အင်ဒိုနီးရှားနိုင်ငံမှ စားအုန်းဆီကြမ်းတင်ပို့မှုတွင် ဥရောပနိုင်ငံများသို့ အများဆုံးဖြစ်ကြောင်း အင်ဒိုနီးရှားစားအုန်းဆီအသင်း (The Indonesia Palm Oil Association – GAPKI) က ထုတ်ပြန်
အင်ဒိုနီးရှားနိုင်ငံ၏ စားအုန်းဆီကြမ်းတင်ပို့မှုမှာ ၂၀၂၄ ခုနှစ်၊ ဇန်နဝါရီလအထိ တန်ချိန် ၂.၈၀၂ သန်းဖြစ်ပြီး ၂၀၂၃ ခုနှစ်၊ ဒီဇင်ဘာလအထိ တင်ပို့မှုထက် ၁၄.၆၃ ရာခိုင်နှုန်း တိုးတက်ခဲ့ ကြောင်း အင်ဒိုနီးရှား စားအုန်းဆီအသင်း (The Indonesia Palm Oil Association – GAPKI) က သတင်းထုတ်ပြန်ခဲ့ပါသည်။
GAPKI ၏ အမှုဆောင်ဒါရိုက်တာဖြစ်သူ Mukti Sardjono က စားအုန်းဆီကြမ်းတင်ပို့မှုသည် ၂၀၂၃ ခုနှစ်၊ ဒီဇင်ဘာလအထိ တန်ချိန် ၂.၄၅၁ သန်းတင်ပို့နိုင်ခဲ့ရာမှ ၂၀၂၄ ခုနှစ်၊ ဇန်နဝါရီလ အထိ တန်ချိန် ၂.၈၀၂ သန်း၊ ရာခိုင်နှုန်းအားဖြင့် ၁၄.၆၃ ရာခိုင်နှုန်းတိုးတက်ခဲ့ကြောင်း၊ ဥရောပနိုင်ငံများသို့ အများဆုံးတင်ပို့နိုင်ခဲ့ခြင်းဖြစ်ပြီး ၂၀၂၃ ခုနှစ်၊ ဒီဇင်ဘာလတွင် ၁၈၀,၀၀၀ တန် တင်ပို့နိုင်ခဲ့ရာမှ ၂၀၂၄ ခုနှစ်၊ ဇန်နဝါရီလတွင် ၃၆၈,၀၀၀ တန် တင်ပို့နိုင်ခဲ့ကြောင်း၊ ဒုတိယအများဆုံးတင်ပို့မှုအနေ ဖြင့် ပါကစ္စတန်နိုင်ငံသို့ တင်ပို့မှုဖြစ်ပြီး ၂၀၂၄ ခုနှစ်၊ ဇန်နဝါရီလတွင် ၂၈၄,၀၀၀ တန် တင်ပို့နိုင်ခဲ့ ကြောင်း၊ ထို့ပြင် အာဖရိကသို့ တင်ပို့မှုမှာ ၂၀၂၃ ခုနှစ်၊ ဒီဇင်ဘာလတွင် ၂၄၀,၀၀၀ တန်မှ ၂၀၂၄ ခု နှစ်၊ ဇန်နဝါရီလတွင် ၃၄၇,၀၀၀ တန် တိုးတက်တင်ပို့နိုင်ခဲ့ကြောင်း၊ အိန္ဒိယနိုင်ငံသို့ ၅၂၇,၀၀၀ တန် တင်ပို့နိုင်ခဲ့ကြောင်း ပြောကြားခဲ့ပါသည်။
၎င်းက ကမ္ဘာ့အကြီးဆုံးဟင်းသီးဟင်းရွက်ဆီတင်သွင်းသည့် နိုင်ငံဖြစ်သည့် တရုတ်နိုင်ငံသည် အင်ဒိုနီးရှားနိုင်ငံမှ စားအုန်းဆီတင်သွင်းမှုမှာ ဇန်နဝါရီလတွင် လျော့ကျခဲ့ကြောင်း၊ ၂၀၂၃ ခုနှစ်၊ ဒီဇင်ဘာလတွင် တရုတ်နိုင်ငံသို့ စားအုန်းဆီကြမ်းတင်ပို့မှုမှာ ၅၆၉,၀၀၀ တန်ဖြစ်ပြီး ၂၀၂၄ ခုနှစ်၊ ဇန်နဝါရီလတွင် ၃၇၅,၀၀၀ တန်သာ တင်ပို့နိုင်ခဲ့ကြောင်း ပြောကြားခဲ့ပါသည်။
ပို့ကုန်ပမာဏအနေဖြင့် ၂၀၂၃ ခုနှစ်၊ ဒီဇင်ဘာလတွင် အမေရိကန်ဒေါ်လာ ၂.၀၈၂ ဘီလီယံ အထိရောက်ရှိခဲ့ရာမှ ၂၀၂၄ ခုနှစ်၊ ဇန်နဝါရီလတွင် အမေရိကန်ဒေါ်လာ ၂.၃၀၄ ဘီလီယံအထိ ရရှိခဲ့ ကြောင်း၊ ပို့ကုန်ပမာဏတန်ဖိုး တိုးတက်ခဲ့ခြင်းမှာ စားအုန်းဆီကြမ်း တစ်တန်လျှင် အမေရိကန် ဒေါ်လာ ၉၄၄ ရရှိခဲ့ရာမှ ၉၅၈ ရရှိခဲ့ခြင်းကြောင့်ဖြစ်ကြောင်း၊ ဇန်နဝါရီလတွင် စားအုန်းဆီကြမ်း ကနဦး ၃၁၄,၆၀၀ တန် သိုလှောင်ထားရှိပြီး စားအုန်းဆီကြမ်းထုတ်လုပ်မှုမှာ ၄၆၃,၄၀၀ တန်၊ ပြည်တွင်းသုံးစွဲမှု ၁၉၄,၂၀၀ တန်၊ တင်ပို့မှု ၂၈၀,၂၀၀ တန်နှင့် ဇန်နဝါရီလကုန်တွင် သိုလှောင်ထားမှု မှာ ၃၀၄,၀၀၀ တန်ခန့်ရှိကြောင်း၊ စားအုန်းဆီကြမ်းထုတ်လုပ်မှုမှာ ၂၀၂၃ ခုနှစ်၊ ဒီဇင်ဘာလထက် ၅.၉၁ ရာခိုင်နှုန်းတိုးတက်ခဲ့ကြောင်း၊ သို့သော် ပြည်တွင်းစားသုံးမှု သည် ဒီဇင်ဘာလနှင့်နှိုင်းယှဉ်ပါက ကျဆင်းခဲ့ပြီး ၂၀၂၃ ခုနှစ်၊ ဒီဇင်ဘာလတွင် စားသုံးမှု ၁၉၉,၅၀၀ တန်ရှိခဲ့ရာမှ ဇန်နဝါရီလတွင် ၁၉၄,၂၀၀ တန်သာ ရှိခဲ့ကြောင်း၊ ပြည်တွင်းစားသုံးမှု ကျဆင်းရာတွင် အစားအသောက်၊ oleo chemical နှင့် ဇီဝဒီဇယ်တို့တွင် သုံးစွဲမှုကျဆင်းခဲ့ခြင်း ဖြစ်ကြောင်း Mukti Sardjono က ပြောကြားခဲ့ပါသည်။
သွယ်သွယ်ဆုတင်၊ စီးပွားရေးသံမှူး
စင်္ကာပူ
ရင်းမြစ်။ အင်ဒိုနီးရှားဆီအုန်းအသင်း (The Indonesia Palm Oil Association – GAPKI)