၂၀၂၃ ခုနှစ်အတွင်း ဗီယက်နမ်၏ ကော်ဖီတင်ပို့မှုသည် အမေရိကန်ဒေါ်လာ ၄.၂ ဘီလီယံနီးပါး ရောက်ရှိ
၂၀၂၃ ခုနှစ်အတွင်း ဗီယက်နမ်အနေဖြင့် ပြည်ပသို့ ကော်ဖီတန်ချိန် ၁ ဒသမ ၆၁ သန်းတင်ပို့ခဲ့ပြီး ဝင်ငွေအမေရိကန်ဒေါ်လာ ၄ ဒသမ ၁၈ ဘီလီယံရရှိပြီး ပမာဏအားဖြင့် ၉ ဒသမ ၆ ရာခိုင်နှုန်း ကျဆင်းသွားသော် လည်း တန်ဖိုးအနေဖြင့် တစ်နှစ်ထက်တစ်နှစ် ၃ ဒသမ ၁ ရာခိုင်နှုန်း တိုးလာခဲ့ကြောင်း Vietnam plus အွန် လိုင်းသတင်းဖော်ပြချက်အရ သိရှိရပါသည်။
၂၀၂၃ ခုနှစ်တွင် ပျမ်းမျှကော်ဖီတင်ပို့မှု စျေးနှုန်းသည် တစ်တန်လျှင် အမေရိကန် ဒေါ်လာ ၂၈၃၄ ရှိပြီး ယခင်နှစ်ထက် ၁၄ ဒသမ ၁ ရာခိုင်နှုန်း တိုးလာကြောင်း၊ ဗီယက်နမ်၏ ကော်ဖီလုပ်ငန်းသည် Robusta ကော်ဖီစျေးနှုန်း မြင့်တက်မှုကြောင့် အကျိုးအမြတ်ရရှိခဲ့ခြင်းဖြစ်ကြောင်း၊ သိုလှောင်မှု နည်းပါးခြင်းနှင့် ရောင်းချရာတွင် ကန့်သတ်ချက်များကြောင့် ကမ္ဘာ့စျေးကွက်ရှိ Robusta ၏ စျေးနှုန်းသည် ၂၀၂၃ ခုနှစ်ကုန်တွင် ၂၈ နှစ်အတွင်း အမြင့်ဆုံးသို့ ရောက်ရှိခဲ့ကြောင်း ဖော်ပြထားသည်။
၂၀၂၄ ခုနှစ်အတွင်း Robusta ကော်ဖီစျေးနှုန်းသည် ရောင်းလိုအားပြတ်လပ်မှုများကြောင့် ဈေးနှုန်း ဆက်လက်မြင့်တက်နေမည်ဟု ခန့်မှန်းရပါသည်။ ဗီယက်နမ်ကော်ဖီနှင့် ကိုကိုးအသင်း (Vicofa) ၏ အဆိုအရ ဗီယက်နမ်၏ ကော်ဖီထုတ်လုပ်မှုသည် ၂၀၂၃-၂၀၂၄ ခုနှစ်တွင် တန်ချိန် ၁ ဒသမ ၆ မှ ၁ ဒသမ ၇ သန်းအထိ ကျဆင်းသွားမည်ဖြစ်ပြီး ၂၀၂၂-၂၀၂၃ ခုနှစ်ထက် တန်ချိန် ၁ ဒသမ ၇၈ သန်း လျော့ နည်းကြောင်း ဖော်ပြထားသည်။
ယခုနှစ်တွင် ဗီယက်နမ်နိုင်ငံအနေဖြင့် ကော်ဖီလုပ်ငန်း၏ ရေရှည်တည်တံ့ခိုင်မြဲမှုနှင့် ဖွံ့ဖြိုး တိုးတက်မှုကို မြှင့်တင်ရန်နှင့် ဥရောပသမဂ္ဂ သစ်တောပြုန်းတီးမှုဆိုင်ရာ စည်းမျဉ်းများကို အာရုံစိုက် ဆောင်ရွက်လျက်ရှိသည်။ ဗီယက်နမ်အနေဖြင့် အီးယူဈေးကွက်သို့ ဝင်ရောက်ရန်အတွက် အီးယူ၏ စည်းမျဉ်းလိုအပ်ချက်များနှင့် ကိုက်ညီအောင် ဆောင်ရွက်လျက်ရှိပြီး အဆိုပါ ကိစ္စရပ်များကို အာရုံ စိုက်ဆောင်ရွက်ခြင်းဖြင့် ကော်ဖီလုပ်ငန်း ရေရှည်တည်တံ့ခိုင်မြဲရေးနှင့် ကော်ဖီအဓိက တင်ပို့သူ အဖြစ် ဆက်လက်ထိန်းသိမ်းရန် ရည်ရွယ်ကြောင်း သုံးသပ်ရပါသည်။
Source : Vietnam +
ဝင့်နန္ဒာကျော်ကျော်၊