အိန္ဒိယလယ်ယာထွက်ကုန်တင်ပို့မှု စက်တင်ဘာတွင် တန်ချိန် ၁၇.၉၃ သိန်း သာရှိခဲ့ပြီး ပို့ကုန်ကျဆင်းခဲ့

စိုက်ပျိုးရေးနှင့် စားသောက်ကုန်ပစ္စည်းများ တင်ပို့မှု ဖွံ့ဖြိုးတိုးတက်ရေး အာဏာပိုင်အဖွဲ့  (APEDA) ၏ အချက်အလက်များအရ အိန္ဒိယနိုင်ငံ၏ ဘာစမာတီဆန်အပါအဝင် လယ်ယာထွက် ကုန်တင်ပို့မှုမှာ ယခုနှစ် သြဂုတ်လ တင်ပို့နိုင်မှု တန်ချိန် ၂၇.၉၄ သိန်းနှင့် နှိုင်းယှဉ်ပါက စက်တင်ဘာလတွင် တန်ချိန် ၁၇ ဒသမ ၉၃ သိန်းသာ တင်ပို့နိုင်ခဲ့သဖြင့် တင်ပို့မှု ကျဆင်းခဲ့ကြောင်း၊ ဧပြီလနှင့် မေလတို့ တွင် လယ်ယာထွက်ကုန် တင်ပို့မှုမှာ ပျမ်းမျှတန်ချိန် ၃၃ သိန်းဝန်းကျင် ရှိခဲ့ကြောင်း၊ သို့ရာတွင် ဆန်ကွဲနှင့် ဘာစမာတီမဟုတ်သော ဆန်ဖြူအပါအဝင် ဆန်မျိုးစုံ တင်ပို့မှု အပေါ်ကန့်သတ်ချက်များ ကြောင့် လယ်ယာထွက်ကုန်များတင်ပို့မှုမှာ တန်ချိန် ၁၅ သိန်းနီးပါး ကျဆင်းခဲ့ကြောင်း သိရသည်။

လယ်ယာသုံးပစ္စည်းများ တင်ပို့မှုမှာ တန်ဖိုးအားဖြင့် ယခုဘဏ္ဍာနှစ် သြဂုတ်လတွင် ရူပီး ၁၈၁,၂၈၀ သန်း ရရှိခဲ့ရာမှ စက်တင်ဘာလ အတွင်း ရူပီး ၁၄,၁၅၃၀ သန်းအထိ ကျဆင်းခဲ့ကြောင်း၊ စက်တင်ဘာလအတွင်း တင်ပို့မှုအများစုမှာ ဘာစမာတီမဟုတ်သော ဆန်ဖြူ တန်ချိန် ၄ ဒသမ ၂၅ သိန်း၊ ဘာစမာတီဆန် တန်ချိန် ၁ ဒသမ ၂၁ သိန်း၊ ကြက်သွန်နီ တန်ချိန် ၁ ဒသမ ၅၁ သိန်းနှင့် ကျွဲသား တန်ချိန် ၁ ဒသမ ၂ သိန်းကျော် ရှိကြောင်း စာရင်းများအရ သိရသည်။

အိန္ဒိယနိုင်ငံ၏ ၂၀၂၃-၂၀၂၄ ဘဏ္ဍာနှစ်၊ ဧပြီလမှ စက်တင်ဘာအထိ လယ်ယာထွက်ကုန် ပစ္စည်း စုစုပေါင်းတင်ပို့မှုမှာ တန်ချိန် ၁၇၂ ဒသမ ၂၇ သိန်းရှိပြီး  ပြည်တွင်း စားနပ်ရိက္ခာဖူလုံမှု ရှိစေရန်နှင့် စားသောက်ကုန်ဈေးနှုန်းတည်ငြိမ်မှုရှိစေရန်အတွက် ဘာစမာတီဆန်ကို အနိမ့်ဆုံး ပို့ကုန်ဈေးနှုန်း သတ်မှတ်ခြင်းနှင့် ဘာစမာတီမဟုတ်သည့် ဆန်ဖြူ အမျိုးအစားများအား တင်ပို့မှု ကန့်သတ်ပိတ်ပင်မှုတို့ကြောင့် ယခုနှစ်တွင် လယ်ယာထွက်ကုန်ပစ္စည်းအချို့ တင်ပို့မှုမှာ ထိခိုက်မှုများရှိခဲ့ကြောင်း တွေ့ရှိရသည်။ 
 

မျိုးမြင့်မောင်
Source: Agri-commodities exports decline to 17.93 Lakh tonnes in Sept: APEDA, The Economic Times,