ထိုင်း Khao Banthat ဒူးရင်းသီး အမျိုးသား GI ဝင်ငွေရရှိသည့် ထိပ်တန်းနေရာတွင် ရပ်တည်လျက်ရှိ

Khao Banthat Mon Thong ဒူးရင်းသီးသည် ထိုင်းနိုင်ငံ၏ အမြင့်ဆုံးဝင်ငွေ ရရှိသည့် Geographical Indication (GI) product ဖြစ်လာပြီး ၂၀၂၅ ခုနှစ်၏ ပထမ ၉ လအတွင်း ဝင်ငွေအားဖြင့် ထိုင်းဘတ်ငွေ ၁၁ ဘီလီယံကျော် (အမေရိကန်ဒေါ်လာ ၂၉၈ သန်းခန့်) ရရှိခဲ့သည်ဖြစ်ရာ ထိုင်းနိုင်ငံ၏ ထိပ်တန်းတင်ပို့သည့် စိုက်ပျိုးရေးထွက်ကုန် အနေဖြင့်ရပ် တည်လျက်ရှိသည်။

ထိုင်းနိုင်ငံ GI ထွက်ကုန်များသည် ၎င်း၏ အရည်အသွေးနှင့် သိသာထင်ရှားသော ဒေသဆိုင်ရာ လက္ခဏာ ရပ်များကြောင့် အောင်မြင်မှုများ ရရှိခဲ့ပြီး ပြည်တွင်းပြည်ပတွင် ဝယ်လို အားများ မြင့်တက်လျက်ရှိကြောင်း အသိဉာဏ်ပစ္စည်းဆိုင်ရာ မူပိုင်ခွင့်ဦးစီးဌာန (Department of Intellectual Property) ၏ ညွှန်ကြားရေးမှူးချုပ်ဖြစ်သူ Aura-mon Supthaweethum က ပြောကြားခဲ့ပါသည်။ ၂၀၂၅ ခုနှစ်၊ ဇန်နဝါရီမှ စက်တင်ဘာအတွင်း စိုက်ပျိုးရေးနှင့် အစားအသောက်ထွက်ကုန် များသည် ထိုင်းနိုင်ငံ၏ GI ဝင်ငွေရရှိ သည့် ထိပ်တန်းထွက်ကုန် ၁၀ မျိုးတွင် ပါဝင်ပြီးနိုင်ငံ၏ အမျိုးသား စီးပွားရေးအား ထိုင်းဘတ် ငွေ ၄၆ ဘီလီယံကျော် (အမေရိကန်ဒေါ်လာ ၁ ဒသမ ၂၅ ဘီလီယံခန့်) ပံ့ပိုးပေးနိုင်ခဲ့သည်။

ဒူးရင်းထွက်ကုန်သည် ထိုင်းနိုင်ငံ၏ ထိပ်တန်း ၃ နေရာတွင် ရပ်တည်လျက်ရှိသည်။ Trat ပြည် နယ်မှ ထွက်ရှိသော Khao Banthat Mon Thong ဒူးရင်းသီးသည် ထိုင်းဘတ်ငွေ ၁၁ ဒသမ ၀၄၇ ဘီလီယံဖြင့် ထိပ်တန်း ဦးဆောင်နေပြီး ၎င်း၏ ချိုမြိန်ပြီး ခရင်မ်အရသာနှင့် အဝါဖျော့ဖျော့အသား ကြောင့် လူသိများလျက်ရှိသည်။ အဆိုပါဒူးရင်းမျိုးကို Khao Banthat တောင်တန်းတွင် စိုက်ပျိုးကြပြီး အဆိုပါတောင် တန်းပေါ်တွင် လေပြင်းတိုက်ခတ်မှုကြောင့် ပန်းစောစော ပွင့်ပြီး ဒူးရင်း သီးများကို စောစောခူးဆွတ်နိုင်ပါသည်။ Yala မြို့မှ ထွက်ရှိသော Saded Nam ဒူးရင်းသီးသည် ထိုင်းဘတ်ငွေ ၆ ဒသမ ၆၆၁ ဘီလီယံ (အမေရိကန်ဒေါ်လာ ၁၈၀ သန်း) ဖြင့် ဒုတိယနေရာတွင် ဦးဆောင်နေပြီး ၎င်းဒူးရင်းမျိုးသည် ခြောက်သွေ့ သော အသားရှိပြီး အမျှင်ဓာတ် အနည်းငယ် ပါဝင်ပြီး ပင်လယ်ရေမျက်နှာပြင်အထက် မီတာ ၁၀၀ တွင် စိုက်ပျိုးကြပါသည်။ Rayong မြို့မှ ထွက်ရှိသော Mon Thong ဒူးရင်းသီးသည် ထိုင်းဘတ်ငွေ ၄ ဒသမ ၈၈၆ ဘီလီယံ (အမေရိကန်ဒေါ်လာ ၁၃၂ သန်း) ဖြင့် တတိယနေရာတွင် ရပ်တည်လျက် ရှိပြီး ၎င်းဒူးရင်းမျိုးသည် အခွံပါးပြီး မွှေးကြိုင် သောအသားကြောင့် ထင်ရှားသည်။

အဆိုပါ ဒူးရင်းမျိုး ၃ မျိုးလုံးကို အဓိကအားဖြင့် တရုတ်နိုင်ငံသို့ တင်ပို့ကြပြီး တရုတ်နိုင်ငံသည် ထိုင်းနိုင်ငံ၏ ဒူးရင်းအတွက် အကြီးမားဆုံးဈေးကွက်အဖြစ် ရပ်တည်လျက်ရှိသည်။

Auramon သည် GI ထွက်ကုန်များ၏ စွမ်းဆောင်ရည်ကို ၎င်းထွက်ကုန်များ၏ အရည်အသွေး ကာကွယ်မှု၊ ဈေးကွက်လက်လှမ်းမီမှုနှင့် တန်ဖိုးမြှင့်ဖန်တီးမှုတို့ကို အခြေခံ၍ ပူးပေါင်း ဆောင်ရွက်မှုမဟာဗျူဟာကို ချမှတ်ခဲ့ပါသည်။ GI အသိအမှတ်ပြုလက်မှတ်သည် ခြေရာခံနိုင်စွမ်း ရှိပြီး အရည်အသွေးထိန်းချုပ်မှု သေချာမှုရှိသည့်အတွက် မှတ်ပုံတင်ထားသော ကုန်ပစ္စည်းများအ တွက် ဈေးနှုန်းမှာ ၂ ဆ မှ ၅ ဆအထိ မြင့်တက်စေပါသည်။ GI ထွက်ကုန်များကို မြှင့်တင်ရန် ကြိုးပမ်း အားထုတ်မှုများတွင် တရုတ်၊ မလေးရှားနှင့် ဂျပန် နိုင်ငံကဲ့သို့သော ဝင်ငွေမြင့်မားသော ဈေးကွက်များကို ဦးတည်၍ ဝင်ရောက်နိုင်ရန် ကြိုးပမ်း ဆောင်ရွက်ခြင်း၊ အဆင့်မြှင့်ထုတ်ပိုးမှုများ ဖွံ့ဖြိုးတိုးတက်အောင် ဆောင် ရွက်ခြင်းနှင့် အဆင့်မြင့်စားသောက် ဆိုင်များနှင့် ခရီးသွားလုပ်ငန်း ကဏ္ဍများတွင် ထွက်ကုန်များကို ပေါင်းစပ် ဆောင်ရွက်ခြင်းလုပ်ငန်းများ ပါဝင်ပါသည်။

အသိဉာဏ်ပစ္စည်းဆိုင်ရာမူပိုင်ခွင့်ဦးစီးဌာနသည် စီးပွားရေးနှင့် ကူး သန်းရောင်းဝယ်ရေး ဝန်ကြီးဌာန၏ "Quick Big Win" မူဝါဒအရ GI မှတ်ပုံတင်ခြင်းနှင့် မြှင့်တင်ခြင်းလုပ်ငန်း စဉ်များကို အဆင့်မြှင့်တင်ရန် ဆက်လက်ဆောက်ရွက်လျက်ရှိပါသည်။ အသိဉာဏ်ပစ္စည်းဆိုင်ရာ မူပိုင်ခွင့်ဦးစီးဌာနသည် ဒေသခံစီးပွားရေးလုပ်ငန်းများကို အားကောင်း စေပြီး တောင်သူလယ်သမားများနှင့် အသေးစားထုတ်လုပ်သူများကို ပံ့ပိုးပေးနိုင်မည့် GI အမှတ်အသားကို အမျိုးသားအဆင့် အရည် အသွေး၏ သင်္ကေတတစ်ခုအဖြစ် ပြုလုပ်ရန် ရည်ရွယ်ထားကြောင်း သိရှိရသည်။

နွေးနွေးအောင်

https://www.freshplaza.com/asia/article/9779231/thailand-s-khao-banthat-durian-tops-national-gi-earnings/