တရုတ်နိုင်ငံပြီးလျှင် အိန္ဒိယသည် ဗီယက်နမ် နဂါးမောက်သီးများအတွက် ခိုင်မာစိတ်ချရသော ဈေးကွက်တစ်ခုအဖြစ် ဆက်လက်တည်ရှိနေ

လတ်ဆတ်သော စိုက်ပျိုးရေးထွက်ကုန်များ တင်သွင်းတင်ပို့ပြုလုပ်သည့်ကုမ္ပဏီ IndoViet Group နှင့် တွဲဖက်လုပ်ကိုင်သူ Vikrant Sharma က နိုဝင်ဘာမှ ဖေဖော်ဝါရီအထိ ကျင်းပလေ့ရှိသည့် မင်္ဂလာဆောင်ရာသီတွင် ဗီယက်နမ် နဂါးမောက်သီး တင်သွင်းမှုသည် အမြင့်ဆုံးကို ရောက်ရှိနေကြောင်း ပြောကြားသည်။ ဗီယက်နမ်နိုင်ငံ၏ မြေနီမြေများတွင် အိန္ဒိယဝယ်လက်များ နှစ်သက်သည့် ချဉ်ချိုအရသာထူးရှိပြီး ထိပ်တန်းအရည်အသွေးရှိသော အသားဖြူ နဂါးမောက်သီးများ ဖြစ်ထွန်းကြောင်း ၎င်းက သုံးသပ်သည်။

ဆောင်းရာသီ မင်္ဂလာဆောင်ရာသီတစ်လျှောက် သင်္ဘောဖြင့် တင်ပို့မှုများ တဖြည်းဖြည်း မြင့်တက်လာခဲ့သည်။ နိုဝင်ဘာတွင် ကွန်တိန်နာ ၆ လုံး၊ ဒီဇင်ဘာတွင် ၈ လုံး၊ ဇန်နဝါရီတွင် ၁၀ မှ ၁၁ လုံး တင်ဆောင်ခဲ့ပြီး ယခုလတွင် ၆ လုံး တင်ဆောင်ထားပြီး အမြင့်ဆုံး တင်ပို့မှု ဆောင်ရွက်ရန်အတွက် ကွန်တိန်နာ ၈ မှ ၁၀ လုံး ထပ်မံတင်ပို့ရန် ရည်မှန်းထားသည်။ အသားဖြူ နဂါးမောက်သီးများကို သေတ္တာတစ်လုံးလျှင် ၉ ကီလိုဂရမ်ထိ အလေးချိန် သတ်မှတ်ထား၍ သေတ္တာများတွင် ထည့်သွင်းပြီး တစ်သေတ္တာလျှင် အလေးချိန် ၄၀၀ မှ ၄၅၀ ဂရမ်ရှိသော အသီး ၁၉ လုံး မှ ၂၀ လုံး အထိ ပါဝင်ကာ အိန္ဒိယတစ်ဝှမ်း ဖြန့်ဖြူးရန်အတွက်အဆင့်မြင့် အရည်အသွေး လိုအပ်သည့် မွမ်ဘိုင်းမြို့ရှိ Vashi စျေးကွက်သို့ အဓိက တင်ပို့သည်။ ချန်နိုင်း ဆိပ်ကမ်းသို့မူ အနည်းငယ် အဆင့်နိမ့်သော  နဂါးမောက်သီးများကို တင်ပို့သည်။ CIF Nhava Sheva စျေးနှုန်းများသည် ယမန်နှစ် ၏ ရှားပါးမှု အထွတ်အထိပ်ကာလမှ စျေးနှုန်းများထက် ၃၀ ရာခိုင်နှုန်းခန့် ကျဆင်းသွားပြီး သင်္ဘောများ ဆိုက်ရောက်မှုနှင့် ဗီယက်နမ်၏ တရုတ် သို့မဟုတ် ဟောင်ကောင်သို့ ဦးစားပေး တင်ပို့မှုများအပေါ် မူတည်၍ အပတ်စဉ် အပြောင်းအလဲများ ရှိပါသည်။

Vikrant က ယခုရာသီတွင် အရည်အသွေးနှင့်ပတ်သက်သော တိုင်ကြားမှုများ မရှိကြောင်း ပြောကြားခဲ့ပြီး "အသီးအနှံများသည် အလွယ်တကူ ပုပ်သိုးပျက်စီးတတ်တဲ့အတွက် စွန့်စားရမှုက အမြဲရှိနေပေမယ့် ရိတ်သိမ်းချိန်လွန် စနစ်တကျ ကိုင်တွယ်ခြင်းနှင့် ထုပ်ပိုးခြင်း နည်းလမ်းများကို အဆင့်ဆင့် မှန်မှန်ကန်ကန် လိုက်နာမည်ဆိုလျှင် ဘယ်တော့မှ အမှားအယွင်း မဖြစ်နိုင်ပါကြောင်း၊ ဗီယက်နမ်အနေနှင့် တရုတ်နှစ်သစ်ကူး ဓလေ့ထုံးတမ်းတွေနဲ့ ပိုမိုမြန်ဆန်တဲ့ ပို့ဆောင်မှုအတွက် တရုတ်နိုင်ငံကို ဦးစားပေးသည်ဆိုသော်လည်း အိန္ဒိယနိုင်ငံသို့ တင်ပို့မှုကတော့ ဝယ်လိုအားကို မောင်းနှင်ပေးနေသော သာလွန်ကောင်းမွန်သည့် အရသာကြောင့် တစ်နှစ်ပတ်လုံး တသမတ်တည်း တည်ငြိမ်စွာရှိနေပါတယ်" ဟု သူက ရှင်းပြသည်။

ဖေဖော်ဝါရီနောက်ပိုင်း တင်ပို့မှုပမာဏကျဆင်းမည်ဖြစ်သော်လည်း တစ်နှစ်ပတ်လုံး တင်ပို့မှု ဆက်လက်ရှိနေမည်ဖြစ်ပြီး မုတ်သုံရာသီကာလများဖြစ်သော ဇွန်မှ သြဂုတ်အတွင်း ဝယ်လိုအား ပြန်လည်မြင့်တက်လာမည်ဟု Vikrant က ပြောကြားသည်။ ဖေဖော်ဝါရီလ နောက်ပိုင်းတွင် စျေးကွက်မှာ ကျဆင်းသွားမည် ဖြစ်သော်လည်း ဆက်တိုက်တင်ပို့နိုင်မှုကို ထိန်းသိမ်းထားရန်အတွက် ကုန် ပစ္စည်းတင်ပို့မှုတွေကို ဆက်လက်လုပ်ဆောင်သွားမည်ဖြစ်ပါသည်။ ကုန်ပစ္စည်း လက်ကျန်ပမာဏ မျှတနေမည်ဆိုရင် စျေးနှုန်းများသည် တည်ငြိမ်နေမည်ဖြစ်ပါသည်။

မွန်ဘိုင်းဈေးကွက် ပြိုင်ဆိုင်မှုကြားမှပင် အိန္ဒိယသည် ယုံကြည်စိတ်ချရသော ဒုတိယ ဈေးကွက်အဖြစ် ဆက်လက်တည်ရှိနေသည်ဟု Vikrant က ပြောပါသည်။ ပုံမှန် တင်သွင်းမှုများရှိပေမယ့် ပြိုင်ဆိုင်မှု မြင့်မားတဲ့အတွက် အမြတ်အစွန်း ရရှိနိုင်မှုက မသေချာ မရေရာဖြစ်စေပါသည်။ သို့သော်လည်း ကျွန်တော်တို့သည် နဂါးမောက်သီး ကုန်သွယ်မှုကို ၈ နှစ်ကြာ လုပ်ကိုင်ခဲ့ပြီး လုပ်ငန်းအတွေ့အကြုံအရ ဗီယက်နမ်ရဲ့ ယုံကြည်စိတ်ချရတဲ့ တင်ပို့မှုပမာဏနဲ့ အရည်အသွေးတို့ဟာ တင်သွင်းမှုတွေကို ဆက်လက်ရှင်သန်စေပြီး ထူးခြားဆန်းပြားတဲ့ သစ်သီးဝလံများအပေါ် အိန္ဒိယနိုင်ငံရဲ့ တိုးပွားလာတဲ့ ကြိုက်နှစ်သက်မှုများကို ဖြည့်ဆည်းပေးနိုင်လိမ့်မယ်လို့ ယုံကြည်ပါကြောင်း ပြောကြားခဲ့သည်။ 

အေးအေးခိုင်

https://www.freshplaza.com/asia/article/9812555/india-remains-a-reliable-market-for-vietnamese-dragon-fruit-after-china/