ဘင်္ဂလားဒေ့ရှ်တွင် တိရစ္ဆာန်စာကဏ္ဍ တိုးတက်မှုကြောင့် ပြောင်းတင်သွင်းမှု မြင့်တက်

ဘင်္ဂလားဒေ့ရှ်သည် မနှစ်က အမေရိကန်မှ ပြောင်းတင်သွင်းခွင့်ပြုခဲ့သော်လည်း ပြည်တွင်း ပြောင်း စိုက်ပျိုးထုတ်လုပ်မှုမှာ  တိုးတက်လာနေလျက်ရှိသည်။ USDA ၏ နောက်ဆုံး ခန့်မှန်းချက်အရ၊ နိုင်ငံအတွင်း ပြောင်းထုတ်လုပ်မှု တိုးလာနေလျှင်ပင် တိရစ္ဆာန်စာလိုအပ်ချက် မြင့်မားလာနေခြင်းကြောင့် ပြောင်း တင်သွင်းမှု ဝယ်လိုအား တိုးလာမည်ဟု ခန့်မှန်းထားသည်။

၂၀၁၈ ခုနှစ်က အမေရိကန် ပြောင်းဈေးကွက်မှ ပထမအကြိမ် ဝယ်ယူတင်သွင်းခဲ့ဖူးသော ဘင်္ဂလားဒေ့ရှ်သည် ၂၀၂၅/၂၆ တွင် ဈေးကွက်သို့ ပြန်လည်ဝင်ရောက်ခဲ့ပြီး နောက် အမေရိကန်သည် တင်သွင်းစျေးကွက်၏ ၁၁ ရာခိုင်နှုန်းကို ရယူနိုင်ခဲ့သည်။

ဘင်္ဂလားဒေ့ရှ် တိရစ္ဆာန်စာ ကုမ္ပဏီ သုံးခုသည် ပထမဆုံး ၆၀,၀၀၀ တန်ခန့် ဝယ်ယူခဲ့ပြီး၊ ၂၀၂၆ ဇန်နဝါရီ ပထမအပတ်တွင် Chattogram Port သို့ ရောက်ရှိခဲ့သည်။ ထိုဝယ်ယူမှုနောက်ပိုင်းတွင် တိရစ္ဆာန်စာ ကုမ္ပဏီများ အဖွဲ့ချုပ်က အမေရိကန်ပြောင်းများကို နှစ်သုတ်ခွဲ၍ ထပ်မံ ဝယ်ယူခဲ့ရာ ၂၀၂၅/၂၆ စိုက်ပျိုးနှစ်တွင် အမေရိကန်မှ ဘင်္ဂလားဒေ့ရှ်သို့ တင်ပို့သည့် ပြောင်းပမာဏစုစုပေါင်းသည် ခန့်မှန်းအားဖြင့် ၁၆၀,၀၀၀ တန်သို့ ရောက်ရှိခဲ့သည်။

တိရစ္ဆာန်စာကဏ္ဍ တိုးတက်လာခြင်းနှင့် နိုင်ငံတကာ စျေးနှုန်း နိမ့်ကျခြင်းကြောင့် ၂၀၂၅/၂၆ စိုက်ပျိုးနှစ်တွင် ဘင်္ဂလားဒေ့ရှ်၏ ပြောင်းတင်သွင်းမှုပမာဏ တန်ချိန် ၁ ဒသမ ၈ သန်း အထိ ရောာက်ရှိနိုင်မည်ဟု USDA က ခန့်မှန်းထားသည်။ ဤခန့်မှန်းချက်သည် ၂၀၂၄/၂၅ ခန့်မှန်းချက်ထက် ၂၇ ဒသမ ၂ ရာခိုင်နှုန်း မြင့်မားသည်။ တင်သွင်းမှုများသည် အဓိကအားဖြင့် အိန္ဒိယ၊ ဘရာဇီးနှင့် အမေရိကန်တို့မှ ဖြစ်သည်။ နိုင်ငံ တကာ ပြောင်းစျေးနှုန်း နိမ့်ကျနေမှုက ကုန်သွယ်သူများနှင့် တိရစ္ဆာန်စာ ကဏ္ဍတို့အား ပြောင်းအများအပြား တင်သွင်းသိုလှောင်စေခဲ့ခြင်းဖြစ်သည်ဟု ဆိုသည်။

၂၀၂၆/၂၇ စိုက်ပျိုးနှစ်တွင် USDA သည် ပြောင်းတင်သွင်းမှုကို တန်ချိန် ၁ ဒသမ ၇ သန်း ခန့်မှန်းထားပြီး၊ ၂၀၂၅/၂၆ ခန့်မှန်းချက်ထက် ၅ ဒသမ ၅ ရာခိုင်နှုန်း လျော့နည်းသွားမည်ဟု ဆိုသည်။ ပြည်တွင်း ပြောင်းထုတ်လုပ်မှု တိုးလာခြင်းနှင့် သို လှောင်ပမာဏ မြင့်တက်နေခြင်းတို့က လိုအပ်ချက် ပမာဏကို ဖြည့် ဆည်းသွားလိမ့်မည်ဟု ခန့်မှန်းထား သည်။

USDA သည် ဘင်္ဂလားဒေ့ရှ်၏ ပြောင်းတင်သွင်းမှုပုံစံ ပြောင်းလဲလာကြောင်း မှတ်ချက်ပြုခဲ့သည်။ “အိန္ဒိယသည် သမိုင်းတစ်လျှောက် ဘင်္ဂလားဒေ့ရှ်အတွက် အဓိက ပြောင်းပေးသွင်းသူ ဖြစ်ခဲ့ပြီး၊ စျေးနှုန်း ယှဉ်ပြိုင်နိုင်မှု၊ လောဂျစ်စတစ် ထိရောက်မှုနှင့် သယ်ယူပို့ဆောင်ချိန်တိုတောင်းခြင်းကြောင့် ဖြစ်သည်။ သို့သော် ၂၀၂၄ နောက်ပိုင်းတွင် အိန္ဒိယ၏ နိုင်ငံတွင်း ပြောင်းအခြေခံ ဇီဝလောင်စာဆီ ထုတ်လုပ်မှု တိုးလာခဲ့ရာ တင်ပို့နိုင်သော ပြောင်းပမာဏ အလွန်နည်းသွားခဲ့သည်။ ထို့ကြောင့် ဘရာဇီးသည် အဓိက ပေးသွင်းသူအဖြစ် ပေါ်ထွက်လာခဲ့သည်။ ၂၀၂၅/၂၆ စိုက်ပျိုးနှစ် ဖေဖော်ဝါရီလအထိ ဘရာဇီးသည် ဘင်္ဂလားဒေ့ရှ်၏ စုစုပေါင်း ပြောင်း တင်သွင်းမှု၏ ၇၈ ရာခိုင်နှုန်းကို ပေးသွင်းခဲ့ပြီး၊ အိန္ဒိယနှင့် အမေရိကန်တို့သည် ၁၁ ရာခိုင်နှုန်းစီ တင်သွင်းခဲ့သည်။”

TTP

asian-agribiz.com(21 April)