ရုရှား၏ ရေထွက်ကုန်တင်ပို့မှု ၁၃ ရာခိုင်နှုန်းနှင့် တင်သွင်းမှု ၁၀ ရာခိုင်နှုန်းတိုးတက်ခဲ့
၂၀၂၃ ခုနှစ်၊ ဇန်နဝါရီမှ နိုဝင်ဘာအထိ ၁၁ လတာကာလအတွင်း ရုရှားဖက်ဒရေးရှင်းနိုင်ငံ၏ ရေထွက်ကုန်များ တင်ပို့မှုမှာ ၂၀၂၂ ခုနှစ် အလားတူကာလနှင့် နှိုင်းယှဉ်ပါက ၁၃ ရာခိုင်နှုန်း တိုးမြှင့်လာပြီး ပမာဏတန်ချိန် ၂ ဒသမ ၁ သန်းအထိ ရောက်ရှိခဲ့ကြောင်း၊ တင်သွင်းမှုပမာဏမှာ တန်ချိန် ၅၄၇,ဝဝဝ ခန့်ရှိပြီး ယခင်နှစ် အလားတူ ကာလထက် ၁၀ ရာခိုင်းနှုန်း ပိုများခဲ့ကြောင်း ရုရှားငါးလုပ်ငန်း ဆိုင်ရာ ဖက်ဒရယ်အေဂျင်စီ (Russia’s Federal Agency for Fishery) က သတင်းထုတ်ပြန်ခဲ့သည်။
ရေထွက်ကုန်များအား ၁၁ လတာအတွက် ပြည်ပသို့ တန်ချိန် ၂ ဒသမ ၁ သန်းအထိ တင်ပို့နိုင်ခဲ့ပြီး တန်ဖိုးအားဖြင့် အမေရိကန်ဒေါ်လာ ၅ ဒသမ ၂ ဘီလီယံထိ ရောက်ရှိခဲ့ကြောင်း၊ ပြည်တွင်း စားသုံးသူများ ၏ အကျိုးစီးပွားကို မထိခိုက်စေဘဲ ပို့ကုန်များ တိုးလာခြင်းဖြစ်ပြီး ပြည်တွင်းဈေးကွက်သို့ ထောက်ပံ့ရေးမှာ ပကတိဦးစားပေးဖြစ်ကြောင်း ထုတ်ပြန်ချက်တွင် ဖော်ပြထားသည်။
ပြည်ပသို့ အဓိကတင်ပို့ခဲ့သည့် ရေထွက်ကုန်များမှာ အေးခဲထားသောငါးများ၊ ငါးအသားလွှာများနှင့် ပါးပါးလှီးဖြတ်ထားသော ငါးအသားများ၊ ပုစွန်များ၊ ခရုများနှင့် ရေနေသတ္တဝါများ ဖြစ်ပါသည်။
ယခုနှစ် ဇန်နဝါရီမှ နိုဝင်ဘာအထိ ရေထွက်ကုန်များ တင်သွင်းမှုပမာဏသည် တန်ချိန် ၅၄၇,ဝဝဝ ခန့်ရှိပြီး တန်ဖိုးအားဖြင့် အမေရိကန်ဒေါ်လာ ၂ ဒသမ ၄ ဘီလီယံထိ ရှိခဲ့ကြောင်း ဖော်ပြထားသည်။
၂၀၂၃ ခုနှစ်၊ ၁၀ လတာကာလအတွင်း ရုရှားနိုင်ငံသည် ရေထွက်ကုန်တန်ချိန် ၃ ဒသမ ၈ သန်း ထုတ်လုပ်နိုင်ခဲ့ပြီး ယင်းပမာဏသည် ယခင်နှစ် အလားတူကာလထက် ၁၀ ရာခိုင်နှုန်း ပိုမို ထုတ်လုပ်နိုင်ခြင်းဖြစ်ကြောင်း သိရှိရသည်။
ခွန်မျိုးသူ
Source : https://www.eastrussia.ru/news/eksport-rossiyskoy-rybnoy-produktsii- uvelichilsya-na-13/