ရုရှား-အင်ဒိုနီးရှား ကုန်သွယ်မှုပမာဏ ကန်ဒေါ်လာ ၅ ဘီလီယံကျော်ရှိမည်

ရုရှားနှင့် အင်ဒိုနီးရှားတို့ကြား ကုန်သွယ်မှုပမာဏသည် ၂၀၂၅ ခုနှစ် နှစ်ကုန်ပိုင်းတွင် အမေရိ ကန်ဒေါ်လာ ၅ ဘီလီယံကျော် ရှိလာမည်ဟု ရုရှားနိုင်ငံမှ မျှော်လင့်ထားကြောင်း အင်ဒိုနီးရှားနိုင်ငံ ဆိုင်ရာ ရုရှားသံအမတ်ကြီး Mr. Sergey Tolchenov က TASS သတင်း ဌာနနှင့် အင်တာဗျူးတစ်ခုတွင် ပြောကြား ခဲ့သည်။

ကုန်သွယ်မှုပုံသဏ္ဍာန်မှာ များစွာပြောင်းလဲခြင်းမရှိဘဲ ရုရှားနိုင်ငံ၏ အဓိကပို့ကုန်များသည် သတ္တု၊ စွမ်း အင်အရင်းအမြစ်များ၊ သစ်၊ ဓာတ် မြေဩဇာနှင့် စိုက်ပျိုးရေးထုတ်ကုန်များဖြစ်ကြောင်း၊ စားအုန်းဆီသည် အင်ဒိုနီးရှား၏ အဓိကပို့ကုန်အဖြစ် ဆက်လက်တည်ရှိနေပြီး ၎င်းသည် ရုရှားဈေးကွက်သို့ အဓိကပို့ကုန်ဖြစ် ကြောင်း၊ နှစ်နိုင်ငံလုံးသည် ကုန်သွယ်မှုဖွံ့ဖြိုးတိုးတက်ရေးတိုးချဲ့ရန် စိတ်ဝင်စားမှုရှိကြောင်း၊ အင်ဒိုနီးရှားကုမ္ပဏီအများ အပြားသည် ၎င်းတို့၏ထုတ်ကုန်များကို ရုရှားဈေးကွက်သို့ တင်ပို့ရန် ဆန္ဒရှိကြကြောင်း၊ ကော်ဖီ၊ လက်ဖက် ခြောက်၊ အပူပိုင်းဒေသ သစ်သီးဝလံများနှင့် ဟင်းခတ်အမွှေးအကြိုင်များသည် အင်ဒိုနီးရှားအတွက် ရုရှားဈေးကွက်သို့ တင်ပို့ရန် စိတ်ဝင်စားဖွယ် ကောင်းသည့် ထုတ်ကုန်များဖြစ်ကြောင်း ရုရှားသံအမတ်ကြီးက ပြောကြားခဲ့သည်။

ဥရောပအာရှစီးပွားရေးသမဂ္ဂ (Eurasian Economic Union - EAEU)နှင့် အင်ဒိုနီးရှားတို့အ ကြား လွတ်လပ်သောကုန်သွယ်မှုသဘောတူညီချက်(FTA)ကို ဒီဇင်ဘာလတွင် လက်မှတ်ရေးထိုးရန် မျှော်လင့်ထားကြောင်း၊ ယင်းသည် နှစ်နိုင်ငံကုန်သွယ်မှုတိုးတက်ရေးကို အထောက်အကူဖြစ်စေမည်ဟု ယုံကြည်ကြောင်း ၎င်းက ဆက်လက်ပြောကြားခဲ့သည်။

၂၀၂၄ ခုနှစ်တွင် ရုရှားနှင့် အင်ဒိုနီးရှား နှစ်နိုင်ငံအကြား ကုန်သွယ်မှုပမာဏသည် အမေရိကန် ဒေါ်လာ ၄ ဒသမ ၃ ဘီလီယံအထိ ရှိခဲ့သည်။ ရုရှားသည် အင်ဒိုနီးရှားနိုင်ငံသို့ ရေနံနှင့် ရေနံထွက် ကုန်များ၊ သံနှင့် သံမဏိ၊ ဓာတ်မြေဩဇာ၊ ဂျုံအပါ အဝင် စိုက်ပျိုးရေးထွက်ကုန်များ အဓိကတင်ပို့ပြီး အင်ဒိုနီးရှားမှ စားအုန်းဆီ၊ ရော်ဘာ၊ ကော်ဖီနှင့် စိုက်ပျိုးရေး ထွက်ကုန်များ အဓိကတင်သွင်းကြောင်း သိရသည်။

ရုရှားတွင် စိုက်ပျိုးထုတ်လုပ်နိုင်ခြင်းမရှိသည့် ကော်ဖီ၊ လက်ဖက်ခြောက်၊ အပူပိုင်းဒေသ သစ်သီးဝလံများနှင့် ဟင်းခတ်အမွှေးအကြိုင်များသည် မြန်မာနိုင်ငံအနေဖြင့် ရုရှားနိုင်ငံသို့ တင်ပို့ရန် အလားအလာကောင်းများရှိကြောင်း သိရသည်။

ခွန်မျိုးသူ

https://tass.ru/ekonomika/25469817