အလျင်မြန်ဆုံး တိုးတက်နေသော အဓိကစီးပွားရေး နိုင်ငံတစ်ခုအဖြစ် အိန္ဒိယ ဆက်လက် တည်ရှိနေမည်

အိန္ဒိယနိုင်ငံ၏ စီးပွားရေးတိုးတက် မှုနှုန်းသည် လက်ရှိဘဏ္ဍာနှစ်တွင် ကမ္ဘာလုံးဆိုင်ရာနှင့် ပြည်တွင်းဖြစ်ပေါ်တိုးတက်မှုများကြောင့် အသင့် အတင့်သာရှိမည်ဟု ခန့်မှန်းထားကြောင်းနှင့် ရေတိုအတွင်း တိုးတက်မှု အရှိန်အဟုန်ကို ထိန်းသိမ်းရန်အတွက် ငွေကြေးနှင့် ဘဏ္ဍာရေးဆိုင်ရာ မူဝါဒများကို မျှတစွာ ပေါင်းစပ်အသုံးပြုရန် လိုအပ်နိုင်ကြောင်း EY အစီရင်ခံစာတစ်စောင်တွင် မေ ၂၈ ရက်က ဖော်ပြခဲ့သည်။

EY Economy Watch မေလထုတ်ပြန်ချက်အရ အိန္ဒိယနိုင်ငံသည် ပြည်တွင်းဝယ်လိုအား ခိုင်မာမှု၊ ငွေကြေး ဖောင်းပွမှု လျော့ကျလာမှုနှင့် ပုဂ္ဂလိက ရင်းနှီးမြှုပ်နှံမှု ပြန်လည်အသက်ဝင်လာမည့် အလားအလာနှင့် ချိတ်ဆက်ထားသော လိုက်လျောညီထွေရှိသည့် ငွေကြေးမူဝါဒတို့၏ ပံ့ပိုးမှုဖြင့် အလျင်မြန်ဆုံး တိုးတက်နေသော အဓိကစီးပွားရေးနိုင်ငံများထဲမှ တစ်ခုအဖြစ် ဆက်လက်တည်ရှိ နေမည်ဟု သိရသည်။

"အိန္ဒိယနိုင်ငံ၏ ၂၀၂၅-၂၆ ဘဏ္ဍာနှစ်အတွက် စီးပွားရေးတိုးတက်မှုနှုန်းသည် ကမ္ဘာလုံးဆိုင်ရာနှင့် ပြည်တွင်းဖြစ်ပေါ်တိုးတက်မှုများ ပေါင်းစပ်လွှမ်းမိုးမှုကြောင့် အသင့်အတင့်သာရှိမည်ဟု ခန့်မှန်းထားသည်" ဟု ၎င်းက ပြောကြားခဲ့သည်။

EY အစီရင်ခံစာ၏ ခွဲခြမ်းစိတ်ဖြာချက်အရ ကမ္ဘာလုံးဆိုင်ရာ အကျိုးသက်ရောက်များကြောင့် အနာဂတ်တွင် ဖြစ်ပေါ်လာမည့် အလားအလာကို သတိထားစောင့်ကြည့်ရန်လိုကြောင်း၊ အဆိုပါ သက်ရောက်မှုများတွင် ထောက်ပံ့ရေးကွင်းဆက် ပြတ်တောက်မှုများ ဆက်လက်ဖြစ်ပေါ်နေခြင်း၊ အမေရိကန်ပြည်ထောင်စုမှ မကြာသေးမီကချမှတ်ခဲ့သော အကောက်ခွန်ဆိုင်ရာ အစီအမံများ ၏ သက်ရောက်မှုနှင့် ကမ္ဘာလုံးဆိုင်ရာ ကုန်သွယ်ရေးနှင့် ပထဝီနိုင်ငံရေးဆိုင်ရာ ဖွံ့ဖြိုးတိုးတက်မှုများတွင် ပိုမိုကျယ်ပြန့်သော မရေရာမှုများ ပါဝင်ကြောင်း သိရသည်။ အဆိုပါအစီရင်ခံစာတွင် ရေတိုအတွင်း အိန္ဒိယနိုင်ငံသည် တိုးတက်မှုအရှိန်အဟုန်ကို ထိန်းသိမ်းရန်အတွက် ငွေကြေးနှင့် ဘဏ္ဍာရေးဆိုင်ရာ မူဝါဒများကို မျှတစွာ ပေါင်းစပ်အသုံးပြုရန် လိုအပ်နိုင်သည်ဟု ပြောကြားခဲ့သည်။

"ငွေကြေးမူဝါဒပိုင်းမှာတော့ လက်ရှိအတိုးနှုန်းလျှော့ချမှု သံသရာကို ဆက်လက်လုပ်ဆောင်ခြင်းက စားသုံးမှုနဲ့ ရင်းနှီးမြှုပ်နှံမှုတွေကို အထောက်အကူပြုနိုင်ပါတယ်။ ဘဏ္ဍာရေးပိုင်းမှာတော့ ၂၀၂၄-၂၅ ဘဏ္ဍာနှစ်မှာ တိုးတက်မှုနှုန်း အသင့် အတင့်သာရှိခဲ့တဲ့ အစိုးရရဲ့ ငွေလုံးငွေရင်းအသုံးစရိတ် အပါအဝင် အစိုးရ ရဲ့ ရင်းနှီးမြှုပ်နှံမှု အရှိန်အဟုန်ကို ပြန်လည်အသက်သွင်းတာက စီးပွားရေးလုပ်ဆောင်ချက်တွေ ရေရှည်တည်တံ့အောင် ထိန်းသိမ်းဖို့ အရေးကြီးတဲ့အချက်ဖြစ်ပါတယ်" ဟု EY မှ ပြောကြားခဲ့သည်။ အိန္ဒိယအမျိုးသားစာရင်းအင်းဌာန (National Statistics Office-NSO) က အိန္ဒိယနိုင်ငံ၏ စီးပွားရေးသည် ၂၀၂၄-၂၅ ဘဏ္ဍာနှစ်တွင် ၆ ဒသမ ၅ ရာခိုင်နှုန်းတိုးတက်မည်ဟု ယခုနှစ် ဖေဖော်ဝါရီလတွင် ခန့်မှန်းထုတ်ပြန်ခဲ့ပြီး စီးပွားရေးတိုးတက်မှုနှုန်းသည် ပြီးခဲ့သည့် ဇွန်၊ စက်တင်ဘာနှင့် ဒီဇင်ဘာ သုံးလပတ်များတွင် ၆ ဒသမ ၅ ရာခိုင်နှုန်း၊ ၅ ဒသမ ၆ ရာခိုင်နှုန်းနှင့် ၆ ဒသမ၂ ရာခိုင်နှုန်း အသီးသီးရှိခဲ့ကြောင်း သိရသည်။ NSO သည် ၂၀၂၄-၂၅ ဘဏ္ဍာနှစ်အတွက် ဂျီဒီပီခန့်မှန်းခြေနှင့် စတုတ္ထသုံးလပတ်အတွက် ခန့်မှန်းခြေများကို မေလ ၃၀ ရက်နေ့တွင် ထုတ်ပြန်ရန် စီစဉ်ထားကြောင်း သိရသည်။

ဧပြီလတွင် ဗဟိုဘဏ်အဖွဲ့ဝင်သုံးဦးနှင့် ပြင်ပအဖွဲ့ဝင်သုံးဦးတို့ ပါဝင်သော အိန္ဒိယဗဟိုဘဏ် (RBI) ၏ ငွေကြေးမူဝါဒကော်မတီ (Monetary Policy Committee MPC) သည် ပြန်လည်ဝယ်ယူမှု (Repurchase) သို့မဟုတ် ဗဟိုဘဏ်တိုးနှုန်း (Repo rate) ကို ၂၅ အခြေခံပွိုင့် လျှော့ချ၍ ၆ ရာခိုင်နှုန်းသို့ သတ်မှတ်ရန် တညီတညွတ်တည်း မဲပေးဆုံးဖြတ်ခဲ့ကြောင်း သိရသည်။ ၂၀၂၅-၂၆ ဘဏ္ဍာနှစ် အတွက် ဂျီဒီပီတိုးတက်မှုနှုန်းကို ၆ ဒသမ ၅ ရာခိုင်နှုန်းအဖြစ် RBI က ခန့်မှန်းထားသည်။ MPC ၏ နောက်ထပ် အစည်းအဝေးကို ဇွန် ၄ ရက်နေ့မှ ၆ ရက်နေ့အထိ ကျင်းပရန် စီစဉ်ထားပြီး ငွေကြေးမူဝါဒကို ဇွန် ၆ ရက်နေ့တွင် ကြေညာမည်ဟု သိရသည်။

နိုင်ငံတကာငွေကြေးရန်ပုံငွေအဖွဲ့ (IMF) ၏ ၂၀၂၅ ခုနှစ်၊ ဧပြီလ ကမ္ဘာ့စီးပွားရေးအလားအလာ အစီရင်ခံစာ (World Economic Outlook -WEO) အရ အိန္ဒိယနိုင်ငံ၏ အမည်ခံဂျီဒီပီ (Nominal GDP) သည် ၂၀၂၅ ခုနှစ် (၂၀၂၅-၂၆ ဘဏ္ဍာနှစ်) တွင်  အမေရိကန်ဒေါ်လာ ၄ ဒသမ ၁၈၇ ထရီလီယံခန့်သို့ ရောက်ရှိမည်ဟု ခန့်မှန်းထားပြီး ဂျပန်နိုင်ငံ၏ ခန့်မှန်း ခြေ အမေရိကန်ဒေါ်လာ ၄ ဒသမ ၁၈၆ ထရီလီယံကို အနည်းငယ်ကျော်တက်ကာ ကမ္ဘာ့စတုတ္ထအဆင့် စီးပွားရေးအဆောက် အအုံတစ်ခုဖြစ်လာမည်ဟု Economic Times သတင်းစာက မေ ၂၆ ရက်က ဖော်ပြပါသည်။

အစောပိုင်းအစီရင်ခံစာအချို့တွင် အိန္ဒိယနိုင်ငံသည် ၂၀၂၅ ခုနှစ်၊ မေတွင် အဆိုပါမှတ်တိုင် ကို ရောက်ရှိခဲ့ပြီဟု ဖော်ပြခဲ့သော်လည်း NITI Aayog အရာရှိများပြောကြားချက်၊ EY Economy Watch နှင့် IMF ၏ အချက်အလက်များအရ တရားဝင်အတည်ပြုချက်ကို ၂၀၂၆ ခုနှစ်အစောပိုင်းတွင် ထုတ်ပြန်မည့် တစ်နှစ်တာ တိုင်းပြည်ဝင်ငွေ (ဂျီဒီပီ) အစီရင်ခံစာ၌ အချက်အလက်အပြည့် အစုံဖြင့် သိရှိရဖွယ်ရှိကြောင်း သိရပါသည်။

သို့ပါ၍ ကျွမ်းကျင်သူများ၏ သုံးသပ်ချက်နှင့် အစီရင်ခံစာများက တစ်ညီတစ်ညွှတ်တည်း ခန့်မှန်းထား ကြသည့်အချက်မှာ အိန္ဒိယနိုင်ငံသည် အလျင်မြန်ဆုံး တိုးတက်နေသော အဓိကစီးပွား ရေးနိုင်ငံများထဲမှ တစ်ခုအဖြစ် ဆက်လက်တည် ရှိနေမည်ဟု တွေ့ရှိရကြောင်း လေ့လာသုံးသပ်တင်ပြလိုက်ရပါသည်။

ကောင်းထွဋ်အောင်

Economic Times, India to remain among fastest-growing major economies even as growth may moderate in FY26: EY, May 28, 2025. Economic Times, India to become 4th largest economy by end of 2025: NITI Member Arvind Virmani, May 26, 2025.