ဗီယက်နမ်တွင် အမဲသားကဏ္ဍ တိုးတက်မှု အထောက်အကူပြု ရောဂါထိန်းချုပ်မှု လုပ်ငန်းများ အရှိန်မြှင့်ဆောင်ရွက်

ဗီယက်နမ်နိုင်ငံ၏ အမဲသားနှင့် ကျွဲသားထုတ်လုပ်မှုကဏ္ဍတွင် "အရေပြားအကျိတ်နာရောဂါ" (Lumpy Skin Disease - LSD) သည် ထုတ်လုပ်မှု စွမ်းဆောင်ရည်၊ စားသုံးသူယုံကြည်မှုနှင့် ဈေးကွက်ရရှိမှုတို့အပေါ် အဓိက စိန်ခေါ်မှုတစ်ခုအဖြစ် ဆက်လက်ရှိနေဆဲ ဖြစ်ပါသည်။ ရောဂါကူးစက်မှု အရေအတွက် လျော့ကျလာသော်လည်း ရောဂါပိုးမှာ အန္တရာယ်ရှိနေဆဲ ဖြစ်သည့်အတွက် ဗီယက်နမ်အာဏာပိုင်များက ရောဂါထိန်းချုပ်ရေးလုပ်ငန်းများကို ပိုမိုတင်းကျပ်စွာ ဆောင်ရွက်လျက်ရှိသည်။

၂၀၂၅ ခုနှစ်အတွင်း ဗီယက်နမ်နိုင်ငံရှိ ပြည်နယ် ၁၂ ခုတွင် အရေပြားအကျိတ်နာရောဂါ (LSD) ဖြစ်ပွားမှု ၈၈ ကြိမ်ရှိခဲ့ပြီး ကျွဲ၊ နွား ကောင်ရေ ၃၃၃ ကောင် ကူးစက်ခံရကာ ၁၄၄ ကောင် သေဆုံး သို့မဟုတ် ဖယ်ရှားခဲ့ရသည်။ ယခင်နှစ်နှင့် နှိုင်းယှဉ်ပါက ရောဂါဖြစ်ပွားမှု ၄၀ ရာခိုင်နှုန်းကျော် လျော့ကျသွားသော်လည်း အချို့ပြည်နယ်များတွင် ကာကွယ် ဆေးထိုးနှံမှုနှုန်း နည်းပါးနေသေးသည့်အတွက် ရောဂါကူးစက်နိုင်ခြေ မြင့်မားနေဆဲ ဖြစ်သည်။

ဤရောဂါသည် တိရစ္ဆာန်များ၏ ကိုယ်အလေးချိန်ကို လျော့ကျစေပြီး အရေပြားကို ပျက်စီးစေသောကြောင့် အသားအရည်အသွေးနှင့် ဈေးကွက်တန်ဖိုးကို ထိခိုက်စေပါသည်။ ထို့အပြင် ရောဂါကူးစက်ခံထားရသော နွားများ၏ ပုံရိပ်များ လူမှုကွန်ရက်ပေါ်တွင် ပျံ့နှံ့မှုကြောင့် အမဲသားစားသုံးမှုအပေါ် စိုးရိမ်ပူပန်မှုများ ဖြစ်ပေါ်စေခဲ့သည်။ (အဆိုပါရောဂါသည် လူသို့ ကူးစက်ခြင်းမရှိကြောင်း အာမ ခံထားသော်လည်း စားသုံးသူများ၏ ယုံကြည်မှုကို ထိခိုက်စေပါသည်။)

ဗီယက်နမ်နိုင်ငံ၏ နွားမွေးမြူရေးကဏ္ဍတွင် LSD ရောဂါသည် ခွာနာလျှာနာရောဂါကဲ့သို့ပင် အဓိကအန္တရာယ်တစ်ခု ဖြစ်နေဆဲဖြစ် သည်။ မညီမျှသည့် ကာကွယ်ဆေးထိုးနှံမှုနှင့် ပြည်တွင်း အမဲသားဈေးကွက်အပေါ် ဆက်လက်မှီခိုနေမှုတို့သည် ခွာနာလျှာနာရောဂါကဲ့သိုပင် ဗီယက်နမ်၏ စားမြုံ့ပြန်တိရစ္ဆာန် မွေးမြူရေးနယ်ပယ်အတွက် အန္တရာယ် ရှိလာမည်ဖြစ်ကြောင်း ကျွမ်းကျင်သူများက သတိပေးထား သည်။

TTP

www.asian-agribiz.com