမား၊ ငါးပိထောင်းသမားများ ဝယ်ယူမှုများသည်။ဟင်းသီး/ရွက်အနေဖြင့် ရာသီဥတုကြောင့် အရည်အသွေးညံ့သော်လည်း အဝင်နည်းခြင်း ကြောင့် ဂေါ်ဖီတစ်ထုပ် ၁၅၀၀ကျပ်၊ ပန်းမုံလာတစ်ပွင့် ၂၀၀၀ကျပ်၊ ဘိုစားပဲသီး တစ် ပိဿာ ၉၀၀၀ကျပ်ထိဈေးမြင့်နေသည်။
သစ်သီးဝလံများအနေဖြင့် ဖရဲသီးများ အဝင်များပြီး တစ်လုံး ၁၅၀၀မှ ၂၅၀၀ကျပ်၊ သင်္ဘောသီးများ ညောင်ပင်ဝန်း၊ ဆားတောင်မှ ဝင်ရောက်ပြီး တစ်လုံး ၁၅၀၀မှ ၂၅၀၀ကျပ်၊ ထောပတ်သီး ၁၀၀လုံးမှ ၁၂၀လုံးပါ ပိုက်အိတ်တစ်အိတ် ၄၀၀၀၀ကျပ်၊ စပျစ်သီး(တရုတ်) ၄ပိဿာ တစ်ခြင်း ၇၀၀၀၀ကျပ်၊ လိမ္မော်သီး ၁၀၀ပိဿာ အရည်အသွေးပေါ်မူတည်၍ ၂၀၀၀၀၀ ကျပ်မှ ၃၀၀၀၀၀ကျပ်၊ ပျားလိမ္မော် ၁၀ပိဿာတစ်ခြင်း ၁၂၀၀၀၀ကျပ်၊ ကမ္ဗလာသီး ၁၀၀ပိဿာ ၄၀၀၀၀၀ကျပ် ဈေးအသီးသီး ဖြင့် ရောင်းဝယ်နေပြီး သင်္ဘောသီး ၂၅လုံး အိတ်များဖြင့် ထည့်ကာ ပဲခူး၊ ရေနံချောင်းသို့လည်းကောင်း သီးနှံမျိုးစုံအား လက်ပံလှ၊ မြင်းခြံ၊ တန့်ဇယ် စသောအမှာရှိသောမြို့များသို့ တင်ပို့မှုရှိသည်။
ဂျုံနှင့် အစေ့ထုတ်ပြောင်း
ဂျုံဈေးနှုန်းများအနေဖြင့် အဟောင်း လက်ကျန်နည်းခြင်း၊ အသစ်စိုက်ပျိုးရန် ပြင်ဆင်ချိန်ဖြစ်ခြင်း၊ ပစ္စည်းရှားခြင်း၊ ဂျုံစက်များ ပုံမှန်ဝယ်ယူမှုရှိခြင်းကြောင့် ငါန်းဇွန်၊ မြို့သာ၊ ဘုတလင်၊ စစ်ကိုင်း၊ ဆားတောင်၊ ရွှေဘို၊ မြင်းမူ၊ မြောင် ဂျုံများ ၃တင်းတစ်အိတ် ၂၁၀၀၀၀ကျပ်ဖြင့် ဈေးတည်ငြိမ်နေပြီး ရှမ်းဂျုံမှာ ဂျုံမှုန့်သား အထွက်နည်း၍ အရောင်းအဝယ်အေးခြင်းကြောင့် တစ်အိတ် ၁၉၅၀၀၀ကျပ်မှ ၁၈၀၀၀၀ကျပ်သို့ ဈေးနိမ့်သွားသည်။ အထွက်တိုးဂျုံနှင့် ကြူကုတ်ဂျုံ ၃တင်းတစ်အိတ် ၁၈၀၀၀၀ကျပ်၊ ဩစတေးလျဂျုံမှုန့်တစ်ပိဿာ ၃၇၀၀ကျပ်၊ ဂျုံဖွဲတစ်ပိဿာ ၁၂၀၀ကျပ်ဖြင့် ဈေးတည်ငြိမ်နေသည်။ အစေ့ထုတ်ပြောင်းမှာ မိုးပြောင်းအဝင်နည်းခြင်း၊ အရည်အသွေးညံ့ခြင်းရှိသော်လည်း အစာစပ်သမား ဝယ်ယူမှုပုံမှန်ရှိခြင်းကြောင့် ယခင်အပတ် ၃တင်းတစ်အိတ် ၇၄၀၀၀မှ ယခုအပတ် ၇၅၀၀၀ကျပ်သို့ ဈေးမသိမသာမြင့်သွားသည်။
ခင်မေကြည်